வாழைச்சேனையில் சிறிலங்கா காவல்துறையினர் மீது கிளைமோர் தாக்குதல்: 1 அதிகாரி உட்பட மூவர் பலி

[Wednesday February 21 2007 02:33:41 PM GMT] [யாழ் வாணன்]

மட்டக்களப்பு வாழைச்சேனையில் சிறிலங்கா காவல்துறையினர் மீது நடத்தப்பட்ட கிளைமோர் தாக்குதலில் காவல்துறை அதிகாரி உட்பட மூவர் கொல்லப்பட்டுள்ளனர்.

வாழைச்சேனை ஓட்டமாவடியில் இன்று புதன்கிழமை மாலை 5 மணியளவில் இத்தாக்குதல் நடத்தப்பட்டுள்ளது.

காவல்துறை இன்ஸ்பெக்டர் உட்பட இரு காவல்துறையினர் கொல்லப்பட்டுள்ளதுடன் காவல்துறையினர் மற்றும் இராணுவத்தினர் உட்பட 16 பேர் காயமடைந்துள்ளனர்.

இதனிடையே யாழ். பலாலி வீதி இலுப்பையடிச் சந்தியில் சிறிலங்கா இராணுவத்தினரின் இராணுவ ட்றக் மீது கிளைமோர் தாக்குதல் நடத்தப்பட்டுள்ளது.

இத்தாக்குதலில் ஏற்பட்ட இழப்பு விவரம் இதுவரை வெளியாகவில்லை.

Tamilwin

வாழைச்சேனையில் குண்டுவெடிப்பு: காவல்துறை இன்ஸ்பெக்டர் உட்பட மூவர் பலி- 14 பேர் படுகாயம்

மட்டக்களப்பு மாவட்டம் வாழைச்சேனை ஓட்டமாவடியில் உந்துருளி குண்டுவெடிப்பில் சிறிலங்கா காவல்துறை அதிகாரியும் 2 பொதுமக்களும் கொல்லப்பட்டுள்ளதுடன் 5 காவல்துறையினர் உட்பட 14 பேர் படுகாயமடைந்துள்ளனர்.

திருகோணமலை பிரதான வீதியில் உள்ள ஓட்டமாவடியில் இன்று புதன்கிழமை மாலை 5 மணியளவில் இச்சம்பவம் இடம்பெற்றுள்ளது.

காவல் கடமையிலிருந்த காவல்துறையினரை மாற்றுவதற்காக காவல்துறை வாகனத்தில் சென்று கொண்டிருந்த காவல்துறையினரை இலக்கு வைத்து தாக்குதல் நடத்தப்பட்டதாக வாழைச்சேனை சிறிலங்கா காவல்துறையினர் தெரிவித்துள்ளனர்.

இன்ஸ்பெக்டர் கருணாரட்ன (வயது 39), பிரந்துறைச்சேனையைச் சேர்ந்த மீரா லெப்பை அகமட் உசனார், குழந்தையொன்றின் தந்தையான வாழைச்சேனையைச் சேர்ந்த அலி கிலீல் ரகுமான் (வயது 32) ஆகியோரே கொல்லப்பட்டவர்கள் ஆவர்.

இச்சம்பவத்தில் காயமடைந்த பொதுமக்கள் வாழைச்சேனை மருத்துவமனையிலும் 5 காவல்துறையினர் பொலநறுவை மருத்துவமனையிலும் அனுமதிக்கப்பட்டுள்ளனர்.

வாழைச்சேனை இன்ஸ்பெக்டர் உள்ளிட்ட காவல்துறைக் குழுவினர், மாலை 4.30 மணியளவில் காவல் நிலையத்திலிருந்து ஒட்டமாவடிக்கு புறப்பட்டதாகவும் மாற்றப்பட்ட காவல்துறையினருடன் பின்னர் திரும்பி வரும் வழியில் தாக்குதல் இடம்பெற்றதாக தெரிவிக்கப்படுகின்றது

-புதினம்