ஆபரேஷன் நோவா - 24

 

தமிழ்மகன், ஓவியங்கள்: பாலா

 

ஒரு நகரமே நகர்ந்து வந்தது போல இருந்தது அந்த விண்கலம். அத்தனை பிரமாண்டம். வியந்து எழுந்த அகிலன், சில அடிகள் அதை நோக்கி நடந்தான். அவனுக்கு இரண்டு அடி இடைவெளிவிட்டு மற்றவரும் தொடர்ந்தனர்.

''நெருங்கிச் செல்ல வேண்டாம்... வந்தது யார் என்று பார்ப்போம்'' - ழீன் மட்டும் கடைசியாக வந்தாள்.

பல கோடி மைல் தூரம் பயணித்த களைப்பு போல, கலத்தின் அடிப்பாகத்தில் இருந்து  பெருமூச்சாக காற்று ஒன்று வெளிப்பட்டது. அதைத் தொடர்ந்து ஹைட்ராலிக் படிக்கட்டு ஒன்று வலிக்காமல் தரை இறங்கியது. இதற்காகத்தான் காத்திருந்தது போல அகிலன் கூர்ந்து பார்த்தபடி நின்றான்.

ழீன், ''அகிலன்... கொஞ்சம் மறைவாக நிற்கலாம்'' என்றாள். வந்திருப்பது மனிதனா, டெர்பியா என்ற அச்சம் அவளுக்கு. உடனடியாக கேத்ரின், ஹென்ரிச், அகி மூவரும் ஒரு மரத்தின் பின் பதுங்கிக்கொண்டனர். படபடப்பு அதிகமாக இருந்தது. 581 ஜி, நிலவு விண்கலத்துக்கு மறுபுறத்தில் இருந்ததால் இருட்டு அதிகமாக இருந்தது. மரத்தின் பின்னால் மறைந்து கொள்ளலாமா, அகிலனைப் பின்தொடரலாமா என்ற மைக்ரோ தயக்கத்தை உதறிவிட்டு, அகிலனைக் கட்டிப்பிடித்துக்கொண்டாள் வினோதினி.

அதே நேரத்தில் விண்கலத்தின் பல புள்ளிகளில் இருந்து ஒளிக்கற்றைகள் புறப்பட்டு, அந்த இடத்தை அலசின. அகிலனும் வினோதினியும் நின்ற இடத்தை வேகமாகக் கடந்துசென்ற ஒளிகள், திரும்பிவந்து அவர்கள் மீது நிலையாக நின்றன. வினோதினி இன்னும் அழுத்தமாக அகிலனை இறுக்கிக்கொண்டாள். இருவரும், வேட்டைக்காரர்களின் டார்ச் வெளிச்சத்தில் சிக்கிய முயல்கள் போல திகைத்து நின்றிருந்தனர்.

 

ழீன், ''ஓடிவந்து மறைந்துகொள்ளுங்கள்'' என்றாள் மறுபடி.

''இப்போது நாங்கள் வந்தால், நீங்களும் மாட்டிக்கொள்வீர்கள். அவர்கள் பார்த்து விட்டார்கள்'' - உதடு பிரிக்காமல் உச்சரித்தான் அகிலன்.

விண்கலத்தின் வயிற்றுப் பகுதியில் படிக்கட்டு இறக்கப்பட்ட இடத்தில் டச் ஸ்கிரீன் கதவு ஒன்று மென்மையாகத் திறந்தது. அதில் இருந்து இறங்கியவர்கள் மனிதர்கள். டெர்பி இல்லை. அப்பாடா!

அடுத்த சந்தேகம்... வந்திருக்கும் மனிதன் பகைவனா, நண்பனா?

எதிர் வெளிச்சத்தின் காரணமாக எல்லோரும் இருட்டு உருவங்களாகத் தெரிந்தனர். அச்ச அதிர்ச்சியோடு நின்றிருந்த இருவரையும் நோக்கி அவர்கள் வந்தனர்.

