அரசியல் தீர்விற்கு முன்னர் தமிழ் மக்களின் பொருளாதாரத்தினை பலப்படுத்த வேண்டும் – மஹிந்தானந்த!

அரசியல் தீர்விற்கு முன்னர் தமிழ் மக்களின் பொருளாதாரத்தினை பலப்படுத்த வேண்டும் என இராஜாங்க அமைச்சர் மஹிந்தானந்த அளுத்கமகே தெரிவித்துள்ளார்.

இன்று(செவ்வாய்கிழமை) காலை அலரிமாளிகையில் ஆதவன் செய்திச் சேவை உள்ளிட்ட முக்கிய தமிழ் ஊடகங்களின் பிரதானிகளை பிரதமர் மஹிந்த ராஜபக்ஷ உள்ளிட்ட அரசாங்கத்தின் முக்கியஸ்தர்கள் சந்தித்து கலந்துரையாடியிருந்தனர்.

இதன்போதே இராஜாங்க அமைச்சர் மஹிந்தானந்த அளுத்கமகே இவ்வாறு தெரிவித்துள்ளார்.

இதன்போது அங்கு தொடர்ந்தும் கருத்து வெளியிட்ட அவர், ‘தமிழ் மக்கள் இன்று பல்வேறு பிரச்சனைகளுக்கு முகங்கொடுத்துள்ளனர்.

அண்மையில் கிளிநொச்சி மாவட்டத்திற்கு சென்றிருந்தேன். அங்குள்ள மக்கள் பாரிய குடிநீர் பிரச்சினையை எதிர் நோக்கியுள்ளனர்.

அதேபோன்று வடக்கின் சில இடங்களிலுள்ள மக்கள் உணவு மற்றும் குடி நீரினை பெற்றுகொள்வதில் பாரிய பிரச்சனைகளுக்கு முகங்கொடுத்துள்ளனர். முதலில் இந்த பிரச்சனைகளுக்கு ஒரு தீர்வினை காண வேண்டும்.

கடந்த நான்கரை ஆண்டுகளாக அரசாங்கத்துடன் இணைந்து செயற்பட்ட தமிழ் தேசிய கூட்டமைப்பினர் பல்வேறு வரப்பிரசாதங்களை பெற்றுக் கொண்டனர்.

அவர்களின் பிள்ளைகள் வெளிநாடுகளில் படிக்கின்றார்கள். ஆனால் அவர்களுக்கு வாக்களித்த தமிழ் மக்கள் எந்த நன்மைகளினையும் பெற்றுக் கொள்ளவில்லை.

யாழ்ப்பாணத்தில் உள்ள அரச அலுவலங்களில் தமிழர்களுக்கு வேலை வாய்ப்புகள் வழங்கப்படவில்லை. குறிப்பாக வடக்கிலுள்ள வைத்தியசாலைகளில் முன்னாள் அமைச்சர் ராஜித்த சேனாரத்னவின் ஆதரவாளர்களே வேலை செய்கின்றனர்.

கடந்த அரசாங்கம் அமைச்சரவையில் அமைச்சரவை பத்திரங்களை மாத்திரமே தாக்கல் செய்திருந்தது’ எனக் குறிப்பிட்டுள்ளார்.

http://athavannews.com/அரசியல்-தீர்விற்கு-முன்ன/