ஜனாதிபதியுடன் பல்வேறு முக்கியமான விடயங்கள் குறித்து பேசினேன்! - மகிந்தவுடனான சந்திப்புத் தொடர்பில் சம்பந்தன் கருத்து!!

ஜனாதிபதியுடன் பல்வேறு முக்கியமான விடயங்கள் குறித்து பேசினேன்! - மகிந்தவுடனான சந்திப்புத் தொடர்பில் சம்பந்தன் கருத்து!!

சிறிலங்கா ஜனாதிபதி மகிந்த ராஜபக்சவுடன் பல்வேறு முக்கியமான விடயங்கள் குறித்து பேசியதாக தமிழ்த் தேசியக் கூட்டமைப்பின் தலைவரும், திருகோணமலை மாவட்ட நாடாளுமன்ற உறுப்பினருமான இரா.சம்பந்தன் தெரிவித்துள்ளார்.

சிறிலங்கா ஜனாதிபதி மகிந்த ராஜபக்சவை தமிழ்த் தேசியக் கூட்டமைப்பின் தலைவர் சம்பந்தன் நேற்று வெள்ளிக்கிழமை காலை சந்தித்து பேச்சுவார்தை நடத்தியிருந்தார்.

இந்நிலையில், சிறிலங்கா ஜனாதிபதியின் செயலாளர் லலித் வீரதுங்க விடுத்த அழைப்பின் பேரிலேயே தான் மகிந்த ராஜபக்சவைச் சந்தித்ததாகவும், இதன்போது பல்வேறு முக்கியமான விடயங்கள் குறித்து பேசியதாகவும் சம்பந்தன் கூறியுள்ளார்.

வடமாகாண முதலமைச்சராக சி.வி.விக்னேஸ்வரன் சத்தியப் பிரமாணம் செய்து கொள்வது மற்றும் வடமாகாண சபைக்கான அமைச்சர்கள் தெரிவு உள்ளிட்ட பல்வேறு விவகாரங்கள் தொடர்பில் கலந்துரையாடுவதற்காக தமிழ்த் தேசியக் கூட்டமைப்பில் அங்கம் வகிக்கும் கட்சிகளின் தலைவர்களுக்கு இடையிலான கூட்டம் பம்பலப்பிட்டியில் அமைந்துள்ள கூட்டமைப்பின் காரியாலயத்தில் நேற்று வெள்ளிக்கிழமை பிற்பகல் இடம்பெற்றிருந்தது.

இக்கூட்டத்தின் பின்னர் ஊடகவியலாளர்களுக்கு கருத்துத் தெரிவித்த சம்பந்தன், 'இக்கூட்டத்தில் மாகாணசபையின் செயற்பாடுகள், அமைச்சர்களின் தெரிவு, அமைச்சுகளுக்கான அதிகாரங்கள் மற்றும் அதன் பணிகளை எவ்வாறு கையாள்வது, முதலமைச்சர், அமைச்சர்கள் மற்றும் ஏனைய மாகாணசபை உறுப்பினர்களின் சத்தியப் பிரமாண விவகாரம் உள்ளிட்ட பல்வேறு விடயங்கள் குறித்து நாங்கள் பேசினோம். தொடர்ந்து பேசி தமிழ் மக்களுக்கு திருப்தி அளிக்கக்கூடிய முடிவுகளை நாங்கள் எடுப்போம்.

இறுதி என்ற சொல்லில் அர்த்தமில்லை. நாங்கள் அந்தந்த காலத்துக்கு ஏற்றவகையில் கருமங்களைக் கையாள வேண்டும். தொடர்ந்து பேசுவோம், இறுதியில் நல்ல முடிவு எடுப்போம். எல்லோருக்கும் திருப்தி அளிக்கக்கூடிய வகையில் அந்த முடிவை அமைப்போம்' எனத் தெரிவித்தார்.

அதேவேளை, சிறிலங்கா ஜனாதிபதி மகிந்த ராஜபக்சவுடனான சந்திப்புத் தொடர்பில் ஊடகவியலாளர் வினவிய போது, 'ஜனாதிபதியை நான் சந்தித்து பேசியுள்ளேன். அவர் நாட்டினுடைய ஜனாதிபதி. அவருடைய செயலாளர் என்னை அழைத்தார். அந்த அழைப்பின் பேரிலேயே நான் ஜனாதிபதியை சந்தித்து பேசியுள்ளேன்.

இதன்போது பல்வேறு முக்கிய விடயங்கள் குறித்து நாங்கள் பேசினோம். எமது பேச்சுவார்த்தைகள் தொடரலாம். இதற்கான திகதி இன்னும் தீர்மானிக்கப்படவில்லை. ஆனால் காலதாமதமின்றி விரைவில் இப்பேச்சுக்கள் பொருத்தமான இடத்தில் இடம்பெறும்' என சம்பந்தன் பதிலளித்துள்ளார்.

http://www.ponguthamil.com/shownewscontent.aspx?sectionid=1&contentid=08c47ecc-f5f8-4078-8244-d59c32828cbc