வினோதினிதான் முதலில் பரவசமானாள். ''ஏஞ்சலினா ஜோலீ'' என்றாள் சந்தோஷமாக. ஹாலிவுட் அதிசயம். அடுத்து அடையாளம் தெரிந்தவர் பிராட் பிட். கணவன்-மனைவி சமேதரராக வந்திருந்தனர்.

''ஹாய்'' என்றார் ஏஞ்சலினா.

சற்றுத் தயங்கியபடி பதிலுக்கு ''ஹாய்'' சொன்னாள் வினோதினி.

''உங்களைப் பார்த்த பின்புதான் புதிய கோளில் வசிக்க முடியும் என்ற தைரியம் வந்தது. நீங்கள் எப்போது வந்தீர்கள்?'' ஏஞ்சலினாவின் ஆங்கில உச்சரிப்பைப் புரிந்துகொள்ள மொழிக் கருவியைப் பொருத்த வேண்டியிருந்தது. ஏஞ்சலினா கேட்ட கேள்விக்குப் பதில் சொல்வதற்குள் வரிசையாக ஆச்சரியங்கள் தொடர்ந்தன. மைக்ரோசாஃப்ட் பில்கேட்ஸ், ஸ்டார் டி.வி. ராபர்ட் முர்டோக் என சர்வதேசப் பிரபலங்கள் லைன் கட்டினார்கள். 'இவர்கள் ஆறு ஆயிரம் கோடி பணம் கட்டி வந்தவர்கள்’ என, ஒவ்வொருவரின் உடலிலும்  எழுதி ஒட்டியிருந்தது.

''ஃப்ளைட்டில் பக்கத்து மாகாணத்துக்கு வந்து இறங்கியது மாதிரிதான் இருக்கிறது...

விஞ்ஞானம்'' என, கட்டைவிரலை உயர்த்திக் காட்டினார் பில்கேட்ஸ்.

ழீன், கேத்ரின், அகி, ஹென்ரிச் ஆகியோரும் மரம் விலகி வெளியே வந்தனர். வந்திருந்த புதியவர்கள், மறைந்திருந்து வெளியே வந்தவர்களைப் பார்த்து அந்நியமாக உணர்ந்தனர். மறைந்திருந்து தாக்க வருகிறார்களோ என்ற அச்சம். பரஸ்பர பயங்களோடு எதற்கும் இருக்கட்டும் என்ற ஒரு டிஃபென்ஸ் புன்னகையைப் பரிமாறிக்கொண்டனர்.

''இங்கே பிரச்னை எதுவும் இல்லையே?'' என்றார் முர்டோக்.

புதிதாக வந்த 100 பேருக்கும் உடனடியாக கேட்கவேண்டிய 100 கேள்விகள் இருந்தன. பூமியைப் பற்றி விசாரிக்க, அகிலன் தரப்பினரிடம் 1,000 கேள்விகள் இருந்தன. கோச்சடையான் ரிலீஸ் ஆகிடுச்சா?, விஸ்வரூபம்-2க்கும் கமல் வெளிநாட்டில் குடியேற வேண்டியிருக்குமா? என்ற சுவாரஸ்யக் கேள்விகள் வினோதியிடமும் இருந்தன.

பெரிய ஆச்சரியங்களும்  சின்ன விசாரிப்புகளுமாக, ஒருவகையில் பொது உடைமை ஏற்பட்டுவிட்ட திருப்தியில் உலகத்தின் முதல் 100 பணக்காரர்களும் சாதாரணமானவர்களும் அங்கே பேசிக்கொண்டிருந்தனர்.

அப்போது... அவர்கள் இருந்த வனாந்தரத்தில் சட்டென ஐந்து அடி உயர ஹாலோகிராம் திரை சிணுங்கியது. எல்லோரும் போப் ஆண்டவர் தேர்வு செய்யப்பட்டதைக் காட்டும் வெண் புகை சிக்னலைப் பார்ப்பதைப் போல ஒரே நேரத்தில் பார்த்தனர்.

