தினமும் உடற்பயிற்சி, சாப்பாட்டிலும் கட்டுப்பாடு...ஆனாலும் உடல் பெருக்கிறதே ?

டியர் டாக்டர் "தினமும் உடற்பயிற்சி, சாப்பாட்டிலும் கட்டுப்பாடு...ஆனாலும் உடல் பெருக்கிறதே?"

''தற்போது ப்ளஸ் டூ முடித்திருக்கும் மாணவி நான். சமீப காலமாக எனது உடல் எடை அதிகரித்துக் கொண்டே செல்கிறது. உடல் எடையை கட்டுக்குள் கொண்டுவர, தினமும் ஒரு மணி நேரம் வியர்த்து விறுவிறுக்க விளையாடுகிறேன். மேலும், சாப்பாட்டின் அளவையும் குறைத்துவிட்டேன். இருந்தும் என் உடல் எடை குறையவில்லை. இன்னும் கொஞ்ச நாளில் கல்லூரி வாசலை மிதிக்க இருக்கும் எனக்கு இந்தப் பிரச்னையிலிருந்து விடுபட ஆலோசனை கூறுங்களேன்..."

டாக்டர் பிரேம்குமார், பொது மருத்துவர், மதுரை

''பதின் பருவத்தில் இருக்கும் உங்களுக்கு, இந்த வயதுக்கே உரிய 'பியூட்டி கான்ஷியஸ்' அதிகமாக இருக்கும். அதன் காரணமாக, உங்களின் உடலுக்கேற்ற இயல்பான எடையே, அதிகமாகத் தெரியலாம். எனவே, நீங்கள் பருமனாக இருக்கிறீர்களா... இல்லை பருமனாக இருப்பதாக நினைத்துக் கொண்டிருக்கிறார்களா என்பதில் இருந்து முதலில் தெளிவு பெறுங்கள். அதற்கு, பி.எம்.ஐ. (B.M.I.Body Mass Index) கணக்கீடு உங்களுக்குக் கை கொடுக்கும். ஒருவர் தன் உயரத்துக்கேற்ற எடைய அறிய பயன்படுவதுதான் இந்த பி.எம்.ஐ. இதன்படி... உங்கள் உயரத்தை அதே அளவால் பெருக்கவேண்டும். பிறகு, உடல் எடைக்குரிய எண்ணை, உயரத்தைப் பெருக்கியதன் மூலம் கிடைத்த எண்ணால் வகுக்க வேண்டும். இறுதியாகக் கிடைக்கும் விடை, 18.4 முதல் 24.9 வரை இருந்தால் அது நார்மல் எடை (பார்க்க பெட்டி செய்தி).

அடுத்ததாக, 'வெய்ஸ்ட் ஹிப் ரேஷியோ' என்ற பரிசோதனை, சராசரி இடுப்பளவைக் கண்டறிய உதவுகிறது. தொப்புளுக்கு மேலே உள்ள சுற்றளவை, தொப்புளுக்குக் கீழே (பேன்ட் பெல்ட் போடும் இடம்) உள்ள சுற்றளவால் வகுக்கக் கிடைக்கும் எண்தான் Ôவெய்ஸ்ட் ஹிப் ரேஷியோÕ. ஆண்களுக்கு 1 என்ற எண்ணுக்குள்ளும், பெண்களுக்கு .7 என்ற எண்ணுக்கும் இருப்பது நல்லது (பார்க்க பெட்டி செய்தி).

மேற்கூறிய இந்த இரண்டு பரிசோதனைகளின்படி உங்களின் உயரத்துக்கு உங்களின் எடை மிகவும் அதிகமாக இருந்தால், அதில் கவனம் செலுத்த தயாராகுங்கள்.

உடல் பருமனைப் பொறுத்தவரை பரம்பரை, உணவுப் பழக்க வழக்கம், உடற்பயிற்சியின்மை போன்றவை அடிப்படைக் காரணங்கள். தவிர, ஹார்மோன் பிரச்னையாலும் உடல் எடை அதிகரிக்கலாம். குறிப்பாக, நூற்றில் ஐம்பது பேர் தைராய்டு பிரச்னை காரணமாக உடல் எடை அதிகரித்து அவதிக்குள்ளாகிறார்கள். எனவே, உங்களின் இந்த எடை அதிகரிப்புக்கான காரணம் ஹார்மோன் கோளாறா என்பதை முதலில் அகச்சுரப்பியல் நிபுணரிடம் (Endocrinologist) தெளிவு பெறுங்கள். ஒருவேளை அதுதான் பிரச்னைக்கு காரணம் எனில், அதற்கான சிகிச்சையை எடுங்கள். இல்லையென்று உறுதி செய்யப்பட்டால், பின் எடை குறைப்புக்கான நடவடிக்கையில் இறங்குங்கள்.

மாவுச்சத்து அதிகமுள்ள உணவு வகைகளையும், பூமிக்கடியில் விளையும் கிழங்கு வகைகளையும் குறைத்து, நார்ச்சத்து அதிகமுள்ள உணவுகளான கீரை வகைகள், பச்சைக் காய்கறிகள், கொய்யா பழங்கள், அதிக நீர்ச்சத்து மற்றும் புரோட்டீன் சத்து மிக்க உணவுகளையும் எடுத்துக் கொள்ளுங்கள். ஒருவேளை கொழுப்பு சத்தினால் உங்கள் எடை அதிகரித்திருப்பது கண்டுபிடிக்கப்பட்டால், தினமும் 45 நிமிடங்கள் காலையில் வேகமாக நடைபயிற்சி மேற்கொண்டால், நிச்சயம் உங்களுடைய எடை குறையும். நீங்கள் இப்போது செய்து வரும் உடற்பயிற்சிகள், நீச்சல், யோகா போன்றவற்றை தொடர்ந்து, முடிந்தால் நேரத்தை அதிகரித்துச் செய்யுங்கள்.

ஒன்றைப் புரிந்துகொள்ளுங்கள்... இவைஎல்லாம் உங்கள் எடையை குறைக்கும் மாயாஜால விஷயங்கள்... மிக விரைவில் உங்களை 'ஸ்லிம்மி' ஆக்கிவிடும். முதலில் உங்கள் எடை கூடுவது கட்டுப்படுத்தப்பட்டு, பின் படிப்படியாக எடை குறையும்!"

vikatan