அரசாங்கத்துடன் நடத்தப்படும் பேச்சுவார்த்தையில் சில இடைக்காலத் தீர்வுகளைக்கூட ஏற்கவேண்டி வராலாம் என தமிழ்த் தேசியக் கூட்டமைப்பின் பாராளுமன்ற உறுப்பினர் எம்.ஏ.சுமந்திரன் தெரிவித்துள்ளார்.

நோர்வே அரசாங்கப் பிரதிநிதிகளுடன் பேச்சுவார்த்தை ஒன்றை நடத்துவதற்காக நோர்வேக்கு விஜயம் செய்துள்ள அவர் தற்போதைய பேச்சுவார்த்தைகள் தொடர்பில் விளக்கமளிக்கையிலேயே இவ்வாறு கூறினார்.

அரசாங்கத்திற்கும் கூட்டமைப்பிற்கும் இடையில் தற்போது நடைபெற்றுவரும் பேச்சுவார்த்தைகள் மூலம் குறிப்பிட்ட காலத்திற்குள் தீர்வு காணப்படவேண்டும் எனவும், பேச்சுவார்த்தையில் உடனடியாகத் தீர்வு கிடைக்கும் என்பது எல்லோரும் எதிர்பார்க்கக்கூடிய காரியம் இல்லை என்பதால் சில இடைக்காலத் தீர்வுகளைக்கூட ஏற்கவேண்டி வராலம் எனவும் அவர் கூறினார்.

அரசாங்கத்துடன் மேற்கொண்டுவரும் பேச்சுவார்த்தைகள் மூலம் இனப்பிரச்சினைக்குத் தீர்வு ஒன்று எட்டுமானால் அதற்கு சர்வதேச நாடுகள் வழங்கிவருகின்ற அழுத்தங்கள் மட்டுமே காரணம் எனவும், பேச்சுவார்த்தை வெற்றிகரமாக முடிவடைவதற்கு அழுத்தங்களைக் கொடுக்கும் நடவடிக்கைகளை தொடர்ந்து மேற்கொண்டு வருகின்றோம் எனவும் அவர் குறிப்பிட்டார்.

தற்போது அரசாங்கத்தினால் செயற்படுத்தப்படுகின்ற பல வேலைத்திட்டங்கள், காணிப்பறிப்பு, இராணுவ ஆட்சி போன்றவற்றையும் சர்வதேசத்தின் கவனத்திற்கு கொண்டுசென்று அரசாங்கத்திற்கு அழுத்தங்களை ஏற்படுத்தவேண்டிய தேவை இருக்கின்றது என்று குறிப்பிட்ட பாரளுமன்ற உறுப்பினர் சுமந்திரன், காணி, பொலிஸ் அதிகாரங்களை வழங்கமாட்டேன் என ஜனாதிபதி வெளிப்படையாகக் பேசிவருகிறார். ஆனால் இப்போதுள்ள அரசியலமைப்பு சட்டத்தின்படி காணி அதிகாரமும், காவல்துறை அதிகாரமும் மாகாணசபைகளுக்கு பகிரப்பட்டிருக்கிறது என்று கூறினார்.

“13ஆவது திருத்தச்சட்டத்திற்கு அப்பால் சென்று அர்த்தமுள்ள அதிகாரப் பரவலை நான் செய்வேன் என்று இரண்டு தடவைகள் இந்தியப் பிரதமருடன் இணைந்து ஜனாதிபதி கூட்டறிக்கை விட்டிருக்கிறார். இவ்வாறான உத்தரவாதத்தை ஜனாதிபதியே சர்வதேச சமூகத்திடம் கொடுத்திருக்கின்ற காரணத்தால் காணி மற்றும் பொலிஸ் அதிகாரங்கள் இப்போதுள்ளதைவிட இன்னும் கூடுதலாகப் பகிரப்படவேண்டும் என்பதில் நாங்கள் தீர்மானமாக இருந்து அந்த அடிப்படையில் பேசிவருகிறோம்” என்றார் அவர்.

இறுதிக்கட்ட யுத்தத்தின்போது நடைபெற்றதாகக் கூறப்படும் போர்க்குற்றங்கள் இன்னமும் குற்றச் சாட்டுகளாகத்தான் இருக்கிறது. இவை விசாரிக்கப்பட வேண்டிய குற்றச் சாட்டுக்களாகவே இருப்பதனால் அரசாங்கம் தப்பிவிட முடியாது என்றும் காலம் கடந்தாலும் நியாயம் கிடைக்கும் என்ற நம்பிக்கை தமக்கு உள்ளது என்றும் தமிழ்த் தேசியக் கூட்டமைப்பின் பாராளுமன்ற உறுப்பினர் எம்.ஏ.சுமந்திரன் மேலும் தெரிவித்தார்.

இதேவேளை, தமிழ்தேசிய கூட்டமைப்பிற்கும் அரசாங்கத்திற்கும் இடையில் இன்று(03.10.2011) நடைபெறவிருந்த மற்றுமொரு சுற்றுப் பேச்சுவார்தை எதிர்வரும் உள்ளுராட்சிசபை தேர்தல்களின் பின்னர் நடைபெறும் என தெரிவிக்கப்பட்டுள்ளது. உள்ளுராட்சி மன்றத் தேர்தல்கள் காரணமாகவே இந்த பேச்சு வார்தைகள் ஒத்திவைக்கப் பட்டுள்ளதாக அறிவிக்கப்பட்டுள்ளது.

http://akkinikkunchu.com/new/

அரசாங்கத்துடன் மேற்கொண்டுவரும் பேச்சுவார்த்தைகள் மூலம் இனப்பிரச்சினைக்குத் தீர்வு ஒன்று எட்டுமானால் அதற்கு சர்வதேச நாடுகள் வழங்கிவருகின்ற அழுத்தங்கள் மட்டுமே காரணம் எனவும், பேச்சுவார்த்தை வெற்றிகரமாக முடிவடைவதற்கு அழுத்தங்களைக் கொடுக்கும் நடவடிக்கைகளை தொடர்ந்து மேற்கொண்டு வருகின்றோம் எனவும் அவர் குறிப்பிட்டார்.

இது புலம்பெயர் மக்களின் கைகளில் தான் உள்ளது. தொடர்ந்தும் பலவகை அழுத்தங்களை எம்மால் முடிந்தளவுக்கு செய்யவேண்டும்.

- கடிதங்கள் எழுதல்

- அரசியல்வாதிகளுடன்/மனித உரிமை ஆர்வலர்களுடன் இணைந்து வேலைசெய்தல்

என்னை பொறுத்தளவில் சுமந்திரனை பொறுந்திருந்துதான் பார்க்க வேண்டும் !