''இந்த, 'ஃப்ரெண்ட்ஸ் ஸ்டார்ச்’ கடையை ஆரம்பிச்சு பதினேழு வருஷம் ஆகுது. நூறு கஸ்டமர்கள் என்ற அளவில் இருந்த தொழில், என்னைப் பற்றி முதல் கட்டுரை புத்தகத்துல வெளி வந்ததும் வேகமெடுக்க ஆரம்பிச்சது. ஆரம்பத்தில் 'புடவை பாலிஷ் பண்ணித் தர்றேன்'னு தேடிப்போய் ஆர்டர் கேட்கும்போது, பட்டுப்புடவைகளை நம்பி யாரும் என்கிட்ட கொடுக்கமாட்டாங்க. பாழாகிடுமோனு பயம். ஆனா, இப்போ தேடிவந்து நம்பிக்கையோடு கொடுக்கிறாங்க. இந்த நம்பிக்கையதான் என்னுடைய உண்மையான வெற்றியா நினைக்கிறேன்'' என்கிறார் இந்திரலட்சுமி. 

சென்னை, மின்ட் பகுதியைச் சேர்ந்த இந்திரலட்சுமி, தடைகளைக் கடந்து வெற்றிபெற்ற கதையைப் பகிர்கிறார். ''சின்ன வயசிலிருந்தே துறுதுறுனு ஏதாச்சும் வேலை செஞ்சுட்டே இருப்பேன். பி.எஸ்.சி., முடிச்சதும் கல்யாணம் ஆகிடுச்சு. வீட்டுல சும்மா இருக்காமல் கிராஃப்ட், பெயின்ட்டிங் என நேரத்தை சுவாரஸ்யமா தொடர்ந்திட்டிருந்தேன். என் ரெண்டு குழந்தைகளும் என் வாழ்க்கையை இன்னும் அழகாக்கினாங்க'' எனும் இந்திரலட்சுமியின் வாழ்வில் அந்தத் திருப்பம் நிகழ்ந்திருக்கிறது. 

''2000-ம் வருஷம் எனக்கு நடந்த ஒரு மேஜர் ஆபரேஷனுக்குப் பிறகு, சில மாதங்கள் ஓய்வில் இருந்தேன். 'இப்படிச் சும்மாவே இருக்கோமே. என்ன பண்ணலாம்?'னு யோசிட்டே இருப்பேன். புடவை டிரைவாஷ் பண்ற என் தோழியிடம், 'எனக்கும் சொல்லிக் கொடு’னு பொழுதுபோக்கா கத்துக்கிட்டேன். பீரோவில் இருந்த புடவைகளுக்கு எல்லாம் கஞ்சி போட்டு, டிரைவாஷ் செய்தேன். அப்போ அந்தத் தோழி, 'இப்போ எல்லாம் நிறையப் பெண்கள் டிரைவாஷ் கடைகளைத் தேடிப்போறாங்க. அந்த அளவுக்கு கிராக்கி இருக்கு. ஆனா, கடைகள் குறைவாதான் இருக்கு’னு சொன்னாள். 'அப்படினா நானே டிரைவாஷ் கடையை ஆரம்பிக்கலாமா?'னு கேட்டேன். செய்யலாம்னு நம்பிக்கை கொடுத்து, தொழில் நுணுக்கங்களையும் சொல்லிக் கொடுத்தாள். 

வீட்டில் விஷயத்தைச் சொன்னதும், 'நாம ஆசாரமான குடும்பம். ஊரில் இருக்கிறவங்க சேலையை துவைச்சுக் கொடுக்கும் தொழில் நமக்கெதுக்கு?’னு பதறினாங்க. அர்த்தமில்லாத அந்த அறிவுரைகளை புறந்தள்ளினேன். 'இந்த தொழில்ல நான் ஜெயிப்பேன்’னு உறுதியா நின்னேன். என் கணவர் வாழ்த்து சொல்ல, தைரியமாகத் தொழிலை கையில் எடுத்தேன். கடை ஆரம்பிச்சது பெருசா தெரியலே. ஆர்டர் பிடிக்கிறதுதான் சவாலா இருந்துச்சு. தெரிஞ்சவங்ககிட்ட வாய் மொழியாப் பேசிப் பேசித்தான் ஆர்டர் பிடிச்சேன். பெண்கள் விடுதிகள், லேடீஸ் கிளப்கள், கல்லூரிகள் என நேரில் போய் கேன்வாஸ் செய்வேன். சொன்ன நேரத்துக்கு முன்னதாவே டெலிவரி செஞ்சு அவங்ககிட்ட நல்ல பெயர் வாங்கினேன். அடுத்தடுத்த ஆர்டர்கள் கிடைக்க ஆரம்பிச்சது'' என்று குரலில் உற்சாக டெஸிபல் அதிகரிக்க தொடர்கிறார் இந்திரலட்சுமி. 

