3ம்இணைப்பு ‐ தமிழ்த் தேசியக் கூட்டமைப்பு இந்திய காங்கிரஸ் கட்சியின் கைப்பொம்மைகளாக செயற்படுகிறது ‐ ஸ்ரீகாந்தா ‐ சிவாஜிலிங்கத்தின் குரல் இணைக்கப்பட்டுள்ளது

விடுதலைப் புலிகளின் கட்டுப்பாட்டின் கீழிருந்த ஆயிரக்கணக்கான அப்பாவித் தமிழ் மக்கள் கொடுரமான முறையில் சித்திரவதை செய்யப்பட்டு படுகொலை செய்யப்படுவதற்கு தமிழ்த் தேசியக் கூட்டமைப்பின் தலைமையே பொறுப்பென தமிழ்த் தேசியக் கூட்டமைப்பிலிருந்து பிரிந்து சென்றுள்ள எம்.பி. சிவாஜிலிங்கம் குறிப்பிட்டுள்ளார்.

எதிர் வரும் பொதுத்தேர்தலில் தனித்துப் போட்டியிட முடிவு செய்து தமிழ்த் தேசியக் கூட்டமைப்பிலிருந்து விலகிச் சென்று புதிய கட்சியொன்றை உருவாக்கிய நிகழ்வின் போதே அவர் இதனைத் தெரிவித்துள்ளார்.

தற்போது தமிழ்த் தேசியக் கூட்டமைப்பு அதன் முன்னாள் எம்.பிக்களான ஆர்.சம்பந்தன், சுரேஸ் பிறேமச்சந்திரன், எம்.சேனாதிராஜா ஆகிய மூன்று சக்திகளால் கட்டுப்படுத்தப்பட்டுள்ளது. எப்போதுமே விடுதலைப் புலிகளின் விருப்பத்திற்கேற்பவே இவர்கள் செயற்பட்டும் வந்துள்ளார்களென அவர் தெரிவித்துள்ளார்.

http://www.globaltamilnews.net/

தமிழ் மக்களுக்குத் துரோகம் செய்கின்ற தமிழ்த் தேசியக் கூட்டமைப்பிலிருந்து விலகி புதிய அரசியல் பாதையொன்றை தாம் உருவாக்கப் போவதாக எம்.கே. சிவாஜிலிங்கமும், ஸ்ரீகாந்தாவும் தெரிவித்துள்ளனரென இலங்கைப் பாதுகாப்பு அமைச்சின் இணையத்தளம் செய்தி வெளியிட்டுள்ளது.

2ம்இணைப்பு ‐ தமிழ்த் தேசியக் கூட்டமைப்பு இந்திய காங்கிரஸ் கட்சியின் கைப்பொம்மைகளாக செயற்படுகிறது ‐ ஸ்ரீகாந்தா :‐ சிவாஜிலிங்கத்தின் குரல் இணைக்கப்பட்டுள்ளது.

தமிழ்த் தேசியக் கூட்டமைப்பு கட்சியின் தலைமைத்துவம் இந்திய காங்கிரஸ் கட்சியின் கைப்பொம்மையாக செயற்பட்டு வருவதாக கட்சியிலிருந்து பிளவடைந்துள்ள முன்னாள் பாராளுமன்ற உறுப்பினர் என்.ஸ்ரீகாந்தா தெரிவித்துள்ளார்.

இறுதிக் கட்ட போராட்டங்களின் போது யுத்த நிறுத்தமொன்றை ஏற்படுத்த அழுத்தம் கொடுக்க வேண்டிய சந்தர்ப்பமொன்றை கட்சி சரியான முறையில் பயன்படுத்திக்கொள்ளவில்லை என அவர் சுட்டிக்காட்டியுள்ளார்.

ஆயிரக் கணக்கான அப்பாவி பொதுமக்கள் யுத்தம் காரணமாக அவலங்களை எதிர்நோக்கிய சந்தர்ப்பத்தில் இந்திய அரசாங்கத்தின் ஊடாக இலங்கைக்கு அழுத்தம் கொடுக்க தமிழ்த் தேசியக் கூட்டமைப்பு தலைமைத்துவம் முனைப்பு காட்டவில்லை என அவர் தெரிவித்துள்ளார்.

