இரு கள­மு­னை­க­ளி­லும்  போரா­டி­யே­யாக வேண்­டும்

வடக்கு – கிழக்கு அபி­வி­ருத்தி தொடர்­பான அரச தலை­வர் செய­ல­ணி­யின் கூட்­டத்­தில் தமி­ழர் தரப்பு பற்­கேற்­பதா இல்­லையா என்­கிற விவா­தம் தொடங்­கி­யுள்­ளது. இது வெறும் விவா­த­மாக மட்­டுமே இருந்­தி­ருந்­தால், அது பற்றி மக்­க­ளும் பெரி­தாக அலட்­டிக்­கொண்­டி­ருக்­கப்­போ­வ­தில்லை.

ஆனால், தமிழ்த் தேசி­யக் கூட்­ட­மைப்­பி­ன­ருக்­கும் வடக்கு மாகாண முத­ல­மைச்­சர் சி.வி.விக்­னேஸ்­வ­ர­னுக்­கும் இடை­யி­லான முரண்­பாட்­டின் நீட்­சி­யாக இந்த விவ­கா­ர­மும் எழுந்­துள்­ள­தால், அதன் மீது மக்­க­ளின் கவ­னம் குவிக்­கப்­ப­டு­வ­தும் தவிர்க்க முடி­யா­த­து­தான்.

இந்­தச் செய­ல­ணி­யில் வடக்­குத் தமி­ழர் தரப்­பில் ,அரச சார்பு இல்­லா­த­வர்­க­ளில் முத­லில் உள்­வாங்­கப்­பட்­டி­ருந்­த­வர் வடக்கு மாகாண முத­ல­மைச்­சர்­தான். ஆனால், அந்­தக் கூட்­டத்­திற்­குத் தான் வரப்­போ­வ­தில்லை என்று அரச தலை­வர் மைத்­தி­ரி­பால சிறி­சே­ன­வுக்கு அவர் கடி­தம் எழு­தி­யி­ருந்­தார். பொரு­ளா­தார நன்­மை­க­ளுக்கு முன்­ன­தாக அர­சி­யல் தீர்வே முக்­கி­யம் என்­றும் அவர் அந்­தக் கடி­தத்­தில் தெரி­வித்­தி­ருந்­தார்.

இந்­தக் கடி­தத்தை அவர் எழு­தி­ய­தற்­குப் பிற்­பாடு, செய­ல­ணி­யின் முத­லா­வது கூட்­டம் நடை­பெ­ற­வி­ருந்த நிலை­யில், கூட்­டம் நடக்­கும் திக­திக்கு சில நாள்­க­ளுக்கு முன்­பா­கத் தானும் அந்­தக் கூட்­டத்­தில் கலந்­து­கொள்­வார் என்­றும், முத­லா­வது கூட்­டம் என்­ப­தால் அதில் கலந்­து­கொண்டு அபி­வி­ருத்தி தொடர்­பி­லான வடக்கு மாகா­ணத்­தின் எதிர்­பார்ப்பை ஆணித்­த­ர­மாக முன்­வைத்­து­விட்­டு பின்­னர் தான் ஒதுங்­கிக் கொள்­வார் என்­றும் மாகாண அரச அதி­கா­ரி­க­ளி­டம் அவர் தெரி­வித்­தி­ருந்­தார்.

இதை­ய­டுத்து, அவர் கூட்­டத்­தில் கலந்­து­கொள்­வ­தற்­கான ஏற்­பா­டு­களை அரச தலை­வர் மேற்­கொண்­டி­ருந்­தார். ஆனால் கூட்­டம் நடை­பெ­று­வ­தற்கு இரண்டு நாள்­க­ளுக்கு முன்­ன­தா­கத் தனது முடிவை மாற்­றிக்­கொண்ட முத­ல­மைச்­சர் , தான் கூட்­டத்­தில் கலந்­து­கொள்­ளப்­போ­வ­தில்லை என்று மீண்­டும் அறி­வித்­தார்.

அது­போன்றே, அவர் அந்­தக் கூட்­டத்­தில் கலந்­து­கொள்­ள­வு­மில்லை. அவர் கலந்­து­கொள்­ளாத நிலை­யில் வடக்கு, கிழக்­கில் உள்ள தமிழ்த் தேசி­யக் கூட்­ட­மைப்­பின் நாடா­ளு­மன்ற உறுப்­பி­னர்­க­ளுக்கு அழைப்பு விடுக்­கா­தமை குறித்து தனது அதி­கா­ரி­க­ளைக் கடிந்­து­கொண்­டார் அரச தலை­வர். இதைத் தொடர்ந்து செய­ல­ணி­யின் இரண்­டா­வது கூட்­டத்தில் நாடா­ளு­மன்ற உறுப்­பி­னர்­க­ளைக் கலந்­து­கொள்­ளு­மாறு அழைப்பு விடுக்­கப்­பட்­டுள்ளது.

