தமிழக உறவுகளின் உணர்வும் ஈடுபாடும் தமிழக மற்றும் இந்திய அரசுகளில் நிலைப்பாடுகளில் மாற்றத்தை உருவாக்கும்: சு.ப.தமிழ்ச்செல்வன் நம்பிக்கை

எமது தமிழக உறவுகளின் உணர்வும் ஈடுபாடும் தமிழக மற்றும் இந்திய அரசுகளில் நிலைப்பாடுகளில் மாற்றத்தை உருவாக்கும் என்று தமிழீழ விடுதலைப் புலிகளின் அரசியல்துறைப் பொறுப்பாளர் சு.ப.தமிழ்ச்செல்வன் நம்பிக்கை தெரிவித்துள்ளார்.

அவுஸ்திரேலிய இன்பத் தமிழ் ஒலி வானொலிக்கு கடந்த சனிக்கிழமை (10.06.06) நோர்வேயிலிருந்து அளித்த நேர்காணலில் கூறியுள்ளதாவது:

எமது உறவுகளாகிய தமிழ்நாட்டு மக்கள், தமிழீழ மக்கள் தொடர்பாக- தமிழீழ மக்களினது விடுதலைப் போராட்டம் தொடர்பாக முழு அளவிலும் ஆதரவுடன்தான் இருக்கின்றனர்.

தமிழ்நாட்டில் உள்ள எங்கள் மக்கள் தலைவர் மீதும் எமது போராட்டத்தின் மீதும் முழு நம்பிக்கையோடு உள்ளனர்.

தமிழக மக்களின் உணர்வும் ஈடுபாடும் நிச்சயமாக தமிழக அரசு மற்றும் இந்திய அரசு நிலைப்பாடுகளில் தமிழீழ மக்களுக்கான ஒரு ஆதரவான நிலையை ஒருநாள் கொண்டு வரும் என்பதில் எமக்கு அசைக்க முடியாத நம்பிக்கை வைத்திருக்கிறோம்.

எமது மக்கள் மீது கொடூரமாக கட்டவிழ்த்து விடப்பட்டிருக்கும் இனப்படுகொலைகள் மற்றும் கொடூரங்கள் பற்றி நன்கு அறிந்தவர்களாகவே இருந்திருக்கின்றனர்.

அவர்களுக்கு இடைக்காலத்தில் சில நெருக்குவாரங்கள் ஏற்பட்டிருந்தாலும் தமிழீழ விடுதலைப் போராட்டம் தொடர்பாகவும் தமிழ் மக்கள் மீது சிங்கள இனவாதிகள் கட்டவிழ்த்துவிட்டிருக்கிற வன்முறைகளையும் அறிந்து தமிழகத்தில் தங்களது எதிர்ப்புக்களையும் தமிழீழ விடுதலைப் போராட்டத்துக்கான தார்மீக ஆதரவுகளையும் தமிழகத்தில் வெளிப்படுத்திக் கொண்டிருக்கின்றனர்.

தமிழக மக்களும் தமிழக அரசும் எமது தமிழீழ விடுதலைப் போராட்டத்துக்கான ஆதரவான நிலைப்பாட்டை மிகவிரைவில் நிச்சயம் ஒன்றுபட்டு வெளிப்படுத்துவார்கள் என்பதில் நம்பிக்கை உள்ளது.

ஏனெனில் நீதியும் நியாமும் எங்கள் பக்கம் இருக்கிறது. எங்கள் உறவுகள் உலகெங்கும் பரந்து வாழ்ந்தாலும் எங்கள் மக்கள் தாக்கப்படும்போது எங்கள் மக்கள் மீது கொடூரங்களை அவலங்களைத் திணிக்கின்ற போது எங்கள் மக்களை நசுக்குகின்றபோது பொறுத்துக் கொண்டிருக்கமாட்டார்கள்.

தமிழ்நாட்டிலும் எங்கள் தமிழ் மக்கள் நிச்சயமாக சிங்கள ஆக்கிரமிப்புப் படைகளின் கொடூரங்களுக்கு எதிரான உணர்வுகளை வெளிப்படுத்துவார்கள்.

தமிழர்கள் மீதும் தமிழர் தாயகத்தின் மீதும் ஒரு கொடூரமான இன வன்முறையைக் கட்டவிழ்த்துவிட்டிருக்கிற சிறிலங்கா அரசாங்கத்தின் மீது இந்திய மத்திய அரசானது இராஜதந்திர அழுத்தங்கள் உட்பட பல்வேறு அழுத்தங்களை ஏற்படுத்தி- இனவெறியையும் படுகொலைகளையும் கண்டிக்கும் நிலை உருவாக வேண்டும்.

தமிழகத்திலே வாழுகிற எமது உறவுகளின் ஒன்றுபட்ட உணர்வின் வெளிப்பாட்டில்தான் இந்திய மத்திய அரசு மட்டத்தில் இந்த மாற்றங்களும் வெளிப்பாடுகளும் வரும் என்று நினைக்கிறோம்.

சர்வதேச நாடுகளில் எம் மீது தடை விதிக்கிற சிறிலங்கா அரசாங்கத்தின் முயற்சிகள் முட்டாள்தனமானவை. பாரிய எதிர்விளைவை உருவாக்கப் போகிறது.

சர்வதேசத்தின் பெருமளவிலான உதவிகளைப் பெற்றுக்கொண்டுதான் சிறிலங்கா அரசாங்கமானது தமிழர்களை இனப்படுகொலை செய்தது. ஆனால் எமது தலைவரும் மக்களும் இராணுவ ரீதியாக வலுப்பெற்று சிறிலங்கா அரசாங்கத்தை முடக்கும் வகையிலான வலிமையைப் பெற்றனர்.

அனைத்து வகையிலும் படுதோல்வியடைந்த நிலையில்தான் சர்வதேசத்தின் காலடியில் விழுந்து சிறிலங்கா அரசாங்கம் பேச்சுக்களுக்கு வந்தது.

இனப்படுகொலைகளை மேற்கொள்வதற்காகத்தான் தமிழீழ விடுதலைப் புலிகளை பலவீனப்படுத்துகிற இத்தடை முயற்சிகளாகும்.

சிங்கள அரச பயங்கரவாதத்தை முறியடிப்பதைத் தவிர எங்களுக்கு மாற்று வழியேதும் இல்லை. எங்கள் மக்களும் முழு அளவில் எழுச்சியுடன் உள்ளனர்.

சிறிலங்கா அரசாங்கத்தை திருப்திபடுத்தும் சர்வதேச சமூகத்தின் போக்கும் ஒட்டுமொத்த தமிழ் மக்களை தமது பலத்தில் தமது சுயத்தில் தமது வழியில் நின்று தற்காத்துக் கொள்கிற தீர்மானங்களை எடுக்கிற நிலைக்குத் தள்ளியிருக்கிறது என்றார் தமிழ்ச்செல்வன்.

-புதினம்

பேட்டியினைக்கேக்க

http://www.tamilnaatham.com/interviews20060609.html