விஞ்ஞான ஆய்வை மேற்கொள்ளும் கெஹலிய ரம்புக்வெல

வன்னியில் இரண்டரை லட்சத்திற்கும் குறைவான மக்களே இருக்கின்றனர் - அமைச்சர் கெஹலிய ரம்புக்வெல

இராணுவக்கட்டுப்பாடற்ற வன்னிப்பகுதியில் 2 லட்சத்து ஐம்பதாயிரத்திற்கும் குறைவானவர்களே இருக்கக்கூடும் என அமைச்சரும் தேசிய பாதுகாப்பு விவகாரப் பேச்சாளருமான கெஹலிய ரம்புக்வெல்ல தெரிவித்துள்ளார்.

கொள்ளுப்பிட்டியிலுள்ள தேசிய பாதுகாப்பிற்கான ஊடக மத்திய நிலையத்தில் நடைபெற்ற செய்தியாளர் மாநாட்டில் வன்னியிலுள்ள மக்கள் தொகைகுறித்து ஊடகவியலாளர் எழுப்பிய கேள்விக்கு பதிலளிக்கையிலேயே அமைச்சர் இவ்வாறு கூறினார்.

அவர் மேலும் கூறியதõவது:

என்னால் எண்ணிக்கையைக் கூற முடியாது. ஆனால், நிச்சயமாக இரண்டரை லட்சம் மக்கள் அங்கில்லை. இந்தவிடயத்தில் நான் விஞ்ஞானபூர்வமான ஒரு ஆய்வை மேற்கொண்டுள்ளேன். கிளிநொச்சி வீழ்ச்சியடைந்தபோது குறிப்பாக அந்தக்காலப்பகுதிக்குள் வீழ்ச்சியடையும் என ஒருபோதும் எதிர்பார்க்கவில்லை.

அந்தக்காலப் பகுதிக்குள்ளாக அங்கிருந்த சுமார் ஒருலட்சம் வரையான மக்களை முல்லைத்தீவு காட்டுப்பகுதிக்கு கொண்டுசெல்லவது மனித சக்திக்குட்பட்ட வகையில் இயலாது என்பதே எனது கருத்து. அடுத்ததாக கடந்த 10 மாத காலப்பகுதியை எடுத்துக்கொண்டால் வெள்ளவத்தை முதற்கொண்டு சிலாபம் வரையான கடற்கரைப்பகுதிகளில் வந்து குடியேறியவர்களை எடுத்து நோக்கினால் அதிக எண்ணிக்கையான தமிழ் மக்கள் அங்கு வாழ்ந்து வருகின்றனர். நாம் அது தொடர்பில் எண்ணிக்கையை வைத்துள்ளோம்.

கொழும்பு மாநகரசபை பகுதியை எடுத்துப்பார்த்தால் இங்கு 67 வீதமானோர் சிறுபான்மையினராக் காணப்படுகின்றனர். அந்தவகையில் அந்தப்பகுதியில் இருந்து மக்கள் இந்தப் பகுதிக்கு வந்துகுடியேறியுள்ளமை தெளிவாகின்றது.

விடுதலைப்புலிகளால் கட்டவிழ்த்துவிடப்பட்ட அடக்குமுறை நடவடிக்கைகள், ஏற்படுத்தப்பட்ட துன்பங்கள் என்பனவே அவர்கள் இங்கு வருவதற்கு காரணமாகும். யாரெல்லாம் அங்கிருந்து வெளியேறக் கூடியதாகவிருந்ததோ அவர்களெல்லாம் அங்கிருந்து வெளியேறிவந்துவிட்டனர் என்பதே எனது கணிப்பு.

இதேவேளை, முகமாலையில் பாதுகாப்பு அரண்களை முற்றாகக் கைப்பற்றி எமது நிலைகளை பலப்படுத்தியுள்ளோம். அங்கிருந்து எதிர்காலத்தில் முன்னேறிச் செல்வோம். ஆனையிறவிற்கு தென்பகுதியிலும் நாம் எமது நிலைகளைப்பலப்படுத்தி முன்னேறிச்சென்று கொண்டிருக்கின்றோம்.

முகமாலை மற்றும் ஆனையிறவு வீழ்ச்சியடைவது தவிர்க்கப்பட முடியாதது என்பதை தற்போதைய நிலையில் எவ்வித அச்சமுமின்றி மிகுந்த நம்பிக்கையுடன் என்னால் கூறமுடியும் என்றார்.

-வீரகேசரி நாளேடு -

Edited January 7, 200917 yr by Kuddi thampi