தான் பங்­கேற்­காத நிலை­யில், நாடா­ளு­மன்ற உறுப்­பி­னர்­கள் அந்­தக் கூட்­டத்­தில் பங்­கேற்­கப் போகி­றார்­கள் என்­ப­தைத் தெரிந்­து­கொண்ட முத­ல­மைச்­சர், அத­னைத் தடுத்து நிறுத்த கூட்­ட­மைப்­பின் தலை­வர் இரா.சம்­பந்­த­னுக்கு ஒரு கடி­தம் எழு­தி­னார். அதில் அர­சி­யல் தீர்வு ஒன்­றைக் காண்­ப­தற்கு முன்­பா­கப் பொரு­ளா­தார நலனை நோக்­கிச் செல்­வது சரி என்று நீங்­கள் முடிவு செய்­தால், நாடா­ளு­மன்ற உறுப்­பி­னர்­கள் இந்­தக் கூட்­டத்­தில் கலந்­து­கொள்­ள­லாம் என்று தனது கடி­தத்­தில் தெரி­வித்­தி­ருந்­தார். அந்­தக் கடி­தத்தை அவரே ஊட­கங்­க­ளுக்­குப் பகி­ரங்­கப்­ப­டுத்­தி­யும் இருந்­தார்.

அவ­ரது கோரிக்­கைக்கு மாறாக, அதனை நிரா­க­ரிக்­கும் வகை­யில் செய­ல­ணி­யின் கூட்­டத்­தில் கலந்­து­கொள்­ள­வேண்­டும் என்று கூட்­ட­மைப்­பின் பங்­கா­ளிக் கட்­சி­கள் அனைத்­தும் ஒரு­ம­ன­தாக முடிவு செய்­துள்­ளன. இது சரியா? பிழையா? அர­சி­யல் தீர்வு ஒன்று எட்­டப்­ப­டு­வ­தற்கு முன்­பா­கப் பொரு­ளா­தார நல­னைத் தமி­ழர்­கள் பெற்­றுக்­கொள்­ள­லாமா, இல்­லையா, என்­கிற வாதத்தை முத­ல­மைச்­ச­ரின் கடி­தம் கிளப்­பி­யுள்­ளது.

தீர்­வுக்கு முன்­பா­கப் பொரு­ளா­தார நலன்­களை அரசு வழங்­கு­வ­தன் நோக்­கம், தனது அர­சி­யல் செல்­வாக்­கைத் தமிழ் மக்­கள் மத்­தி­யில் விரி­வாக்­கிக்­கொள்­வதே என்­கிற சந்­தே­கமே அத்­த­கைய முயற்­சி­க­ளைப் புறக்­க­ணிக்­கும்­படி முத­ல­மைச்­சர் கோரு­வ­தற்­கான கார­ணங்­க­ளில் ஒன்று. பொரு­ளா­தார நலன்­களை வழங்கி அர­சி­யல் வேண­வா­வில் இருந்து தமி­ழர்­களை வில­கச் செய்­து­வி­டு­வார்­கள் என்­பதே அதன் அடிப்­ப­டை­யில் உள்ள அச்­சம்.

இந்த அச்­சம் நியா­ய­மா­னது தான் என்­கி­ற­போ­திலும், தமி­ழர்­கள் பங்­கேற்­றா­லும் இல்­லா­விட்­டா­லும் இந்­தத் திட்­டத்தை அரசு செயற்­ப­டுத்­தத்­தான் போகி­றது. கடந்த 30 ஆண்­டு­க­ளா­கப் பொரு­ளா­தார ரீதி­யில் வடக்கு, கிழக்கை கொழும்பு ஆட்­சி­கள் புறக்­க­ணித்து வரு­கின்­றன என்று குற்­றஞ்­சாட்டி வரும் தமி­ழர்­கள், அர­சின் செயலை கண்­டிக்­கவோ மறுக்­கவோ அடிப்­ப­டைத் தர்க்க நியா­யம் இல்­லா­த­வர்­கள். எனவே தமி­ழர்­கள் பங்­கேற்­காத நிலை ­யில் அரசு தனக்­கேற்ற வடி­வத்­தில் இந்­தத் திட்­டங்­களை முன்­னெ­டுத்­துச் செல்­லவே போகின்­றது. அத­னைக் கட்­டுப்­ப­டுத்­து­ வ­தற்கு தமி­ழர் தரப்பும் இந்தச் செயற்றிட்டத்தில் பங்காளியாக இருப்பது அவசியம்.

விரும்­பியோ விரும்­பா­மலோ பொரு­ளா­தார அர­சி­யல் களத்­தைக் கொழும்பு திறக்­கின்­ற­போது , அதில் நின்று கள­மாட முடி­யாது என்ற சொல்ல முடி­யாது. அதி­கார அர­சி­யல் களத்­தி­லும், பொரு­ளா­தார அர­சி­யல் களத்­தி­லும் என்று இரு முனை­க­ளி­லும் கள­மா­ட­வேண்­டி­யது தமி­ழர் தரப்­பின் முன்­னுள்ள நிர்ப்­பந்­தம். அதனை வெற்­றி­க­ர­மாக எதிர்­கொள்­வ­தன் மூலமே அதி­கார அர­சி­யல் களத்­தி­லும் காத்­தி­ர­மான வெற்­றி­யைத் தமி­ழர் தரப்­புப் பதிவு செய்­ய­மு­டி­யும்.