கிளிநொச்சி முன்னாள் அரச அதிபரைத் தொடர்ந்து மேலும் பல அரச அதிகாரிகள் விரைவில் கைதாவர்: காவல்துறை

தமிழீழ விடுதலைப் புலிகளுக்கு உதவினார்கள் என்ற குற்றச்சாட்டின் கீழ், வடக்கில் பணியாற்றும் மேலும் பல அரச அதிகாரிகள் கைது செய்யப்பட உள்ளனர் என்று சிறிலங்கா காவல்துறையினர் தெரிவிக்கின்றனர்.

கிளிநொச்சி முன்னாள் அரச அதிபர் நாகலிங்கம் வேதநாயகம் அண்மையில் பயங்கரவாதத் தடுப்புப் பிரிவு காவல்துறையினரால் கைது செய்யப்பட்டார். விடுதலைப் புலிகளுடன் அவருக்கு இருந்த தொடர்புகள் குறித்து அவரிடம் அதிகாரிகள் விசாரணை நடத்தி வருகின்றனர்.

கைது செய்யப்பட்ட விடுதலைப் புலிகள் இயக்க உறுப்பினர்கள் வழங்கிய தகவல்களின் அடிப்படையிலேயே அவர் கைது செய்யப்பட்டார் என்று தெரிவிக்கப்படுகின்றது.

வேதநாயகம் வழங்கிய தகவல்களின் அடிப்படையில் மேலும் கைது செய்யப்பட உள்ள அரச அதிகாரிகளின் பட்டியல் தயாரிக்கப்பட்டுள்ளதாக காவல்துறை அதிகாரி ஒருவர் தெரிவித்தார்.

வன்னியில் விடுதலைப் புலிகளின் கட்டுப்பாட்டுப் பகுதிகளில் வசித்த மக்களுக்காக அரசு அனுப்பி வந்த உணவு மற்றும் மருந்துப் பொருட்களில் 60 விழுக்காட்டினை புலிகளின் பயன்பாட்டுக்கு என வேதநாயகம் வழங்கியமை முதற்கட்ட விசாரணைகளில் தெரிய வந்ததாக காவல்துறையினர் கூறுகின்றனர்.

அரச பதவிகளில் வெற்றிடம் ஏற்பட்டபோது புலிகளின் உறுப்பினர்களை அப்பதவிகளுக்கு அவர் நியமித்தார் என்றும், புலிகளின் உத்தரவின் பேரிலேயே அவர் அதனைச் செய்தார் என்றும் காவல்துறையினர் மேலும் கூறுகின்றனர்.

விடுதலைப் புலிகளின் பணிகளை ஆற்றுவதற்கு அரச பணியாளர்களை கிளிநொச்சி முன்னாள் அரச அதிபர் அனுமதித்தார் என்றும் காவல்துறையினர் குற்றம்சாட்டுகின்றனர்.

புதினம்