இலங்கைக்கு GSP+: கண்காணிப்புச் செயன்முறையொன்றை EU கோருவது அவசியம்

May 5, 20178 yr

நீங்கள் ஒரு சட்டையைப் பார்க்கிறீர்கள். பொருத்தமான விலை. நீங்கள் அதை வாங்குகிறீர்கள். “இலங்கையில் தயாரிக்கப்பட்டது” என அதில் எழுதப்பட்டுள்ளது.

ஆனால், அந்தச் சட்டையைச் செய்வதற்கான உண்மையான செலவு என்ன என்பது பற்றி நீங்கள் அனேகமாகச் சிந்தித்திருக்க மாட்டீர்கள். மேலும், GSP+ எனப்படும் ஓர் முன்னுரிமை வர்த்தகத் திட்டமானது எவ்வாறு அச்சட்டையை ஐரோப்பியச் சந்தைக்குக் கொண்டுவருகிறது என்பதைப் பற்றியோ, இலங்கையில் மனித உரிமைகள் நிலைநிறுத்தப்படுகின்றன எனும் பிம்பம் எவ்வாறு அதன் மூலம் ஏற்படுத்தப்படுகிறது என்பதைப் பற்றியோ உங்களுக்குத் தெரிந்திருக்கப் போவதில்லை. ஏப்ரல் 27, 2017 அன்று ஐரோப்பிய நாடாளுமன்றமானது, இலங்கைக்கு இம் முன்னுரிமை வர்த்தக நிலையை மீள அளிப்பதை மறுக்குந் தீர்மானத்தைத் தோற்கடித்து வாக்களித்துள்ளது.

2010 இல், இலங்கையின் மனித உரிமை நிலைமை காரணமாக, இலங்கைக்கான GSP+ வரிச் சலுகையை ஐரோப்பிய ஒன்றியம் திரும்பப் பெற்றுக்கொண்டது. தமிழீழ விடுதலைப் புலிகள் இலங்கை ஆயதப் படைகளால் தோற்கடிக்கப்பட்டு, 26 ஆண்டுகால உள்நாட்டு யுத்தம் முடிவுக்குக் கொண்டுவரப்பட்டிருந்த நேரமது. யுத்தத்தின் இறுதி மாதங்களில் மட்டும் 40,000 அல்லது அதற்கும் மேற்பட்டளவு மக்கள் உயிரிழந்துள்ளனர் என ஐக்கிய நாடுகள் சபையின் வல்லுனர்கள் மதிப்பிட்டுள்ளனர். ஊடகவியலாளர்கள், குடிசார் சமூகக் குழுக்கள், போரினாற் பாதிக்கப்பட்ட தமிழர்கள் மற்றும் மதச் சிறுபான்மையினர் மீதான பரவலான மனித உரிமை மீறல்கள் தொடர்பான சர்வதேச எச்சரிக்கையின் மத்தியிலும் போரை வெற்றிகொண்ட அரசானது தனது அதிகாரத்தை உறுதியாகப் பற்றிகொண்டிருந்தது. GSP+ வரிச் சலுகையைத் தொடர்ந்து பேணுவதற்கு, சர்வதேசக் குடிசார் மற்றும் அரசியல் உரிமைகள் உடன்படிக்கை (ICCPR) மற்றும் சித்திரவதைக்கு எதிரான உடன்படிக்கை (CAT) உட்பட GSP+ திட்டத்தின் கீழ்வரும் 27 சர்வதேச உடன்படிக்கைகளுக்கு இணங்கவேண்டும் என ஐரோப்பிய ஒன்றியம் இலங்கைக்குக் கூறியிருந்தது. மேலும், ஆயிரக்கணக்கானோர் பலவந்தமாகக் காணாமற்போகச் செய்யப்படுவதற்கு வழிகோலிய பயங்கரவாதத் தடுப்புச் சட்டத்தின் (PTA) பல பகுதிகள் சர்வதேசக் குடிசார் மற்றும் அரசியல் உரிமைகள் உடன்படிக்கையுடன் முரண்படுகின்றன; எனவே, அவை நீக்கப்படவேண்டும் எனவும் அது இலங்கைக்குக் கூறியிருந்தது. ஆனால், முந்தைய அரசானது இவ் உடன்படிக்கைகளுக்கு இணங்காத தன் நிலைப்பாட்டில் உறுதியாக நின்றபோது, ஐரோப்பிய ஒன்றியம் இலங்கையின் GSP+ வரிச் சலுகையைத் திரும்பப் பெற்றுக்கொண்டது.

2015இல் இலங்கையில் ஒரு புதிய அரசாங்கம் பதவிக்கு வந்தது. அது GSP+ அங்கத்துவத்துக்கு மீண்டும் விண்ணப்பித்ததுடன், எதிர்காலத்தில் அத்துமீறல்கள் நடவாது தடுப்பதற்கும், கடந்தகாலத்துக்குப் பரிகாரஞ் செய்வதற்குமான விரிவான நடவடிக்கைகளை உள்ளடக்கிய நான்கு நிலைமாறுகால நீதிப் பொறிமுறைகளை உருவாக்குவதற்கு உறுதியளிக்கும் ஐக்கிய நாடுகள் மனித உரிமைகள் பேரவையின் 30/1 இலக்கமுடைய பிரேரணைக்கு இணையனுசரணையையும் வழங்கியது. ஏனைய கடப்பாடுகளுடன், நடைமுறையிலுள்ள பயங்கரவாதத் தடுப்புச் சட்டமானது நீக்கப்பட்டு, அதற்குப் பதிலாக ஒரு புதிய பயங்கரவாத எதிர்ப்புச் சட்டவாக்கம் இயற்றப்படுமென அரசு ஐரோப்பிய ஒன்றியத்துக்கும், மனித உரிமைகள் பேரவைக்கும் உறுதியளித்திருந்தது.

உறுதிமொழிகள் அளிக்கப்பட்ட போதிலும், அவற்றில் மிகக் குறைந்தளவே நடைமுறைப்படுத்தப்பட்டுள்ளன. சமீபத்தில் ஐக்கிய நாடுகள் சபையின் மனித உரிமைகளுக்கான உயர் ஸ்தானிகர், 2015 இலிருந்தான இலங்கையின் நிலைமாறுகால நீதி தொடர்பான முன்னெடுப்புகளைக் “கவலைதரும் வகையில் மந்தமாகவுள்ளது” எனவும், அரச அதிகாரிகள் “அடிக்கடி தெளிவற்ற மற்றும் முரண்பட்ட தகவல்களைத்” தரும் நிலையில் அவை “உண்மையான முன்னேற்றத்தை உறுதிசெய்வதற்குப் போதுமானதாக இல்லை” எனவும் விவரித்திருந்தார். உறுதியளிக்கப்பட நான்கு நிலைமாறுகால நீதிப் பொறிமுறைகளிற் தற்போது காணாமற் போனோருக்கான அலுவலகம் மட்டுமே சட்டவாக்கத்தைக் கொண்டுள்ளது. அதுவுமே செயலற்றதொன்றாகவுள்ள நிலையில், வெளிநாட்டுத் தொழிநுட்ப உதவியை அனுமதிக்கும் ஒரு முக்கிய ஏற்பாட்டை நீக்குவதற்கான நகர்வுகளும் மேற்கொள்ளப்பட்டுவருகின்றன. மேலும், பொதுமக்கள் கலந்தாலோசனைச் செயலணியின் அறிக்கையை அரச அதிகாரிகள் நிராகரித்துள்ளனர். இச்செயலணியை அரசே நியமித்தது என்பது மட்டுமல்லாது, இதில் எல்லா இனச் சமூகங்களிலிருந்தும் 7,300 இற்கும் அதிகமானோர் கலந்துகொண்டு முன்செல்வதற்கான சிறந்த வழி எது என்பது பற்றிய தமது எண்ணங்களையும் பகிர்ந்திருந்தனர்.

குறிப்பாகப் பயங்கரவாதத் தடுப்புச் சட்டம் (PTA) இன்னும் அகற்றப்படவில்லை. அதற்குப் பதிலாகப் புதிய பயங்கரவாத எதிர்ப்புச் சட்டம் (CTA) ஒன்று இயற்றப்பட்டு வருகிறது என அரசினாற் சொல்லப்பட்ட போதிலும், அச் சட்டவாக்கமானது இலங்கையின் மக்கள் மட்டுமல்லாது அதன் மனித உரிமைகள் ஆணைக்குழுவுடன் கூடக் கலந்தாலோசிக்கப்படாது இரகசியமாகவே இயற்றப்பட்டு வருகிறது. ஏப்ரல் 24, 2017 அன்று ஐரோப்பிய ஒன்றிய அங்கத்தவர்களைச் சமாதானப்படுத்தவும், GSP+ வரிச் சலுகையினை மீண்டும் பெற்றுக்கொள்ளவும், CTA வரைவானது அவசரமாக அமைச்சரவையினால் அங்கீகரிக்கப்பட்டது. இச் CTA வரைவானது பயங்கரவாதத்துடன் தொடர்புடைய குற்றங்கள் பற்றிய மிகையானதோர் வரைவிலக்கணம், தடுத்து வைப்பது தொடர்பில் பொலிஸாருக்கு மிகை அதிகாரம், மற்றும் தடுப்புக் காவலின் ஆரம்ப நாட்களில் மட்டுப்படுத்தப்பட்ட சட்ட அணுகல் என்பவற்றை உள்ளடக்கியுள்ளதாகக் கூறப்படுகிறது. இவை அனைத்துமே ஏற்றுக்கொள்ளப்படக்கூடிய சர்வதேச நியமங்களை விடக் கீழ் நிலையிலுள்ளதுடன், GSP+ வரிச் சலுகையை மீண்டும் அளிப்பதற்கான ஐரோப்பிய ஒன்றியத்தின் எதிர்பார்ப்புகளைப் பூர்த்திசெய்யுமாறும் இல்லை. மேலும், அரசானது அரசிலமைப்புச் சீர்திருத்தம் தொடர்பில் இழுத்தடிப்புச் செய்து வருகிறது. இதன் காரணமாக மிதவாதத் தமிழ் அரசியல்வாதிகளுக்கான ஆதரவு குறைந்து, அவர்களும் கடும்போக்குத் தமிழ் அரசியல்வாதிகளைப் போல் அரசுடன் இணைந்து செயற்படுவதை எதிர்க்கும் நிலை ஏற்படுகிறது. இதற்கிடையில் காணாமற்போனோர் தொடர்பில் பதிலளிக்க வேண்டியும், இராணுவக் கட்டுப்பாட்டிலுள்ள மக்களின் நிலங்களை விடுவிக்க வேண்டியும், போரினாற் பாதிக்கப்பட்ட பெண்கள் ஆர்ப்பாட்டங்களையும், உண்ணாவிரதப் போராட்டங்களையும் மேற்கொண்டு வருகின்றனர்.

எனவே, உறுதிமொழிகள் வழங்கப்பட்ட போதிலும், 2010 இலிருந்து இன்றுவரை இலங்கையில் மனித உரிமைகள் தொடர்பில் பாரிய மாற்றமேதும் ஏற்படவில்லை. இருந்தபோதிலும், ஜனவரி 11, 2017 அன்று ஐரோப்பிய ஒன்றியம் இலங்கைக்கு GSP+ அங்கத்துவத்தை வழங்குமாறுமுன்மொழிந்தது. ஜனவரி 18, 2017 அன்று, “முரண்பாட்டுக்குக் காரணமாக அமைந்ததோடு, எல்லா இலங்கை மக்களதும் வாழ்க்கை மற்றும் வாழ்க்கைத் தரத்தினை மோசமாகப் பாதித்த, வரலாற்றுடன் தொடர்புடைய நீண்டகாலப் பிரச்சினைகளுக்குத் தீர்வு காண்பது தொடர்பில் அர்ப்பணிப்புடையதாக உள்ளதற்கு” இலங்கை அரசுக்கு ஐரோப்பிய ஒன்றியம் பாராட்டுத் தெரிவித்தது.

இலங்கையிலுள்ள போரினாற் பாதிக்கப்பட்ட சமூகமானது, GSP+ வரிச் சலுகையினை இலங்கைக்கு மீள வழங்குவது தொடர்பிற் தமது கவலைகளை வெளிப்படுத்தியுள்ளது. GSP+ வரிச்சலுகை நீக்கத்துக்கான மூலக் காரணங்கள் யாவும் பதிலளிக்கப்படாத நிலையில், வெறும் வாக்குறுதிகளை மட்டும் அடிப்படையாகக் கொண்டு தற்போதைய அரசாங்கத்திற்கு இச் சலுகையை வழங்குவது சாதகமற்ற விளைவையே ஏற்படுத்தும். எனினும், யதார்த்தத்தைக் கருத்திற்கொள்ளும்போது, GSP+ வரிச்சலுகை இலங்கைக்குக் கிடைப்பதென்பது உறுதியெனத் தெரிகிறது. ஐரோப்பியப் நாடாளுமன்றத்தின் பெரும்பான்மை இத்தீர்மானத்தை எதிர்த்தால் மட்டுமே இது இலங்கைக்குக் கிடைக்காது போகும். ஆனால், கடந்த காலத்தில் மனித உரிமைகள் தொடர்பில் மோசமான பதிவுகளைக் கொண்ட பாகிஸ்தான் போன்ற நாடுகளுக்கு GSP+ வரிச்சலுகை அளிக்கப்பட்டதைக் கவனத்திற் கொள்ளும்போது, அது சாத்தியமற்றதொன்றாகவே தோன்றுகிறது.

ஆகவே, நானும் எனது சக பணியாளர்களும் வேறுவழியின்றி GSP+ இலிருந்து கிடைக்கக்கூடிய அனைத்தையும் பயன்படுத்திக்கொள்வதிற் கவனஞ் செலுத்த வேண்டியதாகிறது. “ஏனைய GSP+ நாடுகளைப் போலவே, இலங்கைக்கான சுங்கத் தீர்வைகளின் நீக்கத்தைத் தொடர்ந்து, நிலைபேறான அபிவிருத்தி, மனித உரிமைகள், மற்றும் நல்லாட்சி என்பவற்றில் இலங்கையின் முன்னேற்றமானது தீவிரமாகக் கண்காணிப்படும்” என ஐரோப்பிய ஒன்றியம் தெரிவித்துள்ளது. இலங்கைக்கு GSP+ வரிச் சலுகையானது திரும்பக் கிடைக்கும் நிலையில், பயங்கரவாதத் தடுப்புச் சட்டத்தினை நீக்குதல், சர்வதேசக் குடிசார் மற்றும் அரசியல் உரிமைகள் உடன்படிக்கை மற்றும் சித்திரவதைக்கு எதிரான உடன்படிக்கை என்பவற்றுடன் இணங்குதல் மற்றும் ஐக்கிய நாடுகள் மனித உரிமைகள் பேரவையின் 30/1 இலக்கமுடைய பிரேரணையை முற்றாக அமுற்படுத்துதல் போன்றவற்றை உள்ளடக்கிய இலங்கையின் மனித உரிமைகள் தொடர்பான கடப்பாடுகளைச் செவ்வனே நிறைவேற்ற உதவுமொரு கடுமையான கண்காணிப்பு முறைமையொன்றை எவ்வாறு உருவாக்குவதென்ற கேள்வி எழுகிறது.

