நிர்பயா வழக்கு – உயர் நீதிமன்றத்தின் தீர்ப்பு இன்று

டெல்லியில் படுகொலை செய்யப்பட்ட மருத்துவ மாணவி நிர்பயா வழக்கில், மத்திய அரசின் மனு மீது, டெல்லி உயர்நீதிமன்றம் இன்று (புதன்கிழமை) உத்தரவு பிறப்பிக்கவுள்ளது.

டெல்லியில் 2012ஆம் ஆண்டு மருத்துவ மாணவி நிர்பயா, பலாத்காரம் செய்யப்பட்டு கொலை செய்யப்பட்ட வழக்கில் குற்றவாளிகளான முகேஷ் சிங், பவன் குப்தா, வினய் சர்மா, அக்ஷய் சிங் ஆகிய 4 பேருக்கு தூக்கு தண்டனை விதிக்கப்பட்டது.

குற்றவாளிகள் தொடர்ச்சியாக கருணை மனு, சீராய்வு மனு தாக்கல் செய்து வருவதை அடுத்து, தண்டனையை நிறைவேற்றுவதில் சிக்கல் நீடிக்கிறது.

கடந்த முதலாம் திகதி சந்தேகநபர்களை திஹார் சிறையில் தூக்கிலிட ஏற்பாடு செய்யப்பட்ட நிலையில், அதை எதிர்த்து தாக்கல் செய்த மனுவில், குற்றவாளிகளை டெல்லி பாட்டியாலா செசன்சு நீதிமன்றம் தூக்கு தண்டனை நிறைவேற்ற தடை விதித்து உத்தரவிட்டது.

இதை எதிர்த்து மத்திய, மாநில அரசுகள் சார்பிலும் டெல்லி உயர் நீதிமன்றத்தில் முறையீடு செய்யப்பட்டது. இதை விசாரித்த நீதிபதி சுரேஷ் கயித், தீர்ப்பை திகதி குறிப்பிடாமல் ஒத்திவைத்தார்.

இந்நிலையில் நிர்பயாவின் பெற்றோர் டெல்லி உயர் நீதிமன்றத்தில் நேற்று மனுவொன்றை தாக்கல் செய்தனர்.

அதில், ‘குற்றவாளிகளுக்கான துாக்கு தண்டனையை நிறைவேற்ற, செசன்ஸ் நீதிமன்றம் விதித்துள்ள தடையை எதிர்த்து, மத்திய அரசு தாக்கல் செய்துள்ள மனுவை விரைந்து விசாரிக்க வேண்டும்’ என வலியுறுத்தினர்.

அதற்கமைய மத்திய அரசின் மனு மீது, டெல்லி உயர்நீதிமன்றம் இன்று உத்தரவு பிறப்பிக்கவுள்ளமை குறிப்பிடத்தக்கது.

http://athavannews.com/நிர்பயா-வழக்கு-உயர்-நீதி/

நிர்பயா கொலை வழக்கு: சந்தேகநபர்களை தனித்தனியே தூக்கிலிட முடியாது என அறிவிப்பு

 

by : Dhackshala

நிர்பயா கொலை வழக்கில் குற்றஞ்சாட்டப்பட்டவர்களை தனித்தனியே தூக்கிலிட முடியாது என டெல்லி உயர் நீதிமன்றம் உத்தரவு பிறப்பித்துள்ளது.

குறித்த வழக்கில் குற்றம் சாட்டப்பட்டு தண்டனை விதிக்கப்பட்டிருந்தவர்களைத் தனித்தனியாக தூக்கிலிட வேண்டும் என கோரி டெல்லி உயர்நீதிமன்றத்தில் தாக்கல் செய்யப்பட்டிருந்த மனு மீதான விசாரணைகள் இன்று (புதன்கிழமை) இடம்பெற்றன. இதன்போதே இந்த தீர்ப்பு வழங்கப்பட்டுள்ளது.

மேலும் குறித்த வழக்கில் கருத்து தெரிவித்த டெல்லி உயர் நீதிமன்ற நீதிபதி சுரேஷ் கெய்ட், ‘ஒரே வழக்கு ஒரே தண்டைக்குள்ளான குற்றவாளிகளை தனித்தனியே தூக்கிலிடுதல் எனும் கோரிக்கையினை ஏற்றுக்கொள்ள முடியாது.

4 பேரையும் ஒரே நேரத்தில்தான் தூக்கிலிட வேண்டும். 4 பேரும் தாமதமாக சீராய்வு மனுவை தாக்கல் செய்தனர். 4 பேரும் அனைத்து சட்ட நிவாரணங்களையும் ஒரு வாரத்திற்குள் பயன்படுத்த வேண்டும். சட்ட நிவாரணங்களை காரணம் காட்டி குற்றவாளிகள் காலம் தாழ்த்துவதை ஏற்க முடியாது’  என மறுத்துள்ளார்.

டெல்லியில் 2012ஆம் ஆண்டு மருத்துவ மாணவி நிர்பயா, பலாத்காரம் செய்து கொலை செய்யப்பட்ட வழக்கில் குற்றவாளிகளான முகேஷ் சிங், பவன்குப்தா, வினய் சர்மா, அக்ஷய் சிங் ஆகிய 4 பேருக்கு தூக்குத் தண்டனை விதிக்கப்பட்டது.

குற்றவாளிகள் தொடர்ச்சியாக கருணை மனு மற்றும் சீராய்வு மனுக்களை தாக்கல் செய்து வந்ததையடுத்து, தண்டனையை நிறைவேற்றுவதில் சிக்கல் நீடிக்கிறது.

இதையடுத்து, நிர்பயா குற்றவாளிகளை தூக்கிலிட விதிக்கப்பட்ட தடைக்கு எதிராகவும் அவர்களை தனித்தனியாக தூக்கில் போட அனுமதி கோரியும் மத்திய அரசு மற்றும் திஹார் சிறை நிர்வாகம் சார்பில் டெல்லி உயர் நீதிமன்றத்தில் மேன்முறையீடு செய்யப்பட்டிருந்தமை குறிப்பிடத்தக்கது.

http://athavannews.com/நிர்பயா-கொலை-வழக்கு-சந்த/