இந்திய பிரதமருடன் சந்திப்பு ஒன்றை ஏற்படுத்துவதற்கு தமிழக அரசாங்கமும், எதிர்க்கட்சிகளும் மேற்கொண்ட முயற்சிகளுக்கு தமிழ்த் தேசியக் கூட்டமைப்பு உரிய பதிலளிக்கவில்லை என அவர் குறிப்பிட்டுள்ளார்.

இந்திய விவகாரம் தொடர்பில் முடிந்தால் தமிழ்த் தேசியக் கூட்டமைப்பு பகிரங்க விவாதமொன்றை ஏற்பாடு செய்யுமாறும், உரிய பதில்களை வழங்கத் தயார் எனவும் அவர் தெரிவித்துள்ளார்.

தமிழ்த் தேசிய விடுதலை கூட்டமைப்பு என்ற புதிய கட்சியொன்றை உருவாக்கியுள்ளதாக ஸ்ரீகாந்தா தெரிவித்துள்ளார்.

வடக்கு கிழக்கு தமிழ் மக்களின் அபிலாஷைகளை பூர்த்தி செய்வதே தமது பிரதான இலக்கு என அவர் குறிப்பிட்டுள்ளார்.

சுயாட்சி அதிகாரங்களை கொண்ட தீர்வுத் திட்டத்தை அடிப்படையாக் கொண்டு தமது கொள்கைகள் முன்னெடுக்கப்படும் என அவர் தெரிவித்துள்ளார்.

இந்தியாவின் ஆலோசனைக்கு அமைய தமிழ்த் தேசியக் கூட்டமைப்பு ஜெனரல் சரத் பொன்சேகாவிற்கு ஆதரவளிக்கத் தீர்மானித்திருந்ததாக அவர் குறிப்பிட்டுள்ளார்.

தமிழ்த் தேசிய விடுதலை கூட்டமைப்பு கட்சி எதிர்வரும் பொதுத் தேர்தலில் விக்ரபாகு கருணாரட்ன தலைமையிலான இடதுசாரி விடுதலை முன்னணியின் கீழ் போட்டியிட உள்ளதாகத் தெரிவிக்கப்படுகிறது.

அதேவேளை மட்டக்களப்பு மாவட்டத்தில் தம்முடன் இணைந்து 5 புதிய வேட்பாளர்கள் போட்டியிடவுள்ளதாக தமிழ்த் தேசியக் கூட்டமைப்பின் முன்னாள் நாடாளுமன்ற உறுப்பினர் கே.தங்கேஸ்வரி தெரிவித்துள்ளார்.

அத்துடன், தமிழ் தேசியக் கூட்டமைப்பின் முன்னாள் நாடாளுமன்ற உறுப்பினர்களான சிவநாதன் கிஷோர், சதாசிவம் கனகசபை ஆகியோர் வன்னி மாவட்டத்தில் ஐக்கிய மக்கள் சுதந்திரக் கூட்டமைப்பின் கீழ் போட்டியிடவுள்ளதாகவும் அவர் தெரிவித்தார்.

மேலும், ஜனாதிபதி மஹிந்த ராஜபக்ஷவுடன் நேற்று சந்திப்பொன்று இடம்பெற்றதாகவும், இதன்போது பல்வேறு விடயங்கள் தொடர்பில் கலந்துரையாடப்பட்டதாகவும் அவர் குறிப்பிட்டார்.

இதேவேளை, தமிழ் தேசியக் கூட்டமைப்பின் 12 நாடாளுமன்ற உறுப்பினர்கள் கட்சியிலிருந்து நீக்கப்பட்டிருப்பதாகவும் அக்கூட்டமைப்பின் முன்னாள் நாடாளுமன்ற உறுப்பினர் கே.தங்கேஸ்வரி சுட்டிக்காட்டினார்.

ஸ்ரீகாந்தா விண்ட துரோகிப்பட்டத்த வாபஸ் பெறலாமோ?