GSP ஒழுங்குவிதிகளின் கீழ், GSP+ பயனாளிகள் 27 சர்வதேச உடன்படிக்கைகளை உறுதிப்படுத்தி நடைமுறைப்படுத்துவதுடன், இவ் ஒவ்வொரு உடன்படிக்கையின் கீழ்வரும் அறிக்கையளித்தல் மற்றும் கண்காணித்தல் தொடர்பான தேவைப்பாடுகளுக்கு இணங்கவும் வேண்டும்.[1] மேலும் GSP+ “மதிப்பீட்டு அட்டை” என அழைக்கப்படும் ஐரோப்பிய ஒன்றியத்தின் கண்காணிப்புச் செயன்முறையுடன் பயனாளி நாடுகள் இணங்கவும் வேண்டும். ஒரு நாடு GSP+ இல் இணையும் போது, ஐரோப்பிய ஒன்றியம் அந்நாட்டின் குறைகளை 27 உடன்படிக்கைகளின் கீழும் நிரற்படுத்தி, அவை ஒவ்வொன்றிலும் வருடாந்தம் ஏற்படும் முன்னேற்றங்களைக் கண்காணிக்கும். தனது கண்காணிப்புச் செயன்முறையின் ஒரு பகுதியாக, ஐரோப்பிய ஒன்றியமானது “மத்திய அரசு மட்டுமல்லாது, உள்ளூர் அல்லது பிராந்திய அதிகாரசபைகள், குடிசார் சமூகம் (உதாரணமாக, சமூகப் பங்காளிகள், அரச சார்பற்ற நிறுவனங்கள்), வியாபாரச் சங்கங்கள், மற்றும் சர்வதேச நிறுவனங்களின் உள்ளூர் அலுவலகங்கள் போன்ற “பரந்துபட்ட பல்வேறு பங்குதாரகளுடன்” இணைந்து செயற்படும். “குறிப்பாக GSP+ கண்காணிப்பு வருகைகளின் போது, உள்ளூர்ப் பங்குதாரர்களை” அணுகுவதன் மூலம், ஐரோப்பிய ஒன்றியத்தின் கண்காணிப்புச் செயன்முறையானது, உள்ளூர்ப் பங்களிப்பாளர்கள் “உடன்படிக்கைகளின் கீழான தமது பொறுப்புகளை, உள்ளூர், பிராந்திய, மற்றும் மத்திய அதிகாரசபைகள் நிறைவேற்றுவதற்கு உதவுவதில் ஆக்கபூர்வமானதோர் பாத்திரத்தை வகிக்க உதவுகிறது.”[2]

கொள்கை ரீதியாக நோக்கின், இச் சட்டகவமைப்பானது இலங்கையில் மனித உரிமைகள் தொடர்பான முன்னேற்றத்துக்கு உதவிசெய்யக் கூடும். இலங்கைக்கான கண்காணிப்புச் செயன்முறையொன்றை வடிவமைக்கும்போது, வடக்கு மற்றும் கிழக்கு இலங்கையின் போரினாற் பாதிக்கப்பட்ட சமூகங்களை உள்ளடக்கிய, கொழும்புக்கு வெளியேயுள்ள பங்கேற்பாளர்களுடன் இணைந்தியங்குவதை ஐரோப்பிய ஒன்றியம் வலியுறுத்த வேண்டும். ஒவ்வொரு ஆய்வறிக்கைக் காலத்திலும், இலங்கைக்கான GSP+ மதிப்பீட்டு அட்டையைத் தயாரிக்கும்போது, முந்தைய போரினாற் பாதிக்கப்பட்ட பிரதேசங்களுக்குக் கள ஆய்வு செய்வதற்காக ஒரு குழுவை ஐரோப்பிய ஒன்றியம் அனுப்பவேண்டும். ஐக்கிய நாடுகள் மனித உரிமைகள் பேரவையின் 30/1 இலக்கமுடைய பிரேரணை தொடர்பிலும், நிலைமாறுகால நீதி தொடர்பில் தன்னால் நியமிக்கப்பட்ட பொதுமக்கள் கலந்தாலோசனைச் செயலணியின் பரிந்துரைகளைச் செயற்படுத்துவது தொடர்பிலும், அரசின் முன்னேற்றத்தை ஐரோப்பிய ஒன்றியம் கண்காணிக்க வேண்டும். தேசிய மனித உரிமைகள் ஆணைக்குழு, குடிசார் சமூகம், போரினாற் பாதிக்கப்பட்ட பெண்கள் மற்றும் களத்தில் இயங்கும் மனித உரிமைக் குழுக்கள் போன்றவற்றிலிருந்து கிடைக்கும் உள்ளீடுகளை இடையறாது நாடுவதுடன், மனித உரிமைகள் தொடர்பான தனது கடப்பாடுகளுடன் இணங்குவதற்கு இலங்கை அரசிற்கு அழுத்தம் கொடுக்கும் வகையில் அவர்களின் கவலைகளை ஐரோப்பிய ஒன்றியம் வெளிப்படுத்த வேண்டும். மேலும், வர்த்தக நலன்களை, மனித உரிமைகளுடன் இணைக்கும் நடைமுறை ரீதியான தெரிவுகளை அரசு ஆராய்வதற்கு ஐரோப்பிய ஒன்றியம் உதவ முடியும். உதாரணமாக, ஐரோப்பிய ஒன்றியமானது, ஐக்கிய நாடுகள் சபையின் மனித உரிமைகளுக்கான உயர் ஸ்தானிகர் அலுவலகத்துடன் இணைந்து பணியாற்றுவதனூடாக, GSP+ அங்கத்துவத்தின் மூலம் கிடைக்கும் வரிச் சேமிப்பின் ஒரு பகுதியை வைத்து இழப்பீட்டுத் திட்டம் ஒன்றினை ஆரம்பிப்பதற்கு இலங்கைக்கு உதவ முடியும்.

இறுதியாக, நிலைபேறான அபிவிருத்தி, மனித உரிமைகள், மற்றும் நல்லாட்சி என்பவற்றை ஊக்குவிப்பதே GSP+ இன் இலக்கு எனில், இலங்கை சரியான பாதையிற் செல்கின்றது என்பதை உறுதிசெய்ய ஐரோப்பிய ஒன்றியமானது உள்ளூர்ப் பங்குதாரர்களுடன் இணைந்து கடுமையான கண்காணிப்பினை மேற்கொள்ள வேண்டும். மேலும், நிலைமாறுகால நீதியும், சர்வதேசக் குடிசார் மற்றும் அரசியல் உரிமைகள் உடன்படிக்கை (ICCPR), சித்திரவதைக்கு எதிரான உடன்படிக்கை (CAT), பெண்களுக்கெதிரான அனைத்துப் பாகுபாடுகளையும் ஒழிப்பதற்கான உடன்படிக்கை (CEDAW) மற்றும் GSP+ திட்டத்தின் கீழ் வரும் ஏனைய மனித உரிமைகள் தொடர்பான ஒப்பந்தங்கள் என்பவற்றின் முழுமையான அமுலாக்கமும், ஒன்றுடனொன்று தொடர்புபட்டது என்பதை ஐரோப்பிய ஒன்றியம் உணர வேண்டும். தீர்வுக்கான உரிமை பாதிக்கப்பட்டோருக்கு உண்டு என்பதை மனித உரிமைகள் தொடர்பான உடன்படிக்கைகள் அங்கீகரிக்கின்றன; அதைப்போலவே இலங்கையும் தனது பாதிக்கப்பட்ட மக்களுக்கு உண்மை, நீதி, அவை மீண்டும் நிகழாதிருப்பதற்கான உத்தரவாதம் மற்றும் இழப்பீடுகள் என்பவற்றை வழங்குவது தொடர்பிலான தனது உறுதிமொழிகளை நிறைவேற்றிக் கொடுக்க வேண்டும்.

இது என்னை மீண்டும் ஆரம்பித்த இடத்திற்கே கொண்டு வருகின்றது. “இலங்கையில் தயாரிக்கப்பட்ட” அந்தச் சட்டை – மனித உரிமைகளின் அடிப்படையில் அதன் உண்மையான செலவு என்ன? இலங்கைக்கு GSP+ வரிச் சலுகையை மீள அளிக்குமிடத்து, அதனூடாகப் பெற்றுக்கொள்ளக்கூடிய நன்மைகளை எவ்வாறு ஐரோப்பிய ஒன்றியம் உறுதிசெய்ய முடியும்? கடந்த இரு ஆண்டுகளில் அரச அதிகாரிகளிடமிருந்து கிடைத்த வெற்று வாக்குறுதிகள் ஐரோப்பிய ஒன்றியத்தை சோர்வடையச் செய்திருக்க வேண்டும். GSP+ வரிச் சலுகை இலங்கைக்கு வழங்கப்படின், குடிசார் சமூகம் மற்றும் போரினாற் பாதிக்கப்பட்ட சமூகங்களுடன் இணைந்து செயற்படும் பயனுள்ள கண்காணிப்புச் செயன்முறையொன்றை ஐரோப்பிய ஒன்றியம் கோராதவிடத்து, மனித உரிமைகள் தொடர்பான தனது கடப்பாடுகளை இலங்கை நிறைவேற்றும் என்பது கேள்விக்குறியே.

இக்கட்டுரை ஜேர்மன் மொழி சஞ்சிகையில் ஒன்றில் வெளியாகியிருந்தமை குறிப்பிடத்தக்கது.

ஷ்ரீன் சரூர், இலங்கையின் வடக்கு மற்றும் கிழக்கில் போரினாற் பாதிக்கப்பட்ட பெண்களுடன் பணிபுரியுமோர் மனித உரிமை ஆர்வலர் ஆவார்.

[1] GSP+ அங்கத்துவமானது, தாம் ஒப்புக்கொண்டவற்றை நிலைநிறுத்துவதையும், மனித உரிமைகள், தொழிலாளர் உரிமைகள், சூழற் பாதுகாப்பு, மற்றும் நல்லாட்சி என்பவற்றின் மீதான 27 உடன்படிக்கைகளின் முறையான அமுலாக்கத்தை உறுதிசெய்வதையும் உறுப்பு நாடுகளிடமிருந்து கோருகிறது. மனித உரிமைகள் தொடர்பில் உறுப்பு நாடுகள் பின்வரும் உடன்படிக்கைகளை உறுதிசெய்து நடைமுறைப்படுத்த வேண்டும் – சர்வதேசக் குடிசார் மற்றும் அரசியல் உரிமைகள் உடன்படிக்கை; சித்திரவதைக்கு எதிரான உடன்படிக்கை; இனப்படுகொலையைத் தடுப்பது மற்றும் தண்டிப்பது தொடர்பான உடன்படிக்கை; பொருளாதார, சமூக மற்றும் கலாச்சார உரிமைகள் தொடர்பான சர்வதேச உடன்படிக்கை; அனைத்துவகை இனத்துவப் பாகுபாடுகளையும் ஒழிப்பதற்கான சர்வதேச உடன்படிக்கை; பெண்களுக்கெதிரான அனைத்துப் பாகுபாடுகளையும் ஒழிப்பதற்கான உடன்படிக்கை மற்றும் குழந்தைகளின் உரிமைகளுக்கான உடன்படிக்கை.

[2] மூலம்: ஐரோப்பியப் நாடாளுமன்றத்துக்கான, ஐரோப்பிய ஒன்றியத்தின் ஜனவரி 28, 2016 திகதியிடப்பட்ட அறிக்கை. பின்வரும் லிங்கினூடாகப் பார்க்கலாம்.http://trade.eப்c.europa.eu/doclib/docs/2016/january/tradoc_154180.pdf.

http://maatram.org/?p=5979

May 5, 20178 yr

கருத்துக்கள உறவுகள்

மகிந்தவுக்கும் இந்த அரசுக்கும் என்ன வித்தியாசம்? யாரவது விளங்கபடுத்துவது நல்லது

May 5, 20178 yr

கருத்துக்கள உறுப்பினர்கள்

1 hour ago, பெருமாள் said:

மகிந்தவுக்கும் இந்த அரசுக்கும் என்ன வித்தியாசம்? யாரவது விளங்கபடுத்துவது நல்லது

ஈழத்தமிழர் பிரச்சனையிலை சிங்களவருக்கு முகம் ஒரே ஒரு முகம்தான் வித்தியாசம் கண்டு பிடிக்கேலாது.
இதுக்கு விளங்கப்படுத்தோணுமெண்டால்....சம்பந்தன் கோஷ்டிமாதிரி வாய்க்கு வந்தபடி ரீல் விட்டு புளுகவேண்டி வரும்...ஓகேயா

May 6, 20178 yr

நல்லதொரு அலசல் கட்டுரை!

Archived

This topic is now archived and is closed to further replies.

Go to topic listing

Love கருத்துக்களம்? Tell a friend!

மன்னாரில் வீடொன்றில் திருட்டு: பல இலட்சம் மதிப்புள்ள நகை, பணத்துடன் 4 பெண்கள் கைது

மன்னாரில் வீடொன்றில் திருட்டு: பல இலட்சம் மதிப்புள்ள நகை, பணத்துடன் 4 பெண்கள் கைது
Published By: Digital Desk 3
06 Mar, 2026 | 05:06 PM

மன்னார் பொலிஸ் பிரிவுக்குட்பட்ட சாந்திபுரம் 50 வீட்டு திட்டப் பகுதியில் உள்ள வீடு ஒன்றில் புதன்கிழமை (04) இடம்பெற்ற திருட்டு சம்பவத்துடன் தொடர்புடைய பிரதான சந்தேகநபரான பெண் உட்பட நான்கு பெண்கள் கைது செய்யப்பட்டுள்ளனர். அவர்களிடமிருந்து பல இலட்சம் ரூபாய் பெறுமதியான தங்க நகைகள் மற்றும் பெருந்தொகை பணத்தையும் மன்னார் பொலிஸார் மீட்டுள்ளனர்.
இதுகுறித்து அந்த வீட்டின் உரிமையாளர் நேற்று வியாழக்கிழமை (05) மன்னார் பொலிஸ் நிலையத்தில் முறைப்பாடு செய்துள்ளார்.
அந்த முறைப்பாட்டின் படி, வீட்டிலிருந்து தாலிக்கொடி, சங்கிலி, காப்பு உள்ளிட்ட சுமார் 15 பவுன் தங்க நகைகள் மற்றும் 4 இலட்சத்து 35 ஆயிரம் ரூபாய் பணம் காணாமல் போயிருந்ததாக தெரிவிக்கப்பட்டுள்ளது.
இந்த முறைப்பாட்டின் அடிப்படையில், மன்னார் பொலிஸ் நிலைய பொறுப்பதிகாரி யூ.என். கெட்டியாராச்சி அவர்களின் பணிப்புரையின் பேரில், மன்னார் பொலிஸ் நிலைய குற்றத்தடுப்பு பிரிவு பொலிஸ் பரிசோதகர் பத்தே விதான தலைமையிலான பொலிஸ் குழு விசேட தேடுதல் நடவடிக்கைகளை முன்னெடுத்தது.

இதன் போது பிரதான சந்தேகநபரான பெண் ஒருவர் கைது செய்யப்பட்டார். அவரிடம் மேற்கொள்ளப்பட்ட விசாரணைகளின் அடிப்படையில் மேலும் மூன்று பெண்கள் கைது செய்யப்பட்டுள்ளனர்.
மேலும், சந்தேகநபர்களிடமிருந்து சுமார் 56 இலட்சம் ரூபாய் மதிப்புள்ள 15 பவுன் தங்க நகைகள் மற்றும் பணம் முழுமையாக மீட்கப்பட்டுள்ளதாக பொலிஸார் தெரிவித்துள்ளனர்.
கைது செய்யப்பட்ட நான்கு பெண்களும் தற்போது மன்னார் பொலிஸ் நிலையத்தில் தடுத்து வைக்கப்பட்டு விசாரணைகளுக்கு உட்படுத்தப்பட்டுள்ளனர்.
மேலதிக விசாரணைகளை மன்னார் பொலிஸார் மேற்கொண்டு வருவதுடன், விசாரணைகளின் பின்னர் சந்தேகநபர்கள் மற்றும் மீட்கப்பட்ட நகைகள், பணம் ஆகியவற்றை நீதிமன்றத்தில் முன்னிலைப்படுத்த நடவடிக்கை எடுக்கப்பட்டுள்ளதாக தெரிவிக்கப்பட்டுள்ளது.
மன்னாரில் வீடொன்றில் திருட்டு: பல இலட்சம் மதிப்புள்ள நகை, பணத்துடன் 4 பெண்கள் கைது

By ஏராளன் · Just now1 min
'இந்தியா ரஷ்யாவிடம் 30 நாள் கச்சா எண்ணெய் வாங்கலாம்' - அமெரிக்கா கூறியது என்ன?