அம்மா! கலையாத புன்னகையோடு, ''பூமியில் இருந்து வந்திருக்கும் விருந்தாளிகளுக்கு வணக்கம். நான் அம்மா. இந்தக் கிரகத்தின் நிர்வாகம் என்னிடம்தான் இருக்கிறது. ஹைட்ரோகாப்டர்கள் ரெடி. நீங்கள் உங்களுக்காக ஒதுக்கப்பட்ட இல்லங்களில் இறக்கிவிடப்படுவீர்கள். நாளை முதல் எப்படி இருக்க வேண்டும் என்பதை வண்டு உங்களுக்கு விளக்கும். ஆரம்பத்தில் இருந்தது போல கெடுபிடியான விதிகள் இப்போது இல்லை. என்ன அகிலன், நான் சொல்வது சரிதானே? ஒரே ஒரு விதி மட்டும் உண்டு. நடந்தால் நல்லது... நடக்காவிட்டால் மிகவும் நல்லது'' - விரல்களில் உதட்டை ஒத்தி எடுத்து முத்தம் பறக்கவிட்டார்.

அம்மாவின் பிரசங்கம் அவர்கள் எதிர்பாராதது.

பில்கேட்ஸ் சிலிர்த்தபடி, ''ஹூ இஸ் ஷி? பயோ மேக்னடிக் சென்ஸர்... லோ வோல்ட் ஷாக் வித் லோ அபின் கன்டென்ட்'' என்றார். அவர் இன்னும் காதுக் கருவியை மாட்டவில்லை.

''பூமியில் இருந்து கிளம்பும்போது அம்மா பற்றி எல்லாம் சொல்லவே இல்லையே'' - தன் டிரேட்மார்க் ஆவேசத்துடன் சொன்னார் ஏஞ்சலினா.

''இப்பத்தானே வந்திருக்கீங்க?'' என்றான் அகிலன்.

அம்மா சொன்னபடியே ஹைட்ரோகாப்டர்கள் வரிசையாக வந்து நின்றன. இப்போதைக்கு அம்மா சொன்னதுபோல செய்துவிடுவோம் என அவரவர் எண் பொறித்த ஹைட்ரோகாப்டர்களில் ஏறினர். சந்தேகக் கண்களோடும் பொய்ப் புன்னகையோடும் 'பார்க்கலாம்’ என்று வலது கை விரல்களால் காற்றில் டைப் அடித்துவிட்டு மறைந்தனர்.

எந்தப் பரீட்சார்த்தமும் ஏதோ ஒரு பாதிப்பை உண்டாக்கும். 'விஞ்ஞானத்தின் அடிப்படையே விளைவுகளை எதிர்கொள்வதுதான்’ என்று ஆல்பர்ட் ஐன்ஸ்டீனை அவருடைய நியூஜெர்சி இல்லத்தில் சந்தித்தபோது சொன்னது மைக்கேலுக்கு நினைவு வந்தது. அவர் மரணம் அடைவதற்கு ஆறு மாதங்களுக்கு முந்தைய சந்திப்பு அது. மைக்கேல் ஆய்வு மாணவராக இருந்தார். தங்கள் பேராசிரியர்களின் தயவால் அந்தச் சந்திப்பு நடந்து.

'விஞ்ஞானத்தின் அடிப்படையே விளைவுகளை எதிர்கொள்வதுதான்’ - யோசித்துதான் சொன்னாரா? எதிர்ப்பதுதான் என்று சொல்லியிருந்தால், இன்னும் பொருத்தமாக இருந்திருக்கும். உருவமற்ற மகளை எப்படி எதிர்கொள்வது? தலையை உடைத்து மூளையைக் கழற்றி செரிபரல் திரவத்தில் ஊறவைத்திருக்கிறான் கேப்ரியல். அவனுக்கு அதுதான்

விஞ்ஞான வளர்ச்சி - என்ற தொடர்ச்சியான அதிர்ச்சிகளால் அவரால் சரியாகச் சிந்திக்கவோ, சரியாக அழவோகூட முடியவில்லை.

