அபிவிருத்திக் குழுக் கூட்டத்தில் அரசியல் பேச்சு! - பொதுமக்கள் அதிருப்தி

அபிவிருத்தி தொடர்பான ஒருங்கிணைப்புக் கூட்டத்தில் அரசியல் விவகாரம் பேசியதால் வருகை தந்திருந்தவர்கள் அதிருப்தியடைந்து அமைதியின்மை ஏற்பட்டது. கோப்பாய் தொகுதியில் அபிவிருத்தி குறித்து அதற்குட்பட்ட பொது நிறுவனங்களுடனான கலந்துரையாடல் இன்று வலி-கிழக்கு பிரதேச சபை தலைமையக மண்டபத்தில் நடைபெற்றது. இதன்போது, அபிவிருத்தி சம்பந்தமான தங்களது கோரிக்கைகளை இக்கூட்டத்தில் கலந்துக் கொண்டு முன்வைக்குமாறு கேட்டுக் கொள்ளப்பட்டிருந்தது.

கூட்டத்தில் நாடாளுமன்ற உறுப்பினர்களான மாவை சேனாதிராஜா, சரவணபவன், எம்.ஏ.சுமந்திரன் மற்றும் யாழ். மாவட்ட மாகாண சபை உறுப்பினர்கள் ஆகியோரும் கலந்து கொண்டிருந்தனர். இதில் கலந்து கொண்டிருந்த அரசியல் பிரமுகர்கள் கூட்டத்தில் அபிவிருத்தி நடவடிக்கைகளுக்கு மாறாக அரசியல் விவகாரம் குறித்து பேசியுள்ளதாக தெரிவிக்கப்படுகிறது. இதனால், அதிருப்தியடைந்த மக்கள் அரசியல் பேசுவதாக இருந்தால் நாடாளுமன்றத்திற்கு சென்று பேசுங்கள். அபிவிருத்தி குறித்த கலந்துரையாடுவதற்கெனவே நாம் வரவழைக்கப்பட்டோம். அதன்படி எமது பிரச்சினைகள் குறித்து எடுத்துரைக்கவும், மகஜர்களை கையளிக்கும் நோக்கிலும் நாம் இங்கு கலந்து கொண்டோம். ஆனால் எங்கள் குறைகளை கேட்டறியாது, அரசியல் பேசிக் கொண்டிருக்கின்றனர் என மக்கள் விசனம் தெரிவித்தனர்.

அத்துடன், கூட்டத்தில் கலந்து கொண்டிருந்தவர் எழுந்து தனது கண்டனத்தை வெளிப்படுத்தியதை அடுத்து, அவரை வெளியேற்றுமாறு பணிக்கப்பட்டது. இந்நிலையில், இவ்வாறு கூட்டத்திற்கு அழைத்து இப்படி வெளியேற்றும் செயலானது ஏற்பாட்டுக் குழுவின் அநாகரிகமான செயலை வெளிக்காட்டுவதாக அமைந்துள்ளது என கூட்டத்திலிருந்து வெளியேற பணிக்கப்பட்ட நபர் குறிப்பிட்டுள்ளார்.