ரஷ்ய எண்ணெய் விவகாரத்தில் மோதியை ராகுல் காந்தி விமர்சித்தது ஏன்?

பட மூலாதாரம்,Getty Images
ரஷ்யாவிடமிருந்து இந்தியா எண்ணெய் வாங்குவது பற்றிய அமெரிக்காவின் கருத்து குறித்து காங்கிரஸ் எம்.பி ராகுல் காந்தி எதிர்வினையாற்றியுள்ளார்.
சர்வதேச சந்தையில் எண்ணெய் விநியோகத்தைப் பராமரிக்க, இந்திய எண்ணெய் சுத்திகரிப்பு நிலையங்கள் ரஷ்யாவிடமிருந்து எண்ணெய் வாங்க 30 நாட்கள் விலக்கு அளித்துள்ளதாக அமெரிக்கா கூறியுள்ளது
இது குறித்து ராகுல் எக்ஸ் தளத்தில் தன் கருத்தைப் பதிவிட்ட ராகுல் காந்தி, "நமது வெளியுறவுக் கொள்கையானது நமது வரலாறு, புவியியல் இருப்பிடம் மற்றும் நமது விழுமியங்களின் அடிப்படையில் தீர்மானிக்கப்பட வேண்டும். அது உண்மை மற்றும் அஹிம்சையை அடிப்படையாகக் கொண்டிருக்க வேண்டும்" என்று எழுதியுள்ளார்.
மேலும், "இன்று நாம் காண்பது ஒரு கொள்கை அல்ல. இது ஒரு சமரசம் செய்துகொண்ட தனிநபரின் சுரண்டலால் ஏற்பட்ட விளைவு" என்றும் அவர் கூறியுள்ளார். பிப்ரவரி 11 அன்று மக்களவையில் ஆற்றிய உரையைப் பகிர்ந்து ராகுல் காந்தி இதனைத் தெரிவித்துள்ளார்.
அன்று ராகுல் காந்தி பேசுகையில், "யாரிடமிருந்து எண்ணெய் வாங்க வேண்டும், யாரிடமிருந்து வாங்கக்கூடாது என்று அமெரிக்கா நமக்குச் சொல்லும். நாம் ரஷ்யாவிடமிருந்து வாங்க வேண்டுமா அல்லது இரானிடமிருந்து வாங்க வேண்டுமா என்பதை அமெரிக்கா தீர்மானிக்கும். ஆனால் நமது பிரதமர் தீர்மானிக்க மாட்டார்" என்று கூறியிருந்தார்."
ரஷ்ய எண்ணெய் விவகாரத்தில் மோதியை ராகுல் காந்தி விமர்சித்தது ஏன்?

By ஏராளன் · 6 minutes ago6 min
இந்திய கடற்படையின் பயிற்சி பாய்மரக் கப்பல் ஐ.என்.எஸ். தரங்கினி இலங்கை வருகை

கொழும்பு துறைமுகத்தில் நங்கூரமிட்டது ஐ.என்.எஸ் தரங்கினி: இலங்கை கடற்படையினருக்குப் பாய்மர கப்பல் பயிற்சி!
06 Mar, 2026 | 04:11 PM

அபிலாஷனி லெட்சுமன்
இந்தியக் கடற்படையின் பெருமைக்குரிய அடையாளங்களில் ஒன்றான 'ஐ.என்.எஸ் தரங்கினி' பாய்மரக்கப்பல், தனது நான்கு நாள் உத்தியோகபூர்வ விஜயத்தினை மேற்கொண்டு வெள்ளிக்கிழமை (06) கொழும்பு துறைமுகத்தை வந்தடைந்தது.
இந்திய - இலங்கை கடற்படைகளுக்கு இடையிலான உறவை வலுப்படுத்தும் நோக்கோடும், இரு நாட்டு கடற்படை அதிகாரிகளுக்கும் இடையிலான பயிற்சிப் பரிமாற்றங்களை மேம்படுத்தும் நல்லெண்ண அடிப்படையிலான இந்த விஜயம் அமைந்துள்ளது.
திருகோணமலை துறைமுகத்தில் கடந்த 27 ஆம் திகதி முதல் மார்ச் 02 வரையிலான தனது முதற்கட்ட விஜயத்தை மேற்கொண்டு, அங்கிருந்து இலங்கை கடற்படை வீரர்களுக்கான கடல்வழிப் பயிற்சியுடன் மார்ச் 06 ஆம் திகதி கொழும்பை வந்தடைந்தது.
இந்த 'ஐ.என்.எஸ் தரங்கினி' பாய்மரக் கப்பாலானது எதிர்வரும் 09 ஆம் திகதி வரை கொழும்பு துறைமுகத்தில் நங்கூரமிட்டிருக்கும்.
"எப்போதும் உற்சாகத்துடன்" (Always Spirited) என்ற தாரக மந்திரத்தைக் கொண்ட இந்தியக் கடற்படையின் ஐ.என்.எஸ் தரங்கினி, 1997 ஆம் ஆண்டு கோவா கப்பல் கட்டும் தளத்தில் கட்டப்பட்டது. இக்கப்பல் கடந்த 28 ஆண்டுகளாக கடற்படை வீரர்களுக்குச் சிறந்த பயிற்சித் தளமாக விளங்கி வருகிறது.
இக்கப்பல் ஏனைய நவீன போர்க்கப்பல்களைப் போலன்றி, முழுமையாக பாய்மரங்களின் உதவியுடன் இயங்கும் வகையில் வடிவமைக்கப்பட்டுள்ளது. சுமார் 10,000 சதுர அடி பரப்பளவைக் கொண்ட பாய்மரங்கள் காற்றைப் பிடித்து கப்பலை முன்னோக்கிச் செலுத்துகின்றன.
இது குறித்துக் கருத்துத் தெரிவித்த கப்பலின் அதிகாரிகள்:
"இயற்கை நம்மை எப்படிக் கட்டுப்படுத்துகிறது என்பதையும், அந்தச் சூழலுக்கு ஏற்ப நாம் எவ்வாறு செயல்பட வேண்டும் என்பதையும் பயிற்சி வீரர்களுக்குக் கற்பிப்பதே எமது முக்கிய நோக்கம். நவீன தொழில்நுட்பங்களான தானியங்கி வழிசெலுத்தி கருவி (Autopilot) அல்லது நிலைப்படுத்தல் கருவி (Stabilizers) ஏதுமின்றி, கைகளால் நேரடியாகக் கப்பலை இயக்கும் சவாலான பயிற்சியை இங்கே வழங்குகிறோம்."
நவீன மின்னணு வசதிகள் இன்றி, இன்றும் பாரம்பரியமான மரத்தாலான 'சுக்கான்' (Wheel) மூலமே இக்கப்பல் செலுத்தப்படுகிறது. இந்தச் சக்கரத்தைக் கையாண்டு கப்பலை வழிநடத்தும் மாலுமி 'குவார்ட்டர் மாஸ்டர்' (Quartermaster) என்று அழைக்கப்படுகிறார்.
அத்துடன், கப்பலின் ஒவ்வொரு பாய்மரத்தையும் இயக்குவதற்கு நூற்றுக்கணக்கான கயிறுகள் பயன்படுத்தப்படுகின்றன. ஒரு வரிசையில் உள்ள கயிறுகள் மட்டுமே சுமார் 20 மீட்டர் நீளம் கொண்டவை. பாய்மரங்களை விரிப்பதற்கும் மடிப்பதற்கும் தனித்தனியாகக் கயிறுகள் பயன்படுத்தப்படுவதுடன், ஒவ்வொரு கயிறும் ஒரு குறிப்பிட்ட நோக்கத்திற்காகச் செயல்படுகிறது.
கடந்த பெப்ரவரி 27 ஆம் திகதி திருகோணமலைக்கு வருகை தந்த இக்கப்பல், மார்ச் 2 ஆம் திகதி வரை அங்கு தங்கியிருந்தது. அங்கிருந்து கொழும்பு நோக்கிய 4 நாள் கடல் பயணத்தின் போது, இலங்கை கடற்படையின் உயர் அதிகாரிப் பயிற்சி மாணவர்கள் மற்றும் கடற்படைப் பயிற்சி மாணவர்களுக்கும் விசேட பயிற்சிகள் வழங்கப்பட்டன.
பாய்மரங்களை அமைத்தல் (Sail Setting)
பாய்மரக் கம்பங்களில் ஏறுதல் (Manning the Mast)
கடலில் கண்காணிப்புப் பணிகள் (Lookout Duties)
எஞ்சின் அறை பராமரிப்பு (Engine Room Watchkeeping)
போன்ற நுணுக்கமான பயிற்சிகள் இலங்கைப் படையினருக்கு வழங்கப்பட்டதாகக் கப்பலின் பயிற்சி அதிகாரிகள் தெரிவித்தனர்.
இக்கப்பல் மூன்று பிரதான பாய்மரக் கம்பங்களைக் கொண்டது. அவை முறையே முன் பாய்மரக் கம்பம், முதன்மை பாய்மரக் கம்பம் மற்றும் பின்புற பாய்மரக் கம்பம் என அழைக்கப்படுகின்றன. இதில் பின்புறக் கம்பத்தில் உள்ள விசேட பாய்மரங்கள் 'ஸ்பான்கர்ஸ்' என்று அழைக்கப்படுகின்றன.
பிரபலமான ஸ்காட்டிஷ் வடிவமைப்பாளரால் உருவாக்கப்பட்ட இக்கப்பல், 2003-2004 காலப்பகுதியில் உலகத்தையே ஒருமுறை சுற்றி வந்து “உலகைச் சுற்றி வந்த சாதனை ” (Circumnavigation) சாதனை படைத்துள்ளது என்பதும் குறிப்பிடத்தக்கது.
கப்பலில் வழங்கப்படும் பயிற்சிகள் குறித்து விளக்கமளித்த முதன்மை சீமான்ஷிப் பயிற்றுவிப்பாளர் (Seamanship Instructor) அமித் குமார் சிங், வீரர்களின் பாதுகாப்பிற்கு வழங்கப்படும் முக்கியத்துவம் குறித்து விவரித்தார்:
"பயிற்சிப் பெறுபவர்களின் பாதுகாப்பே எமது முக்கிய நோக்கம். 'தவழ்ந்து, நடந்து, பின் ஓடுதல்' என்ற படிமுறைப் பயிற்சியையே நாங்கள் பின்பற்றுகிறோம். அதாவது முதலில் கோட்பாட்டு ரீதியாகவும், பின்னர் நடைமுறை ரீதியாகவும் பயிற்சிகள் வழங்கப்படுகின்றன."
பாதுகாப்பை உறுதிப்படுத்தும் வகையில், இரண்டு கைகள் மற்றும் இரண்டு கால்கள் என நான்கு புள்ளிகளையும் கம்பத்தில் நிலையாகப் பதித்து ஏறும் இந்த விசேட முறை, விபத்துக்களைத் தவிர்க்கப் பெரிதும் உதவுகிறது.
இதில் வீரர்கள் பாதுகாப்பு கவசங்களை அணிந்து, ஒவ்வொரு அடியிலும் கொக்கிகளை மாட்டி மிகுந்த பாதுகாப்புடன் ஏறுகின்றனர். தினமும் காலையில் மஸ்ட் ட்ரில் எனப்படும் இந்தப் பயிற்சி வழங்கப்படுவதன் மூலம், வீரர்கள் உயரமான பகுதிகளில் அச்சமின்றிச் செயல்படப் பழகுகின்றனர்.
நவீன வசதிகள் ஏதுமின்றி இயற்கைக் காற்றை மட்டுமே நம்பி இயங்கும் இக்கப்பல், பல நேரங்களில் சவால்களை எதிர்கொள்கிறது. திருகோணமலையிலிருந்து கொழும்பு வரும் வழியில் காற்றின் வேகம் மிகக் குறைவாக இருந்ததால், கப்பல் மிக மெதுவாகவே நகர்ந்துள்ளது.
கப்பலின் நீளம்: 55 மீட்டர்கள்
அகலம்: 8.5 மீட்டர்கள்
வேகம்: காற்று குறைவாக இருக்கும் போது, கப்பல் ஒரு மணித்தியாலத்திற்கு 1 முதல் 3 கடல் மைல் வேகம் (Knots) வரை மெதுவாக நகரும். 1 கடல் மைல் வேகம் என்பது ஒரு மணித்தியாலத்திற்கு சுமார் 1.8 கிலோமீட்டர் தூரமாகும்.
காற்றின் திசைக்கு ஏற்ப பாய்மரங்களைச் சரியாகத் திருப்பி, அதிகபட்சக் காற்றைப் பிடிப்பதன் மூலமே கப்பலைச் செலுத்த முடியும் என அதிகாரிகள் விளக்கினர். ஐ.என்.எஸ் தரங்கினியில் பொதுவாக 30 நிரந்தரப் பணியாளர்கள் பணியாற்றுவதுடன், பயிற்சியாளர்களையும் சேர்த்து மொத்தம் 61 பேர் வரை பயணிக்க முடியும். தற்காப்பு நோக்கத்திற்காக சிறிய ரக இயந்திரத் துப்பாக்கிகள் (Small arms - 5.56 mm) போன்ற அடிப்படை ஆயுதத் தளவாடங்களும் கப்பலில் வைக்கப்பட்டுள்ளன.
பாய்மரங்களை இயக்குவது மட்டுமன்றி, ஒரு மாலுமிக்குத் தேவையான அடிப்படைப் பண்புகள் மற்றும் கடலில் எதிர்கொள்ளும் சவால்களைச் சமாளிக்கும் திறன்களையும் இலங்கை கடற்படையினருக்கு இக்கப்பல் கற்றுக் கொடுத்துள்ளது.

கொழும்பு துறைமுகத்தில் நங்கூரமிட்டது ஐ.என்.எஸ் தரங்கினி: இலங்கை கடற்படையினருக்குப் பாய்மர கப்பல் பயிற்சி!

By ஏராளன் · 10 minutes ago10 min
"அறிவியல் நோக்கில் 'இலங்கையின் காலவரிசைப்படி நிகழ்வுகளை பதிவு செய்த பண்டைய இலங்கை நூல்களில் [நாளாகமம்களில்]' ஒரு பார்வை" / "A look at 'Lanka chronicles' from a scientific perspective" / In Tamil & English

"அறிவியல் நோக்கில் 'இலங்கையின் காலவரிசைப்படி நிகழ்வுகளை பதிவு செய்த பண்டைய இலங்கை நூல்களில் [நாளாகமம்களில்]' ஒரு பார்வை" / "A look at 'Lanka chronicles' from a scientific perspective" / In Tamil & English

"அறிவியல் நோக்கில் 'இலங்கையின் காலவரிசைப்படி நிகழ்வுகளை பதிவு செய்த பண்டைய இலங்கை நூல்களில் [நாளாகமம்களில்]' ஒரு பார்வை" / "A look at 'Lanka chronicles' from a scientific perspective" / In Tamil & English / பகுதி Part: 124

[This detailed Tamil article is based on the unfinished historical book 'History of Sri Lanka' by my late friend, Mr. Kandiah Easwaran, a civil engineer. The English summary below is his own version. / இந்த விரிவான தமிழ் கட்டுரை, எனது மறைந்த நண்பர், பொறியியலாளர் திரு. கந்தையா ஈஸ்வரன் எழுதிய முடிக்கப்படாத "இலங்கை வரலாறு" என்ற புத்தகத்தை அடிப்படையாகக் கொண்டது. கீழே உள்ள ஆங்கிலச் சுருக்கம் அவரது சொந்தப் பதிப்பாகும்.]