'மனிதன் என்பவன், அவனுடைய அறிவு மட்டும்தான். அவனுடைய நிறம், உயரம், எடை, வடிவம்... எல்லாம் தற்காலிகம். 50, 60 ஆண்டுகளில் மாறிப்போவது. வழுக்கையோ, நரையோ, சுருக்கமோ, நடுக்கமோ முடிவுரை எழுதிவிடுகிறது. மூளை? அது அறிவாலும் அனுபவத்தாலும் நிரம்பிக்கிடக்கிறது. உடலுக்கு முடிவு வந்துவிட்டது என்பதற்காக மூளையையும் சேர்த்து மண்ணுக்குள் புதைத்துவிடுகிறோம்.

தஸ்தேயவஸ்கி, ரிச்சர்ட் ஃபெயின்மேன், மார்க்ஸ், பீத்தோவான்... யோசித்துப்பார்... எல்லோருடைய மூளைகளையுமே காப்பாற்றியிருக்க முடியும். கடன் தொல்லை, கார் லோன் எந்தத் தொல்லையும் இல்லை. சீட்டாடித் தோற்று விரக்தியில் வீழ்ந்து தஸ்தயேவ்ஸ்கி கதை எழுத வேண்டியது இல்லை. எவ்வளவு வேண்டுமானாலும் எழுதலாம், படிக்கலாம். ரோஸியின் உடம்பு இல்லை என்பதற்காக எதற்காக அழுகிறாய்?’ - இதுதான் மனிதத்தன்மை இல்லாமல் கேப்ரியல் பேசியதன் மொத்த சாரம்.

நீண்ட நீண்ட காரிடார்களைக் கடந்து, குழந்தை மார்க்கஸ் அரேலியஸ் வளர்க்கப்படும் இடத்தை வந்தடைந்த கேப்ரியலின் பின்னால், பிஸ்கட் வைத்திருக்கும் எஜமானரைப் பின்தொடரும் நாய்க்குட்டி போல தொடர்ந்துகொண்டிருந்தார் மைக்கேல்.

அந்த இடம் குழந்தைகளுக்கான விளையாட்டுப் பொருள்களால் நிரம்பியிருந்தது. ஆனால், எல்லாவற்றிலும் நவீனம் அதிகமாக இருந்தது. ஆன்டெனா வைத்த குட்டி ரிமோட் கன்ட்ரோல் ஏரோப்ளேன், உற்றுப் பார்த்தால் இயங்கும் விசிஃபௌக்ஸ் இயந்திர பொம்மைகள், ரோபோக்கள் என அந்த இடம் முழுக்க இறைந்திருந்தது.

ரோபோ பெண் ஒருத்தி, அவனுக்கு குவான்டம் தியரி நடத்திக்கொண்டிருந்தாள். 10 மாதக் குழந்தைக்கு 'ரெயின் ரெயின் கோ அவே...’வே அதிகம். குழந்தை, இருவரையும் பார்த்துச் சிரித்தது. பெற்றவர் சூடு அறியாத குழந்தை. டவுண்லோடு செய்யப்பட்ட ஆர்கானிக் சிஸ்டம்.

ரோபோ பெண்ணிடம் அந்தக் குழந்தையை அருகில் கொண்டுவரச் சொன்னார். கேப்ரியல் குழந்தையை எடை பார்க்கிற பாவனையில் வாங்கி சந்தோஷம் காட்டினார்.

''இந்தக் குழந்தையை எப்படி வளர்க்கப் போகிறேன் பார்'' என்று ஒற்றைக் கையில் தூக்கி உயர்த்திக் காண்பித்தார்.

