குற்றம் உள்ள நெஞ்சு குறுகுறுக்குமாம்! யாழ்ப்பாணத்தம்பி:

மனித உரிமை ஆணையாளரின்டை விஜயம் வேடிக்கையாய் இருக்குதாம் கோத்தபாயவுக்கு. பின்ன இருக்காதே? அதை வைச்சும் இவரும் இனவாத அரசியல் செய்த இடமிருந்தால் அது வேடிக்கைதானே. இல்லாட்டி மனித உரிமை ஆணையாளர் என்ன மஜிக் சோ நடத்தவே வந்தவர்?

அவர் வந்து நிலமையைளை பாக்கிறார். நீங்கள் ஏன் முந்திரிக்கொட்டை மாதிரி முந்தி முந்தி கூட்டம் போடுறியள்? குற்றம் உள்ள நெஞ்சுதானே குறுகுறுக்கும். இராணுவ வீரர்கள் யுத்தக் குற்றம் இழைக்கவில்லையாம். சரி அப்ப ஏன் பயப்பிடுறியள்? குற்றம் இழைக்காட்டில் ஏன் இந்த பதற்றம்?

கொழும்பிலை மீட்டிங்கை போடுறியள். கையெழுத்து வேட்டை செய்யிறியள். ஏரி நிறைந்தால் கரை கசியும். அப்பிடித்தான் உங்கடை இனவாத குட்டைக் குளத்தின்டை அணைக்கட்டுக்கள் கரைஞ்சு போச்சுது. கூரைமேலே சோறு போட்டால் ஆயிரம் காகம் வரும் எண்டுற இனவாத அரசியல் செய்யாதிங்கோ. சொப்பனத்திலை கண்ட அரிசி சோற்றுக்காகுமே?

நாங்களே யுத்தத்தை முடிவுக்கு கொண்டு வந்ததாம் எண்டுறார் கோத்தபாய. சும்மாவே யுத்தம் செய்தனியள். சனங்களை கொத்துக் கொத்தாய் கொண்டு தமிழினத்தை அழிச்சு இரத்த ஆற்றிலை நீந்தி எல்லோ யுத்தம் செய்தனியள். உயிரோடை சரணடைஞ்ச எத்தினை மனுசரை இல்லை எண்டு சொன்னனியள்? வெல்ல வேணும் எண்டு நீங்கள் எப்பிடி வேணும் எண்டாலும் யுத்தம் செய்வியள். அதை பாத்துக் கொண்டே இருக்கவேணும் என?

உங்கடை யுத்தம் மனித குலத்திற்கு எதிரானது எண்டதுதானே பிரச்சினை. சரி. நேர்மையாய் யுத்தம் செய்திருந்தால் ஹேக் நீதிமன்றம் போங்கோ. இன்னும் எந்த நீதிமன்றம் என்ன விசாரணை எண்டு சொல்லேல்லை. அதுக்குள்ளை நீங்கள் தொடங்கிட்டியள்.

ஏனெண்டால் என்ன குற்றம் செய்தால் என்ன விசாரணை? எங்கை நீதிமன்றம்? என்ன தண்டனை எண்டு உங்களுக்குத் தெரியும்தானே? உவையளை மாதிரி ஆக்களுக்கு என்ன நடந்தது எண்டும் உவருக்கும் உவரின்டை அண்ணனுக்கும் நல்லா தெரியும்தானே?

வியாதிக்கு மருந்துண்டு விதிக்கு மருந்துண்டா? ஆட்சியை இழந்தால் பேசாமால் அண்ணனும் தம்பியுமாய் மெதமுலனவில் போய் இளைப்பாறுகிறதுதானே. அதைவிட்டிட்டு கிணற்றுக்குத் தப்பித் தீயிலே பாய்ந்த கதையாய் தொடர்ந்தும் யுத்தவெறியை வைச்சுக் கொண்டு அரசியல் செய்ய திரியிறியள்?

ஆட்டுக்கும் வால் அளந்து வைத்திருக்கு. அதனால் கொஞ்சம் அடக்கமாய் நடந்திருக்க வேணும். நீங்கள் அந்தி மழை அழுதாலும் விடாது எண்டுற மாதிரி தொடர்ந்து இனவாதத்தை கக்கிறியளே? அடி நாக்கிலே நஞ்சும் நுனி நாக்கில் அமுதமும் எண்டுவினம். இது நுனி நாக்கிலையும் நஞ்சே? ஆனால் இலங்கை தீவிலை நிலமை மாறிட்டுது. மகிந்தர் எண்டுற இனவாத குதிரையை வைச்சு இனிமேல் பந்தயம் காட்ட ஆரும் வறமாட்டினம். அச்சாணி இல்லாத தேர் முச்சாணும் ஓடாது.

விளையாட்டாய் இருந்தது வினையாய் முடிஞ்சிட்டுது. அடாது செய்தவன் படாது படுவான் எண்டுற மாதிரி நீங்களும் இனி என்ன எல்லாம் செய்து பாக்கிறியள். என்ன எல்லாம் பேசிப் பாக்கிறியள். அல் ஹூசைனுக்கு  அரசாங்கம் பயிற்சி அளித்து பேச அனுப்பியிருக்குது எண்டுறியள். மகிந்தவும் அவரை முந்திக் கூப்பிட்டவர்தானே. அப்ப நீங்கள் கூப்பிடுறவைக்கு நீங்கள் ரெயினிங் எடுக்கிறனியளே? அது மகிந்தர்தான் வெளிநாட்டு கூட்டங்கள் போகமுதல் ரெயினிங் கிளாஸ் போறவர்.

இரண்டொரு நாளிலை அல் ஹூசைன்  என்ன சாதித்தபார்? எதை முழுமையாக தெரிஞ்சு கொள்ளுவார் எண்டு கேக்கிறியள்? உங்கடை ஆட்சியிலை நவநீதம்பிள்ளை வந்து இரண்டு ஒருநாளிலை வந்து எல்லாத்தையும் தெரிஞ்சு கொண்டாவா தானே? நீங்கள் செய்த அநியாங்களை உலகமே அறியும் எல்லே? இன்னும் கூட நாள் இஞ்ச அல் ஹூசைன் இலங்கையிலை தங்கினால் உங்கடை வண்டவாளங்கள்தான் ஐ.நா தண்டவாளத்திலை அதிகமாய் ஏறும்!

நீங்கள் தலையாலை நடந்தும் ஒண்டும் செய்ய ஏலாது. வினை விதைத்தவன் வினை அறுப்பான், தினை வினைத்தவன் தினை அறுப்பான். உப்புத் திண்டவன் தண்ணி குடிப்பான். திண்ட உப்பின்டை அளவு தெரியும்தானே. அதுக்கு தக்கினை பானையோடை ரெடியாய் இருங்கோ.

யாழ்ப்பாணத்தம்பி

http://globaltamilnews.net/GTMNEditorial/tabid/71/articleType/ArticleView/articleId/128765/language/ta-IN/article.aspx