''ஒவ்வொரு வகை சேலைக்கும் ஒவ்வொரு விதமாக டிரைவாஷ் செய்யணும். பாந்தினி சாரி, டிசைனர் சாரி, சில்க் காட்டன், ரா சில்க்னு மார்கெட்டுக்கு புதுசா வர்ற புடவை ரகங்களுக்கு ஏற்ப தொழிலை, அப்டேட் செஞ்சுக்கிட்டே இருப்பேன். இப்போ ஏழு பணியாளர்களுடன் சீஸனைப் பொறுத்து மாசத்துக்கு 25,000 முதல் 40,000 ரூபாய் லாபம் பார்க்க முடியுது. கடையை ஆரம்பிச்ச நாளிலிருந்து அதன் நிர்வாகப் பொறுப்பை ஏத்துக்கிட்டு திறம்பட நடத்தும் என் தோழி சித்ராவும் இந்த வெற்றிக்கு ஒரு காரணம். இந்த சாரி டிரைவாஷ் தொழிலுக்கு கடை வாடகை, சலவைப் பொருள்கள், பணியாளர்கள் என ஆரம்ப முதலீடாக 20,000 ரூபாய் தேவைப்படும். புடவையின் ரகத்துக்கு ஏற்ப டிரைவாஷ், ஸ்டார்ச் ரேட் வசூலிக்கலாம். தொடக்க மாதங்களில் சில ஏற்ற இறக்கங்கள் இருக்கத்தான் செய்யும். தொழில் சீரானதும் லாபத்துக்கு கியாரன்ட்டி இருக்கு'' என்கிறார் இந்திரலட்சுமி. 

இவரது கணவர் ஷங்கர், கண்ணாடிகள் தயாரித்து வெளிநாடுகளுக்கு ஏற்றுமதி செய்கிறார். பி.எஸ்சி படிக்கும் அபிநயா, ஒன்பதாம் வகுப்பு படிக்கும் பாலாஜி என்று இரண்டு குழந்தைகள். 

''உதிரியா கஸ்டமர்கள் சேர்த்திட்டிருந்த நான், தொழில் சார்ந்த நபர்களை அதிகமா சந்திச்சேன். தறி வெச்சுருக்கறவங்க, லாண்டரி யூனிட் வெச்சுருக்கறவங்க எனத் தேடிப்போய் ஆர்டர் வாங்கினேன். ஆந்திரா காட்டன், காஞ்சிபுர நெசவுப் பட்டு என ஒவ்வொரு ஊராகப் போய், ஒவ்வொரு யூனிட்டையும் பார்த்தேன். இப்போ, தமிழ்நாடு முழுக்க சுமார் 400 யூனிட்களிலிருந்து ஆர்டர்கள் வருது. மயிலாப்பூர், நங்கநல்லூர், கோடம்பாக்கம், ராயப்பேட்டை, வில்லிவாக்கம், கொருக்குப்பேட்டை எனச் சென்னையின் 19 இடங்களில் கலெக்ஷன் சென்டர்களை ஆரம்பிச்சுருக்கேன். மழைக் காலத்தில் சில நேரம் தொழில் மந்தமாக இருக்கும். சில நேரங்களில் ஆர்டர் குறைஞ்சுடும். அதையெல்லாம் பொருட்படுத்தாமல் வேலையைத் தொடர்ந்து செஞ்சுட்டே இருந்தால், நம் உழைப்புக்கான பலன் நிச்சயம் கிடைக்கு'' என்கிற இந்திரலட்சுமி, தொழிலில் அடுத்த பாய்ச்சலை எடுத்துள்ளார். 

''அடுத்து என்ன செய்யலாம்னு யோசிச்சு, டிரைவாஷ் பயிற்சி வகுப்புகள் எடுக்க ஆரம்பிச்சேன். நானே எதிர்பார்க்காத அளவுக்கு முதல் மாதமே அறுபதாயிரம் ரூபாய் லாபம் கிடைச்சது. என்கிட்ட முதன்முதலா பயிற்சிக்காக மதுரையிலிருந்து வந்த ஒரு பெண்மணி, இன்னிக்கு தொழில்முனைவோரா ஆகியிருக்காங்க. அதுதான் ஆரம்பம். திருப்பூர், கோவை எனப் பல மாவட்டங்களிலிருந்து பயிற்சி எடுத்துட்டுப் போனாங்க. என் பயிற்சிக்கு பிறகு, திருப்பூரில் மட்டுமே நாற்பதுக்கும் மேற்பட்ட பெண்கள், தொழிலில் வெற்றிகரமாக இயங்கிட்டிருக்காங்க. டிரைவாஷ் மட்டுமில்லாம, பாலிஷிங், ஜரி பாலிஷிங், ரோலிங்னு இந்தத் தொழில் சம்பந்தப்பட்ட அனைத்துப் பயிற்சிகளும், அதற்கான மெட்டீரியல்களும் பொதுவா ஒரே இடத்தில் கிடைக்காது. அதைச் சாத்தியப்படுத்தினதுதான் என் பயிற்சி வகுப்புகளின் வெற்றி ரகசியம். கணிதப் பட்டதாரியான நான், இந்தத் தொழிலுக்குத் தேவையான கம்ப்யூட்டர் அறிவை வளர்த்துக்கிட்டேன். தொழிலில் பிரச்னைகளையும் நெருக்கடிகளையும் சந்திச்சு சந்திச்சே, பட்டை தீட்டிக்கிட்டேன். தேவக்கோட்டையில் பிறந்து வளர்ந்து, சென்னையில் ஒரு வெற்றிகரமான தொழில் பெண்மணியா காலூன்றி இருக்கேன்'' என்கிற இந்திரலட்சுமி முத்தாய்ப்பாக சொன்னது... 

''ஆரம்பத்தில் ஒரு புடவைக்கு ஸ்டார்ச் செய்தால் எனக்குக் கிடைச்சது ஆறு இல்லனா ஏழு ரூபாய்தான். 'இதுக்காக உட்கார்ந்து இவ்வளவு உழைக்கணுமா?’னு பலரும் கேலி செஞ்சாங்க. அதுக்காக சோர்துவிடாமல், ஒவ்வொரு படியா நிதானமா ஏறினேன். எந்தத் தொழிலும் குறைந்தது இல்லை. அக்கறையும் உழைப்பைச் சேர்ந்தால், அது நம்மை உயரத்தில் நிறுத்தும்!''.