பகுதி: 124 / பின் இணைப்பு - "இலங்கையின் நாளாகமங்கள் மற்றும் தமிழ் காவியங்களான சிலப்பதிகாரம் மற்றும் மணிமேகலை"

தீபவம்சம், மகாவம்சம் மற்றும் இராசாவலிய போன்ற இலங்கையின் வரலாற்றுக் நாளாகமம்களில் உள்ள சில புராணக்கதைகள் மற்றும் இலங்கைக்கு புத்த மதத்தின் வருகை ஆகியவை தமிழ்நாட்டுடன் அதிக அளவிலும், கேரளா மற்றும் ஆந்திராவுடன் குறைந்த அளவிலும் நெருங்கிய தொடர்பைக் கொண்டுள்ளன என்பதைக் காண்கிறோம். புவியியல் காரணமாக கட்டாயம் ஆந்திரா கேரளாவை விட பெரிய பங்கைக் கொண்டிருந்திருக்க வேண்டும். அதேபோல, பழங்கால சிங்கள மக்கள், பொதுவாக, தங்கள் வடக்கு அண்டை நாடுகளுடன் மிகவும் ஆரோக்கியமான உறவைக் கொண்டிருந்திருக்க வேண்டும். வரலாற்றுக் குறிப்புகளில் தமிழ் நாட்டுப்புறக் கதைகளின் செல்வாக்கையும், இலங்கைக்கு பௌத்தம் பரவியதையும் காட்ட, இரண்டு முன்னணி தமிழ் காவியங்களான சிலப்பதிகாரம் மற்றும் மணிமேகலை பற்றிய மிகச் சுருக்கமான விவரிப்பைக் கொடுக்க வேண்டியது இன்று அவசியம் ஆகிறது. சிலப்பதிகாரம் மத ரீதியாக நடுநிலையானதாகக் கருதப்பட்டாலும், மணிமேகலை காவியம் ஒரு முழுமையான பௌத்தக் கதை ஆகும்.

சிலப்பதிகார காவியத்தின் முன்னுரையில், கடலால் சூழப்பட்ட இலங்கையின் மன்னன் கஜபாகு (Gajabahu) ஆடித் திங்கலில் (கிறிஸ்தவ நாட்காட்டியில் ஜூலை - ஆகஸ்ட்) பத்தினி தேவியின் (கண்ணகி) கதையைக் கேள்விப்பட்டு, காணிக்கைகளை வழங்கி, பத்தினி தேவியை கௌரவிக்கும் வகையில் விழாக்களை நடத்தினார் என்றும் இதனால், நல்ல மழை பெய்து, இலங்கை செழிப்பாக மாறியது என்றும் குறிப்பிடப்பட்டுள்ளது. இது, இலங்கையில் ஒவ்வொரு ஆண்டும் ஜூலை - ஆகஸ்ட் மாதங்களில் அல்லது அதற்குப் பிறகு நடைபெறும் பெரகரா விழா மற்றும் ஆடிவேல் விழாவின் [Perahera festival and the Aadivel festival] மிகப் பழைய வடிவமாக அல்லது அதன் பண்டைய விழாவாக இருக்க வேண்டும். மன்னன் கஜபாகு, ஒரு வெற்றி பெற்ற மன்னராகக் குறிப்பிடப்படவில்லை, ஆனால் அந்தக் காலத்தின் மிகவும் சக்திவாய்ந்த தென்னிந்திய மன்னரான சேரன் செங்குட்டுவனுடன் நட்புறவைக் கொண்ட இலங்கையின் சுதந்திர மன்னராகக் குறிப்பிடப்படுகிறார். ஒரு காலத்தில் பரந்து விரிந்த சேர இராச்சியத்தின் எச்சம் இன்றைய கேரளம் ஆகும். மேலே குறிப்பிட்டுள்ளபடி, முன்னுரையில் உள்ள வசனங்கள் தமிழில் கீழே கொடுக்கப்பட்டுள்ளன. அர்த்தத்தின் சுருக்கம் ஏற்கனவே மேலே கொடுக்கப்பட்டுள்ளது.

"அது கேட்டு, கடல் சூழ் இலங்கைக் கயவாகு
என்பான் நங்கைக்கு நாள் பலி பீடிகைக்
கோட்டம் முந்துறுத்து, ஆங்கு, ‘அரந்தை
கெடுத்து, வரம் தரும் இவள்’ என, ஆடித் திங்கள்
அகவையின், ஆங்கு ஓர் பாடி விழாக் கோள் பல் முறை
எடுப்ப, மழை வீற்றிருந்து, வளம் பல பெருகி,
பிழையா விளையுள் நாடு ஆயிற்று"

அதனைக் கேட்டு, கடலை அகழாகவுடைய [கடலால் சூழ்ந்த] இலங்கையிலுள்ள கயவாகு என்னும் அரசன், அவ்விடத்தே நங்கைக்கு நாடோறும் பலி கொள்ளும் பலி பீடத்தை முற்படச் செய்து பின்பு கோட்டமும் அமைத்து, துன்பங்களைக் கெடுத்து நமக்கு வேண்டும் வரங்களை இவள் தருமென்று துணிந்து, ஆடித் திங்களிலே, தனது நகரின்கண் விழாச் செய்தலை, ஆண்டு தோறும் நிகழ்த்தா நிற்க, மழை குறை வின்றி நிலைபெறுதலானே, பல வளங்களும் நிறைந்து, பொய்யாத விளை வினையுடைய நாடாயிற்று அவனது நாடு என்கிறது மேலே உள்ள இந்தப் பாடல்.

சிலப்பதிகாரக் காவியத்தின் முதன்மை நாயகி கண்ணகியாக இருந்தாலும், ஒரு நேர்த்தியான நடன அழகியான மாதவி, ஒரு நடன பெண் குலத்தைச் சேர்ந்தவராக, ஒரு கணிகை மகளாக [nautch] இருந்தாலும், சமமான தகுதி கொண்ட நாயகியாகவும் கருதப்படலாம் என்பதற்கு ஒரு உதாரணமாக வாழ்ந்தவள். கரிகால சோழனின் சபையில் மாதவி நாட்டியமாடிய போது கோவலன் எனும் வணிகனுக்கு மாதவியின் அறிமுகம் கிடைத்தது. கண்ணகியின் கணவரான கோவலன், மன்னனின் முன் மாதவியின் முதல் நடன அறிமுகவிழா நாளில், மாதவியின் அழகில் மயங்கி, அவள் மேல் காதல் கொண்ட கோவலன், தன் மனைவி கண்ணகியைப் பிரிந்து மாதவியுடன் தங்கி, தனது செல்வம் அனைத்தையும் மாதவியின் தாயாரிடம் இழந்தார். பின்னர் மாதவியுடன் ஏற்பட்ட ஒரு அற்பமான பிரச்சினையில், கோவலன் கண்ணகியின் வீட்டிற்குத் திரும்பினான். நடனமும் நடன சமூகமும் அந்த காலத்தில் சமூகத்தின் ஒருங்கிணைந்த பகுதியாக இருந்தன என்பது வரலாறு. கண்ணகி ஒரு பணக்கார வணிகக் குடும்பத்தைச் சேர்ந்தவள் என்பதுடன், சிலப்பதிகார காவியத்தின் ஆசிரியர் அவளுடைய செழிப்பான வாழ்க்கையை 'பூமாதேவி கண்ணகியின் சிறிய அழகான கால்களை ஒருபோதும் அறிந்திருக்கவில்லை.' என்று விவரிப்பதில் இருந்து இலகுவாக அறிந்து கொள்ளலாம்.

Part: 124 / APPENDIX – "The Chronicles of Ceylon and the Tamil Epics Silappathikaram and Mannimeghalai"

The chronicles of Ceylon; the Dipavamsa, the Mahavamsa, and the Rajavaliya, indicate that the some of the legends in the chronicles, and the arrival of Buddhism to Lanka have close connection with the Tamil Nadu to a greater extent and to Kerala and Andhra to a lesser extent. Andhra should have played a larger role than Kerala because of the geography. Sinhalese people of yore, in general, must have had a very healthy relationship with their northern neighbours. It is necessary to give a very brief account of the two foremost Tamil Epics Silappathikaram and Mannimeghalai to show the influence of Tamil folklores in the chronicles and the spread of Buddhism to Lanka. The Epic Silappathikaram can be considered religiously neutral, but the Epic Mannimeghalai is a fully fledged Buddhist narrative.

Silappathikaram: It is mentioned in the prologue, kind of introductory summary at the beginning, of this epic that the king Kajavahu (Gajabahu) of Lanka (Illanagai in Tamil) which is surrounded by sea heard of the story of the Goddess Pattini (Kannaki) and gave offerings and took festivals on her honour in the month of July, (July-August in the Christian Calendar) and it rained well and Lanka became prosperous. This must be the ancient most record of the Perahera festival and the Aadivel festival that take place usually about or during the months of July-August each year in Ceylon. The king Kajavahu is mentioned not as a conquered king, but as an independent king of Lanka with amicable relationship with the most powerful South Indian king of that time, Cheran Seng Kudduvan. The remnant of the once extensive Chera Kingdom is the present day Kerala. The verses in the prologue, as mentioned above, are given below in Tamil. The summary of the meaning is already given above.

"அது கேட்டு, கடல் சூழ் இலங்கைக் கயவாகு
என்பான் நங்கைக்கு நாள் பலி பீடிகைக்
கோட்டம் முந்துறுத்து, ஆங்கு, ‘அரந்தை
கெடுத்து, வரம் தரும் இவள்’ என, ஆடித் திங்கள்
அகவையின், ஆங்கு ஓர் பாடி விழாக் கோள் பல் முறை
எடுப்ப, மழை வீற்றிருந்து, வளம் பல பெருகி,
பிழையா விளையுள் நாடு ஆயிற்று"

"On hearing this Gajabahu of Ceylon encircled by sea,
built a shrine for the Lady of Chastity where daily sacrifices were performed.
Thinking that she would remove the distress [ of his land],
He also instructed annual festivals commencing with the month Adi [July - August];
Then the rain came to stay, and increased the fertility of the land,
So as to produce unfailing crops"

[The Silappathikaram, Transilation by V R Ramachandra Dikshitar, M. A., 1939]

The prime heroine of the Epic Silappathikaram is Kannaki, but Madhavi, who is an accomplished elegant dancing beauty, can also be considered a heroine of equal merit though born a nautch. Kovalan, the husband of Kannaki, got entranced with Madhavi on the day of her first dancing inauguration in front of the king. He stayed with Madhavi, and lost all his wealth to Madhavi’s mother. Then on a trivial issue with Madhavi, Kovalan returned home to Kannaki. The dancing and the dancing community were then an integral part of the community. Kannaki was from a wealthy merchant family, and the author of the epic describes her opulent life thus; the lady earth never knew Kannaki’s small beautiful feet.

நன்றி
Thanks

[கந்தையா தில்லைவிநாயகலிங்கம்,
அத்தியடி, யாழ்ப்பாணம்]

[Kandiah Thillaivinayagalingam,
Athiady, Jaffna]

பகுதி / Part: 125 தொடரும் / Will follow
துளி/DROP: 2076 ["அறிவியல் நோக்கில் 'இலங்கையின் காலவரிசைப்படி நிகழ்வுகளை பதிவு செய்த பண்டைய இலங்கை நூல்களில் [நாளாகமம்களில்]' ஒரு பார்வை" / "A look at 'Lanka chronicles' from a scientific perspective" / In Tamil & English / பகுதி Part: 124
https://www.facebook.com/groups/978753388866632/posts/34156313217350555/?

By kandiah Thillaivinayagalingam · 13 minutes ago13 min
ஆமென்! - மத்திய கிழக்கு போர்க் குறிப்பு

பா.ரவீந்திரன் அவர்கள் Champagne (sipping) Socialist ஆக இருப்பதை விடுத்து கொஞ்சம் இரு பக்கமும் சாராத நிபுணர்கள் வெளியிடும் அறிக்கைகள் தகவல்களையும் வாசிக்க வேண்டும்.
90% யுரேனியத்தைச் செறிவாக்கினால் சிறிய ரக, ஏவுகணை காவிச் செல்லக் கூடிய (tactical) அணுவாயுதம் செய்யலாம்.
ஆனால், 60% செறிவாக்கிய யுரேனியத்தின் பெருமளவினைப் பாவித்து சற்றுப் பெரிய அணுவாயுதம் செய்யலாம்.
ஈரான், 60% செறிவாக்கிய யுரேனியத்தை நீண்ட காலமாகச் சேமித்து வருகிறது என்பது பல்வேறு தரப்புகளாலும் உறுதியான தரவு.
ஈரானே இதை மறுக்கவில்லை என்பது இன்னொரு முக்கியமான தரவு!
சிவிலியன் அணுசக்தியை உருவாக்க 60% யுரேனியம் அவசியமில்லை, அது 20% இலும் குறைவான செறிவாக்கலில் சாத்தியமாகும் விடயம், என்பது இன்னொரு தரவு.
அப்படியானால் "ஏன் 60% யுரேனியம் செறிவாக்கல்?" என்ற கேள்விக்கு "ஈரான் அணுவாயுதம் தயாரிக்க முயல்கிறது" என்பது தான் யாரும் ஊகிக்கக் கூடிய பதில்.
"இஸ்ரேலை அழிப்போம்!" என்ற கொள்கை, யேமனின் ஹூத்திகள், லெபனானின் ஹிஸ்புல்லாக்கள், பலஸ்தீனத்தின் அரை டசன் உதிரி ஆயுதக் குழுக்கள் போன்றவற்றிற்கு ஆதரவு தரும் ஒரு நாடுஅணுவாயுதம் தயாரித்தால், அது எங்கள் எல்லோருக்கும் தான் ஆப்பு! இதனால் Champagne socialists இற்கும் கூட அழிவு தான் முடிவாகும்!
"வாசிப்பில்லாத கோஷங்கள் நிறைந்த எழுத்து" முகநூலுக்குப் பொருந்தலாம்😎!

