வியாழன் 18-01-2007 23:46 மணி தமிழீழம் [சிறீதரன்]

வாகரை வைத்தியசாலையை இலக்கு வைத்து எறிகணைத் தாக்குதல் 5 பொதுமக்கள் காயம்

மட்டக்களப்பு மாங்கேணி மற்றும் கஐவத்தை இராணுவ முகாம்மில் இருந்து சிறீலங்கா படையினர் தொடர்ச்சியாக கடும் எறிகணைத்தாக்குதல்களை இன்று வியாழக்கிழமை காலை மற்றும் மாலை மேற்கொண்டுள்ளதாகவும் இவ் எறிகணைகள் வாகரை வைத்தியசாலையை அண்டிய பகுதிகளில் வீழ்ந்து வெடித்ததாகவும். இதன்போது 5 பொதுமக்கள் காயமடைந்துள்ளதாகவும் மேலும் அறியமுடிகிறது.

இதுதொடர்பில் மேலும் தெரியவருகையில் காலை 6 மணிமுதல் 10 மணிவரையும் மேற்கொண்ட எறிகணைத்தாக்குதலில் 8 எறிகணைகள் வைத்தியசாலையை அண்டியபகுதிகளில் வீழ்ந்து வெடித்ததாகவும் இதன் போது ஒருவர் காயமடைந்ததாகவும் பின் மாலை 5.15 மணியளவில் மேற்கொண்ட எறிகணைத்தாக்குதலில் 6 எறிகணைகள் வைத்தியசாலை வளவுக்குள் வீழ்ந்து வெடித்ததாகவும் இதன் போது நால்வர் காயமடைந்துள்ளனர்.

நன்றி-பதிவு

எறிகணைத் தாக்குதலில் வாகரை மருத்துவமனை கட்டடம் சேதம்- 5 பேர் படுகாயம்

மட்டக்களப்பு வாகரை மருத்துவமனையை இலக்கு வைத்து சிறிலங்காப் படையினர் நடத்திய எறிகணைத் தாக்குதலில் பொதுமக்கள் ஐவர் படுகாயமடைந்துள்ளதுடன் மருத்துவமனை கட்டடமும் சேதமாகியுள்ளது.

நேற்று வியாழக்கிழமை காலை முதல் வாகரை மருத்துவமனையை அண்மித்த பகுதிகளை இலக்கு வைத்து படையினர் தொடர் எறிகணைத் தாக்குதல்களை நடத்திக்கொண்டிருந்தனர். இதன் காரணமாக பத்தாயிரத்துக்கு மேற்பட்ட மக்கள் வாகரை மருத்துவமனை வளாகத்தில் தஞ்சமடைந்திருந்தனர்.

அப்போது எறிகணைகள் மருத்துவமனை கட்டடம் மற்றும் வளாகத்திற்கள் வீழ்ந்து வெடித்துள்ளன. இதில் மருத்துவமனை வாளாகத்துள் தஞ்சமடைந்திருந்த பொதுமக்களில் ஐவர் படுகாயமடைந்தனர். மருத்துவமனை கட்டமும் சேதமாகியுள்ளது. அத்துடன் வளாகத்திற்குள் மக்கள் தங்கியிருந்த நான்கு தற்காலிக கொட்டில்களும் எரிந்துள்ளன. தொடர்ந்து படையினர் எறிகணைத் தாக்குதலை நடத்தி வருகின்றனர்.

மக்களின் பாதுகாப்புக் கருதி வாகரை மருத்துவமனை பொறுப்பதிகாரி அனைத்துலக செஞ்சிலுவை சங்கக்குழுவினர் மற்றும் சிறிலங்கா அரச தரப்பினருக்கு நிலைமைகளை எடுத்துரைத்தார். ஆனால் மாலையும் வாகரை மருத்துவமனையை இலக்கு வைத்து படையினர் செறிவான தொடர் எறிகணைத் தாக்குதலை நடத்தினர்.

-புதினம்