அரசியல் கட்சிகள்

அரசியல் கட்சிகள்

[12 - June - 2008]

கடந்த சட்டப்பேரவைத் தேர்தலில் தமிழகத்தில் அதிகாரபூர்வமான சின்னத்துடனும், சுயேச்சை சின்னத்துடனும் போட்டியிட்ட கட்சிகளின் மொத்த எண்ணிக்கை எழுபதுக்கும் அதிகம். இதில் பல கட்சிகள் தேர்தல் நேரங்களில் மட்டுமே தாங்கள் இருப்பதை நினைவுபடுத்துகின்றன. இருக்கின்ற இத்தனை கட்சிகளும் போதாது என்று புதிது புதிதாக கட்சிகள் தொடங்கப்படுகின்றன. அந்த வரிசையில் சமீபத்திய வரவு நடிகர் கார்த்திக்கின் அகில இந்திய நாடாளும் மக்கள் கட்சி.

நாடாளும் வாய்ப்பை மக்கள் இந்தக் கட்சிக்கு அளிக்கிறார்களோ இல்லையோ, தங்களது கட்சி நாடாளும் மக்கள் கட்சி என்று தங்களுக்குத் தாங்களே சொல்லி சந்தோஷப்பட்டுக் கொள்ளலாம் என்பதால்தான் இந்தப் பெயரை நடிகர் கார்த்திக் தேர்ந்தெடுத்தாரோ என்னவோ! இந்தப் புதிய கட்சியைப் பற்றி குறிப்பிட வேண்டிய விஷயம் என்னவென்றால், கட்சியின் கொடியில் பசும்பொன் முத்துராமலிங்கத் தேவரின் உருவப்படத்தைப் போட்டு, தனக்கும் தனது கட்சிக்கும் அழுத்தமான "ஜாதி' பின்னணியை ஏற்படுத்திக் கொள்ள நடிகர் கார்த்திக் முனைந்திருக்கிறார் என்பதுதான்.

நடிகர்கள் கட்சி தொடங்குவதில் நாம் எந்தவித தவறும் காண முடியாது. மக்கள் மத்தியிலும் ரசிகர்கள் மத்தியிலும் தனக்கென ஒரு செல்வாக்கை ஒரு சில நடிகர்கள் தாங்கள் ஏற்கும் கதாபாத்திரங்கள் மூலமாகவும், தங்களது ரசிகர் மன்றங்களின் செயல்பாடுகள் மூலமாகவும் ஏற்படுத்திக் கொள்வது புதிதல்ல. நிழல் கதாபாத்திரங்களை நிஜமென்று நம்பி மக்கள் ஏமாறுகிறார்கள் என்பதைவிட, நிஜக் கதாபாத்திரங்களான நமது அரசியல்வாதிகளின் செயல்பாடுகளில் நம்பிக்கை இழப்பதால் நிழலில் நிஜத்தைத் தேடுகிறார்கள் என்பதுதான் உண்மை.

மக்களின் எதிர்பார்ப்புக்களையும், உணர்வுகளையும் புரிந்து செயல்பட எம்.ஜி.ஆர்., என்.டி.ராமராவ் போன்ற நடிகர்களுக்கு முடிந்தது என்பதால், அரிதாரம் பூசும் ஒவ்வொரு நடிகரும் தங்களை அரசியல் தலைவராகவும், அரியணை ஏறும் தகுதி படைத்தவராகவும் கருதத் தொடங்கிவிட்டனர். மக்களாட்சியின் இறுதி முடிவு மக்களின் கையில்தான் இருக்கிறது என்பதால், கட்சி தொடங்கும் நடிகரெல்லாம் ஆட்சியைப் பிடித்துவிட முடியாது என்று நாம் சமாதானப்பட்டுக் கொள்ளலாம்.

