திருமலையில் புதிய காணிப் பதிவுகள் அனைத்தும் இரத்து: அரச அதிபர் நடவடிக்கை

திருகோணமலை மாவட்டத்தில் அண்மையில் புதிதாக மேற்கொள்ளப்பட்ட காணிப் பதிவுகள் அனைத்தையும் இரத்துச் செய்யும்படி அரச அதிபரான ஓய்வுபெற்ற மேஜர் ஜெனரல் றஞ்சித் சில்வா உத்தரவிட்டுள்ளார்.

சட்டவிரோதமாக காணிகள் விற்பனை செய்யப்படுவதைத் தடைசெய்வதை உள்நோக்கமாகக் கொண்டு இந்த தடை உத்தரவு பிறப்பிக்கப்பட்டுள்ளதாகத் தெரிவிக்கப்படுகின்றது.

கிழக்கு தமிழ் அரசியல்வாதிகளினால் உப்புவெளியில் உள்ள கடற்கரையோர காணிகள் சட்டத்திற்குப் புறம்பாக விற்பனை செய்யப்பட்டதாக எழுப்பப்பட்ட குற்றச்சாட்டுக்கள் குறித்த விசாரணைகள் முழுமையாகும் வரைக்கும் இந்தத் தடை உத்தரவு நடைமுறையில் இருக்கும்.

இந்த மோசடிக் குற்றச்சாட்டு தொடர்பாக விசாரணைகளை மேற்கொள்வதற்கு என இரு குழுக்கள் நியமிக்கப்பட்டுள்ளன. குற்றத் தடுப்புப் புலனாய்வுத்துறையைச் சேர்ந்த ஒரு குழு கொழும்பில் இருந்து திருகோணமலைக்கு அனுப்பப்பட்டுள்ளது என காவல்துறை பேச்சாளர் நிமல் மிடிவக தெரிவித்தார். உடனடியாக இது குறித்து கருத்து எதனையும் தெரிவிக்க முயடியாது என்றார் அவர்.

மற்றொரு விசாரணைக் குழு கிழக்கு மாகாண முதலமைச்சர் சிவனேசதுரை சந்திரகாந்தனால் நியமிக்கப்பட்டுள்ளது. உள்ளூராட்சி சபைகளைச் சேர்ந்த இரு அரசியல்வாதிகளுக்கு எதிராக இந்தக் குற்றச்சாட்டுக்கள் சுமத்தப்பட்டுள்ளதாக முதலமைச்சரின் செயலாளர் ஏ.தேவராஜ் தெரிவித்தார்.

திருகோணமலை நகர சபைத் தலைவர் எஸ்.கௌரி முகுந்தன் மற்றும் பிரதேச சபைத் தலைவர் ரி.காந்தரூபன் ஆகியோருக்கு எதிராகவே காணி மோசடிக் குற்றச்சாட்டுக்கள் சுமத்தப்பட்டுள்ளன.

மோசடி குறித்த விசாரணைகள் நடைபெற்றுக்கெண்டிருக்கும் அதேவேளையில் சிறிலங்கா கடற்படையினர் அந்த நிலப்பகுதியில் தொடர்ந்தும் பாதுகாப்பு நடவடிக்கைகளில் ஈடுபட்டு வருகின்றனர். இப்பொழுது மோசடி குறித்த மேலும் பல தகவல்கள் வெளியாகிய வண்ணம் இருக்கின்றன.

அமைச்சரவை தகுதி இல்லாத அமைச்சர் ஒருவரின் செயலாளர் திருகோணமலை மாவட்ட செயலகத்துக்குச் சென்று உப்புவெளி பகுதியில் தனக்குச் சொந்தமான 100 ஏக்கர் நிலம் இருப்பதாக ஒரு பழைய காணி உறுதியைக் காண்பித்துள்ளார். அதன் நிழற்பிரதி ஒன்றையும் அவர் வைத்திருந்துள்ளார். பின்னர் மீண்டும் ஒருமுறை செயலகத்துக்கு வந்த அந்த நபர் 60 ஏக்கர் காணியை வேறு பெயரில் பதிவு செய்ய முயன்றுள்ளார்.

மற்றொரு சம்பவத்தில், றஞ்சித் கொட்டிகார என்ற வர்த்தகர் திருகோணமலை காவல்துறையின் சிறப்பு புலனாய்வுக் குழுவிடம் ஒரு முறைப்பாடு சமர்ப்பித்திருந்தார். அதில், உப்புவெளிக்கும் நிலாவெளிக்கும் இடைப்பட்ட பகுதியில் தான் காணி ஒன்றை வாங்கியிருந்தார் என்றும் அதே காணிக்கான மற்றொரு உறுதியை பிரதேச செயலர் ரி.காந்தரூபன் வைத்துக்கொண்டு அந்தக் காணி தனக்குச் சொந்தமானது என வாதிடுகிறார் என்றும் தெரிவித்திருந்தார்.

ஓகஸ்ட் 18 ஆம் நாள் அதே பிரதேச சபை அக்காணி தனக்குரியதுதான் என்பதை உறுதிப்படுத்திப் பற்றிச்சீட்டு வழங்கியுள்ளதாக ரஞ்சித் கொட்டிகார கூறுகின்றார்

புதினம்