சிறிலங்காவிற்கான கடனுதவியை தடுக்குமாறு அமெரிக்க அமைச்சின் கோரிக்கை

சிறிலங்காவிற்கான கடனுதவியை தடுக்குமாறு அமெரிக்க அமைச்சின் கோரிக்கை

திகதி: 18.07.2009 // தமிழீழம்

சர்வதேச நாணய நிதியம் சிறிலங்காவிற்கு கடனுதவி வழங்குவதை அமெரிக்க திறைசேரி அமைச்சர் முழுமையாகத் தடுக்கவேண்டுமென விரைவில் நிறைவேற்றப்படவிருக்கும் அமெரிக்க வெளிவிவகார அமைச்சின் நிதி ஒதுக்கீட்டு சட்டமூலத்தில் குறிப்பிடப்பட்டுள்ள தகவலை இணையத்தளங்கள் வெளியிட்டுள்ளன.

உள்நாட்டில் இடம் பெயர்ந்தவர்களை சிறிலங்கா, சர்வதேச தரத்திற்கு அமைய நடத்துகின்றது என்பதையும், அவர்களது நடமாட்டச் சுதந்திரத்தை உறுதி செய்துள்ளது என்பதையும் வெளிவிவகார அமைச்சர் ஹிலாரி கிளின்டன் உறுதி செய்து உத்தரவாதம் அளிக்கும் வரை சிறிலங்காவிற்கு கடனுதவி வழங்குவதற்குத் திறைசேரி அமைச்சு அனுமதியளிக்கக் கூடாது என்றும் தெரிவிக்கப்பட்டுள்ளது.

தேசிய நல்லிணக்கம், நீதியை உரிய முறை யில் கடைபிடித்தல் மற்றும் அரசமைப்பின் அடிப்படையில் வடக்கு கிழக்கு மாகாணங்களுக்கு அதிகாரத்தைப் பகிர்ந்தளித்தல் என்பனவற்றில் சிறிலங்கா சிறப்பாக செயற்படுகிறது என அமெரிக்க வெளிவிவகார அமைச்சு உறுதிப்படுத்தும் நிலை ஏற்படவேண்டும் என்றும் வலியுறுத்தப்பட்டுள்ளது.

ஜனநாயகக் கட்சியின் செனெட்டர் பட்ரிக் லீகி சிறிலங்கா குறித்த இந்த நிபந்தனைகளை முன் வைத்துள்ளார் எனவும், இதன் காரணமாக சிறிலங்காவிற்கு விரைவில் சர்வதேச நாணய நிதியக் கடன் கிடைப்பதற்கான சந்தர்ப்பங்கள் அற்றுப் போயுள்ளன எனவும் அமெரிக்க காங்கிரஸ் உறுப்பினர்கள் குறிப்பிட்டுள்ளனர்.

மேலும் ஜனவரி முதல் மே மாதம் வரையான காலப்பகுதிக்குள் இலங்கையில் இடம்பெற்ற யுத்தக் குற்றங்கள் குறித்து அமெரிக்க காங்கிரஸை அறிக்கை சமர்ப்பிக்குமாறும் பட்ரிக் லீகி கேட்டுள்ளார்.

இதேவேளை, அமெரிக்க வெளிவிவகார நிதி ஒதுக்கீட்டு சட்டமூலத்தில் மேலும் தெரிவிக்கப்பட்டுள்ளவை வருமாறு: வெளிநாட்டு இராணுவ நிதி வழங்குதல் திட்டம் எனும் இந்தச் சட்டத்தின் கீழ் ஒதுக்கப்பட்ட எந்த நிதியும் சிறிலங்காவிற்கு உதவியாக வழங்கப்படக்கூடாது. எவ்வித பாதுகாப்பு ஏற்றுமதி அனுமதிப்பத்திரமும் வழங்கப்படக்கூடாது.

இந்தச் சட்டமூலத்திலோ அல்லது வேறு எந்தச் சட்டமூலத்திலோ குறிப்பிட்டுள்ளதன் அடிப்படையில் சிறிலங்காவிற்கு இராணுவ உபகரணங்களையோ, தொழில்நுட்பங்களையோ விற்கக் கூடாது; பரிமாறக்கூடாது. சிறிலங்கா அரசு பின்வரும் நடவடிக்கைகளை எடுத்துள்ளது என வெளிவிவகார அமைச்சர் நிதி ஒதுக்கீட்டு குழுவிற்கு உறுதிப்படுத்தும் வரை திறைசேரி அமைச்சு, சிறிலங்காவிற்கு கடனுதவி வழங்குவதை ஆதரிக்கக்கூடாது.

1. சர்வதேச ரீதியாக அங்கீகரிக்கப்பட்ட மனித உரிமைகள் மற்றும் சர்வதேச மனிதாபிமான சட்டங்களை மீறினர் என நம்பகத்தன்மை மிக்க விதத்தில் குற்றஞ்சாட்டப்பட்ட இராணுவத்தினரை சிறிலங்கா அரசு இடைநிறுத்துகின்றது; நீதியின் முன் நிறுத்துகின்றது என வெளிவிவகார அமைச்சர் உறுதி வழங்கவேண்டும்.

2. இலங்கையில் ஐ.நா. மனித உரிமை ஆணைக்குழுவை அமைப்பதற்கும் அது நாடு முழுவதிலும் விசாரணைகளை மேற்கொள்வதற்கும் கொழும்பு அனுமதி வழங்கியது என உறுதிப்படுத்தவேண்டும்.

3. இலங்கை இடம்பெயர்ந்தவர்களை சர்வதேச தராதரத்தின்படி நடத்துகின்றது. அவர்களுடைய நடமாட்டச் சுதந்திரத்தை உறுதி செய்துள்ளது. மோதல் நடைபெற்ற இடங்களுக்கும் மக்களிடமும் செல்வதற்கு மனிதாபிமான அமைப்புகளுக்கும் அனுமதி வழங்குகின்றது என்பன குறித்து வெளிவிவகார அமைச்சு உத்தரவாதம் வழங்கவேண்டும்.

4. அமெரிக்க திறைசேரி அமைச்சர் சர்வதேச நிதி அமைப்புகளிலுள்ள அமெரிக்க நிறைவேற்று இயக்குநர்களை சிறிலங்காவிற்கு எவ்வித கடன் அல்லது வேறு நிதியுதவி வழங்குவதற்கு எதிராக வாக்களிக்க வேண்டும் என அறிவுறுத்தவேண்டும்.

5. சிறிலங்கா இதற்கான தேவைகளை பூர்த்தி செய்துள்ளது என அமெரிக்க வெளிவிவகார அமைச்சர் உத்தரவாதம் அளிக்கும் வரை அவர் இதனை மேற்கொள்ளவேண்டும்.

என்றுள்ளது.

sankathi