திருமணம் சில திருத்தங்களுடன் - திரை விமர்சனம்!

திருமணம் நடக்கும் விதத்தில் உள்ள சிக்கல்களைப் பற்றிப் பேசும் படம் எப்படி இருக்கிறது?

திருமணம் நடத்துவது நிச்சயம் எளிமையான விஷயம் அல்ல. காதலர்கள், வீட்டாரின் சம்மதத்துடன் திருமணம் செய்வதுகொள்வது என்பதும் கடினம்தான். அப்படி ஒரு திருமணத்தில் எத்தனை தடங்கல்கள் ஏற்படும் என்பதை மையப்படுத்தி எடுக்கப்பட்ட படம்தான் திருமணம் சில திருத்தங்களுடன்.

உமாபதி ராமையா, காவ்யா சுரேஷ், சுகன்யா, எம்.எஸ்.பாஸ்கர், தம்பி ராமையா, மனோபாலா முதலானோர் முக்கியக் கதாபாத்திரங்களில் நடிக்க, கதை, திரைக்கதை எழுதி இயக்கியிருக்கும் சேரன் முக்கிய வேடத்தில் நடித்துள்ளார்.

ஜமீன் குடும்பத்தில் பிறந்து வளர்ந்து, அக்காவின் பாசத்தம்பியாக அன்பிலும் ஆடம்பரத்திலும் வாழ்ந்து, பண்பலைத் தொகுப்பாளராகப் பணியாற்றுபவர் மகேஷ் (உமாபதி ராமையா). அவரது காதலி ஆதிரா (காவ்யா சுரேஷ்) சாதாரணக் குடும்பத்தைச் சேர்ந்தவர். இருவரும் வீட்டில் தங்கள் காதலைச் சொல்கிறார்கள். அதற்கு எதிர்ப்பு ஏதும் வரவில்லை. ஒரு வார காலம் அவகாசம் எடுத்துக்கொண்டு, விசாரித்துத் திருமணம் செய்து வைக்க இரு வீட்டாரும் சம்மதிக்கின்றனர்.

தன் தம்பியின் திருமணம் ஆடம்பரமாக நடக்க வேண்டும் எனக் கதாநாயகனின் அக்கா மனோன்மணி (சுகன்யா) விரும்புகிறார். ஒரு நாள் கூத்திற்காக அத்தனை பணம் செலவழிக்க வேண்டுமா எனக் கதாநாயகியின் அண்ணன் அறிவு (சேரன்) நினைக்கிறார். இவர்களுக்கு இடையில் ஏற்படும் கருத்து வேறுபாடு, ஒரு கட்டத்தில் திருமணம் தடைபடும் அளவிற்குப் போகிறது. கருத்து வேறுபாடு தீர்ந்ததா, திருமணம் நடைபெற்றதா என்பதைச் சொல்கிறது படம்.

வாழ்க்கையில் திட்டமிடலின் அவசியம், திருமணத்தில் ஏற்படும் ஆடம்பர அனாவசியச் செலவினங்கள் போன்றவற்றைச் சுட்டிக்காட்டியிருப்பது பாராட்டத்தக்கது. திருமண அழைப்பிதழுக்காகச் செய்யப்படும் செலவு, வீணாகும் உணவு முதலான பல விஷயங்களைப் படம் கவனப்படுத்துகிறது. சேரனின் கஞ்சத்தனம் ஆரம்பத்தில் நகைப்பூட்டினாலும் சிந்திக்கவும் வைக்கிறது. சேரனுக்கும் சுகன்யாவுக்கும் இடையில் இருக்கும் முரண்கள் சமகால வாழ்க்கை பற்றிய பல முக்கியமான விஷயங்களை முன்னிலைப்படுத்துகின்றன. திருமணம் நடக்குமா, நடக்காதா என்னும் கேள்வி படத்தை நகர்த்திச் செல்ல உதவுகிறது.

பொதுவாக இயக்குநர் சேரனின் திரைப்படங்களில் பார்க்க முடிகின்ற குடும்பப் பின்னணியை இதிலும் பார்க்க முடிகிறது.

காதலிப்பதை வீட்டில் பாட்டுப் பாடித் தெரியப்படுத்துவதும், அதற்கு மறு பாட்டுப் பாடி வீட்டில் உள்ளவர்கள் பதில் கூறுவதும் யதார்த்தமாகவும் இல்லை, ரசிக்கும்படியும் இல்லை.

படத்தில் வரும் ‘ஆல் த பெஸ்ட்’ பாடலைக் கேட்கும்போது மீம் கிரியேட்டர்ஸுக்காகவே எழுதி இயக்கப்பட்ட பாடல் போலத் தோன்றியது. பாடல்களில் சித்தார்த் விபின் இன்னும் நல்ல கவனம் செலுத்தியிருக்கலாம். இரண்டாம் பாதியில் அடுத்தடுத்து வரும் பாடல்கள் படத்தின் ஓட்டத்தைப் பெரிதும் பாதிக்கின்றன.

வானுயர்ந்த மலை மீது தழுவிச் செல்லும் இருள் சூழ்ந்த மழை மேகம், பசுமைப் போர்வை போர்த்திய மரங்கள், இதமான ஒலி எழுப்பி ஒன்றாய்ப் பறந்து செல்லும் பறவைகள், மாடுகள், வைக்கோல் என்று திரையில் தோன்றும் காட்சிகளில் இயற்கை அழகு மிளிர்கிறது. ஒவ்வொரு காட்சியிலும் கேமிராவின் மாயம் தெரிகிறது. ராஜேஷ் யாதவின் ஒளிப்பதிவைப் பாராட்டியே ஆக வேண்டும்.

டிரைவராக வரும் பால சரவணன் ஓரிரு இடங்களில் மட்டுமே சிரிக்க வைக்கிறார். 96 திரைப்படம் பார்த்தபோது ஆட்டோகிராஃப் படம் நினைவிற்கு வந்தது என்று கூறிக் கதாநாயகி சிரிக்க வைக்கிறார். சுகன்யாவின் நடிப்பு அவரின் பழைய திரைப்படங்களை நினைவூட்டும்படி அமைந்துள்ளது. எம்.எஸ்.பாஸ்கர், தம்பி ராமையா இருவரும் தாங்கள் தேர்ந்த நடிகர்கள் என்பதனை மீண்டும் நிரூபித்துள்ளனர். கதாநாயகி காவ்யா சுரேஷ், தான் பரதநாட்டியக் கலைஞர் என்பதனை படத்தில் நிரூபித்துள்ளார்.

திருமணத்தை முன்வைத்துச் சிக்கனத்தை வலியுறுத்த முயலும் இப்படம், மெகா சீரியல் பார்ப்பது போன்ற உணர்வைப் பல காட்சிகளில் ஏற்படுத்துகிறது. படத்தில் எல்லோரும் வாய் ஓயாமல் பேசுகின்றனர். வெறும் பேச்சு அல்ல. சலிக்கச் சலிக்க அறிவுரைகள். பல காட்சிகள் செயற்கையாக உள்ளன. இவற்றையெல்லாம் தவிர்த்துச் சம்பவங்கள் மூலம் இயல்பாகக் கதை சொல்லியிருந்தால், திருமணம் சில திருத்தங்களுடன் திரைப்படம் வலுவாக இருந்திருக்கும்.

https://minnambalam.com/k/2019/03/02/59