மட்டக்களப்பு அகதி முகாம்களில் வேகமாக பரவும் தொற்றுநோய்கள்

மட்டக்களப்பில் அகதி முகாம்களில் வேகமாகப் பரவி வரும் தொற்று நோய்களால் ஆயிரக்கணக்கான மக்கள் மிக மோசமாகப் பாதிக்கப்பட்டுள்ளனர்.

அதிகளவு மக்கள் குறிப்பிட்டதொரு நிலப் பகுதியில் மிக நெருக்கமாகத் தங்கியிருக்கும் சூழ்நிலையிலும் முழுமையான சுகாதாரச் சீர்கேடுகள் ஏற்பட்டுள்ள நிலையில், தொற்று நோய்கள் வேகமாகப் பரவி வருகின்றன.

அண்மையில் தொடர்ச்சியாகப் பெய்த கடும் மழையாலும் அகதி முகாம்களைச் சூழ்ந்து வெள்ளம் தேங்கி நிற்பதாலும் தொற்று நோய் பரவும் வேகம் அதிகரித்துள்ளது.

பொக்களிப்பான், கண்நோய், வயிற்றோட்டம், வாந்திபேதி மற்றும் தோல் நோய்களும் பரவத் தொடங்கியுள்ளன.

அகதிகள் நெருக்கமாகத் தங்கியுள்ள இடங்களில் மலசலகூட வசதியின்மையாலும் கடும் மழையால் முகாம்களைச் சுற்றி வெள்ளம் தேங்கி நிற்பதாலும் மிக மோசமான சுகாதாரச் சீர்கேடும் ஏற்பட்டுள்ளது.

இதைவிட, ஆயிரக்கணக்கில் அகதிகள் தங்கியுள்ள பகுதிகளில் மிக மோசமாக துர்நாற்றம் வீசுவதாக மக்கள் தொடர்ந்தும் கூறிவருகின்றபோதும் இது குறித்து சுகாதாரப் பகுதியினரோ, அரச அதிகாரிகளோ அக்கறை காட்டுவதாயில்லை.

சுமார் ஐந்நூறு குடும்பங்களுக்கு மூன்று தற்காலிக மலசலகூடங்கள் ஒதுக்கப்பட்டுள்ள நிலையிலும் அடிப்படை சுகாதாரம் குறித்து மக்களுக்கு எதுவித அறிவுறுத்தலும் வழங்கப்படாத நிலையிலும் மக்கள் சொல்லொணாத் துன்பங்களை அனுபவிக்கின்றனர்.

இங்கு தொற்று நோய்க்குள்ளாகி வைத்தியசாலைகளில் சிகிச்சை பெற்றுத் திரும்பிய நோயாளிகள் பல தடவை தங்களுக்கு வயிற்றோட்டம், வாந்திபேதி, காய்ச்சல் போன்றன வந்துள்ளதாகவும் வைத்தியசாலையில் சிகிச்சை பெற்று முகாமுக்கு திரும்பி அங்குள்ள குழாய்க் கிணற்றிலிருந்து பெறும் நீரைப் பருகினால் மீண்டும் வயிற்றோட்டம், வாந்திபேதி, காய்ச்சல் திரும்பத் திரும்ப வருவதாக பாதிக்கப்பட்டவர்கள் தெரிவிக்கின்றனர்.

முகாம்களில் பரவி வரும் தொற்றுநோயைத் தடுப்பதற்கான நடவடிக்கையினை சுகாதாரப் பகுதியினர் மேற்கொள்ள வேண்டும் எனவும் இவர்கள் வேண்டுகோள் விடுக்கின்றனர்.

thinakkural.com