ஃபேஸ் புக்கில் ஆபாச செய்தி: 14 வயது சிறுமி தூக்கிட்டு தற்கொலை!

மும்பை: தனது ஃபேஸ்புக் தளத்தில் ஆபாச செய்திகளை பதிவு செய்ததால், மனமுடைந்த 14 வயது சிறுமி தூக்குப்போட்டு தற்கொலை செய்துகொண்ட சம்பவம் மும்பையில் அதிர்ச்சியை ஏற்படுத்தி உள்ளது. 

மும்பை காந்திவிலி பகுதியை சேர்ந்த 14 வயது சிறுமி அப்பகுதியில் உள்ள பள்ளியில் 9-ம் வகுப்பு படித்து வந்தாள். இச்சிறுமியின் பேஸ்புக் இணையதள பக்கத்தில் 16 வயது சிறுவன் ஒருவன் தொடர்ந்து ஆபாச செய்திகளை பதிவு செய்துள்ளார். 

இதனால் மனமுடைந்த அச்சிறுமி இதனை தனது பெற்றோரின் கவனத்திற்கு கொண்டு சென்றுள்ளார். இதனையடுத்து அச்சிறுமியின் பெற்றோர் இதுகுறித்து கடந்த 4 தினங்களுக்கு முன்னர் காவல் நிலையத்தில் புகார் அளித்தனர். ஆனால் போலீசார் உடனடி நடவடிக்கை எதுவும் எடுக்கவில்லை. 

இந்நிலையில் நேற்று அந்தச் சிறுமி பள்ளி முடிந்து, வீட்டிற்கு வந்தபின்னர் மாலை 6 மணிக்கு தனதுஅறைக்கு படிக்க சென்றார். இரவு நீண்ட நேரம் ஆகியும் கதவு திறக்கப்படவில்லை. அவளது தாயார் சத்தம் போட்டும். அறையில் இருந்து எந்த ஒரு பதிலும் வரவில்லை. இதனால் பதட்டம் அடைந்த அவளது தந்தை அறையின் கதவை உடைத்து உள்ளே சென்றனர். அங்கு சிறுமி தூக்கிட்டு தற்கொலை செய்து கொண்டது தெரியவந்தது.

இதுகுறித்து காவல்துறைக்கு தகவல் தெரிவிக்கப்பட்டதை தொடர்ந்து, போலீசார் விரைந்து வந்து உடலை கைப்பற்றி விசாரணை மேற்கொண்டனர். அதனைத் தொடர்ந்து பிரேத பரிசோதனைக்கு உடல் எடுத்துச் செல்லப்பட்டது. 

சிறுவன் குறித்து தாங்கள் 4 தினங்களுக்கு முன்னரே புகார் கொடுத்தும் போலீசார் நடவடிக்கை எடுக்காமல் மெத்தனமாக இருந்ததாகவும், அப்போதே நடவடிக்கை எடுத்திருந்தால் தனது மகள் இத்தகைய விபரீத முடிவுகளை எடுத்திருக்க மாட்டார் என்றும் சிறுமியின் தந்தை செய்தியாளர்களிடம் கூறினார். 

இதனிடையே சிறுமிக்கு தொல்லை கொடுத்த சிறுவன் யார் என அடையாளம் காணப்பட்டுள்ளதாகவும், இது தொடர்பாக விசாரணை மேற்கொள்ளப்பட்டு வருவதாகவும் போலீசார் தெரிவித்தனர்.

 http://news.vikatan.com/article.php?module=news&aid=21508