தமிழக கவர்னர் டில்லி வந்தது அதிகாரிகள் ரகசியம் காத்ததால் பரபரப்பு

தமிழக கவர்னர், டில்லியில் முகாமிட்டுள்ள நிலையில், அவர் வருகை குறித்து அதிகாரிகள் ரகசியம் காத்ததும், அவரது பயணத்திட்டம் குறித்தும், தமிழ் ஊடகங்களுக்கு ஒருவார்த்தை கூட சொல்ல யாரும் முன்வராததும், ஆச்சரியத்தை ஏற்படுத்தியுள்ளது.

தமிழக கவர்னர், பன்வாரிலால் புரோஹித், நேற்று முன்தினம் இரவு, டில்லி வந்தார். அவரது வருகை குறித்த, எந்த தகவலும், டில்லி ஊடகங்களுக்கு தெரியாது.
 

ஆலோசனை

தமிழ்நாடு இல்லத்தில், திடீரென காலையில், போலீஸ் பாதுகாப்பு அதிகரிக்கப்பட்டதை வைத்தே, கவர்னரின் வருகை குறித்த தகவல் வெளியில் கசிந்தது.

'டில்லிக்கு எதற்காக வந்தார்; பயணத்திட்டம் என்ன' என்பது குறித்த பரபரப்பு கிளம்பிய நேரத்தில், தமிழ்நாடு இல்லத்தில் இருந்து கிளம்பிய கவர்னர் மற்றும் அதிகாரிகள், 7 கி.மீ., தொலைவில் உள்ள ஆந்திரா பவனுக்கு சென்றனர். அங்கும், பலத்த பாதுகாப்பு ஏற்பாடுகள் செய்யப் பட்டிருந்தன.

விசாரித்தபோது, இன்னும் சில மாநிலங்களின் கவர்னர்கள், அங்கு வருவதும், அங்கு கவர்னர்களின் ஆலோசனைக் கூட்டம் நடப்பதும் தெரியவந்தது. ஆனாலும், தமிழக கவர்னரின் நிகழ்ச்சி நிரல் குறித்து, முழுவதுமாக எந்த தெளிவும் கிடைக்கவில்லை.

இதையடுத்து தமிழ்நாடு இல்ல வட்டாரங்களில் விசாரித்தபோதும் தகவல் பெறமுடியவில்லை. கவர்னரின் பயணம் குறித்து தெரிந்து கொள்ள, சென்னையில் உள்ள கவர்னர் மாளிகைக்கு தொடர்பு கொண்டபோது, 'கவர்னர் வருகை குறித்த தகவல்கள் வேண்டுமெனில், கூட்டத்தை நடத்தும், ஜனாதிபதி மாளிகையை தொடர்பு கொள்ளவும்' என, பதில் கிடைத்தது.

ஒரு மாநிலத்தின் உயர் பொறுப்பில் உள்ள கவர்னர், டில்லிக்கு வருகிறார். அவரது பயணத்திட்டம் குறித்து தமிழக அரசு, டில்லி தமிழ்நாடு இல்லம், கவர்னர் மாளிகை என மூன்று தரப்புமே தெரியாது என்கின்றன.
 

ரகசியம்

இந்த அதிர்ச்சியுடனேயே, ஆந்திர பவன் வட்டாரங்களில் விசாரித்த போது, 'பிரதமரின் துாய்மை இந்தியா திட்டத்திற்காக, தமிழகம், ஆந்திரா, தெலுங்கானா, ஹிமாச்சல் பிரதேசம், திரிபுரா, உ.பி., மாநிலங்களின் கவர்னர்களை உறுப்பினர்களாக கொண்ட, மத்திய அரசின் ஆலோசனைக் கூட்டம் இது' என, பதில் வந்தது.