கனடாவில் ஆப்பிள் தோட்டத்தில் வேலை: 150 தமிழர்களிடம் பல இலட்சம் ரூபாய் மோசடி!

கனடாவில் ஆப்பிள் தோட்டத்தில் வேலை: 150 தமிழர்களிடம் பல இலட்சம் ரூபாய் மோசடி!

புதன், 23 பெப்ரவரி 2011 01:21

கனடாவில் அப்பிள் தோட்டங்களில் வேலை வாய்ப்பு பெற்றுத் தருவார்கள் என்று சொல்லி சுமார்150 தமிழ் இளைஞர்களிடம் இருந்து முற்பணம் என்கிற பெயரில் தலா 02 இலட்சத்து 10 ஆயிரம் ரூபாய் வரை ஒரு கும்பல் மோசடி செய்து உள்ளது.

இக்கும்பல் கொழும்பை தளமாக கொண்டு இயங்கி வந்து உள்ளது.

வடக்கு மற்றும் கிழக்கு மாகாணங்களில் உள்ள தமிழ் இளைஞர்களை இக்கும்பலைச் சேர்ந்தவர்கள் இலக்கு வைத்து இருந்தனர்.

பாதிக்கப்பட்டவர்களில் கணிசமானோர் யாழ்ப்பாணத்தை சேர்ந்தவர்கள்.

இக்கும்பலுக்கு உதவி, ஒத்தாசையாக செயல்பட்டவர்களில் யாழ்ப்பாணத் தமிழர் ஒருவர் முக்கியமானவர். யாழ். மாநகர சபையில் கடமை புரிகின்றார்.

இவரை விட பொலிஸ் உத்தியோகத்தர் இருவர் இக்கும்பலுக்கு உதவி, ஒத்தாசை செய்து இருக்கின்றனர். ஒருவர் யாழ்ப்பாண பொலிஸ் நிலையத்தில் கடமையாற்றும் கண்டித் தமிழர்.

கனடாவில் ஆப்பிள் தோட்டங்களில் வேலைக்கு சேர்ந்து மாதாந்தம் இரண்டு இலட்சம் ரூபாய் வரை உழைக்க முடியும் என்று இக்கும்பலைச் சேர்ந்தவர்கள் ஆசை காட்டி இருக்கின்றனர்.

ஒட்டுமொத்தமாக பயணச் செலவு தலா 30 இலட்சம் என்றும் மிகுதிப் பணத்தை தவணை அடிப்படையில் கட்டலாம் என்றும் கூறி இருக்கின்றார்கள்.

கொழும்பில் நேர்முகப் பரீட்சையும் நடத்தி இருக்கின்றார்கள்.

இக்கும்பலைச் சேர்ந்தவர்களுக்கு எதிராக சட்ட நடவடிக்கைகள் முடுக்கி விடப்பட்டு உள்ளன.

tamilcnn