மைக்கேல், அந்தக் குழந்தையைப் பரிதாபமாகப் பார்த்தார். ''இவனை மரணமற்றவனாக மாற்றப்போகிறேன். அமரனாக்கப்போகிறேன். கொஞ்சம் யோசித்துப் பார் மைக்கேல், நமக்குத் துணையாக யாராவது ஒருத்தராவது சாவே இல்லாமல் இருந்தால்தான் நல்லது. இதை எல்லாம் யார் கவனிப்பது? பொறுப்பு வேண்டும் இல்லையா? என்ன சொல்கிறாய் மார்க்கஸ்?''

மார்க்கஸ் சிரித்தான்!

- ஆபரேஷன் ஆன் தி வே...

https://www.vikatan.com

ஆபரேஷன் நோவா - 25

 

 

 

 

புவியியல் தட்பவெப்பச் சூழல்களை வைத்து அது ஓர் ஐரோப்பிய நாடாகத்தான் இருக்கும் என்பதைத் தாண்டி வேறு ஒன்றையும் ஊகிக்க முடியவில்லை. சார்லஸ், தன் இமைகளைத் திறக்க விரல்களின் உதவியை நாட வேண்டியிருந்தது. அப்போதுதான் இரண்டு கரங்களும் பின் பக்கமாகக் கட்டப்பட்டிருப்பது தெரிந்தது. வாயில் ஓர் அழுக்குக் கைக்குட்டையை வைத்து அடைத்திருந்தனர். கேட்டமைன் கைக்குட்டையால் மூக்கையும் வாயையும் பொத்தியது மட்டும்தான் அவருக்கு நினைவு இருந்தது.

அவர் ஒரு மோசமான காரில் கடத்தப்படுவதை உணர்ந்தார். சாலையும் மோசமாகத்தான் இருந்தது. மூடப்படாத சூட்கேஸின் மூடிபோல குலுக்கலின்போது அவருடைய கண்கள் தானாகத் திறந்து மூடின. சுற்றுலாப் பயணிகளைக் கவராத ஒரு மலைப் பாதை. காலாவதியாகிப்போன ஒரு புனல் மின்நிலையம் இந்தப் பகுதியில் இருக்கக்கூடும். சார்லஸின் உள்மனக் கணிப்பு அது. வாய் வழியாக மூச்சை இழுத்துவிட வேண்டும் என்று விரும்பினார். 'நான் கத்திக் கூப்பாடு போட மாட்டேன். வாயில் இருந்து துணியை அகற்றுங்கள்’ என வேண்டுகோள் வைக்க நினைத்தார். அதை நிறைவேற்றி வைக்கக்கூடியவர்கள் அவருக்கு இரண்டு பக்கமும் இருந்தனர். வலது பக்கம் ஒருவன். இடது பக்கம் ஒருத்தி. முகத்துக்கு மங்கி குல்லா மாட்டியிருந்தார்கள். யார், எங்கே அழைத்துச் செல்கிறார்கள், ஏன் என்பதையெல்லாம் ஒருவாறு அவரால் தீர்மானிக்க முடிந்தது.

'ஆபரேஷன் நோவா’ எதிர்ப்பாளர்கள்! கண்காணாத இடத்துக்கு அழைத்துச் செல்கிறார்கள், போட்டுத் தள்ளப்போகிறார்கள் என்ற விடைகள் சிரமம் இல்லாமல் தெரிந்தன. ஆனால், தவறான ஆளைக் கொல்லப்போகிறார்கள். உயிர் பயத்தைவிடக் கொடியது உடல் வலி. தேவை இல்லாத வதை; தேவை இல்லாத கொலை. அதுதான் அவரை எக்கச்சக்கமாக வருத்தியது.

