இஸ்லாமிய விரோத மனப்பான்மை கொண்ட சிறு கும்பல் வீட்டில் செய்யப்பட்ட தூக்குமேடையைச் சக்கரம் கட்டி இழுத்து வந்து, லண்டனின் முதல் இஸ்லாமிய மேயரைக் கைது செய்வதாக நடத்திய நாடகம் மக்களிடையே சிரிப்பலையை ஏற்படுத்தியுள்ளது.

இது தொடர்பாக வாஷிங்டன் போஸ்ட்டில் வெளியான செய்தி வருமாறு:

லண்டன் மேயர் சாதிக் கான் சனிக்கிழமையன்று அங்கு உரை நிகழ்த்தவிருந்த போது இந்தச் சம்பவம் நடந்தது. எந்த போலீசாரால் புடைசூழ இவர்கள் உரை நிகழ்த்து ஹாலுக்கு வந்தனரோ அதே போலீஸார் இந்த இஸ்லாமிய விரோத கும்பலை வெளியே அனுப்பி வைத்தனர். இதனால் லண்டன் மேயர் உரை 15 நிமிடங்கள் தாமதமானது.

லண்டன் மேயரை துரோகி, ஏமாற்றுக்காரர் என்றெல்லாம் வசைபாடியதொடு அதிபர் ட்ரம்ப்பை மரியாதைக் குறைவாக மேயர் பேசியதாக சாடினர். லண்டன் பயங்கரவாதத் தாக்குதலை அடுத்து அதிபர் ட்ரம்ப், இந்த முஸ்லிம் மேயரைக் குறிப்பிட்டு, “பரிதாபம்” என்று கூறியது நினைவுகூரத்தக்கது.

இந்நிலையில் லண்டன் மேயர் கான் உரை நிகழ்த்த தயாரான போது டேவி ரஸல் என்ற நபர் இவருடன் வந்த 6-7 பேர், வீட்டில் செய்யப்பட்ட தூக்கு மேடையை சக்கரத்தில் கட்டி இழுத்து வந்து மேயரைக் கைது செய்ய வேண்டும் என்று கோஷமெழுப்பினர்.

இவர் தீவிர வலது சாரி இயக்கத்தைச் சேர்ந்தவர், இஸ்லாமிய விரோத வானொலி நிகழ்ச்சியையும் இவர் நடத்தியுள்ளார். மேயர், பயங்கரவாதிகளை ஆதரிக்கிறார், இவருக்கு ட்ரம்ப்பை விமர்சிக்க உரிமையில்லை என்று டேவி ரஸல் கூறினார். நாங்கள் இவரைக் கைது செய்யப்போகிறோம் என்று மைக்கில் டேவி ரஸல் அறிவித்ததற்கு ஒரு கிளாஸ் தண்ணீர் அருந்தி விட்டு மேயர் இருக்கையில் அமர்ந்து அமைதி காத்தார்.

நாடாளுமன்ற உறுப்பினர் கேட் கிரீன், ‘இந்த நபரை வெளியேற்ற முடியுமா?’ என்றார். அப்போது காவலர் ரஸலை நோக்கிச் செல்ல, அவர் எங்கள் மீது கைவைத்தால் பிரச்சினையாகி விடும் என்று எச்சரித்தார். ஆனால் காவலர் அசரவில்லை. நான் கட்டணம் செலுத்தி வந்துள்ளேன் என் மீது கை வைக்காதே என்று மீண்டும் ரஸல் கத்தினார். வெளியே செல்லும் வரை டேவி ரஸல் கத்தியபடியே சென்றிருக்கிறார், அதன் பிறகு லண்டன் மேயர் பேசிய போது மக்கள் சிரிப்பலையில் ஆழ்ந்தனர்.