வட மாகாண முதலமைச்சர் சி.வி.விக்னேஸ்வரனின் கருத்துக்கள் சாத்தான்  வேதம் ஓதுவது போன்றது என நாடாளுமன்ற உறுப்பினரும் ஈழ மக்கள் ஜனநாயக கட்சியின் செயலாளர் நாயகமுமான டக்ளஸ் தேவானந்தா விமர்சித்துள்ளார்.      

வட மாகாண முதலமைச்சர் உட்பட வடமாகாண சபை நிர்வாகம் தமிழ் மக்களின் விடயங்களில் அக்கறையும், ஆற்றலும் அற்றவர்கள் என அவர்  குற்றம் சுமத்தியுள்ளார்.  

வவுனியா – தேக்கவத்தையில் அமைக்கப்பட்டிருந்த ஈழ மக்கள் ஜனநாயகக் கட்சி  அலுவலகம் நேற்று திறந்துவைக்கப்பட்டது.

இந்த நிகழ்வில் கலந்துகொண்டு உரையாற்றும் போதே நாடாளுமன்ற உறுப்பினரும் ஈழ மக்கள் ஜனநாயக கட்சியின் செயலாளர் நாயகமுமான டக்ளஸ் தேவானந்தா வடமாகாண முதலமைச்சர் சி.வி.விக்னேஸ்வரனை கடுமையாக விமர்சித்தார்.

வடக்கு, கிழக்கு தமிழ் மக்களின் நியாயமான கோரிக்கைகளை  நிறைவேற்ற வேண்டுமானால் அரசாங்கத்துடன் மோதிக்கொள்ளாமல்    அரசாங்கத்தை ஆதரித்து நடக்க வேண்டும் எனவும் வலியுறுத்தினார்.

யுத்தத்தினால்   பாதிக்கப்பட்ட தமிழ் மக்களுக்கு மீள்குடியேற்ற அமைச்சினால்  அமைத்துக் கொடுக்கப்படவிருந்த பொருத்து வீட்டுத்  திட்டத்திற்கு   எதிராக  வழக்குத் தாக்கல் செய்து, அரசியல் சுயலாபத்தை அடைய சிலர் முயற்சிப்பதாக  தமிழ்த் தேசிய கூட்டமைப்பை  நாடாளுமன்ற உறுப்பினர் டக்ளஸ் தேவானந்தா மறைமுகமாக சாடியுள்ளார்.