கரடுமுரடான சாலையும் ஓர் இடத்தில் நின்றுபோயிருக்க வேண்டும்; காரும் நின்றது. அதை ஓட்டி வந்தவன், இறங்கி இடது பக்கக் கதவைத் திறந்தான். அந்தப் பெண் இடுப்பில் செருகியிருந்த துப்பாக்கியை எடுத்து சார்லஸைக் குறிவைத்து, அதைக்கொண்டே இறங்கச் சொல்லி சைகை காட்டினாள்.

கட்டப்பட்ட கைகளோடு இறங்குவதற்குச் சிரமப்பட்டார் சார்லஸ். வலது புறம் இருந்தவன் அவரை ஒரு மூட்டை போல வெளியே தள்ளினான். இந்த நால்வர் தவிர வேறு யாரும் அங்கே இல்லை. கார் கதவைத் திறந்த நொடியில் சில்லென்ற காற்றின் அவசரத் தழுவல்.

உண்மையில் சார்லஸால் காலை எடுத்து வைக்கவும் முடியவில்லை. அந்தப் பெண், துப்பாக்கியால் அவர் முதுகில் குத்தி நகர்த்திக்கொண்டு போனாள். அவருக்கு முன் மலையில் வசிப்பவருக்காகக் கட்டப்பட்டு, பராமரிப்பு இல்லாமல் இருந்தது அந்தத் தேவாலயம். தூசு, ஒட்டடை, சுவர் வெடிப்புகளில் வளர்ந்திருந்த செடிகள்... அனைத்தும், மனிதர்கள் அங்கு வந்து ஆறு மாதங்களாவது ஆகியிருக்கும் என்பதை உறுதி செய்தன.

சிலுவையில் அறையப்பட்ட கிறிஸ்துவுக்கு முன் இருந்த நீள நீளமான இருக்கைகள் தூசுபடிந்து கிடந்தன. சார்லஸ், அங்கே தனியே கிடந்த நாற்காலியில் யாருடைய அனுமதியும் இன்றி அவராகவே அமர்ந்தார். அந்தப் பெண், அவருடைய வாயில் இருந்து கர்ச்சீப்பை காற்று பிடுங்குவதுபோல உருவி எடுத்துவிட்டு, அவரை நாற்காலியோடு கட்டிப்போட்டாள்.

மற்ற இரண்டு பேரில் ஒருவன் அவரை நெருங்கி வந்து, நெருப்புப் பார்வை பார்த்தான். ''என்ன நடக்கிறது என்று நீயாகச் சொல்லிவிடு'' என்றான்.

அவர், ''தண்ணீர்'' என்றார் மொத்த சக்தியையும் திரட்டி.

நெருப்புப் பார்வையன், சம்மதம் போல மற்றவனைப் பார்த்துவிட்டு, முதுகுப் பக்கம் செருகி வைத்திருந்த பாட்டிலை எடுத்துக் கொடுத்தான்.

மிச்சம் வைக்காமல் குடித்தார். மூவரின் முறைப்பையும் நிதானமாகப் பார்த்துவிட்டு, ''நீங்கள் கேப்ரியலைத்தான் கேட்க வேண்டும்'' என்றார்.

''அவன் யார்?''

''விளக்கமாகச் சொல்ல வேண்டும். நீங்கள் கோபம் இல்லாமல் கேட்டால்தான் விளங்கும்'' என்றார் சார்லஸ் நிதானமாக.

''இந்தத் தெனாவட்டு எல்லாம் வேண்டாம். சிதறிவிடுவாய்'' - துப்பாக்கியால் நெற்றியில் அவள் அழுத்தினாள்.

உலகத்துக்கு ஏற்பட்டிருக்கும் ஆபத்தில் இருந்து மக்களைக் காப்பாற்ற விஞ்ஞானிகள் எடுத்த முயற்சியில், கேப்ரியல் இடையில் புகுந்து அராஜகம் செய்துகொண்டிருப்பதை அவர்களிடம் சொல்லி நம்பவைப்பதற்குப் பெரும்பாடு படவேண்டியிருந்தது.

