இராணுவத்தினரால் கடத்தப்பட்ட எனது மகன் நயினாதீவில் கடற்படை சீருடையுடன் நின்றார் என தாய் ஒருவர் சாட்சியம் அளித்துள்ளார்.

 

 

மேலும் தனது சாட்சியத்தில் குறிப்பிடுகையில், 

 

எனது மகனான அச்சுதன் வைகுந்தன் (வயது 22) நீர்வேலி வடக்கில் உள்ள எமது வீட்டில் இருந்த வேளை 2006ம் ஆண்டு 10ம்  மாதம் 18ம் திகதி வீட்டுக்குள் புகுந்த கும்பல் ஒன்று வீட்டில் இருந்த பொருட்களை அடித்து நெருக்கி மகனை கயிற்றால் கட்டி இழுத்து சென்றனர்.

 

அதன் பின்னர் அச்செழு மற்றும் ஊரெழு இராணுவ முகாமில் மகனை தடுத்து வைத்து விசாரணைகளை மேற்கொண்டனர். பின்னர் மகனை பற்றிய தகவல் எதுவும் இல்லை.

 

மகன் கடத்தப்பட்டு ஆறு மாத காலம் கடந்த நிலையில் நயினாதீவு ஆலயத்திற்கு சென்ற எமது உறவினர்கள் மகனை கடற்படை சீருடையுடன் நயினாதீவில் கண்டு உள்ளனர். 

 

அதன் பின்னர் மகனை பற்றிய எந்த தகவலும் இல்லை. கடந்த 2013ம் ஆண்டு இறுதி கால பகுதியில் எமக்கு ஒரு கடிதம் வந்தது மகனை வவுனியா யோசப் முகாமில் தடுத்து  வைத்து இருப்பதாகவும் அவரை மீட்க ஒரு இலட்ச ரூபாய் பணம் கொடுக்கவும் என.அதன் பிறகு கைதடியில் உள்ள ஒருவர் வந்து என்னிடம் ஒரு இலட்சம் ரூபாய் பணத்தை பெற்றுக்கொண்டு இந்த பணத்தை இராணுவத்தினரிடம் வழங்கினால் முகாமில் இருந்து அதிகாலை மகனை விடுதலை செய்வார்கள் என கூறி பணத்தினை வாங்கி சென்றார்.

 

அதன் பிறகு எந்த தகவலும் இல்லை. பணத்தை பெற்றவரின் வீட்டினை அறிந்து அங்கு சென்று விசாரித்தால் பணம் வாங்கியவரின் மனைவி பிள்ளைகளே இருந்தனர். அவர்கள் கூறினார்கள் அவர் நீண்ட நாள வீட்டுக்கு வரவில்லை என

 

அதன் பிறகு மகனை பற்றியோ பணத்தை பெற்றவர் பற்றியோ எந்தவிதமான தகவலும் இல்லை என தனது சாட்சியத்தில் குறிப்பிட்டார்.

இராணுவத்தினரிடம் கையளித்த மகனையும் மகளையும் காணவில்லை. தாய் சாட்சியம்.

 

ஓமந்தையில் இராணுவத்திடம் கையளித்த மகனையும் மகளையும் காணவில்லை என தாய் ஒருவர் சாட்சியம் அளித்துள்ளார்.

 

மேலும் சாட்சியத்தில் குறிப்பிடுகையில், 

 

ஓமந்தை பகுதியால் நாம் இராணுவ கட்டுப்பாட்டு பகுதிக்குள் வரும் வேளை எனது மகனான புவனேந்திரன் மதன்ராஜ் , மற்றும் மகளான புவனேந்திரன் நிஷாந்தினி ஆகிய இருவரையும் இராணுவத்தினர் பிடித்து சென்று அங்கிருந்த பஸ்ஸில் ஏற்றி சென்றனர்.

 

 

எனது பிள்ளைகள் புலிகள் இல்லை அவர்களை விடுமாறு கூறிய போது விசாரனைக்காக தான் அழைத்து செல்கின்றோம். விசாரணை முடிய விடுதலை செய்வோம் என கூறி தான் அழைத்து சென்றார்கள் அதன் பின்னர் எந்த தகவலும் இல்லை என தனது சாட்சியத்தில் குறிப்பிட்டார்.

 

 

மேஜர் செங்கதிருடன் சென்ற மகனை காணவில்லை. - தாய் சாட்சியம்.

 

விடுதலை புலிகள் அமைப்பை சேர்ந்த மேஜர் செங்கதிர் உடன் சென்ற தனது மகனை காணவில்லை என தாய் ஒருவர் சாட்சியம் அளித்துள்ளார்.

 

மேலும் தனது சாட்சியத்தில் குறிப்பிடுகையில், 

 

கடந்த 1990ம் ஆண்டு பாடசாலைக்கு சென்ற எனது மகனான சரவணபவன் ரகுநாதன் விடுதலை புலிகள் அமைப்பில் இணைந்து  கொண்டதாக புலிகளால் கூறப்பட்டது.

 

அதன் பின்னர் 1991ம் ஆண்டு மட்டுவில் பகுதியில் உள்ள விடுதலை புலிகளின் முகாமில் மேஜர் செங்கதிர் என்பவரின் மெய் பாதுகாவலராக இருந்தார்.

 

1991ம் ஆண்டு முதலாம் மாதம் 10ம் திகதி மேஜர் செங்கதிர் உடன் வவுனியாவுக்கு சென்ற வேளை காணாமல் போயுள்ளார். அவர்கள் இருவரும் காணாமல் போன சில நாட்களில் விடுதலை புலிகள் அமைப்பை சேர்ந்தவர்கள் எங்கள் வீட்டு வந்து எனது மகனை தேடினார்கள். அவர்களிடம் எனது மகன் இல்லை என கூறினேன்.

 

அதன் பின்னர் 1991ம் ஆண்டு 2ம் மாதம் 25ம் திகதி மேஜர் செங்கதிரும் எனது மகனும் வீரச்சாவு என ஈழநாதம் பத்திரிகையில் மூலம் விடுதலை புலிகளால் அறிவிக்கப்பட்டது. 

 

மேஜர் செங்கதிருக்கும் புலிகள் அமைப்புக்கும் இடையில் உட்பூசல் இருந்ததாகவும் அதனால்  செங்கதிரும் எனது மகனும் வவுனியா இராணுவ முகாமில் சரணடைந்து தற்போது இராணுவத்தினரின் தலையாடிகளாக உள்ளதாகவும் தகவல்கள் வெளியாகின.