சிவன் பக்தரும் தமிழ் உணர்வாளருமான சிவனடியார் ஆறுமுகசாமி காலமானார். சிதம்பரம் நடராஜர் கோயிலில் திருவாசகம், தேவாரம் பாடல்களை தமிழில் பாடவேண்டும் என தொடர்ந்து போராடி வந்த இவர், 2008 ல் உயரநீதிமன்ற தீர்ப்பை பெற்று மேளதாளங்கள் முழங்க தமிழில் தேவாரம்  பாடினார். 

2008 மார்ச் 2 -ஆம் தேதி தில்லை நடராஜர் கோயிலில் தமிழ் ஒலித்தது. தள்ளாத வயதிலும்,கண் பார்வை மங்கிய முதியவரான சிவனடியார் ஆறுமுகசாமி சிற்றம்பலத்தில் தேவாரம் பாடினார். தில்லை தீட்சிதர்களுக்கு எதிராக தொடர்ந்து போராடிய போராட்டவீரர் ஆறுமுகசாமி. சிதம்பரம் கோயிலை அரசாங்கமே நடத்த வேண்டும், தமிழில் தேவாரம், திருவாசகம் பாடப்பட வேண்டும் என அவர் தொடர்ந்து குரல்கொடுத்து வந்தார்.

பல தமிழ் அமைப்புகளும் அவருக்கு ஆதரவாக நிற்கவே, உயர்நீதிமன்றம் ஆறுமுகசாமி பாடுவதற்கான அரசாணையை வெளியிட்டது. இந்நிலையில், சிவனடியார் ஆறுமுகசாமி உடல் நலக்குறைவால் உயிரிழந்தார்.

தனது மகள் வீட்டில் தங்கியிருந்த இவர் உடல் நலம் பாதிக்கப்பட்டு இயற்கை எய்தினார். இதையடுத்து அவரின் சொந்த ஊரான குமுடிமூலை கிராமத்தில் இன்று இறுதி சடங்கு நடைபெறுகிறது.

சிற்றம்பலத்தில் நின்று அனைவரும் தமிழில் தேவாரம் பாடும் அரசாணையைப் பெற்ற பின்னரும், தன்னைத் தவிர யாரும் அந்த உரிமையை பயன்படுத்திக் கொள்ள முன்வரவில்லையே என்று அவர் பெரிதும் வருந்தினார் என்பது குறிப்பிடத்தக்கது.