By Justin · 15 minutes ago15 min

ஈழத்தமிழர் மீதான இனவழிப்புப் போரில் எனது தனிப்பட்ட அனுபவங்கள்
ஈழத்தமிழர் மீதான இனவழிப்புப் போரில் எனது தனிப்பட்ட அனுபவங்கள்

ஈழத்தமிழர் மீதான இனவழிப்புப் போரில் எனது தனிப்பட்ட அனுபவங்கள் அண்மையில் இஸ்ரேலுக்குப் பயணம் செய்த தனது அனுபவங்களை திரு நிராஜ் டேவிட் அவர்கள் காணொளிகள் வாயிலாக வெளியிட்டு வருகிறார். அவற்றில் சில காணொளிகளில் அவர் அங்கு தங்கியிருந்த‌ நாட்களில் பயணித்த பலவிடங்களையும் காட்சிப்படுத்தியிருந்தார். அவற்றுள் ஒன்று யூத மக்கள் மீது இரண்டாம் உலக யுத்த காலத்தில் நாசிகளால் மேற்கொள்ளப்பட்ட இனக்கொலை தொடர்பான சாட்சியங்கள், ஆதாரங்கள் ஆகியவற்றினை பாரிய நினைவாலயம் ஒன்றினுள் காட்சிப்படுத்தியிருந்தமை பதிவுசெய்யப்பட்டிருந்தது. தம்மீது நிகழ்த்தப்பட்ட இனக்கொலை தொடர்பாக தமது சந்ததிகள் தொடர்ச்சியாக அறிந்துகொள்ளவேண்டும் என்பதும், இனிமேல் அவ்வாறனதொரு இனக்கொலை தமது இனம் மீது நடக்காது தவிர்ப்பது எந்தளவு முக்கியமானது என்பதையும் தம் இன மக்களுக்கு தொடர்ச்சியாக வலியுறுத்துவதும் இந்நினைவாலயத்தின் நோக்கம் என்றும் அவர் தெரிவித்திருந்தார். கொல்லப்பட்ட அறுபது இலட்சம் யூதர்களில் ஒரு பகுதியினர் பயன்படுத்திய காலணிகள், அவர்களால் அணியப்பட்ட கறுப்பும் வெள்ளையும் சேர்ந்த வரிரியிலான ஆடைகள், அவர்கள் பயன்படுத்திய உணவருந்தும் பாத்திரங்கள், அவர்களின் புகைப்படங்கள் என்பவற்றோடு அவர்களை வதைப்படுத்திக் கொன்றுபோட்ட பல நாசிப் படைத் தளபதிகளின் புகைப்படங்களும் அங்கு மிக நேர்த்தியாக காட்சிப்படுத்தப்பட்டிருந்தது. இவற்றைத் தனது காணொளிகளில் காண்பித்த டேவிட் அவர்கள், எமதினத்திற்கு நடந்த அக்கிரமங்கள், அழிவுகள் குறித்து நாம் பேசுவதை எம்மில் ஒரு பகுதியினரே தடுத்து வருவதையும், சிங்கள இனத்தோடு நாம் ஒன்றித்து வாழ்வதை இவ்வாறான "பழங்கதைகள் பேசுதல்" எனும் முயற்சி தடுத்துவிடும் என்றும், அது இனவொற்றுமையினைக் குலைத்துவிடும் என்றும் காரணம் கூறிவ‌ருவதையும் குறிப்பிட்டு அங்கலாய்த்திருந்தார்.யூதர்கள் தமக்கு நடந்த அழிவினைத் தொடர்ச்சியாகப் பேசியும், காட்சிப்படுத்தியும், ஆவணப்படுத்தியும் வரும் நிலையில், நாமோ எம்மீது நடத்தப்பட்ட அழிவுகளை வேண்டுமென்றே மறுத்தோ அல்லது மறைத்தோ வாழத் தலைப்படுதல் ஈற்றில் எமது இருப்பிற்கே முடிவாய் அமைந்துவிடும் என்பதும் அவரது ஆதங்கமாக இருந்தது.இக்காணொளிகளின் இறுதிப்பகுதியில் தமிழ் மக்களை நோக்ல்கி வேண்டுகோள் ஒன்றினை அவர் முன்வைத்தார். அதுதான் நாம் அனைவரும், தனிப்பட்ட ரீதியிலோ அல்லது ஒரு குழுவாகவோ எம்மீது நடத்தப்பட்ட அனைத்து அக்கிரமங்களையும் ஏதோ ஒரு வகையில், ஏதோ ஒருவடிவில் கட்டாயம் ஆவணப்படுத்தியோ அல்லது காட்சிப்படுத்தியோ தீரவேண்டும் என்பது. அவரது காணொளிகளைப் பார்த்தபோது அவர் கூறுவது எனக்குச் சரியென்றே பட்டது. ஏனென்றால், எம்மீது நடத்தப்பட்ட அநீதிகளை நாமே பேசவோ அல்லது காட்சிப்படுத்தவோ மறுப்பின், வேறு யார்தான் இதைச் செய்யப்போகிறார் எனும் கேள்வி எனக்குள் வந்தது. ஆகவேதான் எம்மீது நடத்தப்பட்ட அக்கிரமங்கள் தொடர்பான எனது அனுபவங்களை இங்கு பதிவிடலாம் என்று நினைக்கிறேன். இத்தளத்தில் இருக்கும் ஏனையவர்களும் தமது தனிப்பட்ட அனுபவங்களை இங்கு பகிருமாறும் வேண்டிக்கொள்கிறேன்.
- 38 replies
ரஞ்சித்

December 7, 2025Dec 7
Featured by மோகன்

December 8, 2025Dec 8
சாத்தான் படை (IPKF)
சாத்தான் படை (IPKF)

* அன்பான உறவுகளே, இந்தப் புத்தகம் அன்றைய இந்திய அமைதிப்படை (ஆக்கிரமிப்புப் படை) கால சம்பவங்களையும், அன்று ஊடகங்களில் வெளியான செய்திகளையும் தொகுத்து செய்யப்பட்டுள்ளது. மிகுந்த சிரமங்களுக்கு மத்தியில், இன்றைய சூழல் கருதியும் தேவை கருதியும் ஈழத்திலிருந்து எடுப்பித்திருக்கிறோம். இதனை உங்களின் நண்பர்களுக்கும், தெரிந்தவர்களுக்கும் அனுப்பி உண்மைகளை அறியச் செய்யவேண்டும் என்று கேட்டுக்கொள்கிறோம். [குறிப்பாக உங்களுக்குத் தெரிந்த தமிழக நண்பர்களுக்கு, மக்களுக்கு, ஊடகங்களுக்கு, அரசியற் கட்சியனருக்கு, அமைப்புகளுக்கு அனுப்பிவைக்கவும்.]* * flash: http://ebook.yarl.com/ipkf/ * pdf zipped: Part 1 http://www.mediafire.com/?emj0zigyjyu Part 2 http://www.mediafire.com/?i5tzkzyjfny Part 3 http://www.mediafire.com/?tz1mvzdgggz * pdf: Part 1 http://ebook.yarl.com/ipkf/Satarnic-Force_Part1.pdf Part 2 http://ebook.yarl.com/ipkf/Satarnic-Force_Part2.pdf Part 3 http://ebook.yarl.com/ipkf/Satarnic-Force_Part3.pdf அன்பான உறவுகளே, தற்போதைய இலங்கையின் போர்ச்சூழல் பற்றி நீங்கள் அறிவீர்கள். திட்டமிட்ட வகையில் நடத்தப்படும் இனவழிப்பு / இனக்கருவறுப்புப் போரில் - ஒவ்வொரு நாளும் - குழந்தைகள், பெண்கள், முதியோர் என ஆயுதம் ஏந்தாத அப்பாவிப் பொதுமக்கள் - எந்தவிதப் பாகுபாடுமின்றி - கொத்துக்கொத்தாக கொத்தணிக் குண்டுகளாலும், பொஸ்பரஸ் அடங்கிய எரிகுண்டுகளாலும் படுகொலை செய்யப்படுகிறார்கள். "பாதுகாப்பு வலயம்" என அறிவித்து - அங்கும் மக்களை அரக்கத்தனமாகக் கொல்கிறார்கள். சிறிலங்கா அரசின் கட்டுப்பாட்டுப் பகுதிக்கு வரச்சொல்லி - ஆண்கள் பெண்களென வகைபிரித்து - பெண்களை பாலியல் வன்முறைக்கு உள்ளாக்கிப் பின் கொன்று புதைக்கிறார்கள். புதிய ஆண்டும் அவர்களுக்கு கொலைக்களமாகத்தான் பிறந்தது. இந்த ஆண்டின் இரண்டு மாத காலத்தில் மட்டும் - 1500 க்கும் அதிகமான மக்கள் சிறிலங்கா பேரினவாத அரசால் கொல்லப்பட்டுவிட்டார்கள். ஒரு இளம் சந்ததியே - ஒரு புதிய தலைமுறையே - கை, கால் இல்லாத சந்ததியாக மாற்றப்பட்டுக் கொண்டிருக்கிறது. இந்தச் சூழலில் - இந்த இன்னல் நிறைந்த காலகட்டத்தில் - தமிழகத்திலிருந்து எழும் ஒவ்வொரு ஆதரவுக் குரலும் புலம்பெயர் மக்களாகிய எமக்கு எவ்வளவு ஆறுதலாக இருக்கிறதென்பதை நீங்கள் அறீவீர்களோ தெரியாது. உங்களின் ஆதரவான ஒவ்வொரு சொல்லும் எங்கள் கண்ணீரைத் துடைக்க வல்லன. எமக்கு ஆதரவாக நீங்கள் வீதியில் இறங்கும் போதும் - உரக்கக் குரல் கொடுக்கும் போதும் - நாம் நம்பிக்கை கொள்கிறோம். சாதாரண நம்பிக்கையல்ல - சரித்திரம் படைக்கிற நம்பிக்கை. ஆனாலும் உறவுகளே - இன்னொரு கசப்பான உண்மையையும் நாம் உங்களுக்கு சொல்ல விரும்புகிறோம். உங்கள் ஆதரவான நம்பிக்கை தரும் குரல்களுக்கும் மத்தியிலிருந்து - தமிழகத்திலிருந்து - எம்மீது வெறுப்பைக் கக்குகிற சில குரல்கள் இன்னும் ஒலித்துக் கொண்டிருக்கின்றன. அவை, மீண்டும் மீண்டும் எம்மைக் காயப்படுத்துகின்றன. நாம் காயப்படுவதைப் பற்றி கவலைப்படவில்லை. அந்தக் குரல்கள் ஒட்டுமொத்தத் தமிழகத்தின் ஆதரவுக் குரலையும் பலவீனப்படுத்திவிடும் என்றே பயப்படுகிறோம். உலகத் தமிழினமே இன்று ஒன்றுபட்டு நிற்கையில் - பகைவளர்க்கும் இந்தச் சில குரல்கள் - தமிழினத்தின் விடுதலையில் கீறல்களை ஏற்படுத்திவிடக் கூடாதென்றே விரும்புகிறோம். ஈழத்தமிழர் பிரச்சனை/அவலம் பற்றி நீங்கள் பேசுகிற போதெல்லாம் - ராஜீவ்காந்தியின் கொலையை முன்னிறுத்தி - உங்களின் வாயை அடைக்கப் பார்க்கிறார்கள். ஈழத்தின் விடுதலை பற்றிப் பேசுகிறபோதெல்லாம் - ராஜீவ்காந்தியின் கொலையை முன்னிறுத்தி - கொச்சைப்படுத்துகிறார்கள். உங்களின் எழுச்சியை அவர்கள் ஒற்றை வார்த்தை கொண்டு ஒதுக்கிவிடப் பார்க்கிறார்கள். உலகத் தமிழரின் ஒற்றுமையை ஒற்றைவார்த்தையால், சாத்தியமற்றதாக்கிவிடலாம் என்று நினைக்கிறார்கள். எனவே அன்பான உறவுகளே, எந்தச் சூழ்நிலையிலும் நீங்கள் சோர்ந்துவிடக்கூடாது - எவருக்கு முன்னும் நீங்கள் தலைகுனியக்கூடாது - உண்மைகளை உணர்ந்துகொள்ளவேண்டும் என்கிற நோக்கோடு இந்தப் புத்தகத்தை மின்னூல் வடிவில் உங்கள் முன் வைக்கிறோம். ராஜீவ்காந்தியின் கொலையை யார் செய்தார்கள்? அவர் கொலை செய்யப்பட்டது சரியா பிழையா? யார் யாருக்கு அதில் பங்குள்ளது என்பது பற்றியெல்லாம் நாம் இங்கு பேச முனையவில்லை. அவற்றை ஒருபுறம் நாம் ஒதுக்கிவைத்துவிட்டு - எங்கிருந்து எல்லாம் தொடங்கியது என்று பார்த்தால் - சிலவேளை உண்மைகள் புரியக்கூடும். அமைதிப்படை என்கிற பேரில் ஈழத்து மண்ணில் கால்வைத்த இந்திய சாத்தான் படை - எப்படியெல்லாம் ஈழத்தமிழர்களைக் கொடூரமாகக் கொலை செய்ததென்பதைப் பாருங்கள். ஈழத்தமிழரின் விடுதலைப் போரைச் சிதைக்க எப்படியெல்லாம் துணைநின்றார்கள் என்பதைப் பாருங்கள். மீண்டும், அதே கொடுமையையும் துரோகத்தையும் - சிங்கள அரசுக்கு உதவுவதினூடாக/சிங்கள இராணுவத்தின் பின்னாலிருந்து யுத்தத்தை நடத்துவதினூடாக - இந்தியா செய்கிறது. இப்படியான சூழலில் நீங்கள் ஈழத்தமிழர்களுக்கு ஆதரவாக எழுப்புகிற குரலை நசுக்க ராஜீவ்காந்தியின் கொலையைத் தூக்கிப்பிடிக்கிறார்கள். இதை தொடர்ந்து கவனிக்கிற போது, ஈழத்தமிழர் பிரச்சனை தமிழகத்தில் பேசப்படக்கூடாது என்பதற்காகவும், ஈழத்தமிழர்களுக்கு தமிழகம் உதவக்கூடாது என்பதற்காகவும், ஈழத்தமிழர் பிரச்சனை பற்றி பேசப்படுகிறபோது ராஜீவ்காந்தி கொலை கண்ணுக்கு முன் வரவேண்டும் என்பதற்காகவும் - யாரோ திட்டமிட்டு நீண்டகால அரசியல் இலாபத்தோடு இதைச் செய்திருக்கிறார்கள் என்றே உணர முடிகிறது. இந்திய/தமிழக நண்பர்களே, உறவுகளே, ஊடகங்களே நாம் பழையதை நினைவுபடுத்தி, எமக்குள் உள்ள உறவைக் காயப்படுத்த விரும்பவில்லை. எனினும், உண்மைகளை நீங்கள் அறிந்துகொள்ளவேண்டும் என்று விரும்புகிறோம். உங்களின் ஆதரவுக் குரல்கள் "ராஜீவ்காந்தியின் கொலை" என்கிற ஒற்றை வார்த்தையைக் கொண்டு அடக்கப்பட்டுவிடக் கூடாது என்பதற்காகவே நாம் இந்தப் புத்தகத்தை உங்களுக்கு அனுப்புகிறோம். நாம் மீண்டும் மீண்டும் எல்லோராலும் ஏமாற்றப்படுகிறோம் என்பதை நீங்கள் புரிந்துகொள்ளவேண்டும். * அன்பான உறவுகளே, இந்தப் புத்தகம் அன்றைய இந்திய அமைதிப்படை (ஆக்கிரமிப்புப் படை) கால சம்பவங்களையும், அன்று ஊடகங்களில் வெளியான செய்திகளையும் தொகுத்து செய்யப்பட்டுள்ளது. மிகுந்த சிரமங்களுக்கு மத்தியில், இன்றைய சூழல் கருதியும் தேவை கருதியும் ஈழத்திலிருந்து எடுப்பித்திருக்கிறோம். இதனை உங்களின் நண்பர்களுக்கும், தெரிந்தவர்களுக்கும் அனுப்பி உண்மைகளை அறியச் செய்யவேண்டும் என்று கேட்டுக்கொள்கிறோம். --நன்றி: யாழ் இணையம்--
- 11 replies
இளைஞன்

February 15, 200917 yr
Featured by மோகன்

November 25, 2025Nov 25
🕯️ ஒவ்வொரு ஆன்மாவுக்கும் ஒரு தீபம் / “A Lamp for Every Soul”
🕯️ ஒவ்வொரு ஆன்மாவுக்கும் ஒரு தீபம் / “A Lamp for Every Soul”

