டெல்லியில் தமிழக விவசாயிகள் வளையல் உடைத்து, குங்குமம் அழித்து நூதன போராட்டம்

புதுடெல்லி:

தமிழக விவசாயிகள் கடந்த 34 நாட்களாக டெல்லி ஜந்தர்மந்தரில் வெயில், குளிர், மழை என்று பாராமல் தொடர் போராட்டம் நடத்தி வருகிறார்கள்.

மத்திய அரசு காவிரி நீர் மேலாண்மை வாரியம் அமைக்க வேண்டும், விவசாயிகளின் கடன்களை தேசியமயமாக்கப்பட்ட வங்கிகள் தள்ளுபடி செய்ய வேண்டும், தமிழகத்திற்கு உரிய வறட்சி நிவாரணம் வழங்க வேண்டும், நதிகளை இணைக்க வேண்டும் உள்ளிட்ட கோரிக்கைகளை வலியுறுத்தி தேசிய தென்னிந்திய நதிகள் இணைப்பு விவசாயிகள் சங்கத்தினர் இந்த போராட்டத்தில் ஈடுபட்டுள்ளனர்.

அவர்களுக்கு தமிழகத்தை சேர்ந்த அரசியல் கட்சி தலைவர்கள் மு.க.ஸ்டாலின், திருமாவளவன், ஜி.கே.வாசன், ஜி.ராமகிருஷ்ணன், முத்தரசன், விஜய டி.ராஜேந்தர், பிரேமலதா, சீமான், திருநாவுக்கரசர், ஈ.வி.கே.எஸ்.இளங் கோவன் உள்ளிட்ட பலர் டெல்லி சென்று நேரில் ஆதரவு அளித்தனர்.

கடந்த மாதம் 16-ந்தேதி தொடங்கிய இந்த போராட்டம் இன்று 34-வது நாளாக நீடிக்கிறது. எலிக்கறி, பாம் புக்கறி தின்று போராட்டம், மொட்டை அடித்து, மண் சோறு சாப்பிட்டு, சேலை அணிந்து, தாலி அறுத்து போராட்டம் என தினமும் வித்தியாசமான முறையில் போராட்டம் நடத்தி வருகிறார்கள்.

நாளுக்கு நாள் தீவிரமடைந்து வரும் போராட்டத்தில் இன்று விவசாயிகள் தங்கள் கைகளில் அணிந்த வளையல்களை உடைத்தும், நெற்றியில் அணிந்த குங்குமத்தை அழித்தும் மத்திய அரசின் கவனத்தை ஈர்க்கும் போராட்டத்தை நடத்தினர்.

இன்றைய போராட்டம் குறித்து அவர்கள் கூறுகையில், சேலை கட்டி, பொட்டு வைத்தும், தாலியை அறுத்தும் போராட்டம் நடத்தியும் எங்களை இதுவரை பிரதமர் சந்தித்து பேச முன் வர வில்லை. எனவே போராட்டத்தின் அடுத்த கட்டமாக இன்று பெண்களை போல் வளையல் அணிந்து அதனை உடைத்தும், குங்குமத்தை அழித்தும் போராட்டம் நடத்தியுள்ளோம். விவசாயிகளான எங்கள் மரணத்திற்கு பிறகு எங்கள் மனைவி மார்களின் கையில் அணிந்திருக்கும் வளையல்களை உடைத்து, நெற்றியில் இருக்கும் குங்குமத்தை அழித்து விவசாயிகளின் மனைவிகள் அனைவரும் வாழ வழியில்லாமல் நிர்கதியான நிலையை சித்தரிக்கும் வண்ணம் இந்த போராட்டம் நடத்தப்பட்டது.

நியாயமான எங்கள் கோரிக்கைகள் நிறைவேறும் வரை போராட்டத்தை கைவிடும் எண்ணம் எங்களுக்கு இல்லை என்று விவசாயிகள் திட்டவட்டமாக கூறினர்.