சந்திரயான்-2 விண்கலம் : விண்ணில் செலுத்துவதற்கான அனைத்து ஏற்பாடுகளும் பூர்த்தி!

[தமிழ் சிறி]

சந்திரயான்-2 விண்கலம் : விண்ணில் செலுத்துவதற்கான அனைத்து ஏற்பாடுகளும் பூர்த்தி!

தொழில்நுட்ப கோளாறு சரி செய்யப்பட்டதை அடுத்து சந்திரயான்-2 விண்கலம் விண்ணில் செலுத்தப்படவுள்ளது.

குறித்த விண்கலம் இன்று (திங்கட்கிழமை) ஸ்ரீஹரிகோட்டாவில் உள்ள ஏவுதளத்தில் இருந்து நண்பகல் 2.43 மணிக்கு செலுத்தப்படவுள்ளதாக இந்திய ஊடகங்கள் செய்தி வெளியிட்டுள்ளன.

இதற்கான 20 மணி நேர கவுண்ட்டவுன் நேற்று மாலை 6.43 மணிக்கு ஆரம்பமாகியதுடன் சந்திரயான் 2 விண்கலத்தை தாங்கிய ஜி.எஸ்.எல்.வி. மார்க்-3 ரொக்கெட் விண்ணில் செலுத்தப்படவுள்ளது.

இதற்கான அனைத்து ஏற்பாடுகளும் செய்யப்பட்டுள்ளதாக இஸ்ரோ தலைவர் சிவன் கூறியுள்ளார்.

இது குறித்து மேலும் கருத்து தெரிவித்துள்ள அவர், “சந்திரயான்-2 விண்கலத்தை விண்ணில் செலுத்துவதற்கான இறுதிக்கட்ட ஆயத்த பணிகள் சிறப்பாக மேற்கொள்ளப்பட்டு வருகின்றன.

கடந்த 15ஆம் திகதி ஏற்பட்ட தொழில்நுட்ப கோளாறு தற்போது நிவர்த்தி செய்யப்பட்டுள்ளதுடன்,ஒத்திகையும் பார்க்கப்பட்டுள்ளது.

இந்த விண்கலம் விண்ணில் செலுத்தப்பட்ட பிறகு 48 நாட்கள், 15 கட்டங்களாக அதன் சுற்றுப்பாதை உயர்த்தப்பட்டு சந்திரனை சுற்றி வருவதற்கான ஏற்பாடுகள் இடம்பெறும். அதன் பின்னர் சந்திரனின் தென் துருவ பகுதியில் சந்திரயான் இறங்கவுள்ளது.

கடந்த முறை தொழில்நுட்ப கோளாறு ஏற்பட்டதை கண்டுபிடித்ததும் கவுண்ட்டவுனை நிறுத்திவிட்டோம். அதன்பிறகு பலமுறை சோதனைகள் நடத்தப்பட்டு உள்ளன. இதனால் மீண்டும் தொழில்நுட்ப கோளாறுகள் ஏற்படுவதற்கான வாய்ப்புகள் இல்லை.

சந்திரயான்-2 தென் துருவ பகுதியில் இறங்குவதால் இந்தியாவுக்கு விஞ்ஞான ரீதியாக அதிகளவிலான தகவல்களைப்  பெற்றுக்கொள்ள முடியும்.

இதனால் உலகம் முழுவதும் உள்ள விஞ்ஞானிகள் சந்திரயான்-2 விண்ணில் செலுத்தப்படுவதை ஆவலுடன் எதிர்பார்த்து காத்திருக்கிறார்கள்” என கூறியுள்ளார்.

http://athavannews.com/சந்திரயான்-2-விண்கலம்-விண-2/