''நீங்கள் என்னைக் கடத்தவில்லை. காப்பாற்றினீர்கள்'' என்றார். கிழவனை நம்புவதா, கொல்வதா? - ஓர் இளைஞன் யாரிடமோ செல்போனில் பேசிவிட்டு வந்தான்.

''ஒரு பில்லியன் டாலர் கொடுத்தால், அந்தக் கிரகத்துக்கு அனுப்பி வைப்பதாக டி.வி. பேட்டியில் சொன்னீர்களே... அது நீங்களும் கேப்ரியலும் சேர்ந்துபோட்ட திட்டம்தானே?''

''நீங்கள் துப்பாக்கி வைத்திருக்கிறீர்கள். அவன் பாம் வைத்திருந்தான். உயிருக்குப் பயந்து அப்படிச் சொன்னேன். நான் சொன்னால் விஞ்ஞானிகளும் மக்களும் நம்புவார்கள் என்பதால், என்னை அதற்குப் பயன்படுத்திக் கொண்டான். வேண்டும் என்றால் என்னை நீங்கள் கடத்திய இடத்தில் யாரையாவது பார்க்கச் சொல்லுங்கள். என் படுக்கையில் ஒரு பாம் பொருத்தப்பட்டிருக்கும். அவனுக்கு எதிராகத் திரும்பினால் எந்த நேரத்திலும் என்னைக் கொன்றுவிடுவான். நல்லவேளையாக என்னைக் காப்பாற்றினீர்கள். என்னைக் காப்பாற்றிக்கொள்வதில் எனக்கு ஓர் அக்கறையும் இல்லை. இந்த இரண்டு கோள்களையும் காப்பாற்ற வேண்டும். அதாவது, அதில் உள்ள மக்களை. அதற்காகத்தான் உயிரைப் பிடித்துக்கொண்டு இருக்கிறேன்.''

எதிர்பாராத ஏமாற்றம் போல இருந்தது இளைஞர்களுக்கு. ஓர் எதிரியைக் கையும் களவுமாகப் பிடித்துவிட்டோம் என்ற சந்தோஷம் கை நழுவியது.

''நான் உங்களுக்கு உதவ முடியும்.

விஞ்ஞானிகள் ஏற்படுத்திய உலக அமைதிக் குழுவினருக்கு, கேப்ரியலின் பேராசையை விளக்க வேண்டும். கேப்ரியலின் கையில் இருந்து விஞ்ஞானத்தைப் பிடுங்க வேண்டும்.''

''ராணுவ உதவி தேவைப்படுமா?''

சார்லஸ் சிரித்தார். ''கைப்பற்ற வேண்டியவை சில சங்கேதக் குறியீடுகளையும், அழுத்த வேண்டிய சில பட்டன்களையும். என்னை லண்டன் விஞ்ஞானக் கழகத்துக்கு அழைத்துச் செல்ல முடியுமா?''

இளைஞன் யாரிடமோ போனில் பேசிவிட்டு வந்து ''சரி'' என்றான்.

மீண்டும் காரில் ஏறினார்கள். ''ஏமாற்ற நினைத்தால் ஒரு விஞ்ஞானிகூட மிஞ்ச மாட்டீர்கள்'' என்றாள் அந்தப் பெண். துப்பாக்கி பிடித்த கையில் கட்டை விரலுக்கு அருகே அவளுக்கு ஒரு மச்சம் இருந்தது.

