எங்கள் தமிழினத்தை விற்று விட்டார்கள்

ஐ.நா மனித உரிமைகள் ஆணையம் விதித்த நிபந்தனைகளை இலங்கை அரசு நிறைவேற்றுவதற்கு மேலும் இரண்டு ஆண்டுகள் கால அவகாசம் வழங்கப்பட்டுள்ளது.

 

இந்தக் கால அவகாசம் என்ற சொற்பதம் இலங்கை அரசுக்கும் ஐ.நா மனித உரிமை ஆணையத்துக்கும் பொருந்துவதாகும்.

 

இதே கால அவகாசம் என்பதைக் கூட்டமைப்பின் மொழியில் கூறுவதாயின், இலங்கை மீதான ஐ.நாவின் மேற்பார்வை என்றும் அது மேலும் இரண்டு ஆண்டுகளுக்கு நீடிக்கப் பட்டுள்ளது என்றே கூறவேண்டும்.

 

ஆக, இலங்கை அரசுக்குக் கால அவகாசமாக இருப்பது கூட்டமைப்புக்கு ஐ.நாவின் மேற்பார்வையாக இருக்கிறது.

 

இங்கு ஒரு சொல் இரு வகையாகக் கையாளப்படுகின்றதேயன்றி, இரு வகைச் சொற்பதத்தினதும் பொருள் ஒன்றுதான் என்பது புரிதற்குரியது.

 

அதாவது இலங்கை அரசும் தமிழ்த் தேசியக் கூட்டமைப்பும் தமிழ் மக்களை ஏமாற்று வதற்குப் பயன்டுத்துகின்ற சொற்பதமே கால அவகாசம் என்பதும் மேற்பார்வை என்பது மாகும்.

 

இதை நாம் கூறும்போது, கால அவகாசத்தை கூட்டமைப்பு ஐ.நாவின் மேற்பார்வை என்கிறதே! ஐ.நாவின் மேற்பார்வை தமிழ் மக்களுக்கு உரிமையைப் பெற்றுத்தருமா என்ற கேள்வி உங்களிடம் ஏற்படவே செய்யும்.

 

அப்படியயாரு கேள்வி ஏற்பட்டால் அது தேவையற்ற கேள்வி எனலாம்.

ஆம், ஈழத் தமிழினத்தை தமிழ் அரசியல் தலைமை விற்றுவிட்டது. இனி கால அவகாச மும் இல்லை. ஒரு மண்ணாங்கட்டியும் இல்லை.

 

2021ஆம் ஆண்டு வழமைபோல் ஐ.நா மனித உரிமை ஆணையத்தின் கூட்டத் தொடர் ஜெனிவாவில் ஆரம்பமாகும்.

 

அப்போதும் இலங்கை அரசு எந்த நிபந்தனைகளையும் நிறைவேற்றியிராது.

அதேநேரம் இலங்கை அரசு கால அவகாசமும் கேட்காது. மாறாக இணை அனுசரணையில் இருந்து இலங்கை விலகுவதாக அறிவிக்கும்.

 

கூடவே, எங்கள் நாட்டு நீதிபதிகள் மூலம் விசாரணை நடத்திவிட்டோம். போர்க்குற்றம் எதுவும் நடைபெறவில்லை. இலங்கைப் படையினர் தேசத்தைக் காப்பாற்றியுள்ளனர் என இறுமாப்புடன் இலங்கை ஆட்சியாளர்கள் கூறுவர். 

 

இது நிச்சயம் நடக்கும்.

ஆக, கால அவகாசம் என்பது தமிழ் மக்களை ஏமாற்றுவதற்கான ஒரு செப்படி வித்தை மட்டுமே.

 

என்ன செய்வது எங்கள் இளைஞர்கள் தங்கள் உயிரைத் தியாகம் செய்து ஒரு சிலருக்குக் கோடி உழைத்துக் கொடுத்துள்ளனர்.

 

கோடி பெற்றவர்கள் இறந்த தமிழ் உறவுகளுக்கு மட்டுமல்ல, உயிரோடு இருக்கின்ற தமிழ்மக்களுக்கும் சேர்த்து மண் போட்டுள்ளனர்.

 

ஓ! தமிழினமே இன்னமும் நீ அவர்களை நம்பியிருந்தால், அது நீ செய்த ஊழ்வினைப் பயனேயன்றி வேறில்லை.  

 

http://www.valampurii.lk/valampurii/content.php?id=18070&ctype=news