யேர்மனியில் நான்கு தமிழர்கள் மீதான வழக்கு உயர்நீதிமன்றில் ஆரம்பம்!

யேர்மனியில் நான்கு தமிழர்கள் மீதான வழக்கு உயர்நீதிமன்றில் ஆரம்பம்!

புதன்கிழமை, 23 மார்ச் 2011 11:56

யேர்மனியில் கடந்த வருடம் மார்ச் 5ஆம் திகதி கைதுசெய்யப்பட்ட விடுதலைப்புலிகள் இயக்க ஜேர்மன் பொறுப்பாளரும் ஜேர்மன் தமிழர் ஒருங்கிணைப்புக்குழு பொறுப்பாளருமான வாகீசன் என்று அழைக்கப்படும் 35வயதுடைய வி.எஸ்.விஜயகனேந்திரா உட்பட ஜேர்மன் தமிழர் ஒருங்கிணைப்புக்குழுவைச்சேர்ந்த நான்கு பேருக்கு எதிரான வழக்கு செவ்வாய்கிழமை ஜேர்மனி டுசில்டோவ் நகரில் உள்ள உயர்நீதிமன்றத்தில் ஐந்து நீதியரசர்கள் முன்னிலையில் விசாரணைக்கு எடுத்துக்கொள்ளப்பட்டது.

கைது செய்யப்பட்டு தடுத்து வைக்கப்பட்டுள்ள 35வயதுடைய வி.எஸ்.விஜிகாந்த, 34வயதுடைய எம்.சசிதரன், 40வயதுடைய ரி.கோணேஸ்வரன், 35வயதுடைய டபிள்யூ.அகிலன் ஆகியோர் நீதிமன்றத்தில் நிறுத்தப்பட்டிருந்தனர்.

அரசதரப்பின் வழக்கறிஞர்களால் தாக்கல் செய்யப்பட்டுள்ள குற்றப்பத்திரிகை எதிரிகளுக்கு வாசித்து காட்டப்பட்டு அவர்களிடம் குற்றப்பத்திரிகை சமர்ப்பிக்கப்பட்டது.

ஐரோப்பிய ஒன்றியத்தால் தடைசெய்யப்பட்ட விடுதலைப்புலிகள் அமைப்பிற்கு ஜேர்மனியில் நிதி சேகரித்தது, பொதுமக்களிடம் கட்டாயப்படுத்தி நிதி வசூலித்தது, உட்பட சில குற்றச்சாட்டுக்கள் இவர்கள் மீது சுமத்தப்பட்டுள்ளது. இந்த குற்றச்சாட்டை கைது செய்யப்பட்டுள்ள நான்கு தமிழர்களும் மறுத்துள்ளனர்.

கைது செய்யப்பட்ட தமிழர்கள் சார்பில் தோன்றிய வழக்கறிஞர்களும் பதில் அறிக்கையை தாக்கல் செய்தனர். இவர்கள் மீது சுமத்தப்பட்டிருக்கும் குற்றச்சாட்டுக்களை அவர்கள் சார்பில் தோன்றிய சட்டத்தரணிகள் மறுத்தனர்.

கடந்த ஒருவருடமாக இவர்கள் தடுப்பு காவலில் வைக்கப்பட்டுள்ளனர்.

நீதிமன்றத்தில் நிறுத்தப்பட்ட நால்வரும் நிரபராதிகள் என்றும் யாரிடமும் அவர்கள் கட்டாயப்படுத்தி நிதி சேகரிக்கவில்லை என்றும் எதிரிகள் சார்பில் தோன்றிய சட்டத்தரணிகள் வாதிட்டனர்.

நேற்றுகாலை 9மணிக்கு ஆரம்பமான விசாரணைகள் மாலை 5மணிவரை நடைபெற்றது.

இந்த வழக்கின் விசாரணைகள் தொடர்ந்தும் பல பிரிவுகளாக நடைபெறும் என்று அறிவிக்கப்பட்டுள்ளது.

வழக்கு விசாரணை நடைபெற்ற போது நீதிமன்றத்திற்கு வெளியே ஜேர்மனியில் வாழும் தமிழர்கள் பலரும் கூடியிருந்தனர்.

sangamam.com