அடுத்த வரவுசெலவுத்திட்ட உரை திருமலையில்!

அடுத்த வரவுசெலவுத்திட்ட உரை

தமிழீழத் தலைநகர் திருமலையில்!நாடாளுமன்றத்தில் ஈழவேந்தன் எம்.பி. பேச்சு

இலங்கையின் வரவுசெலவுத்திட்டத்தில் நாம் ஆற்றுகின்ற கடைசி உரை இதுதான். தமிழீழத்தின் தலைநகரமான திருகோணமலையில்தான் அடுத்த வருடம் தமிழீழ நாடாளுமன்றத்தில் எமது வரவுசெலவுத் திட்டம் தொடர்பாக நாம் உரையாற்றுவோம்.

இவ்வாறு நேற்று நாடாளுமன்றில் தெரிவித்தார் தமிழ்த் தேசியக் கூட்டமைப்பின் நாடாளுமன்ற உறுப்பினர் மா.க.ஈழவேந்தன்.

வரவு செலவுத் திட்டத்தின் இரண்டாவது வாசிப்பின் ஐந்தாவது நாள் விவாதத்தில் கலந்துகொண்டு உரையாற்றும்போதே அவர் இதனைத் தெரிவித்தார். அவர் மேலும் கூறியதாவது:

தலைவர் பிரபாகரனின் மாவீரர் தின உரை தமிழ் மக்களின் வாழ்வில் ஒரு திருப்பு முனையாக அமையும். எதிர்வரும் 26ஆம் திகதி பிரபாகரனின் 52ஆவது பிறந்த தினம் என்பதும் இங்கு குறிப்பிடத்தக்கதாகும்.

அநுர பண்டாரநாயக்க எம்.பி. இணை யாட்சி குறித்துப் பேசினார். இணையாட்சிக்கான காலமெல்லாம் கடந்துவிட்டது.

கூட்டமைப்பு எம்.பிகளான நாம் அநுரவின் சகோதரி ஜனாதிபதியாகவிருந்தபோது சந்தித்துப் பேச்சு நடத்தினோம். அதிகாரமுள்ள சமஷ்டி முறை ஆட்சி இனப்பிரச்சினைத் தீர்வுக்கு ஏற்றதாக இருக்குமெனத் தெரிவித்தோம். இதைக் கேட்டுவிட்டு அவர் புன்னகைத்தார். எதுவும் நடக்கவில்லை. இப்போது காலம் கடந்துவிட்டது. தனிநாடுதான் தீர்வு என்ற நிலைக்கு நாம் தள்ளப்பட்டுவிட்டோம் என்றார்.

இலங்கையரசின் வரவுசெலவுத் திட்டத்தில் தாம் ஆற்றும் கடைசி உரை இதுதான். அடுத்த வருடம் தமிழீழத் தலைநகரம் திருகோணமலையில் எமது தமிழீழ நாடாளுமன்றத்தில் எமது வரவு செலவுத்திட்டம் தொடர்பாக நாம் உரையாற்றுவோம் என்றார்.

-உதயன்