எகிப்த்தில் உஸ்னி முபாரக் பதவிகவிழ்க்கப்பட்ட பின்னர் சனநாயகத் தேர்தல் மூலம் ஆட்சியமைத்த முஸ்லீம் சகோதரத்துவக் கட்சியின் தலைவரான மொர்ஸி அண்மையில் இராணுவச் சதிப் புரட்சியொன்றின் மூலம் பதவி கவிழ்க்கப்பட்டது தெரிந்ததே. அவர் பதவிகவிழ்க்கப்பட்டது செல்லாதென்றும், மறைமுக இடத்தில் அடைத்து வைக்கப்பட்டிருக்கும் மொர்ஸி அவர்களை விடுதலை செய்து மீண்டும் ஆட்சியில் அமர்த்துமாறும் முஸ்லீம் சகோதரத்துவக் கட்சியின் தொண்டர்களும் ஆதரவாளர்களும் கடுமையான மறியல்ப் போராட்டங்களில் ஈடுபட்டு வருகின்றமை நாம் அறிந்த செய்தி.

 

இவ்வாறான போராட்டங்களின் ஒரு படியாக கைரோவிலும் மற்றும் புறநகர்ப் பகுதியொன்றிலும் நகரப்பகுதியை ஆக்கிரமித்து முகாமிட்டு நீண்டநாட்களாக மொர்சி ஆதரவாளர்கள் போராடி வந்த நிலையில், அவர்களைக் கலைந்து செல்லுமாறும், நகரை சுமூக நிலைக்குத் திரும்ப ஒத்துழைக்குமாறும் இராணுவம் கேட்டுவந்தது. இந்த வேண்டுகோள்களையெல்லாம் உதாசீனம் செய்துவிட்டு போராட்டக்காரர்கள் தொடர்ந்தும் மறியலில் ஈடுப்பட்டு வந்தனர். 

 

இவர்களுக்கு கலைந்துசெல்லக் காலக்கெடு கொடுக்கப்பட்ட நிலையில் "மொர்சியிக்காக உயிரையும் கொடுப்போம்" என்று இந்தப் போராட்ட அமைப்பாளர்கள் அறைகூவல் விடுத்து தொடர்ந்தும் போராடி வந்தனர்.

 

இந்நிலையில் நேற்று போராட்டக்காரர்கள் முகாமிட்டிருந்த பகுதி நோக்கி கனரக புல்டோசர்கள், ராணுவ வாகனங்கள் சகிதம் முன்னேறிய இராணுவம் இவர்கள் மீது கண்ணீர்ப்புகைக் குண்டு மற்றும் ரப்பர்க் குண்டுகளைக் கொண்டு ஆரம்பத்தில் தாக்குதல் நடத்தியிருக்கிறது. பதிலுக்கு முகாமிலிருந்தவர்கள் துப்பாக்கித் தாக்குதல் நடத்தவே, இராணுவம் முழு அளவிலான தாக்குதலை நடத்தி போராட்டாக்காரர்களை துரத்தியடித்திருக்கிறது. 

 

ஒரு நாள் நடந்த மோதலில் குறைந்தது தமது ஆதரவாளர்கள் 2000 பேர் இராணுவத்தால் கொல்லப்பட்டிருப்பதாக முஸ்லீம் சகோதரத்துவக் கட்சி கூறியிருக்கிறது. தப்பி ஓடிய தமது தலைவர்களை இராணுவம் தொடர்ந்தும் தேடி வேட்டையாடி வருவதாகக் கூறியிருக்கிறது. போராட்டம் நடைபெற்ற பகுதிக்கு அருகிலிருந்த மிருகக்காட்சிச் சாலை மற்றும் பலகலைக் கழகம் போன்றவற்றில் மறைந்திருக்கும் மொர்ஸி ஆதரவாளர்களை தேடிக் கண்டுபிடிக்கும் பணி தொடர்வதாக இராணுவமும் கூறியிருக்கிறது.

 

இதுவரை வைத்தியசாலைக்குக் கொண்டுவரப்பட்ட சடலங்களை அடையாளம் கண்டு 150 பேர் கொல்லப்பட்டதாக இராணுவம் கூறியிருக்கிறது. இதனுள் கொல்லப்பட்ட இராணுவ வீரரர்களும் அடங்குவதாகக் அது கூறுகிறது.ஆனால் மோதல் நடைபெற்ற பகுதியிலிருந்து செய்திகளை வெளியிட்டு வரும் மேற்குலகச் செய்திச் சேவைகள், பல டசின் கணக்கான உடலங்கள் இன்னும் அப்பகுதியெங்கும் இரைந்து கிடப்பதாகக் கூறுகின்றன.

 

செய்தி சேகரிப்பில் ஈடுபட்டிருந்த மேற்குலகச் செய்திச் சேவையொன்றின் செய்தியாளரும் தாக்குதலில் கொல்லப்பட்டிருக்கிறார்.

 

முஸ்லீம் சகோதரத்துவக் கட்சி அல்கொய்தா மற்றும் அரபுலக முஸ்லீம் தீவிரவாத அமைப்புகளுடன் தொடர்புடையது என்றும், இஸ்ரேல் மீது கடுமையான வெறுப்பை உமிழ்ந்துவருவதாகவும் அண்மையில் கூறப்பட்டு வந்தது நினவிருக்கலாம்.

http://youtu.be/HH9QrwL0CVQ