ஜனநாயக விரோத செயற்பாடுகளை முறியடிக்க கட்சி வேறுபாடுகளின்றி அனைவரும் ஒன்றுபடுங்கள்

வீரகேசரி நாளேடு

நாட்டில் தற்போது ஏற்பட்டுள்ள ஜனநாயக விரோதச் செயற்பாடுகளை முறியடிக்க அனைவரும் அணிதிரண்டு செயற்பட வேண்டுமென ஐ.தே.க. தலைவரும், எதிர்க்கட்சித் தலைவருமான ரணில் விக்கிரமசிங்க தெரிவித்தார்.

ஐ.தே.கட்சியின், அரசுக்கு எதிரான பிரசாரக்கூட்டத்தின் முதலாவது கூட்டம் குருணாகல் சத்தியவதி மைதானத்தில் நடைபெற்றது. குருணாகல் ஐ.தே.க. அமைப்பாளர் ஜோன்ஸ்டன் பெர்னாண்டோ தலைமையில் நடைபெற்ற இக்கூட்டத்திற்கு கொட்டும் மழையிலும் பெருமளவு மக்கள் கலந்து கொண்டனர்.

ஐ.தே.க. தவிசாளர் ருக்மன் சேனாநாயக்க, தேசிய அமைப்பாளர் எஸ்.பி.திசாநாயக்க, பொதுச்செயலாளர் திஸ்ஸ அத்தநாயக்க, பாராளுமன்ற உறுப்பினர்களான ஜயந்த கருணாதிலக மற்றும் பலர் இகூட்டத்தில் கலந்து கொண்டனர்.

இக்கூட்டத்தில் உரையாற்றிய ரணில் விக்கிரமசிங்க மேலும் கூறியதாவது:

5ஆம் மஹிந்த மன்னன் பின் அனுராதபுரம் வீழ்ச்சியுற்றது. இன்று மஹிந்தவின் ஆட்சியில் அனைத்தும் இல்லாமற்போகும் அபாயம் ஏற்பட்டுள்ளது. 5ஆம் மஹிந்த மன்னன் காலத்திலும் இப்படியான குழப்பநிலை ஏற்பட்டது. இந்த மன்னர் உருகுணைக்குத் தப்பிச் சென்றான். சோழப்பேரரசன் இராஜராஜ சோழன் தன் படையை அங்கு அனுப்பி மன்னர் குடும்பத்தை கைது செய்து தஞ்சாவூரிற்கு கொண்டு சென்றான்.

இன்று மஹிந்தவின் காலத்தில் திருப்தியற்ற அரசுகளில் ஒன்றாக இலங்கை கீழ்நிலை அடைந்துள்ளது. பொருளாதாரம் வீழ்ச்சியடைந்துள்ளது. நாடு அனைத்திலும் கீழ் நிலை அடைந்துள்ளது. இன்று தமிழர்களை துரத்துகின்றனர். இன்று முழு உலகமே எம்மைவெறுக்கும் நிலை உருவாகியுள்ளது.

உலகில் இன்று கீழ்நிலையிலுள்ள தலைவர்களில் சிம்பாப்வேயின் முகாபேயும்ஹி மஹிந்தவுமே உள்ளனர். நாம் தொடர்ந்தும் வன்முறைகளுக்கும், குடும்ப ஆதிக்கத்திற்கும் இடம்கொடுக்க முடியாது. இதனால் நாம் அணிதிரண்டு இதை முறியடிக்கும் காலம் நெருங்கி உள்ளது. ஐ.தே.கட்சியுடன் இணைந்து செயற்பட மங்கள சமரவீர கூறியிருப்பதை வவேற்கின்றேன். மங்கள, ஸ்ரீபதி ஆகிய இருவரை மட்டுமல்ல அனைவரையும் நான் இணைந்து ஜனநாயகத்திற்காகப் போராட அழைக்கின்றேன்.

கட்சி ரீதியாக ஒன்று சேர முடியாவிட்டாலும் ஜனநாயகத்தைக்காக்க அனைவரும் இணைந்து செயலாற்ற முன்வருமாறு நான் அழைப்பு விடுக்கின்றேன். நாம் ஒரே நோக்கத்திற்கு செயற்படலாம். நாட்டை கூறுபோட நான் இடமளிக்க மாட்டேன். நாட்டை ஒன்றுபடுத்த இலங்கையர் என்ற வகையில் செயற்பட அனைவரும் முன்வர வேண்டும். நம் நாட்டை காப்பாற்ற அனைவரும் இணைய முடியும். நான் அதற்காக அனைவருக்கும் அழைப்பு விடுக்கின்றேன். நாம் ஆட்சியமைத்தால் ஊழல்புரிந்த அனைவருக்கும் சட்டத்தின் முன் முகங்கொடுக்க வேண்டிவரும். ஐ.தே.க. ஆட்சியில் ஊழல் இடம்பெறாது. மக்கள் சக்தியை நாம் கட்டியெழுப்புவோம். இதற்காக அனைத்திற்கும் முகங்கொடுக்க நான் தயார் என்றார்.

ஜனநாயக விரோத செயற்பாடுகளை முறியடிப்பதாயின் முதலில் தமிழினத்துக்கு சமஉரிமை வழங்குவதிலிருந்து தான் அதைத் தொடங்கவேண்டும். ஆட்சியிலிருந்தபோதும் இப்போது பிரதான எதிர்கட்சியின் தலைவராய் இருக்கும்போதும் ரணிலும் அவருடைய ஆட்களும் செய்த ஜனநாயக விரோத செயல்களைப் பட்டியலிட்டுச் சொல்லலாம். நாட்டை ஆளும்போது வராத ஞானம் இப்போது எங்கிருந்து வந்தது?