🕯️ ஒவ்வொரு ஆன்மாவுக்கும் ஒரு தீபம் / “A Lamp for Every Soul” ஓ… முள்ளிவாய்க்கால் ஆன்மாக்களேகாற்றில் அலையும் ஜீவன்களே அலைகளுடன் நகரும் மென்மையானவர்களே உங்களின் முன் தலை குனிந்து வணங்குகிறோம்!உங்கள் துன்பம் மறக்கமுடியாதது உங்கள் பெயர்கள் மறையமுடியாததுஉங்கள் கனவுகள் எங்களால் வாழட்டும்!குழந்தைகளைப் பாதுகாத்த தாய்மார்களுக்கும் கதிரவனைக் காணாத குழந்தைகளுக்கும்நம்பிக்கையை மட்டுமே சுமந்த இளைஞர்களுக்கும்நாங்கள் இந்த தீபத்தை ஏற்றுகிறோம்!உங்களை கைவிட்ட உலகிற்கு இந்த தீபம் வழிநடத்தட்டும்!நாங்கள் வழங்க முடியாத பாதுகாப்பை அமைதி சூழ்ந்து கொடுக்கட்டும்! முள்ளிவாய்க்காலின் ஆன்மாக்களேநாங்கள் உங்களைப் போற்றுகிறோம்உங்களுக்காகப் பேசுகிறோம்!ஒவ்வொரு தீபத்திலும் ஒவ்வொரு கண்ணீரிலும்ஒவ்வொரு இதயத் துடிப்பிலும் உங்களை நினைவில் கொள்கிறோம்!🕯️ உங்கள் ஒளி நிலைத்திருக்கட்டும்🕯️ உங்கள் உண்மை உயரட்டும்🕯️ உங்கள் நினைவு என்றென்றும் ஒளிரட்டும்![கந்தையா தில்லைவிநாயகலிங்கம்,அத்தியடி, யாழ்ப்பாணம்] “A Lamp for Every Soul”O spirits of Mullivaikkal,restless in the wind,gentle in the waveswe bow our heads before you.May your sufferingnever be forgotten.May your namesnever fade from memory.May your dreamslive through us.To the mothers who shielded their children,to the babies who never saw the sunrise,to the youth who carried only hopewe light this lamp.May this flame guide youwhere the world failed you.May peace hold youin the embrace we could not give.O souls of Mullivaikkalwe honour you.We speak for you.We remember youin every lamp,every tear,every heartbeat.🕯️ Let your light endure.🕯️ Let your truth rise.🕯️ Let your memory shine forever.[Kandiah Thillaivinayagalingam,Athiady, Jaffna]துளி/DROP: 1910 [🕯️ ஒவ்வொரு ஆன்மாவுக்கும் ஒரு தீபம் / “A Lamp for Every Soul”]https://www.facebook.com/groups/978753388866632/posts/32502659262715967/?
- 1 reply
kandiah Thillaivinayagalingam

