யாழில் ஆட்டோ, மோட்டார் சைக்கிள், ஏ.ரீ.எம். இயந்திரத்தை மோதித்தள்ளிய பஸ்:படுகாயமடைந்த மூவர் வைத்தியசாலையில்; மாணவனின் நிலைமை கவலைக்கிடம்!

(பாறுக் ஷிஹான்)

யாழ்ப்பாணம் பலாலி வீதியில்  பாரிய வாகன விபத்து இடம்பெற்றுள்ளது.

யாழ்ப்பாணத்திலிருந்து புன்னாலைகட்டுவன் நோக்கி பயணித்த தனியார் பஸ் ஒன்று இலங்கை போக்குவரத்துச் சபைக்குச் சொந்தமான  பஸ்ஸை முந்திச் செல்ல முற்பட்டபோதே இந்த விபத்து இடம்பெற்றுள்ளது.

கட்டுப்பாட்டை இழந்த  தனியார் பஸ்  ஆட்டோ, மோட்டார் சைக்கிள்களை மோதி விட்டு அருகிலிருந்த தனியார் வங்கியின்  தானியங்கி (ஏ.ரி.எம்) இயந்திரத்துக்கு பலத்த சேதத்தை ஏற்படுத்தியுள்ளது. 

இதன் போது  முச்சக்கரவண்டியை மோதித்தள்ளியதில் முச்சக்கர வண்டியில் பயணித்த மூவர் படுகாயமடைந்த நிலையில்  யாழ்.போதனா வைத்தியசாலையில் அனுமதிக்கப்பட்டுள்ளனர். 

இதில் பயணித்த பாடசாலை மாணவன் கவலைக்கிடமான நிலையில் உள்ளார் எனத் தெரிவிக்கப்படுகின்றது. சம்பவம் தொடர்பில் கோப்பாய் பொலிஸார் மேலதிக விசாரணைகளை மேற்கொண்டு வருகின்றனர்.