அரசியல், படைத்துறை இராஜதந்திர பலத்தை வெளிப்படுத்திய புலிகளின் போர் நிறுத்த அறிவிப்பு

அரசியல், படைத்துறை இராஜதந்திர பலத்தை வெளிப்படுத்திய புலிகளின் போர் நிறுத்த அறிவிப்பு

[ஞாயிற்றுக்கிழமை, 27 யூலை 2008, 07:34 பி.ப ஈழம்] [வவுனியாவிலிருந்து த.சுகுணன்]

தமிழீழ விடுதலைப் புலிகளின் போர் நிறுத்த அறிவிப்பானது அரசியல், படைத்துறை இராஜதந்திர பலத்தை வெளிப்படுத்துகின்றது என்று விடுதலைப் புலிகளின் தூயவன் அரச அறிவியல் கல்லூரியின் முதல்வர் அரசண்ணா தெரிவித்துள்ளார்.

முல்லைத்தீவு மாவட்டத்தில் உள்ள விசுவமடுவில் நேற்று சனிக்கிழமை நடைபெற்ற புலிகளின் குரலின் முத்தமிழ் கலையரங்க நிகழ்வில் சிறப்புரையாற்றும் போது அவர் மேலும் தெரிவித்ததாவது:

சிறிலங்கா வான்படையின் தாக்குதல் விசுவமடுவில் இன்று மாலை இடம்பெற்றது. அதற்கு அடுத்ததாக இக்கலையரங்கு நிகழ்வு நடைபெறுகின்றது

தமிழர்கள் மீது நடத்தப்படுகின்ற தாக்குதலை முறியடித்து தமிழர்களின் இயல்பு வாழ்க்கையையும் விடுதலை வாழ்க்கையையும் நடத்தவேண்டிய நிலையில் உள்ளோம்.

முத்தமிழை வகுத்த எமது முன்னோர்கள் தொடர்பிலும் இம்மண்ணில் வாழ்கின்ற தமிழர்களை எதிரி என்ன செய்ய நினைக்கின்றான்? எதிரி ஏன் தொடர்ச்சியாக தாக்குதலை நடத்துகின்றான் என்பது தொடர்பிலும் தமிழீழ விடுதலைப் புலிகள் போர் நிறுத்தத்தை செய்து ஒரு பெறுமானத்தை அடைந்திருக்கின்றனர் என்பது தொடர்பிலும் தெரிந்துகொள்ள வேண்டிய நிலையில் நாம் உள்ளோம்.

தமிழர்களுக்கு ஒரு பிரச்சினையும் இல்லாத சூழலில் இம்முத்தமிழ் கலையரங்கத்தை நிகழ்த்துவோமாக இருந்தால் எனது சிறப்புரை கூட வேறுவிதமாக அமைந்திருக்கும்.

ஆனால், நெருப்பு எரிகின்ற தேசத்தில் நெருப்பை எரிக்கின்ற அரக்கர்களுடன் போராடிக்கொண்டு நிகழ்த்தப்படும் முத்தமிழ் கலையரங்கம் என்பதால் இந்நிகழ்வு சிறப்பாக நடைபெறுகின்றது.

முத்தமிழ் கலையரங்கு என்பது புலிகளின் குரல் வானொலி தன்னை மக்களுக்குளே நிறுவிக்கொண்டதன் அடையாளமாக இந்நிகழ்வு அமைகின்றது.

ஓர் ஊடகமாக தனக்கென்றே அமைக்கப்பட்ட நிலையத்தில் இருந்துகொண்டு மக்களின் வீடுகளுக்குச் செல்கின்ற புலிகளின் குரல் வானொலி மக்களுக்குள்ளே தனது கரத்தை நீட்டியிருக்கின்றது.

இன்று மாலையில் சிறிலங்கா வான்படையின் தாக்குதலினால் மக்கள் கூடுவர்களோ என்ற ஜயப்பாட்டிற்கு மத்தியில் வான்படையின் அச்சம் இல்லாமல் பெருமளவு மக்கள் நிகழ்வுக்கு கூடியிருக்கின்றனர் எனில், புலிகளின் குரல் ஊடகம் மக்களிடம் எவ்வளவு தூரம் இணைந்திருக்கின்றது என்பதனை புரிந்துகொண்டு பாராட்டாமல் இருக்கமுடியாது

இன்று ஒரு பயங்கரமான சூழ்நிலை. நெஞ்சத்தை கவ்விப்பிடித்து இறுக்கிப் பிடிக்கின்ற நிகழ்ச்சிகள்.

ஆனால் எந்த நிகழ்வுகளுக்குள்ளும் சோர்ந்து போய்விடமாட்டோம் என்பதை வெளிப்படுத்துகின்ற ஓர் குறியீடாக இன்றைய நிகழ்வை பார்க்கலாம் என்றார் அவர்.

புலிகளின் குரலின் விசுவமடு கோட்ட வானொலி மன்ற முத்தமிழ் கலையரங்கம் கோட்ட அரசியல்துறையின் ஒத்துழைப்புடன் நேற்றிரவு 7:30 மணிக்கு மன்றத் தலைவர் மு.கந்தசாமி தலைமையில் நடைபெற்றது.

நிகழ்வில் கலை நிகழ்ச்சிகள் மற்றும் சங்கநாதம் சிறப்பு அரங்காற்றுகை ஆகியன இடம்பெற்றன.

புதினம்