புலிகள் இயக்கத்திலிருந்து விலகிய 5000 பேரை உடன் இணையுமாறு கோரிக்கை

புலிகள் இயக்கப் படையில் நீண்ட காலம் உறுப்பினராக இருந்து பின்னர் அனுமதி பெற்று விலகிச் சென்றவர்களை உடனடியாக மீண்டும் இயக்கத்தில் வந்து சேர்ந்து கொள்ளும்படி புலிகள் இயக்கத் தலைமைத்துவம் உத்தரவிட்டுள்ளதாகத் தெரிவிக்கப்பட்டுள்ளது. இவ்வாறு விலகிச் சென்றோரில் பெரும்பகுதியினர் பின்னர் திருமணம் செய்து மனைவி பிள்ளைகளுடன் வாழ்ந்து வருவதுடன் ஏனையோர் தமது பெற்றோர் அல்லது குடும்பத்தினருடன் வாழ்ந்து வருகின்றனர். மேலும் குறிப்பிட்ட தொகையினர் புலிகளின் பிரதேசங்களிலிருந்து தப்பியோடியுள்ளதுடன் ஒரு பகுதியினர் புலிகள் இயக்கம் நடத்திவரும் நிலையங்கள் நிறுவனங்களில் தொழில் செய்து வருகின்றனர்.

தற்போது இவர்கள் அனைவரையும் குடும்பஸ்தர்களாக இருந்தாலென்ன இல்லாவிட்டாலென்ன உடனே இயக்கத்தில் மீண்டும் வந்து சேரும்படி புலிகள் இயக்கம் கட்டளையிட்டுள்ளது. ஏற்கனவே இறுதி யுத்தத்திற்காக இயக்கத்தில் சேர்ந்து யுத்தப்பயிற்சிகளைப் பெறும்படி கிளிநொச்சி, முல்லைத்தீவு பிரதேசங்களில் வாழும் அனைத்துப் பொதுமக்களுக்குக் உத்தரவிட்ருந்தது. இதனைத்தொடர்ந்து பெருந்தொகையான பொதுமக்களுக்கு கட்டாயமாக யுத்தப் பயிற்சிகளை புலிகள் இயக்கம் வழங்கியுள்ளது.

இந்நிலையில் தற்போது இயக்கத்திலிருந்து விலகிச் சென்றவர்களை மீண்டும் உடனே வந்து இறுதி யுத்த நடவடிக்கைக்குத் தயாராகும்படி புலிகள் இயக்கம் உத்தரவிட்டுள்ளது. இவ்வாறு விலகிச் சென்றோரில் கிளிநொச்சி, முல்லைத்தீவு புலிகளின் பிரதேசங்களில் ஆண்களும் பெண்களுமாகத் தற்போது சுமார் 5000 பேர் வரையில் இருப்பதாக தெரியவந்துள்ளது. இவர்கள் முறையான யுத்தப் பயிற்சிகளைப் பெற்றவர்களாகவும் பல்வேறு தாக்குதல் நடவடிக்கைகளிலும் பங்கெடுத்த அனுபவம் உடையவர்களாகவும் இருப்பதால் தற்போது யுத்தத்தைத் தொடர்ந்து நடத்துவதற்கு ஏற்ற தலைவர்களும் போராளிகளும் இல்லாத ஆட்பஞ்சத்திற்கு முகம் கொடுத்திருக்கும் நிலையில் புலிகள் இயக்கத் தலைமைத்துவம் இவ்வாறு விலகிச் சென்றவர்களை மீண்டும் சேர்க்க முடிவெடுத்திருப்பதாகத் தெரிய வந்துள்ளது. மேற்படி விலகிச் சென்றவர்கள் அனைவரும் ஏற்கனவே புலிகளின் யுத்த நடவடிக்கைகளில் 5 முதல் 10 வருடங்கள் வரையில் ஈடுபட்டவர்களாகும்.

மேலும் இவ்வாறு இயக்கத்திலிருந்து விலகிச் சென்றவர்கள் மீண்டும் யுத்தம் செய்ய விரும்பாதவர்களாகவே இருப்பதாகவும் இதனாலேயே புலிகள் இயக்கத் தலைமைத்துவம் கட்டாயமாக மீண்டும் வந்து சேரும்படி உத்தரவிட்டிருப்பதாகவும் தெரிவிக்கப்பட்டுள்ளது. இவ்வாறு மீண்டும் சேர அவர்கள் தயங்கும் பட்சத்தில் அவர்களைத் தேடிப் பிடிப்பதற்கும் இயக்கத்தினர் ஏற்பாடு செய்துள்ளார். விலகிச் சென்றவர்கள் ஏற்கனவே யுத்தப் பயிற்சி பெற்றவர்களாக இருந்தாலும் பெற்றோர்களாகவும் கூடிய வயதினராகவும் இருக்கும் இவர்கள் யுத்தப் பயிற்சிகளை மறந்திருப்பார்கள் என்பதால் மீண்டும் அவர்களுக்கு "ஞாபகமூட்டல் யுத்தப்பயிற்சி' என்ற பெயரில் பயிற்சிகளை புலிகள் இயக்கத் தலைமைத்துவம் ஆரம்பித்துள்ளது.

புலிகள் இயக்கத்தின் புலிகளின் குரல் வானொலி மூலம் இவ்வாறு விலகிச் சென்றவர்கள், தப்பியோடியவர்களை இறுதி யுத்தத்திற்காக மீண்டும் வந்து இணைந்து கொள்ளும்படி அறிவித்தல் கடந்த 17 ஆம் திகதி விடப்பட்டுள்ளது. மேற்படி வானொலியும் மற்றும் புலிகள் இயக்க இணையத்தளங்கள் உட்பட ஊடகங்களும் தகவல் தெரிவிக்கையில் வன்னியை ஆக்கிரமிக்க முன்னேறிவரும் அரச படையினருடன் நேருக்கு நேர் புலிகள் இயக்கப் பிரதான படையணிகள் மோதவுள்ளதாகவும் இதற்கான உதவிப் படையணிகளாகவே தற்போது பொது மக்கள் இணைந்த மக்கள் படையணி உருவாக்கப்பட்டிருப்பதாகவும