பெண்கள் இல்லாத உலகத்தில் song to listen.

நான் எதிர்பார்க்கவில்லை! யாழ்களத்தில் இருந்து இவ்வளவு உறவுகள் இந்தப்பாடலைக் கேட்டு இதற்கு தங்களுடைய ஆக்கபூர்வமான கருத்துக்களையும், விமர்சனங்களையும் வழங்குவார்கள் என்று. அந்த வகையில் முதலில் மோகன் அண்ணாவிற்கு எனது அன்பு கலந்த நன்றிகளை தெரிவித்துக் கொள்வதில் மகிழ்வடைகிறேன். யாழ்கள அனைத்து முகமறியா அன்புள்ளங்களுக்கும் எனது நன்றிகளும் வாழ்த்துக்களும். எங்கள் வளர்ச்சியில் யாழ்களமும் இணைய அணில்போல் பங்கெடுத்துக் கொள்வதையிட்டு நாங்கள் பெருமகிழ்வடைகிறோம்.

உங்கள் ஒவ்வொருவருடைய கருத்துக்களைப் பார்க்கும் போது எனது நீண்டநாள் ஆதங்கத்திற்க விடை கிடைக்கும் காலம் நெருங்கி வருகின்றது என்று நம்புகின்றேன். தமிழகக் கலைஞர்களின் படைப்புகள் தொடர்பாக விவாதித்துப் பழக்கப்பட்ட எங்கள் மக்கள் எங்கள் மக்களுடைய படைப்புக்களுக்கு முக்கியத்துவம் கொடுக்கும் நேரம் வந்துவிட்டது என்றும் நம்புகின்றேன்.

நான் அறிந்த வரையில் இதுவரை காலமும் எங்களுடைய எந்தப் படைப்பானாலும் நமது மக்கள் பரவாயில்லை! பிழையில்லை! எண்டாலும் அவங்களைப் போல வராது என்ற விமர்சனத்தை மட்டுமே ஈழத்துப் படைப்புகள் தொடர்பாக, பெரும்பாலானவர்கள் சொல்லிப் பழக்கப்பட்டவர்கள். ஆனால் இன்று இன்றுள்ள எங்கள் இளம் சமுதாயத்தைப் பார்க்கும் போது அது மாறிவிட்டது என்றே எண்ணத்தோன்றுகிறது.

எங்களுடைய படைப்பாளிகளை நான் மேலே குறிப்பிட்டது போன்று முழுமனதோடு ஏற்றுக் கொண்டு ஆழமான விமர்சனங்களை வைக்க வைக்க படைப்புக்களின் தரமும் கனமும் கூடும்.

ஆகவே இது ஆரோக்கியமான பாதை என்றே நினைக்கின்றேன். பார்த்துப் பார்த்துப் பழகி வெறுமன பார்வையாளர்களாகவோ கேட்போராக மட்டும் நின்றுவிடாமல் ஒவ்வொருவரும் தங்களால் இயன்ற வரையில் எங்கள் வாழ்வு சார்ந்த படைப்புக்களை உருவாக்க வேண்டும். படைப்புகளை உருவாக்கும் போது அந்த படைப்பு எப்படிப் பட்ட சூழ்நிலையில் உருவாக்கப்படுகிறது. அந்தப் படைப்பால் நம் சமூகத்திற்கு ஏற்படப்போகும் சாதகங்கள் பாதகங்கள் என்ன? என்ற தெளிவோடும், சிந்தனையோடும் செயற்பட்டால் நம் மக்கள் ஏற்றுக்கொள்வார்கள் என்பதற்கு எங்கள் படைப்பை நான் ஓர் உதாரணமாகவே பார்க்கின்றேன்.

இங்கு யாழ்கள நண்பர் சுகன் குறிப்பிட்டது போன்று. எங்கள் மண் சார்ந்த மக்கள் சார்ந்த வாழ்வியல் பதிவுகளை கலையாகப் படைக்க வேண்டும் என்பதுதான் என்னுடைய நோக்கம். நாங்கள் இந்த இயந்திரமயமான வாழ்க்கையில் எஞ்சி வழிகின்ற மணித்துளிகளில்தான் இப்படி ஆக்கபூர்வமான படைப்புகளை படைக்கமுடிகிறது. நீங்கள் சொல்வதுபோன்று எங்களுக்கென ஒரு தனித்தன்மையை உருவாக்க வேண்டும் என்ற நோக்கோடுதான் நான் இத்துறையை விரும்பி ஏற்றுக்கொண்டுள்ளேன். அதில் எந்தவித மாற்றுக் கருத்துக்கும் இடமில்லை.

எங்களுடைய காதல் கடிதம் இசைத்தொகுப்பில் வந்த இரு பாடல்கள் மிகவும் எம் மக்களிடம் பிரபல்யம் அடைந்ததற்குக் காரணமே அது எங்கள் மக்கள் சார்ந்து மண் சார்ந்து பேசியபடியால் தான். இனி நாங்கள் படைக்கப் போகின்ற ஒவ்வொரு படைப்பும் தமிழ் சார்ந்தும் தமிழ்மக்கள் சார்ந்து பேசும். இதன் பாதை வழியேதான் எங்கள் கலைப்பயணம் செல்கிறது. பனங்காய்ப்பணியாரமே பாடலின் சுழ்நிலை எம்தமிழ் மக்கள் இலங்கை முழுவதும் பரந்து வாழ்கிறார்கள். அங்கு வாழ்கின்ற எல்லா மக்களையும் கவரும் வகையில்தான் இது எழுதப்பட்டது. சிங்கள மக்கள் கேட்க வேண்டும் என்பதற்காக நான் இதை எழுதவில்லை. அரசியல் கண்ணோடத்தோடு கூடிய மனநிலையிலும் எழுதப்படவில்லை. என்பதை மிகவும் தாழ்மையோடும் அன்போடும் தெரிவித்துக் கொள்கின்றேன்.

வருகிற(23.07.2007) திங்கட்கிழமை நான்காவது பாடல் வரிகளுடன் வரும். அதுவரை உங்கள் கருத்துகளை வழங்கக் காத்திருங்கள்.

அன்புடன்

தமிழ்வானம்

Edited July 19, 200718 yr by Tamizhvaanam