November 22, 2025Nov 22
Featured by மோகன்

November 23, 2025Nov 23
தாயகத்தின் தாய் – ச.பொட்டு
தாயகத்தின் தாய் – ச.பொட்டு

தாயகத்தின் தாய் – ச.பொட்டு அம்மா எமக்கு அறிமுகமான அந்தநாள் இப்போது நினைவில் இல்லை. அது மணிமனைக் கோவைகளை பரிசீலித்தே அறிய வேண்டியதான ஒன்றாக எம் நினைவுப்பதிவுகளில் இருந்து மறந்து போய்விட்டது. எதொவொரு இலக்கத்தாலும் நினைவில் வைத்திருக்க வாகாகத்தெரிவு செய்யப்பட்ட வழமையல்லாத ஏதோவொருயெராலும், கறிப்பிடப்பட்டிருக்கக்கூடிய அம்மாவின் கோவையும்பொல் ஒன்றாகத்தான் தூங்கும். ஆனால் அம்மா எல்லோரையும் போன்ரவரல்ல. என்றென்றும் மறக்கப்பட முடியாதவராக அந்த அம்மா எம் நிணைவுப்பதிவுகளில்…. கரீர் என்ற கறுப்பு நிறமும், மெலிவான மலர்ந்த முகமும் சளசள வென்ற ஒயாத கதையுமாய்… நகைச்சவை உணர்வுமிக்க ஒரு புலனாய்வாளனால் தமிழகத்து சிரிப்பு நடிகைகளது பெயரில் ஒன்றை புனைபெயராக அம்மாவில் வெளிப் பார்வைக்குத் தெரியும். சில பெண்பிள்ளைகளுடன் இளையவனாய் ஒரேயொரு மகன் என்பது அந்த மகன் மீது அதீத அன்புக்கு காரணமாய் அமைவது இயல்புதான். அம்மாவுக்கும் அப்படித்தான். சில பெண் சகோதரிகளுடனான அந்த ஒரேயொரு மகன் மீது கொள்ளைப் பாசம். காலத்தின் தேவையாக அந்த ஒரேயொரு மகன் போராளியாக ஆனபோது, அம்மாவின் அந்த அதீத பாசத்திற்க்கு சோதனை வந்தது. அந்தச் சோதனை எல்லா அம்மாமாருக்கும் வருவது போன்றபாசத்தின்தளத்தில் எழும்வேதனை மட்டுமல்ல. ****** அம்மா அந்தக் காலத்து பழசுதான். ஆனால் பழமையில் ஊறிய பிற்போக்கு வாதியல்ல. இளமைக்காலத்தில் இருந்தே சமூகத்தின் மீதான பார்வையை செலுத்தக்கூடியவர். எம்மினத்தின் அரசியல் பயணத்தின் அம்சங்களை காலத்தால் அறிந்தவர். மென்முறையில் எழுந்த அரசியல் கோரிக்கைகள் ஆக்கிரமிப்பு வன்முறைகளால் ஒடுக்கப்பட்டதை கண்ணால் கண்டறிந்து குமறியவர். அரசியல் மென்முறைகள் அக்கிரமிப்பு வன்முறைகளால் ஒடுக்கப்பட்டதன் மறவடிவமாக அரசியல் வன்முறை வடிவம் கொண்டதை ஆரம்ப காலத்தில் இருந்தே வியப்புடன் பார்த்தவர். காலம் தன்பாட்டில் ஓடி, அம்மா குடும்பமாகி, பிள்ளைகள் பெற்று வளர்த்து..ஒருசராசரி பெண்ணாக, தாயாக ஆனார். இது வரை அம்மாவால் அப்படியாக வாழவும் முடிந்தது. ஆனாலும் மனதில் ஆயுதப் போராட்ட நியாயத்தின் கடமைக்காய் தன் கடைசிப்பிள்ளை அம்மாவின் பாசத்தை கொள்ளை கொண்ட செல்லமகன் ஆயுதம் ஏந்தப்புறப்பட்டதை அம்மா எப்படி எதிர்கொள்வது? பெற்ற பாசமா? இனத்தின் சோகமா? என்ற தர்ம சோதனையில் அம்மா குழம்பி மகனது ஆயுதப்போர் வடிவத்தெரிவை மனதால் எற்று சமநிலைக்கு வர காலம் பிடித்தது. ***** இப்போது மகன் போராளி. தெருவில் போகவர அம்மாவை எதரிகொள்வான். மகன் இப்போது வளர்ந்து விட்டான். வளர்ந்தவனையே கூட கழந்தையாய் பார்க்கும் அம்மா மனம், இப்போது மகனைக் கண்டு வியந்தது தன்ர சின்னப்பிள்ளை இப்போது எபரிய ஆளாய், ஏதேதோ வேலையாய் அங்கிங்கு ஓடித்திரிவது அம்மாவுக்கு சொல்ல முடியாத பெருமைதான். இயக்கத்தில் இணைந்த காலத்தில் மகன் சின்னப்பெடியன். வயதுக்கே உரிய வேகமான செயற்பாடும் குழப்படியும் கொண்ட இளைய போரளி. அவன் செய்யும் குழப்படிகள், வாங்கும் தண்டனைகள் எதுவும் அம்மாவுக்குத் தெரியய நியாயமில்லைத்தான். அதே போல் வடமராச்சி பொறுப்பாளர் தண்டனை கொடுத்து களைத்துப்போயா அல்லது இவன்தான் தண்டனை செய்து களைத்தப்போயா என்னவோ ஆள் நெல்லியடியில் இருந்து சாவகச்சேரிக்கு நடந்தெ வந்து சேர்ந்தும் அம்மாவுக்கு தெரிய எந்தநியாயமும் இல்லைத்தான். இதற்கிடையில் மகன் சண்டைக்களத்தில் என்ற செய்தியை மட்டுமே கேள்விப்பட்டு கவலைப்பட்ட அம்மா. கடும் சண்டை என்ற செய்தியால் எல்லா அம்மாக்களையும் போல அம்மாவும் பதறிக் கொண்டிருந்த ஒரு பொழுதில் மகன் காயமடைந்த செய்தி, பதறிய மனதுடன் அம்மா ஓடித்திரிந்தும், மகனின் நண்பர்கள் மூலம் அவன் நிலையறிந்து துடித்ததுமாக கழிந்தது நாட்கள். அம்மாவுக்கு மகனின் சுகநலன் அறியும் தொடர்புகளும் ஏற்பட்டுவிட்டன. ‘இதுவொரு சின்னக்காயம் இன்னும் கொஞ்ச நாள்ள காம்புக்கு வந்திடுவான்” என்று பொறுப்பாளர் சொல்லும் பொய்யான கதையை மீறி’ வயிற்றுக்காயம்” பதிணைந்து தையலுக்கு மேல் போட்டிருக்கு” ‘இன்னும் சாப்பிடத் தெடங்கேல்ல” என்று உண்மைகளை அறிந்துவிடும் அளவுக்கு அம்மாவுக்குத் தொடர்புகள் எற்பட்டு அதனை தொடர்ந்து மருத்துவனைக்கு போய்வரவும் தொடங்கிவிட்டா. மருத்துவமனை’கெதியாக என்னை துண்டு வெட்டி விடுங்கோ உடனே சண்டைக்குப் போகவேணும்” உறுதியின் வெளிப்பாடுகள். "என்ர இடத்தில ஆமியின்ர பொடியும் ஆயுதமும் இருக்கு காவு குழு அனுப்புங்கோ” ‘……….” எம்மையா? எதிரியையா? என சிந்திக்க வைக்கும் எழுத்தில் சொல்லமுடியாத வசவுகள். மருந்தின் மயக்கத்தில் தம் நிலை மறந்து உளறல்கள். ’ஜயோ தங்கேலாமல் கிடக்கு பெத்தடினைப் போடுங்கோ…..ஓ…” வேதனை தாங்கேலாமல் கிடக்கு இந்தக் காலை வெட்டுங்கோ” கேட்போரின் கண்களில் இரத்தம் கசிய வைக்கும் வேதனைக்குரல்கள். மருந்துக்களின் நெடியை மீறிய புண்களின் மணம். ****** மகனைப் பிரிந்திருந்த அம்மா தனது பாச உணர்வுகளும் அடிமனத்து விடுதலை உணர்வுக்குமாக ஒரு வடிகாலை தேடிக்கொள்ள, காயமடைந்த போராளிகளை பராமரிப்பவர்களில் ஒருவராகிவிட்டார். இந்தக் காலம் அம்மாவுக்கு விடுதலைப் போரை முன்னை விட கூடுதலாகவே அறிமுகம் செய்து வைத்தது. காயமடைந்த போராளிகளுடனான பரிச்சயமும், பழக்கமும் அம்மாவுக்கு போராட்டத்தின் இன்னொரு பக்கத்தை அறிமுகம் செய்து வைக்க அவவுக்கே தெரியாமல் அம்மா கொஞ்சம் கொஞ்சமாய் மாறிப்போனார். வெளியில் இருந்து போராட்டச் செய்திகளை மட்டும் கேட்பதற்கும், வெற்றிகளை கேட்டு மகிழ்சி அடைவதற்கும் அப்பால் அந்தச் செய்திகளின் உருவாக்கத்தின் யதார்த்தம் அம்மாவை அதிகமாக சிந்திக்க வைத்தது. விட்டுக் கொடுக்கப்பட முடியாததான இவ்விடுதலைப் போராட்டம் இத்தனை கடினமானதா? இவ்வளவு கண்ணீரை வரவழைப்பதா? இழப்புக்களை குறைத்தோ அல்லது குறைக்கவோ ஏதாவது செய்யமுடியாதா? அம்மா அரசியல், இராணுவ வித்தகத்தடன் சிந்தித்தாவோ? இல்லையோ? அம்மாவாகச் சிந்தித்தா. எல்லாப் போராளிகளையும் தன் பிள்ளையாய் பார்த்த அம்மாவாக சிந்தித்தா.. ******* எம் தாயகத்தில் விளைவிக்கும் ஆக்கிரமிப்பு கொடுமையின் ஒரு சிறு பங்காவது எதிரியின் கோட்டைக்குள் திருப்பிக் கொடுக்கப்படுவது அம்மா திருப்தியுடன் பார்க்கும் செய்திதான். அதுவுமல்லாது எதிரியின் பெரும் நிலைகள் அவ்வப்போது ஆங்காங்கே அழிக்கப்படுவதும் அது எதிரிக்கு ஏற்படுத்தும் அதிர்ச்சியும் அம்மா அறிவார். அதில் எம் போராளிகள் இங்க போல் பெரும் இழப்புக்களை சந்திப்பதில்லை என்பதும் அம்மாவுக்கு தெரியும். ஏற்கனவே எரிபற்று நிலையில் இருந்த அம்மாவின் மனம்தான் இந்த வழியை நாடிப்போனதோ அல்லது அம்மாவை அறிந்து சந்தித்த அந்த போராளிகள்ததான் அம்மாவின் மனதில் தீயை மூட்டினரோ? என்னவோ? அம்மா இப்போது புலனாய்வுத்துறையின் ஆள், முகவராம் வெளிவேலைக்கான முகவாரம். அம்மா இப்போது மாறி விட்டா. முன்பு குடும்பம் அயலவர் என்று எல்லா இடமும் செய்தி சொல்லி மருத்துவமனை சென்று வருபவர். இப்போது சுருக்கமாக வேறெங்கோ தனியாகப் போய்வரத்தொடங்கிவிட்டா. மருத்துவமனை போய்வர நேரம் இருக்குதோ இல்லையோ அம்மா இப்ப அங்கை எல்லாம் போய்வரக்கூடாதம். மருத்துவமனை என்றில்லை. இயக்கம் இருக்கிற இடம் ஒன்றுக்கும் போய் வரவும் கூடாதாம்.இயக்கத்திற்கு ஆதரவாக கதைக்கக் கூடாதாம். அம்மாவுக்கு தன்னையே நம்ப முடியாதபடி ஆச்சிரியம் கலந்த பெருமை சி.ஜ.ஏ, கே.ஜி.பி மொசாட் என்று புலனாய்வு அமைப்புக்களை பட்டியலிடுவதுடன் எங்கட வேலைத்திட்டம் என்று ஏதோ விளக்கங்கள். அம்மாவுக்கு எதுவெது விளங்குகிறதோ? இல்லையோ? மனதுக்குள் குறுகுறுவென்று ஆர்வ முனைப்பு. அம்மாவுக்குள் இப்போது வேறொரு உலகம் அறிமுகம் செய்யப்பட்டு விட்டது. அவர் இப்போது இன்னொரு ஆளாகவும் செயற்படக் கூடியவராக ஆகிவிட்டார். தலைநகர் அதிர்ந்தது” தற்கொலையாளி அடையாளம் காணப்பட்டார் ‘புலிகளைத் தேடி வலைவிரிப்பு” சூத்திரதாரி தலைமறைவு” அடையாளம் காணப்பட்டவரின் பெயர் போலியானதென பொலிசார் தெரிவிப்பு” உலகமே செய்திகளை வியப்புடன் நோக்கும். சூழ உள்ள சுற்றத்தினரும் கூட தங்களுக்கு எல்லாம் தெரியும் என்பது போல செய்திகளும் கற்பனைகளுமாக கதைகதையாய் பீற்றித்திரிவார். எல்லாவற்றையும் அமைதியாக அமத்தலாக பார்த்தபடி பட்டுக்கொள்ளாமல் இருப்பா அம்மா. ஆக, அம்மாவுக்குள் இப்போ வேறொரு உலகம் அறிமுகம் செய்யப்பட்டுவிட்டது. அவ்வப்போது வந்து அன்பு மகனை பார்த்துக்கொள்வது தவிர மற்றும்படி எவ்வளவோ மாறிப்போனா அம்மா. ***** இதற்கிடையில் அம்மாவுடன் மகனுக்கு சரியான கோபமாம். அம்மாவின் அக்கா பெரியம்மா – மூலமாக செய்தியனுப்பியிருந்தான்.’ இட இவர் பெரிய மனுசானாகி இப்ப இவருக்கு கோபமும் வருமே” என செல்லமாய் சொல்லிவிட்டிருந்தா அம்மா. இவனது போராளி நண்பனொருவன் ஊர்ப்பக்கமாய் வந்தபோது’ சின்னதாய் ஒரு மூஸ் அடித்து அம்மாவிடம் போய் இவனது சுகநலன் சொல்லியுள்ளான். அவனுக்கு சாப்பாடு கொடுக்காமல் அனுப்பிவிட்டவவாம் அம்மா. போய்வந்தவன் குறையாகவோ இல்லை பகிடியாகவோ சொன்னானோ அல்லது அவன் சொல்லாமல்விட இவன்தான் கதைவிட்டு அறிந்தானோ என்னவோ? ஆளுக்கு சரியான கோபம். அம்மா வழமையில் அப்படியில்லை. எல்லோரையுயம்’ குறிப்பாக போராளிகளை” உபசரிப்பதில் அதுவும் சக்திக்கு மீறியே உபசரிப்பதில் முன்னிப்பவர்தான். அன்று அந்த ஏழைத்தாய்க்கு என்ன கஸ்ரமோ வசதிக்குறைவோ? வீம்புக்காக அம்மாவில் கோபம் போட்டாலும் அவ்வப்போது பெரியம்மாவின் வீடு வந்து’ அம்மாவில் இப்போதும் கோபம்தான்” என்று சொல்லிப் போவான். மகன் பெரியம்மா வீடு வந்து. அம்மாவில் கோபம் சொல்லி நிற்பதும். அம்மாவின் சமையல் வேலிக்குள்ளால் பயணித்துபெரியம்மா வீடு வந்து மகனிடம் சேர்வதும் நல்லதொரு நாடகம். அம்மாவின் கை மணம் தெரிந்தும் தெரியாதது போல நல்ல சாப்பாடு என பெரியம்மாவை புகழ்ந்து விட்டு போகும் பிள்ளையை வேலியால் பார்த்திருப்பா அம்மா. தான் பார்ப்பது தெரிந்தால் அவருக்கு இன்னும் எழுப்பமாய்ப் போய்விடும் என அம்மா, மறைவாய் நின்று சிரிப்பது தெரியாமல் அம்மாவை தேடுவான் பிள்ளை. அன்றைய சுகமும் இன்றைய சோகமுமாய் ஆகிப்போன சின்னச்சின்ன ஞாபகங்கள் இப்படி எத்தனை? ****** காலம் கொஞ்சம் ஓடிப் போக மகன் இப்போது முதிர்ந்தவனாகி விட்டான். அம்மா எதிர்பார்க்க முடியாதபடி என் அவனே கூட எதிர்பார்க்காமல் பொறுப்புள்ளவனாகிப் போனான். இயக்கத்தின் ஆசிரியர் அணியொன்றின் உதவியாளன் என்பதும், அவ் ஆசிரியர் அணியுடனும் அவர்தம் பணியுடனும் அவனுக்கேற்பட்ட ஈடுபாடுமாக அவனைப் படிப்படியாக முதிர்ந்தவனாக ஆக்கிவிட்டதோ? சண்டை அணியில் நிற்கும் போது நண்பர்கள் செய்தது போல அவனும் கரும்புலி விண்ணப்பக் கடிதம் எழுதிக் காத்திருந்தது பழையகதை. இப்போது மொழிப்பெயர்ப்புத் திரைப்பட உருவாக்கற்பொறுப்பை கைமாற்றிக் கொடுத்து விட்டு, அவன் கரும்புலிக்கான அழைப்பை ஏற்றுக்கொண்டதே புதிய நிலை. அணிசேர்ப்பு, தொடர்வகுப்பு,கடும்பயிற்சி,எதிரியின் தலைநகர் அறிமுகமென தயார்படுத்தல்களுடன், தனிமைப்படுத்தப்பட்ட முகாம் வாழ்வுமாக மகனும் இப்போ வேறொரு உலகிற்கு மாறிப்போனான். ******** மகன் வழிதெருவில் எதிர்படாமல் போனதும், வழமைபோல தேடிப்போன இடத்தில் சரியான பதில் இல்லாது போனதும் அம்மாவுக்கு என்னவோ போலானது. காணாத மகனை தெருவில் கண்டபோது அவனது புதிய கூட்டாளிகளும், வழமையல்லாத நடை, உடை,பாவனையும் அம்மாவுக்கு எதையெதையோ எண்ணவும் வைத்தது. அம்மாவும் இப்போதும் பழைய அப்பாவி அம்மா இல்லையே. மகன் இவ்வழியில் கரும்புலியாய் தெரிவு செய்யப்பட்டுவிட அம்மா வெளிவேலைகளில் இருந்து நிறுத்தப்படுவது தவிர்க்க முடியாததாக ஆனது.’ தேவை ஏற்படும் போது அவசரமாக அழைக்கப்படுவீர்கள்” என்ற விளக்கத்தை அம்மாவால் முற்றாக நம்பவோ, புறக்கணிக்கவோ முடியவில்லை. தனக்கு கூறப்படுவது போலிக்காரணம் என்று தெரிந்தாலும் அதற்கு மேல் அம்மாவாலும் ஒன்றும் செய்யமுடியாமல் போக அம்மா, வழமையான அம்மாவாக வாழத்தொடங்கிவிட்டா. அம்மாவின் சந்தேகத்தை இன்னும் அதிகரிக்க அல்லது தீர்த்து வைக்க காரணமாக இன்னொரு செய்தியும் வந்து சேர்ந்தது. அம்மாவின் உறவுக்கார பெண்மணியொருவர் கொழும்பில் இருந்து வந்திருந்தார். மகனை கொழும்பில் கண்டதை அம்மாவுக்குச் சொன்னது மட்டுமின்றி, தன்னைக் கண்டதை அம்மாவுக்குச் சொல்ல வேண்டாமென்று அவன் சொன்னதையும் வலு கவனமாய் மறக்காமல் சொல்லிவிட்டுப் போனார். அம்மாவின் மனப்புதிர் மெல்ல மெல்ல விடுபட்டுப்போகும் காலத்தின் ஒரு நாளில்,’சொல்லாமல் கொள்ளாமல் திடுதிப்பென்று” வீடு வந்தான் மகன். பழைய கோபத்தை நினைவூட்டுவதும் செல்லம் கொஞ்சுவதுமாய், அதே பழைய மகனாய்……..ஒரே கொண்டாட்டம். வீடு நிறைந்து போனது. அப்பாவி அப்பாவுக்கும் அக்காளுக்கும், உறவுகளுக்கும் மகனது வீடு வருகையின் காரணம் தெரியாமல் ஒரே கொண்டாட்டம். அம்மாவுக்கு மட்டும் என்ன தெரியும்? ஒன்றுமே தெரியாதுதானே.’மகனது புதிய நடை, உடை பாவனையில்,வித்தியாசம் விளங்காது”‘அவன் கொழும்புக்கு போனதும் தெரியாது”‘அவனது அன்ரி வந்து ஒன்றுமே சொல்லவும் இல்லை” ஒரே மகிழ்ச்சி வீடு நிறைந்த மகிழ்ச்சி.. பிள்ளை ‘அம்மாவை தனக்கு சாப்பாடு ஊட்டி விடக்கேட்டது’ அம்மாவுக்கு நான் தான் தீத்துவேன் என்று கூறி உணவூட்டிவிட்டதும் ஏன் என்று வீட்டில் மற்றயோருக்குத் தெரியாது.’தம்பி இப்ப தான் செல்லம் கொஞ்சுது என்று அவர்கள் பரிகசித்து பேசும் போதும் அம்மா கண்ணீர் மறைத்து, முகம் சிரித்து,’உணர்வு மறைத்து உணவூட்டி…. வீட்டில் ஒரே சிரிப்பும் கொண்டாட்டமும் தான். அம்மாவுக்குத்தான் ஒன்றும் தெரியாதே. மகன் முகாம் திரும்ப முன்புபோல் அவசரப்படவும் இல்லை. எல்லோரிடமும் விளையாட்டும் , கதையுமாய் கொண்டாடி, உணவுண்டு, பாய்போட்டு நித்திரை கொண்டு அவன் முகாம் திரும்பும் வேளையில் அன்றைய பொழுது இரவைத் தொட்டுவிட்டிருந்தது. அன்று அவன் சொல்லிவிட்டுப் போனது போல தனயாக வரவில்லை அரை டசினுக்கு அதிகமான அவனது நண்பர்களால் வீடு மீண்டும் களைகட்டியது. அவனது அம்மா,அப்பா, அக்காக்கள், வந்திருந்த அனைவருக்கும் அம்மா, அப்பா,அக்கா ஆயினர். அத்தனை பிள்ளைகளும் மாறி மாறியும் ஒன்றாயும் அம்மா…..என்று உறவு சொல்லி அழைக்க வீடு களைகட்டியது. ஒன்றும் தெரியாத அப்பாவி அப்பாவும் அக்காக்களும் அவனது புதிய நண்பர்களின் உற்சாகத்தில் கரைந்து போயினர் அம்மாவும் தான். அவவுக்கும் தான் ஒன்றுமே தெரியாதே. அவவும் சேர்ந்து அந்த உற்சாகத்தில்…….. வந்திருந்த எல்லோருக்கும் தடல்புடலாய் சமையல், சாப்பாடு என்று வீடு அமர்க்களப்பட்டபோதும், குசினியும் முற்றமுமாய் பம்பரமாய் சுழன்ற போதும் அப்பாவி அப்பாக்கும் அக்காக்களுக்கும் ஒன்றுமே தெரியாதே…. அம்மாவுடன் வீடே வாசல் வரை வழியனுப்ப அவர்கள் புறப்பட்டு போயினர். ****** அவர்கள் விடைபெற்று போயினர். அந்தத்தாயின் வழியனுப்பலின் பின்னர் அவர்கள் தாயகத்திடமும் விடை பெற்றுப் போய்……போய் விட்டனர். நல்ல சூரியனின் பெயரால் கொடியோரின் ஆக்கிரமிப்புக் கதிர்கள் விலிகாமத்து மண்ணை சுட்டெரித்த காலத்தின் ஒரு பொழுதில் அவர்கள் எதிரியின் கோட்டைக்குள் புதுவரலாறு படைத்தனர். வீரமும் அர்பணிப்பும் மட்டுமன்றி மனிதாபிமான நிதானமும் நிறைந்த அவர்களது வெற்றிச் செய்தியால் உலகமே உறைந்து நின்ற வேளையில், தமிழீழத்து எல்லோரையும் போலவே அவனது குடும்பத்திலும் மகிழ்ச்சி வளிப்பாடுகள். ஆனால் அம்மா மனதில்?… ****** மகனது பொறுப்பாளர்களை அம்மா சந்திக்கும் அந்த நாள் வந்தேவிட்டது. மகன் எங்கே? என்பதற்கான வழமையயான பதில்கள் அம்மாவிடம் எடுபடாமல் போக, சந்திக்க வேண்டியது தவிர்க்க முடியாததாக ஆகிப்போனது. மனுசியின்ர வாயை முதலே அடைச்சுப்போட வேணும். கதைக்க விட்டால் தப்பேலாது” என்ற சிந்தனையில் மகன் நிற்குமிடம் அவனைச்சந்திப்பதில் உள்ள வசதிக் குறைவு…என பொருத்தமற்ற பொய்யான பதில்களுடன் பொருப்பாளர். ‘மகன் தூரத்தில்…., மட்டகளப்பில்…நிற்கிறான்…வர கொஞ்சம் காலம் செல்லும்” அம்மாவின் முன்னால் இரத்தம் நீராகிப்போன பொருபாளரின் வார்த்தைகள். அவரது உயிரற்ற வார்த்தைகளை மீறி அம்மாவின் உறுதியான கேள்வி. ‘எப்படி என்ர மகன் கடைசி வரைக்கும் சரியாக செயற்பட்டவனே………? ‘எனக்கு எல்லாம் தெரியும். நான் பெத்து வளத்த பெடியன் அவன் சொல்கிறது பொய் எண்டு எனக்குத் தெரியாதே” ‘உப்பிடி எத்தனை பொய்களை எனக்கு நீங்கள் சொல்லித்தந்திருப்பியள்” ‘வீட்ட வந்து அவன் நித்திரை கொள்ளேக்க அவன்ர பொக்கற்றுக்குள்ள பார்த்தன் வட்டுக்கோட்டை அடையாள அட்டை வச்சிருந்தவன்” என்ர பிள்ளை அம்மாவுக்கு சொல்லேலாதெண்டு எனக்குத் தெரியும். அதில நான் ஏதும் பிழை விட்டிடக்கூடாது என்று தான் நானும் அவனோடை ஒன்றும் கதைக்கேல்லை. ‘செய்தியை கேட்டுப்போட்டு அக்கா வீட்டை ஒடிப்போய் ரூபவாகினிதான் பார்த்தனான்” முகம் தெரியாததால ஒருதருக்கும் விளங்கேல்லை – பெத்ததாய் எனக்கு தெரியாமல் போகுமே. ‘றெயில் தண்டவாளத்துக்குப் பக்கத்துல கிடக்கிறான் என்ரபிள்ளை…” அடக்கி வைத்ததெல்லாம் வெடித்ததால் குமுறி அழும் அம்மாவிடம் சொல்ல வார்த்தைகள் இல்லை. உலகத்தில் உள்ள பொய்கள் எல்லாம் எங்கோ ஓடிப்போக விக்கித்து நினறவரிடம் அம்மா அந்த கடிதத்தைக் கொடுத்தா. தன் வீரச்சாவு வெளிப்படும் வேளையில் அம்மாவுக்கு கொடுக்கவென மகன் எழுதிய கடிதம். எங்கோ பிசகுப்பட்டு முன்கூட்டியே அம்மாவின் கையில். எண்ணற்ற தடவைகள் படிந்துறைந்த போன அந்தக் கடிதத்தில் அவன் எல்லாம் எழுதியிருந்தான். முத்தாய்ப்பான வரிகள்… உன் கடன் தீர்க்காமல் போகின்றேனம்மா. தமிழீழத்தில் அடுத்த பிறப்பில் உன் வயிற்றில் பிள்ளையாகவே என்னைப் பெற்றிடு அம்மா இப்பிறப்பில் தீர்க்காத உன் கடன் எல்லாம் அப்பிறப்பில் தீர்த்திடுவேன் அம்மா அம்மா தாயே உங்களை எமாற்ற உங்களின் பிள்ளைகள் நாங்கள் எத்தனை திட்டங்கள் போட்டோமம்மா. ஒன்றுமே கூறாது நீ நின்றதும் வென்றதும் எவ்வண்ணம் தாயே. தாயகத்தின் தாயே உங்களிடம் நாங்கள் தோற்றுத்தான் போனோமம்மா… ********* ஆசிரியரை பற்றி…. விடுதலைப்புலிகளின் முக்கியஸ்தரான பொட்டம்மான் பற்றி உலகத்திற்கு தெரிந்தவவைகளில் அனேகமானவை புனைவுகளே. புலனாய்வு நடவடிக்கை பணிப்பாளர்களின் துரதிஸ்டம் அவரையும் வாழ்கை முழுவதும் பிடித்திருந்தது. இயற்கையான தனது வெளிப்பாடுகளையும், உணர்வுகளையும் வெளிப்படுத்தும் சுதந்திரம் மட்டுப்பட்டிருந்தது. அவர் ஒரு படைப்பளியாகவும், தீவிர வாசகராகவும் இருந்தார் என்பது பலர் அறியாதது. வன்னியிலிருந்த வெளியான பத்திரிகைகளிலும், இலக்கிய சஞ்சிகைகளிலும் எப்பொழுதாவது எழுதிக்கொண்டிருந்தார். வெளிச்சம் சஞ்சிகையில் அவர் எழுதிய சில கதைகளில் இதுவும் ஒன்று. http://pagetamil.com/?p=5409
- 12 replies
கிருபன்

