புதுச்சேரி: `அடம்பிடிக்கும் கிரண் பேடி; அசராத அமைச்சர்!’ - போராட்டக்களமான கவர்னர் மாளிகை

ஜெ.முருகன்அ.குரூஸ்தனம்

`மக்கள் நலத் திட்டங்களை நிறைவேற்றுவதற்கு தடையாக இருக்கும் துணைநிலை ஆளுநர் கிரண் பேடியை திரும்பப் பெற வேண்டும்’ என்ற கோரிக்கையுடன் ஜனவரி 8-ம் தேதி மறைமலை அடிகள் சாலையில் அமைச்சர்கள், எம்.எல்.ஏக்களுடன் 4 நாள்கள் தர்ணா போராட்டத்தை தொடங்கிய முதல்வர் நாராயணசாமி, பொங்கல் பண்டிகையையொட்டி மூன்றாவது நாளே போராட்டத்தை முடித்தார்.

மேலும், அடுத்தடுத்த கட்டங்களில் போராட்டங்கள் தொடரும் என்றும் அறிவித்தார். ஆனால் அன்றைய தினமே ஆளுநருக்கு அனுப்பப்பட்ட 15 கோப்புகளுக்கு அனுமதி தரும்வரை, சட்டப்பேரவை வளாகத்தில் உள்ளிருப்புப் போராட்டத்தில் அமர்ந்தார் சமூக நலத்துறை அமைச்சர் கந்தசாமி. அதற்கடுத்து `புதுச்சேரி பஞ்சாலைகள் மற்றும் சர்க்கரை ஆலையைத் திறக்க வேண்டும். மக்கள் நலத்திட்ட உதவிகளை வழங்க வேண்டும். ரேஷன்கடை ஊழியர்களை பணியில் அமர்த்த வேண்டும்’ என்பது உள்ளிட்ட 21 அம்ச கோரிக்கைகளையும் சேர்த்து 36 கோரிக்கைகள் குறித்தும் நேரில் சந்தித்து விவாதிக்க வேண்டுமென்று துணைநிலை ஆளுநர் கிரண் பேடியிடம் அனுமதி கேட்டார்.

அந்த கடிதத்துக்கு பதிலளித்த கிரண் பேடி,``அமைச்சர் குறிப்பிட்ட விஷயங்கள் விதிகளின் அடிப்படையில் சம்பந்தப்பட்ட செயலர்கள் அலுவலகங்களில் பரிசீலனையில் உள்ளது. இதுகுறித்து உங்களிடம் விளக்கிக் கூற தலைமைச் செயலரை கேட்டுக்கொண்டுள்ளேன். அமைச்சருக்கும், அவரின் குடும்பத்துக்கும் மகிழ்ச்சியான பொங்கல் வாழ்த்துக்கள்" என்று தெரிவித்திருந்தார்.

சட்டப்பேரவை வளாகத்தில் தனது அறையிலேயே குளித்து, உணவருந்தி வராந்தாவில் சேரில் அமர்ந்து போராட்டத்தைத் தொடர்ந்துவந்தார் அமைச்சர் கந்தசாமி. தொடர்ந்து போராட்டத்தில் இருக்கும் அவருக்கு ஆதரவாக அனைத்து தலித், பழங்குடி அமைப்புகள் நேற்று முன்தினம் ஒருநாள் உண்ணாவிரதப் போராட்டத்தை நடத்தின. நேற்று கூடிய சிறப்பு சட்டப்பேரவையில் கலந்துகொண்ட அமைச்சர் கந்தசாமி, பேரவை முடிந்ததும் அங்கேயே தங்கி போராட்டத்தைத் தொடர்ந்தார்.

இன்று காலை சட்டப்பேரவையில் இருந்து கிளம்பி கவர்னர் மாளிகை முன்பு தரையில் அமர்ந்து அமைச்சர் கந்தசாமி, ``கோப்புகள் குறித்து கவர்னர் அழைக்கும் வரை நான் திரும்பப் போவதில்லை. இங்கேயே போராட்டத்தைத் தொடர்வேன்” என்று தெரிவித்திருக்கிறார். இதற்கிடையில் நகரின் பல பகுதிகளில் அவருக்கு ஆதரவாளர்களும், தலித் அமைப்புகளும் சாலை மறியலில் ஈடுபட்டு வருகின்றனர்.

அதேபோல எம்.எல்.ஏ தொகுதி மேம்பாட்டு நிதி வராதது தொடர்பாக ஆளுநரை சந்திக்கச் சென்ற அ.தி.மு.க சட்டமன்றக் குழு தலைவரான எம்.எல்.ஏ அன்பழகனை பேரிகார்டுகள் போட்டு மத்திய பாதுகாப்புப் படையினர் தடுத்து நிறுத்தியதால் வாக்குவாதத்தில் ஈடுபட்டார்.

போராட்டத்தில் இருக்கும் அமைச்சர் கந்தசாமியை சந்திப்பதற்காக சென்ற முதல்வர் நாராயணசாமி, நாடாளுமன்ற உறுப்பினர் வைத்திலிங்கம், அமைச்சர் மல்லாடி கிருஷ்ணாராவ், எம்.எல்.ஏ-க்கள் ஜெயமூர்த்தி, விஜயவேணி போன்றவர்களையும் மத்தியப் பாதுகாப்பு படையினரும், காவல்துறையும் அனுமதிக்காத நிலையில் அவர்கள் அங்கேயே தரையில் அமர்ந்திருப்பதால் மாநிலம் முழுவதும் அசாதாரண சூழல் ஏற்பட்டிருக்கிறது.

இதற்கிடையில் 10 நாள்களாக அமைச்சர் கந்தசாமியை சந்திக்க மறுத்துவரும் கவர்னர் கிரண் பேடிக்கு எதிராக சமூக வலைத்தளங்களில் எதிர்ப்புகளும், கண்டனங்களும் குவிந்து வருகின்றன.

https://www.vikatan.com/government-and-politics/politics/puducherry-minister-kandasamy-continuous-his-protest-against-governor-kiran-bedi