நிரந்தர பகைவர்களாக

ஈழநாதம் நாளேட்டில் 12.07.06 வெளிவந்த ஆசிரியர் தலையங்கம்

நிரந்தர பகைவர்களாக

விடுதலைப் புலிகளுக்குத் தடை விதித்துள்ள ஐரோப்பிய ஒன்றிய நாடுகளைச் சேர்ந்த பிரதிநிதிகள் யுத்த நிறுத்தக் கண்காணிப் புக்குழுவில் அங்கம் வகிப்பது ஏற்கத்தக்கதல்ல என்ற விடுதலைப் புலிகளின் நிலைப்பாடு வாதப்பிரதிவாதங்களுக்கு உள்ளாகியுள்ள நிலையில்-சிறிலங்கா சனாதிபதி மகிந்த ராஜபக்சவோ இங்கிலாந்தை இனப்பிரச்சினை தொடர்பாக ஏற்பாட்டாளராகப் பணியாற்ற வருமாறு அழைப்பு விடுத்துள்ளதாக வெளியாகியுள்ள தகவலானது மகிந்த ராஜபக்சவின் நரித்தனமான செயற்பாட்டை வெளிப்படுத்துவதாகவே உள்ளது.

இங்கிலாந்தை மகிந்த ராஜபக்ச அழைத்தமைக்கு முன்னைய ஆட்சியாளர்கள் என்ற அடிப்படை காரணமாகக் கூறக்கூடியதாயினும் தற்போதைய அரசியல் சூழ்நிலையில் இங்கிலாந்தினால் அத்தகையதொரு பாத்திரத்தை வகிக்கமுடியுமா? அன்றி இங்கிலாந்து அதற்குத்தகுதியானதா? என்பது குறித்த கேள்வி தவிர்க்க முடியாததாகவுள்ளது.

பிரித்தானிய அரசு விடுதலைப் புலிகள் இயக்கத்திற்குத் தடை விதிக்கும் முன்பதாகவே பிரித்தானியா தமிழ் மக்கள் தொடர்பாக நியாயப்பாடானதொரு நிலைப்பாட்டைக் கொண்டதாக இருந்திருக்கவில்லை. அவ்வாறு இருந்திருக்குமானால் இலங்கையில் இனப்பிரச்சினை என்பது தோற்றம் பெறுவதற்கான வாய்ப்பே சிலவேளை அற்றுப்போயிருக்கலாம்.

பல அரசுகளாக பல பிரிவுகளாக இருந்த இலங்கைத்தீவை பிரித்தானிய ஆட்சியாளர்களே தமது நிர்வாகத்தை இலகுபடுத்துவதற்காக ஒரே நிர்வாகத்திற்குள் கொண்டுவந்தனர். அப்பொழுது அவர்கள் இலங்கையில் இருந்த இனங்கள் மற்றும் மக்கள் இடையிலான வேறு எந்த முரண்பாடுகளையும் கருத்திற்கொள்ளவில்லை.

அது மட்டுமல்லாது அவர்கள் இலங்கையில் இருந்த நிர்வாக முறையை முற்றாக நிராகரித்து ஆட்சிமுறை உட்பட்ட அனைத்தையுமே இங்கிலாந்தில் இருந்து இறக்குமதி செய்தார்கள். அவை இலங்கைக்கும் அங்குள்ள மக்களுக்கும் பொருத்தப்படானதா? என்பதைக்கூட சிந்திக்கவில்லை.

அத்தோடு அவர்கள் இலங்கையை விட்டுச்செல்லும் போது தாம் கொண்டு வந்தவற்றை இங்கிருந்து எடுத்துச்செல்லவும் இல்லை. இங்கு தாங்கள் கொண்டு வந்தவற்றால் ஏற்படக்கூடிய பாதகமாக நிலைமைகளையும் அவர்கள் கருத்திற்கொள்ளவுமில்லை. மாறாக சனநாயகம் எனக் கூறிக்கொண்டு பெரும்பான்மை இனத்திடம் சிறுபான்மை இனங்களின் வாழ்வை பணயம் வைத்துவிட்டுச் சென்றனர்.

ஆனால் இவர்களால் வழங்கப்பட்ட ஆட்சிமுறை மற்றும் நிர்வாகக் கட்டமைப்புக்களால் குறுகிய காலத்திற்குள்ளேயே சிறுபான்மை இனங்கள் சவால்களையும் அவலங்களையும் சந்தித்தபோது கூட பிரிட்டன் அக்கறை எதையும் வெளிக்காட்டவில்லை. மாறாக சிறிலங்காவின் ஒடுக்குமுறையாளர்களுக்கு உதவிகளைச் தொடர்ச்சியாக வழங்கி வருவதாகவே இருந்தது.

இத்தகையதொரு நிலையில் தற்பொழுது ஒடுக்கப்பட்ட தமிழ் மக்களுக்காகப் போராடும் விடுதலைப் புலிகள் இயக்கத்தை பிரிட்டன் தடை செய்தும் உள்ளது. இந்நிலையில் மகிந்த ராஜபக்ச பிரிட்டனை அனுசரணையாளர்களாகச் செயற்பட வேண்டும் என அழைக்க முற்பட்டமையானது பிரிட்டனுக்கும் தமிழருக்கும் இடையிலான உறவை முற்றிலுமாகச் சிதைவடையச் செய்யும் நோக்கம் கொண்டதாகவும் அதை நிரந்தரமானதாக ஆக்கிவிட முற்படுவதாகவும் உள்ளது.

அதாவது பிரிட்டனின் அனுசரணையாளர் பாத்திரம் என்பது சாத்தியமானதாக மாட்டாது என்பதை உறுதியாக தெரிந்திருந்தும் பிரிட்டனிடம் அழைப்பு விடுத்துள்ளமையானது பிரிட்டனுடன் தமிழ் மக்களை மோதவிடும் சதி முயற்சியாகவே கொள்ளத்தக்கதாகும்.

சிறிலங்கா அரசு இல்லாத ஊருக்கு சென்று சேர முடியாத வழியைத் தேடுவது போன்றதான நடவடிக்கைகளில் ஈடுபடுவது போன்றதான செயற்பாட்டில் இறங்கியுள்ளது. ஆனால் இதனைச் சிறிலங்கா அரசாங்கம் விளங்கிக் கொள்ளாமலோ தெரிந்து கொள்ளாமலோ மேற்கொள்வதாக இல்லை.

சிறிலங்கா அரசாங்கம் திட்டமிட்ட ரீதியிலேயே இந்நடவடிக்கைகளை மேற்கொள்கின்றது. இதன் மூலம் ஒரு புறத்தில் விடுதலைப் புலிகளைத் தடைசெய்துள்ள நாடுகளுக்கும் புலிகளுக்கும் இடையில் மேலும் பகையை வளர்த்துக் கொள்ளும் வகையில் நடவடிக்கைகளை மேற்கொள்ள முனைப்புக்காட்டி நிற்பது உறுதிப்படுத்துவதாகவுள்ளது.

இன்னொரு புறத்தில் தற்பொழுது நடைமுறையில் உள்ள யுத்த நிறுத்த உடன்பாட்டைச் சிதைத்துவிடும் நோக்கம் கொண்டதாகவுமுள்ளது. ஒட்டுமொத்தத்தில் பார்த்தால் சமாதான முயற்சிகளுக்கு சாதகமற்ற மார்க்கத்தில் செல்வதில் அது தீவிரம் காட்டுவதாய் தெரிகின்றது.

நன்றி: ஈழநாதம்