வடக்கு கிழக்கு மாகாணங்களில் போராட்டங்களில் ஈடுபட்ட வேலையில்லாப் பட்டதாரிகளுக்கு நியமனங்களை பெற்றுக் கொடுக்க வடக்கு முதலமைச்சரால் கூட முடியாமல் போய்விட்டது என மத்திய மாகாண தமிழ் கல்வி அமைச்சர் எம்.ரமேஸ்வரன் தெரிவித்துள்ளார்.

ஆனால், மத்திய மாகாணத்தில் எந்த வித போராட்டங்களுமின்றி  742 பட்டதாரிகளுக்கு நியமனம் வழங்கப்பட்டதாகவும் அவர் குறிப்பிட்டுள்ளார்.

நுவரெலியா - கொட்டகலை கேம்பிரிட்ஜ் கல்லூரியில் இடம்பெற்ற இந்து விழி கணித பாட பயிற்சிக் கையேடு வெளியீட்டு விழாவில் கலந்துக் கொண்டு உரையாற்றிய போதே அமைச்சர் எம்.ரமேஸ்வரன் இதனை தெரிவித்துள்ளார்.

2000த்திற்கும் அதிகமான பட்டதாரிகளுக்கு நியமனம் வழங்க சந்தர்ப்பம் இருந்த போதிலும் 742 பட்டதாரிகளே விண்ணப்பித்திருந்ததாக அவர் குறிப்பிட்டுள்ளார்.

எனினும், நியமனங்களை பெற்றுக் கொண்ட ஆசிரியர்கள் சிலர் பாடசாலைக்கு சமூகம் தரவில்லை  என்பது கவலைக்குரிய விடயம் எனவும் தெரிவித்துள்ளார்.

அத்துடன், வடக்கு கிழக்கு மாகாணங்களில் நியமனங்களுக்காக போராட்டங்களில் ஈடுபட்டு வரும் பட்டதாரிகளுக்கு 5 வருட ஒப்பந்த அடிப்படையில் மத்திய மாகாணத்தில் நியமனம் வழங்க நடவடிக்கைகள் எடுக்கப்பட்டு வருவதாகவும் அமைச்சர் எம்.ரமேஸ்வரன் கூறியுள்ளார்.