ஜாம்ஷிட் ஷர்மாத்தின் மரணதண்டனையை ஈரான் நிறைவேற்றியது

[Kavi arunasalam]

“ஜாம்ஷிட் ஷர்மாத்துக்கு( Jamshid Sharmahd)வழங்கப்பட்ட தீர்ப்பானது முற்றிலும் ஏற்றுக்கொள்ள முடியாத ஒன்று தயவு செய்து தீர்ப்பை மறுபரிசீலனை செய்யுங்கள்” என யேர்மனிய வெளியுறவு அமைச்சர்  அன்னலெனா பேர்பொக் ஈரானைக் கேட்டிருந்தார்.  ஆனால் தான் வழங்கிய தீர்ப்பில் ஈரான் உறுதியாக இருந்தது. யேர்மனி,ஈரான் இரட்டைக் குடியுரிமை பெற்ற  ஷர்மாத்துக்கு, ஈரான் இஸ்லாமியக் குடியரசு இப்போது மரண தண்டனையை நிறைவேற்றியிருக்கிறது.

ஷர்மாத் அவரது ஏழு வயதில் தனது தந்தையுடன் யேர்மனிக்கு இடம் பெயர்ந்தவர். ஷர்மாத் சொந்தமாக ஒரு  மென்பொருள் நிறுவனத்தை நிறுவி நடத்தி வந்திருக்கிறார். 2003 முதல் அமெரிக்காவில் வசித்துக் கொண்டிருந்தார்.

2007இல் ஒரு சைபர் தாக்குதலை நடத்தினார் என்று ஈரான் ஷர்மாத் மேல் குற்றம் சுமத்தியது. அத்துடன் ஈரானுக்கு எதிரான ரொன்டர் (Tondar) இயக்கத்துடன் தொடர்புகளை வைத்திருந்ததாகவும், ரொன்டர் இயக்கத்துக்காக,லொஸ் ஏஞ்சல்ஸை தளமாகக் கொண்ட தொலைக்காட்சி,வானொலி நிகழ்ச்சிகளை இயக்குவதற்கு உதவினார் என்றும் ஈரான் அவர்மேல் குற்றம் சாட்டியிருந்தது.

2020இல்  தொழில் சம்பந்தமான நிகழ்ச்சி ஒன்றில் பங்கு பற்றி விட்டு யேர்மனியில் இருந்து அமெரிக்காவுக்கு விமானத்தில் புறப்பட்ட ஷர்மாத், விமானம் இடைத் தங்கலுக்காக துபாயில் நின்ற போது ஈரானிய உளவாளிகளால் ஈரானுக்குக் கடத்தப்பட்டிருந்தார். ஈரானில் தனிமைச் சிறையில் வைக்கப்பட்ட ஷர்மாத்துக்கு 2023ம் ஆண்டு ஈரான் புரட்சிகர நீதிமன்றம்  மரணதண்டனையை விதித்தது. ஷர்மாத்திற்கு வழங்கப்பட்டஇந்தத் தீர்ப்புக்கு யேர்மனி உடனடியாகவே தனது எதிர்ப்பைத் தெரிவித்திருந்தது. உலகளாவிய ரீதியில் மனித உரிமை அமைப்புகளும்  தங்களது எதிர்ப்பைத் தெரிவித்திருந்தன.

ஈரான் மரண தண்டனைகளை கடுமையாக நடைமுறைப்படுத்தினாலும், மேற்கத்திய வெளிநாட்டவர்களுக்கு மரணதண்டனை நிறைவேற்றப்படுவது மிகவும் அரிதானது. ஆனால் ஷர்மாத்தின் விடயத்தில் அவர் ஈரானிய குடியுரிமையையும் வைத்திருந்ததால் அவருக்கான மரணதண்டனையை ஈரானால் நிறைவேற்ற முடிந்திருக்கிறது.

சிறையில் பார்கின்சன் நோயால் பாதிக்கப்பட்ட 69 வயதான தனது தந்தையை விடுவிக்க ஷர்மாத்தின் மகள் கெஸல் இறுதிவரை போராடினர். அவரது போராட்டமும் பலனில்லாமல் போனது. 28.10.2024 அதிகாலை ஷர்மாத், அவருக்கு விதிக்கப்பட்ட  தண்டனைக்காக  தூக்கிலிடப்பட்டார் என ஈரான் அறிவித்திருக்கிறது.

சில ஆண்டுகளாக ஈரானுக்கும் யேர்மனிக்கும்  இடையே நல்ல உறவுகள் இருக்கவில்லை. இப்பொழுது இன்னும் மோசமான நிலை ஏற்படலாம் என யேர்மனிய வெளிவிவகார அமைச்சர் அன்னலெனா பேர்பொக் தெரிவித்திருக்கிறார்.

https://www.spiegel.de/ausland/jamshid-sharmahd-iran-weist-deutschlands-kritik-an-hinrichtung-zurueck-a-dd4d9b9d-e8b0-4a5e-bdd0-4c5f8edc748a

[குமாரசாமி]

1 hour ago, Kavi arunasalam said:

சில ஆண்டுகளாக ஈரானுக்கும் யேர்மனிக்கும்  இடையே நல்ல உறவுகள் இருக்கவில்லை. இப்பொழுது இன்னும் மோசமான நிலை ஏற்படலாம் என யேர்மனிய வெளிவிவகார அமைச்சர் அன்னலெனா பேர்பொக் தெரிவித்திருக்கிறார்.

முன்னரெல்லாம் ஜேர்மனியில் அரசியல் முதிர்ச்சியும்,உலக அனுபவமும் உள்ளவர்கள் தான் அரசியல்வாதிகளாகவும் அமைச்சர்களாகவும் உயர் அதிகாரிகளாகவும் இருந்தனர். அவர்கள் பல உலக குழப்ப நிலைகளிலும் சகல நாடுகளுடனும் நல்ல உறவையே வைத்திருந்தார்கள்.வியாபார ரீதியிலும் எல்லா நாடுகளுடனும்  சுமுக நிலையிலேயே இருந்தார்கள்.
ஆனால் இன்று இருக்கும் அரசியல்வாதிகள் சொந்த நாட்டையே கட்டுப்பாட்டுக்குள் வைத்திருக்க முடியாமல் திணறுகின்றார்கள்.பல நாடுகளுடன் நல்லுறவும் இல்லை.

அன்னலேனா பேர்பொக் சொல்லி வேலையில்லை.ஒரு முட்டாள்த்தனமான வெளிவிவகார அமைச்சர்.😂

 

[நியாயம்]

15 hours ago, Kavi arunasalam said:

2020இல்  தொழில் சம்பந்தமான நிகழ்ச்சி ஒன்றில் பங்கு பற்றி விட்டு யேர்மனியில் இருந்து அமெரிக்காவுக்கு விமானத்தில் புறப்பட்ட ஷர்மாத், விமானம் இடைத் தங்கலுக்காக துபாயில் நின்ற போது ஈரானிய உளவாளிகளால் ஈரானுக்குக் கடத்தப்பட்டிருந்தார்.

 

இடைவெளியில் துபாயில் வைத்து எவ்வாறு கடத்தினார்கள்? இவர் துபாய் வரும் செய்தி எப்படி கிடைத்தது? அரச புலனாய்வு அமைப்புக்கள் ஒருவருக்கொருவர் சளைத்தவர்கள் அல்ல போலும்.