கடந்த சில மணி நேரங்களில் நடந்துள்ள உலகச் செய்திகளை ஓரிரு வரிகளில் தொகுத்தளிக்கிறோம்.

அதிபர் பதவியில் தொடர்வேன்: முகாபே

ஜிம்பாப்வே அதிபர் ராபர்ட் முகாபே, பதவி விலக வேண்டும் என வலுத்துவரும் கோரிக்கையை நிராகரித்துள்ளார். அடுத்த சில வாரங்களுக்கு தொடர்ந்து பதவியில் இருப்பேன் என்று அவர் தெரிவித்துள்ளார்.

தொலைக்காட்சி நேரலையில் பேசிய அதிபர் முகாபே, டிசம்பர் மாதம் நடக்கவுள்ள நாடாளுமன்ற கூட்டத்தை தலைமையேற்று நடத்துவேன் என்று தெரிவித்துள்ளார்.

அவரின் ஸானு- பி.எஃப் கட்சி, அவரை கட்சித்தலைவர் பதவியிலிருந்து நீக்கியதோடு, அதிபர் பதவியிலிருந்து விலக 24 மணிநேரத்திற்கு குறைவான கெடு அளித்திருந்தது.

ஜெர்மனி: கூட்டணி பேச்சுவார்த்தை தோல்வி

மூன்று கட்சிகளை கொண்ட கூட்டணி அரசை உருவாக்க நடத்தப்பட்ட பேச்சுவார்த்தை தோல்வியடைந்தது.

அந்நாட்டின் எஃப்.டி.பி கட்சி இந்த பேச்சுவார்த்தையிலிருந்து விலகிக்கொண்டது.

இந்த பேச்சுவார்த்தையில், எஃப்.டி.பி கட்சி மீண்டும் இணையவில்லை என்றால், ஏஞ்சலா மெர்கல் ஒரு சிறுபான்மை கூட்டணி அரசை அமைக்க வேண்டும் அல்லது புதிய தேர்தலை நடத்த வேண்டும்.

செப்டம்பர் மாதம் நடந்த வாக்குப்பதிவில் அவரின் கட்சி வெற்றிபெற்றது. ஆனால், பல வாக்காளர்கள் முக்கிய கட்சிகளுக்கு முழுமையாக வாக்களிக்கவில்லை.

அர்ஜெண்டீனா: மோசான வானிலையால், நீர்மூழ்கியை தேடும் பணியில் தொய்வு

44 பேருடன் காணாமல் போன, ஏ.ஆர்.ஏ சன் ஜுவான் என்ற அர்ஜண்டீனாவின் கடற்படை நீர்மூழ்கியை தேடும் பணி, மோசமான வானிலை காரணமாக தடுக்கப்படுவதாக அதிகாரிகள் தெரிவித்துள்ளனர்.

புதன்கிழமை காணாமல் போன இந்த நீர்மூழ்கியை கண்டுபிடிக்க பல நாடுகளில் உள்ள குழுக்களும், தெற்கு அட்லாண்டிக்கில், தங்களின் தேடுதல் வேட்டையை தொடங்கியுள்ளனர்.

நீர்முழ்கியை கண்டறியும் சிறப்பு கருவி மற்றும் ஆழ்கடலில் மீட்பு பணிக்கான கருவிகளுடன், அமெரிக்க கடற்படை இரண்டாவது கப்பலை அனுப்பியுள்ளது.

மொரக்கோ: நெரிசலில் சிக்கி 15 பேர் பலி

உணவுகள் வழங்கப்பட்ட நிகழ்வின் போது ஏற்பட்ட கூட்ட நெரிசலில் சிக்கி, மொரக்கோவில் குறைந்தது 15 பேர் கொல்லப்பட்டுள்ளனர்.

இசௌரியா மாகாணத்தில் உள்ள சிதி பௌலாலம் என்ற பகுதியில், தனியார் தொண்டு நிறுவனத்தால் உணவு வழங்கப்பட்ட போது இந்த சம்பவம் நடந்துள்ளது.

சில அறிவிப்புகள், இந்த நெரிசல் சம்பவத்தில் 40 பேர் வரை காயமடைந்திருக்கலாம் என தெரிவிக்கின்றன.

பெண்களும், வயதானவர்களுமே இந்த சம்பவத்தில் பெரும்பாலும் இறந்துள்ளனர் என உள்ளூர் ஊடகம் தெரிவிக்கிறது.

இஸ்ரேல்: வீரரின் மன்னிப்பு கோரிக்கையை நிராகரித்தார் அதிபர்

காயமுற்றிருந்த பாலஸ்தீனிய தாக்குதல்தாரியை, கொன்ற வழக்கில் 18 மாதங்கள் சிறைதண்டனை பெற்ற எலோர் அசாரியாவின் மன்னிப்பு கோரிக்கையை இஸ்ரேல் அதிபர் ருவன் ரூவிலின் நிராகரித்துள்ளார்.

ஹெப்ரூனில் உள்ள, கட்டுபாட்டிற்குள் கொண்டுவரப்பட்டிருந்த மேற்குகரை பகுதியில், 21 வயதான அப்துல் ஃபத்தா அல்-ஷரீஃப் என்பவரை, அசாரியா கொன்றதாக, அவர் மீது குற்றம் நிரூபிக்கப்பட்டது.

ஜனவரி மாதம், அந்த வீரருக்கு மன்னிப்பு அளிப்பதற்காக, அந்நாட்டு பிரதமர் பெஞ்சமீன் நெதன்யாகு அழைப்பு விடுத்திருந்தார்.

இதற்கான முறையான வேண்டுகோளை அசாரியா கடந்த மாதம் வைத்தார்.