நடிகர் கார்த்திக்கின் அரசியல் பிரவேசம் புதியதல்ல. கடந்த சட்டப்பேரவைத் தேர்தலில், அவரது தலைமையில் அகில இந்திய பார்வர்ட் பிளாக் கட்சி தனித்துபோட்டியிட்டு, ஒரு தொகுதியில் கூட டெபாசிட் தொகையைப் பெறாவிட்டாலும், 19 தொகுதிகளில் அ.தி.மு.க ம.தி.மு.க. கூட்டணியின் வெற்றி வாய்ப்பைத் தடுக்க முடிந்தது என்பதை நாம் மறந்துவிடக் கூடாது. அ.தி.மு.க. அணியில் கார்த்திக் இருந்திருந்தால், தி.மு.க. தனித்து ஆட்சி அமைத்திருக்குமா என்பது சந்தேகம் தான்.

அதற்காக, நடிகர் கார்த்திக் ஒரு பெரிய சக்தி என்றோ, அவரது கட்சி தமிழக அரசியலில் மிகப்பெரிய மாற்றத்தை ஏற்படுத்திவிடும் என்றோ அர்த்தமல்ல. எந்தவித கொள்கை அல்லது இலட்சியத்தின் அடிப்படையிலும் கட்சி தொடங்காமல் ஜாதியின் அடிப்படையில் ஒரு கட்சியைத் தொடங்கி இருக்கும் நடிகர் கார்த்திக், தனக்குப் பின்னால் முக்குலத்தோர் சமுதாயமே அணிதிரளும் என்று கருதுவாராயின், அவருக்கு மிஞ்சுவது ஏமாற்றமாகத்தான் இருக்கும்.

அகில இந்திய பார்வர்ட் பிளாக் கட்சியின் தலைவராக இருந்த பி.கே.மூக்கையா தேவரின் மறைவுக்குப் பிறகு, நடிகர் முத்துராமன் முக்குலத்தோர் சங்கத்தில் மிகுந்த ஆர்வம் காட்டியது மட்டுமல்லாமல், பல்வேறு நிகழ்ச்சிகளிலும் கலந்து கொண்டார் என்பதால் அந்தச் சமுதாய மக்கள் மத்தியில் அவருக்கு நன்மதிப்பு இருந்தது உண்மை. அதுவே தனக்கு மூலதனம் என்று நடிகர் கார்த்திக் கருதுவது பூனை கண்ணை மூடிக்கொண்ட கதையாகத்தான் இருக்கும்.

நடிகர்கள் தங்களுக்கு இருக்கும் கவர்ச்சியையும், ரசிகர்கள் மத்தியில் இருக்கும் செல்வாக்கையும், சினிமாவில் நடித்ததன் மூலம் சம்பாதித்த பணத்தையும் பயன்படுத்தி சமுதாயக் கடமையாற்ற முனைவது வரவேற்கப்பட வேண்டிய விஷயம். காரணம், நடிகர்களின் கவர்ச்சியும் செல்வாக்கும் ஜாதி மதங்களைக் கடந்து அனைத்துத் தரப்பினரையும் ஒருங்கிணைக்கும் வல்லமை படைத்தது என்பதால். இதனால் சமூக நல்லிணக்கம் ஏற்பட வாய்ப்பிருக்கிறது.

அதை விட்டுவிட்டு, நடிகர்கள் தங்களது ஜாதி பலத்தை நம்பி அரசியல் கட்சி தொடங்கி, அதிலிருந்து ஆதாயம் தேட முயல்வது என்பது வன்மையாகக் கண்டிக்கப்பட வேண்டிய ஒன்று. "பசும்பொன்' முத்துராமலிங்கத் தேவர் ஒரு மிகச் சிறந்த தேசியவாதியாகவும், ஆன்மிகவாதியாகவும் திகழ்ந்தவர். அவருக்கு ஜாதி முத்திரை குத்தியது போதாதென்று, அவரை வைத்து அரசியல் ஆதாயமும் தேட முயல்வது ஏற்புடையதல்ல.

ஒருவர் பின் ஒருவராக நடிகர்கள் கட்சி தொடங்குகிறார்கள். தி.மு.க.கூட்டணி, அ.தி.மு.க.கூட்டணி போல விரைவிலேயே நடிகர்கள் கூட்டணி ஒன்று உருவாகுமோ என்னவோ....!

தினமணி ஆசிரிய தலையங்கம் 11 ஜூன் 2008

thinakural.com