June 5, 201411 yr
Featured by மோகன்

November 5, 2025Nov 5
இது ஒரு தீபாவளிக் கதை: பாவம் நரகாசுரன் -பேராசிரியர் சி. மௌனகுரு
இது ஒரு தீபாவளிக் கதை: பாவம் நரகாசுரன் -பேராசிரியர் சி. மௌனகுரு

இது ஒரு தீபாவளிக் கதை: பாவம் நரகாசுரன் -பேராசிரியர் சி. மௌனகுரு நாளைக்குத் தீபாவளி. அடிக்கடி நண்பர்களும் மாணவர்களும் தொலைபேசியில் வாழ்த்துகளைத் தெரிவிக்கிறார்கள். அனைவரும் மகிழ்ச்சிகரமாக இருகிறார்கள் போலத் தெரிகிறது. கொண்டாட்டம் என்பது மகிழ்ச்சிதானே? மகிழ்ச்சியாக எல்லோரும் இருப்பதைத்தானே நாம் விரும்புகின்றோம். மட்டக்களப்பில் நான் பிறந்த காலங்களில், அதாவது 1940களில், இற்றைக்கு 77 வருடங்களுக்கு முன்னர், தீபாவளியை யாரும் கொண்டாடவில்லை. நாங்களும் வீட்டில் இதைக் கொண்டாடியதாக ஞாபகம் இல்லை. எமக்கு அன்று கொண்டாட்டம், சித்திரை மாதப் புதுவருடம் தான். அன்று தான் எங்கள் வீட்டில் பலகாரம் சுடுவார்கள். முதல் நாளிரவு நான்கைந்து குடும்பங்கள் சேர்ந்து பலகாரம் சுட்டு, அதனைத் தமக்குள் பகிர்ந்து கொள்வார்கள். குடும்பங்களின் விழா அது; கிராமங்களின் விழா அது புது உடுப்புகளை, காலையில் முதலில் தென்னம்பிள்ளைகளுக்கு உடுத்திவிடச் சொல்லுவார் அம்மா. தென்னம்பிள்ளைகள் அணிந்த உடுப்பைத்தான் நாம் பின்னர் அணிவோம். இயற்கையை நேசித்த மனிதர்கள்; அன்றைய சித்திரை நாள், எங்களுக்குப் பெரும் கொண்டாட்ட நாள். தைப்பொங்கலும் கொண்டாட்ட நாள்தான். அதனை விவசாயிகள் கொண்டாடுவர். ஏனையோரும் வீட்டில் பொங்கி மகிழ்வர். ஆனால், சித்திரை வருடமளவுக்கு அது, அன்று பெரும் கொண்டாட்டமில்லை. சின்னவயதில் தமிழ்நாட்டிலிருந்து கல்கி தீபாவளி ஆண்டுமலர், ஆனந்தவிகடன் தீபாவளி ஆண்டுமலர் எனச் சில மலர்கள் வரும். அவற்றின் மூலம்தான் தமிழகத் தீபாவளி எமக்கு அறிமுகமாகியதாக ஞாபகம். அதன்மூலம்தான் தலைத்தீபாவளி, கங்காஸ்னானம், அத்திம்பேர், தீபாவளிச்சீடை முறுக்கு, குடும்பிவைத்து பூணூல் போட்ட தாத்தாமார், மடிசார் வைத்த பெண்கள் எனப் பல தீபாவளி சார்ந்த சமாச்சாரங்கள் சிறுவயது மனதில் படிய ஆரம்பித்தன. தீபாவளிச் சிறுகதைகள் வேறு, இவற்றை மனதில் அழுத்தின. நரகாசுரனைச் சத்தியபாமா துணையுடன் கிருஸ்ண பகவான் அழித்த கதையும் எம்மனதில் வேரூன்றியது. சற்றுவளர்ந்த பின்னர், 15ஆவது வயதில் திராவிடக் கழகக் கருத்துகளுக்கு அறிமுகமானபோது, நரகாசுரன் என்ற திராவிட குலத் தலைவனை, ஆரியனாகிய கண்ணன் அழித்த கதை எமக்கு அறிமுகமானது. நரகாசுரன் என்பவன் நரன்; அதாவது மனிதன். அசுர என்பதன் அர்த்தம், சுரன் அல்லாதவன். சுரர் என்றால் தேவர். தேவர்கள் என அழைக்கப்பட்ட ஆரியர்கள், சுரபானம் எனும் மதுவை அருந்தியதால் சுரர் என அழைக்கப்பட்டனர். திராவிடர்கள் ஒழுக்க சீலர்கள்; மதுஅருந்தாதோர். ஆகவே, அசுரர் என்றால் சுரம் அருந்தாதோர் என்பது அர்த்தம் (அ+ சுரம்) என்ற விளக்கங்களைத் திராவிடக்கழக நூல்கள் தந்தபோது, இளைஞரான நாம் அதனால் ஈர்க்கப்பட்டோம். இவற்றையெல்லாம் தாண்டி, மெல்லமெல்ல தமிழகத் தீபாவளி, தமிழ்ப் பண்பாட்டுக்குள் புகத்தொடங்கி, சித்திரை வருடத்துக்கு அடுத்த பெரும் கொண்டாட்டமாக இடம்பெறலாயிற்று. 1960களில் பேராதனைப் பல்கலைக்கழகத்தில் படித்துக் கொண்டிருந்த காலத்தில், எமக்கு தமிழ் இலக்கியங்கள், இலக்கணங்கள், சமணப் புலவர்களின் தனிப்பாடல்கள் என்பன அறிமுகமாகின. அவர்கள் பிராமண மதத்துக்கும் வைதீக மதத்துக்கும் எதிரானவர்கள்; நால்வகைப் வருணப் பாகுபாட்டை விரும்பாதவர்கள்; மக்கள்பால் நின்றவர்கள்; தமிழ்நாட்டில் பெரும் தாக்கத்தை அன்று எற்படுத்தியவர்கள் என்ற விவரங்களும் சமணத் தலைவரான மகாவீரர், ஸ்தாபித்த சமணமதம் அதன் தத்துவங்கள் என்பனவும் அறிமுகமாகின. இவற்றை எமக்கு அறிமுகம் செய்தவர்கள் பேராசிரியர்களான கணபதிப்பிள்ளை, வித்தியானந்தன், கைலாசபதி, வேலுப்பிள்ளை ஆகியோராவர். கைலாசபதி வகுப்பில் தொடர்ச்சியாகச் சமண தத்துவத்தை எமக்கு விளக்கினார். வேலுப்பிள்ளையும் தமிழ்ச் சமணம், தமிழ்ப் பௌத்தம் பற்றி ஆராய்ந்து எமக்குக் கூறினார். இதன் காரணமாக, சமண மகாஞானியான மகாவீரர் மீது ஒரு மதிப்பு உண்டானது. பேராசிரியர் கணபதிப்பிள்ளையின் வகுப்புகள் வெகுசுவராஸ்யமானவை. சிரித்துக்கொண்டு கதையோடு கதையாகப் பல ஆழமான விடயங்களை எளிமையாகக் கூறிசெல்வார். ஒருநாள், அவர் எங்களுக்குப் படிப்பித்துக் கொண்டிருக்கையில், “உந்தத் தீபாவளி எப்படி வந்தது என்று தெரியுமோடா”? என்று கேட்டார். நாங்கள் நரகாசுரன் கதையைக் கூறினோம். “அதெல்லாம் புழுகடா. சமண மதத்தின் தலைவரான மகாவீரர் சமாதி அடைந்த நாளை நினைவு கூரப் பல தீபங்களை ஏற்றி வைத்து, சமணர் கொண்டாடிய சமண விழாவை, சைவர்கள் தம்வசப்படுத்திக்கொண்ட கதை தாண்டா தீபாவளி. அதற்காக உருவாக்கப்பட்ட கதைதான் நரகாசுரன்கதை” என்றார். சைவம், சமண மதத்திலிருந்து பல விடயங்களைத் தன்வயப்படுத்திச் சைவமாக்கிக் கொண்டது என்பதற்கு நிறைய உதாரணங்கள் கூறி, இதுவும் அதில் ஒன்றடா என்றார். எங்களுக்கு வியப்பு அதிகமாயிற்று. தீபாவளியின் மூலம் பற்றி பேராசிரியர் வேலுப்பிள்ளை கூட, தனது நூலில் ஒரு கட்டுரை எழுதியமை ஞாபகம் வருகிறது. காலங்கள் பல கடந்து விட்டன.... இன்று 2020ஆம் ஆண்டு, இன்று, வடக்கு-கிழக்கு தமிழர் பிரதேசங்களில் தீபாவளி பெரும் கொண்டாட்டம். நரகாசுரனை அழித்த கதை, பாடசாலைகளிலும் சமயச் சொற்பொழிவுகளிலும் சர்வசாதாரணமாகச் சொல்லப்படுவதாயிற்று. அரசியல்வாதிகளும் ஆட்சியதிகாரத்தில் உள்ள பெரும்தலைவர்களும் சமயத் தலைவர்களும் நரகாசுரன் ஒழிந்த நாள் என்றே மக்களுக்கு வாழ்த்துத் தெரிவிக்கின்றனர். நரகாசுரனுடன் தீபாவளி இணைக்கப்பட்டுவிட்டது; பெரும் சமயக் கொண்டாட்டம் ஆகிவிட்டது. இக்கொண்டாட்டத்தை இனி மக்களிடமிருந்து பிரித்துவிட முடியாது. காரணங்கள் பல; ஒன்று, இது ஒரு பெரும் சமய விழாவாகி விட்டது. இரண்டு, இது ஒரு பெரும் கொண்டாடமாகிவிட்டது. கொண்டாட்டம் ஆனமையால் மக்கள் கூடுதல், அதனால் கிடைக்கும் பெருமகிழ்ச்ச்சி, ஒருவருக்கொருவர் மகிழ்ச்சி தெரிவித்தல் என்ற மனிதகுலம் விரும்பும் அடிமனநல்லியல்புகள் இதில் உள்ளன. மூன்று, பெரும் வணிக நிறுவனங்களின் இலாபம், இக்கொண்டாட்டத்தில் அடங்கியுள்ளது. உடுப்புகள், பட்டாசு, பலகார வகைகளுக்கான மூலப்பொருள் வியாபாரம் என்பன இதில் அடங்கும். நான்கு, கோவில் வருமானம், பூசகர் வருமானம் என்பன இன்னொருபுறம் உள்ளன. ஐந்து, பத்திரிகைகளின் தீபாவளிமலர் வருமானம், மற்றொரு புறம் உள்ளது. ஆறு, தொலைக்காட்சி போன்ற ஊடகங்களின் இடைவிடாத கருத்தேற்றமும் அவை, அவற்றால் அடையும் பெருவருமானமும் இன்னொரு புறம் உள்ளது. ஏழு, அதனை விரும்பி ஏற்றுப் புகழ்பெறச் செல்லும் நமது கலைஞர்களும் அறிஞர்களும் இன்னொரு புறம் பெருவாரியாகக் காணப்படுகின்றார்கள். எனவே, தீபாவளியைக் கொண்டாட வேண்டாம் என எப்படிச் சொன்னாலும் அக்கொண்டாட்டத்தை இலகுவில் போக்கிவிட முடியாது. அது, இந்து மக்கள் கொண்டாட்டமாகி விட்டது. கொண்டாட்டங்களை மிகவும் வரவேற்கும் பின் நவீன சிந்தனையாளர்களை நாம் காண்கிறோம். மக்கள் இணைகிறார்கள்; மக்கள் மகிழ்கிறார்கள் என அவர்கள் கொண்டாட்டங்களுக்கு ஒரு புது வியாக்கியானம் அளிக்கிறார்கள். ஆனால், கொண்டாட்டங்களுக்குப் பின்னால் மறைந்து கிடக்கும் சுரண்டலையும் பேதங்களையும் மறக்க வைக்கும் போதைநிலையையும் அவர்கள் தோலுரித்துக் காட்டுவதில்லை. தீபாவளியைக் கட்டுடைத்துப் பார்க்கலாம்; அதன் அதிகாரம் எங்கிருக்கிறது என்று பார்க்கலாம்; தீபாவளிக் கதை கூறும் நரகாசுரன் கதைப் பிரதியைக் கட்டுடைத்துப் பார்க்கலாம். இவை யாவும் ஒரு புலமைத்துவ இன்பப்பயிற்சியுமாகும் (Intelectual pleasure excersise). தீபாவளி அன்றுபோல் இன்றில்லை. நிறைய மாறி விட்டிருக்கிறது. இன்னும் மாறும்; இடையில் வந்து மாட்டிக்கொண்டான் நரகாசுரன்; பாவம் நரகாசுரன். அவனுக்கு ஆழ்ந்த அனுதாபங்கள். http://www.tamilmirror.lk/சிறப்பு-கட்டுரைகள்/இது-ஒரு-தீபாவளிக்-கதை-பாவம்-நரகாசுரன்/91-258874
- 2 replies
கிருபன்

November 14, 20205 yr
Featured by மோகன்

October 18, 2025Oct 18

View All

Sign In

இலங்கைக்கு GSP+: கண்காணிப்புச் செயன்முறையொன்றை EU கோருவது அவசியம்

Featured Replies

Archived

Tell a friend

Topics

மன்னாரில் வீடொன்றில் திருட்டு: பல இலட்சம் மதிப்புள்ள நகை, பணத்துடன் 4 பெண்கள் கைது

'இந்தியா ரஷ்யாவிடம் 30 நாள் கச்சா எண்ணெய் வாங்கலாம்' - அமெரிக்கா கூறியது என்ன?

ஆமென்! - மத்திய கிழக்கு போர்க் குறிப்பு

ஈரானிய கடற்படைக் கப்பலே விபத்து : 35 பேர் மீட்பு

ஈரானுக்கான புதிய உச்ச தலைவராக மொஜ்தபா கொமெய்னி தெரிவு!

Posts

மன்னாரில் வீடொன்றில் திருட்டு: பல இலட்சம் மதிப்புள்ள நகை, பணத்துடன் 4 பெண்கள் கைது

'இந்தியா ரஷ்யாவிடம் 30 நாள் கச்சா எண்ணெய் வாங்கலாம்' - அமெரிக்கா கூறியது என்ன?

இந்திய கடற்படையின் பயிற்சி பாய்மரக் கப்பல் ஐ.என்.எஸ். தரங்கினி இலங்கை வருகை

ஆமென்! - மத்திய கிழக்கு போர்க் குறிப்பு

Featured Content

ஈழத்தமிழர் மீதான இனவழிப்புப் போரில் எனது தனிப்பட்ட அனுபவங்கள்

சாத்தான் படை (IPKF)

🕯️ ஒவ்வொரு ஆன்மாவுக்கும் ஒரு தீபம் / “A Lamp for Every Soul”

தாயகத்தின் தாய் – ச.பொட்டு

இது ஒரு தீபாவளிக் கதை: பாவம் நரகாசுரன் -பேராசிரியர் சி. மௌனகுரு

Important Information

Account

Navigation

Search

Configure browser push notifications

Chrome (Android)

Chrome (Desktop)

Safari (iOS 16.4+)

Safari (macOS)

Edge (Android)

Edge (Desktop)

Firefox (Android)

Firefox (Desktop)