இரசாயன குடோனில் தொடர்ந்தும் தீ பரவல் – தீயணைப்பு வீரர்கள் போராட்டம்

மாதவரத்தில் உள்ள இரசாயன குடோனில் தொடர்ந்தும் தீ பற்றி எரிந்து வரும் நிலையில், தீயை முழுமையாக அணைக்க தீயணைப்பு வீரர்கள் போராடி வருகின்றனர்.

மாதவரம் புதிய பேருந்து நிலையத்திற்கு எதிரே தனியார் நிறுவனத்திற்கு சொந்தமான இரசாயன கிடங்கில் நேற்று மாலை 3 மணி அளவில் திடீரென தீ பிடித்தது எரிந்தது.

இதில் அங்கு வைக்கப்பட்டிருந்த இரசாயன பேரல்கள் வெடித்து சிதறியது. அதில் இருந்து சிதறிய தீயால் அருகில் இருந்த மேலும் 2 கிடங்குகள் எரியத் தொடங்கின.

இதுகுறித்து தகவல் அறிந்ததும் செங்குன்றம், மணலி, மாதவரம், ஆவடி, அம்பத்தூர், பெரம்பூர், கொருக்குப்பேட்டை, சென்னை விமான நிலைய மற்றும் சி.பி.சி.எல். எண்ணெய் நிறுவன தீயணைப்பு வாகனம் ஆகியவற்றில் இருந்து 40க்கு மேற்பட்ட வாகனங்களில் தீயணைப்பு வீரர்கள் விரைந்து வந்தனர்.

சுமார் 500க்கும் மேற்பட்ட தீயணைப்பு வீரர்கள் தீயை கட்டுபடுத்த முயன்றனர். இரசாயன பேரல்களில் தீப்பற்றியதால் அதனை உடனடியாக அணைக்க முடியவில்லை.

300 அடி நீள ஏணி பொருத்தப்பட்ட பிராண்டோ ஸ்கைலிப்ட் ராட்சத அதிநவீன தீயணைப்பு வாகனங்கள் 5 வரவழைக்கப்பட்டு அதன் மீது ஏறி வீரர்கள் தீயை கட்டுப்படுத்த போராடினர். எனினும் தீயை கட்டுப்படுத்த முடியவில்லை.

மீட்பு பணியை தமிழக தீயணைப்பு துறை தலைமை இயக்குனர் சைலேந்திரபாபு, பொலிஸ் ஆணையாளர் ஏ.கே.விஸ்வநாதன், சென்னை மாவட்ட ஆட்சியாளர் சீதா லட்சுமி, மாதவரம் தொகுதி சட்டமன்ற உறுப்பினர் மாதவரம் சுதர்சனம் ஆகியோர் பார்வையிட்டனர்.

நள்ளிரவு குடோனில் பற்றி எரிந்த தீ ஓரளவு கட்டுப்படுத்தப்பட்டது. ஆனால் முழுமையாக அணைக்க முடியவில்லை. தொடர்ந்து தீ எரிந்து வந்தது.

இந்நிலையில், இன்றும் (ஞாயிற்றுக்கிழமை) 2ஆவது நாளாக இரசாயன குடோன் எரிந்து வருகிறது. தீயை முழுமையாக அணைக்க தீயணைப்பு வீரர்கள் போராடி வருகிறார்கள்.

இந்த தீ விபத்து காரணமாக அப்பகுதியில் இருந்த பெட்ரோல் பங்குகளில் வாகனங்களுக்கு எரிபொருள் நிரப்ப தடை விதிக்கப்பட்டுள்ளது. மேலும் மின் வினியோகமும் நிறுத்தப்பட்டது. போக்குவரத்து மாற்றமும் செய்யப்பட்டுள்ளது.

இதனால் அப்பகுதி, பொதுமக்கள் நடமாட்டம் இன்றி காணப்படுகிறது. மேலும் பொதுமக்கள் யாரும் தீ விபத்தில் சிக்கிக்கொள்ளாத வகையில் பொலிஸார் அப்பகுதியைச் சுற்றி யாரும் வராத வகையில் தடை விதித்துள்ளனர். சுமார் ஒரு கிலோ மீட்டர் தூரம் பொலிஸ் கட்டுப்பாட்டில் கொண்டுவரப்பட்டுள்ளது.

அருகில் உள்ள குடியிருப்பில் வசிப்பவர்களுக்கு மூச்சு திணறல், கண் எரிச்சல், புகை பட்டவுடன் கை – காலில் எரிச்சல் போன்ற உடல் உபாதைகள் ஏற்பட்டு வருகிறது. தீ விபத்தில் குடோன் அருகே நிறுத்தி வைக்கப்பட்டிருந்த 15க்கும் மேற்பட்ட லொரிகள், கார் மற்றும் பணியாளர்களின் இருசக்கர வாகனங்கள் உள்ளிட்ட 100 கோடி ரூபாய் மதிப்பிலான பொருட்கள் எரிந்து நாசமாகின.

மின்கசிவு காரணமாக தீ விபத்து ஏற்பட்டதா? அல்லது திட்டமிட்டு இரசாயன கிடங்கிற்கு தீ வைத்தனரா? என்ற கோணத்தில் மாதவரம் பொலிஸார் விசாரணை நடத்தி வருகின்றனர்.

http://athavannews.com/இரசாயன-குடோனில்-தொடர்ந்த/

கடல்ல ஆயில் கொட்டினப்ப வாளில அள்ளின விஞ்ஞானிகள் கூப்பிடுங்க டீ கப்ல தண்ணி மொண்டு ஊத்துவாங்க!