சமஷ்டி முறையில் அதிகாரப் பகிர்வு

இவற்றை அடிப்படையாகக் கொண்டு அரசியல் தீர்வுக்கான முன்னெடுப்புகள் தீவிரப்படுத்தப்பட வேண்டும் என்பதே எமது கோரிக்கையாகும்.

எம்மைப் பொறுத்தவரை 60 ஆண்டுகளாக நீடித்து நிலவும் இப்பிரச்சினைக்கு தற்போதைய தருணத்தில் நிரந்தரத் தீர்வு காண்பதற்கான செயற்பாடுகள் துரிதப்படுத்தப்பட வேண்டும். மூன்று தசாப்த யுத்தம் மற்றும் வன்முறைகளாலும் உயிரிழப்புகள், சொத்து அழிவுகளாலும் மக்கள் மிகவும் களைப்படைந்துவிட்டனர்.

அன்றாட அவலங்கள் தொடர்பான எமது அக்கறையுடன் இனப்பிரச்சினைக்கு நிரந்தரத் தீர்வொன்றை எட்டுவதற்கே அரசு முன்னுரிமை அளிக்கவேண்டும். ஜனநாயகத்தையும், சமாதானத்தையும், அமைதியையும் நேசிக்கும் சாதாரண தமிழ் மக்களின் ஏக்கமும் இதுதான். சமூகத்தின் பல்வேறு மட்டங்களிலும் நிரந்தரமாக நிம்மதியாக சொந்த இடங்களில் வாழ்வதற்கான பிரதிபலிப்புகள் காணப்படுகின்றன.

சமஷ்டி முறையிலான அதிகாரப் பகிர்ந்தளிப்புக்கு ஏற்புடையதாக நாட்டின் அரசமைப்பில் தீவிரமான மாற்றங்கள் அவசியமானதாகும். "சமஷ்டி' என்ற பதம் யாப்பில் இடம்பெறாவிட்டாலும் அந்த உணர்வின் அடிப்படையில் இந்திய முறையிலான அதிகாரப் பகிர்ந்தளிப்பு மேற்கொள்ளப்படுவது சகல தரப்பினராலும் ஏற்றுக்கொள்ளப்படக் கூடிய ஒன்றாகும்.

வடக்கு கிழக்கு இணைந்த நிர்வாகம்

சர்ச்சைக்குரியதாக்கப்பட்ட வடக்கு கிழக்கு மாகாண இணைப்பைப் பற்றி எமது நிலைப்பாட்டைத் தெளிவுபடுத்த விரும்புகின்றோம். ஏனைய பிரதேசங்களுடன் ஒப்பிடுகையில் வடக்கு கிழக்கில் வாழுகின்ற மக்களே பெருமளவில் பாதிக்கப்பட்டுள்ளமையால் இப்பகுதி மக்கள் எதிர்நோக்கும் பிரச்சினைகளுக்கு நியாயமான தீர்வை இணைந்த வடக்கு கிழக்கு நிர்வாகத்தின் மூலமே காணமுடியும் என உறுதியாக நம்புகின்றோம்.

யுத்தம் உருவெடுத்து மக்கள் இடம்பெயர்வதற்கு முன்னர் வாழ்ந்த பகுதிகளில் அவர்கள் இன,மத பேதமின்றி மீள் குடியமரவும் இம்முறை வழியேற்படுத்தும். இப்பகுதியில் வாழும் சமூகங்களின் பாதுகாப்பு, வாழ்விடம் தொடர்பான அம்சங்களைக் கவனத்தில் எடுத்து ஒரு நிரந்தரத் தீர்வு காணப்படவேண்டும் என்பதில் உறுதியாகவுள்ளோம்.

நாட்டின் பல்வேறு பகுதிகளிலும் வாழும் எண்ணிக்கையில் சிறுபான்மையான தேசிய சமூகங்கள் அந்தந்தப் பிரதேசங்களில் அவர்களுடைய அபிலாஷைகள், உரிமைகள் மற்றும் பாதுகாப்பை உறுதிப்படுத்தக் கூடிய வகையில் அரசமைப்பில் ஏற்பாடு செய்யப்பட வேண்டும். நாட்டின் எப்பகுதியிலும் இலங்கையின் சகல இன மக்களும் சம உரிமையுடன் வாழ்வதற்கான உத்தரவாதம் உறுதிசெய்யப்பட வேண்டும்.

இலங்கை பல்லின, பல்மத, பல்மொழி மற்றும் பல் கலாசாரங்களைக் கொண்ட நாடாகவும் இலங்கையின் இறையாண்மைக்குள் ஆட்சி, அதிகார அங்கங்களான மத்திய மாநில அரசியல் நிர்வாகக் கட்டமைப்புகளில் இனசமூகங்களின் விகிதாசாரம் கருத்திற்கெடுக்கப்பட்டு பிரதிநிதித்துவங்களோ, நியமனங்களோ மேற்கொள்ளப்பட வேண்டும். தேர்தல் சீர்திருத்த ஏற்பாடுகளிலும் இந்த விடயம் பிரதிபலிக்க வேண்டும்.

அதிகாரப் பகிர்ந்தளிப்புச் செயன்முறையினூடாகவே நாம் ஐக்கிய இலங்கையை சுபீட்சமான எதிர்காலத்தை நோக்கி கட்டியெழுப்ப முடியும்.

எமது இந்த நிலைப்பாட்டுடன் இணைந்து செயற்பட விரும்பும் அனைத்து அரசியல் சமூக சக்திகளுடன் நாம் ஐக்கியமாகச் செயற்படத் தயாராக இருக்கின்றோம் என்பøதையும் தெரிவித்துக் கொள்கின்றோம். என்று உள்ளது. (சி)

உதயன்