ஏஞ்சலினா ஜோலி தம்பதியருக்கு ஒதுக்கப்பட்டிருந்த இடத்தை, வீடு என்று சொல்ல முடியாது. உயரமான கண்ணாடிக் குடுவைபோல இருந்தது. எந்த இடத்திலும் படுக்கை அறை, சமையல் அறை என்ற சம்பிரதாயத் தடுப்புகள் இல்லை. விசாலமான ஒரே ஓர் அறை. குளிக்கும் தேவை எல்லாம் இப்போதுதான் கொஞ்ச நாள்களுக்கு முன்பு நடைமுறைப்படுத்தப்பட்டதாக கேப்ரியல் சொன்னார். அந்த வெட்டவெளி அறையிலேயே ஓர் இடத்தில் பாத்-டப் இருந்தது. தனித்தனி தடுப்பு தேவை இல்லைதான் என்று அவர்களாகவே சமாதானம் செய்துகொண்டனர்.ஆனால், அதில் டி.வி. இல்லை; சினிமா இல்லை; ஸ்போர்ட்ஸ் இல்லை. அதுதான் அவர்களுக்குப் பெரிய வெறுமையாக இருந்தது. ஃபேஸ்புக், ட்விட்டர், இன்டர்நெட்... சுத்தம்! குழந்தைகள் ஆறு பேரும், 'எப்பம்மா வீட்டுக்குப் போவோம்?னு’ இப்பவே ஆரம்பித்துவிட்டார்கள்.

உலகம் அழிந்துவிடப்போகிறது என்று அவசரப்பட்டு வந்துவிட்டோமோ என்று முதல் நாளே விரக்தி வாட்டியது. ஏதாவது பர்ச்சேஸ்... மார்க்கெட்... மால்... ம்ஹூம்! இங்கே யார் எதை விற்பார்கள், யார் எதை வாங்குவார்கள்?

'உங்களால் என்ன வேலை செய்ய முடியும்’ என்று கேப்ரியல் ஒரு நீண்ட பட்டியல் கொடுத்திருந்தார். அதில் டிக் செய்ய வேண்டும். அவரவருக்குப் பிடித்த வேலையைச் செய்யலாம் என்றபோது கவர்ச்சியாக இருந்தது. ஆனால், கேப்ரியல் கொடுத்த வேலைகளின் பட்டியலைப் பார்த்தபோது பிராட் பிட் நொந்துபோனார். பாலி வினைல் கன்ஸ்ட்ரக்ஷன், அக்ரோ, ஹைட்ரோ, ஜினோம், பயோமெக்கானிஸம்... இதில் எதை டிக் செய்வது என்றே தெரியவில்லை.

பூமியில் என்ன சொல்லி அழைத்து வந்தார்களோ... அது எதுவுமே இங்கே இருக்காது எனத் தோன்றியது. இங்கே நிறைய தங்கம் இருக்கும், வைரம் இருக்கும் என்றார்கள். அதை எல்லாம் வைத்து என்ன செய்வது என்பது தெரியவில்லை.

''திரும்பிப் போய்விடலாமா?'' என்று கேட்டார் பிராட் பிட். ஏஞ்சலினா ஜோலி பதில் சொல்லவில்லை. அப்படி ஒரு வாசல் இருப்பதாகவே அவருக்குத் தெரியவில்லை.

''இன்னும் பலர் வரட்டும். வந்தால் ஏதோ ஒரு சட்டத்துக்கு உட்பட்டு வாழ வேண்டியிருக்கும். வாழ்ந்துதான் பார்த்துவிடுவோம்'' என்றார். அதைத் தவிர வேறு வழியும் இருக்கவில்லை.

இரண்டு நிலவுகள் இருந்தும் ரசிக்க முடியவில்லை. பால்கனி போல இருந்த பகுதியில் நின்றபடி, இருட்டு போர்த்தியிருந்த அந்தக் கோளைப் பார்த்தார் ஜோலி. அங்கிருந்து கொஞ்ச தூரத்தில் இன்னொரு கண்ணாடி மாளிகை இருந்தது. அது பிரமாண்டமானது. ஆட்கள் இருக்கிறார்களா என்று தெரியவில்லை. அமானுஷ்யமான அமைதி. இங்கே யாரை நம்புவது எனத் தெரியவில்லை.

உலகம் என்பது ஒரு நம்பிக்கை. தினமும் பொழுது விடியும்; காபி குடிப்போம்; மேக்கப் போடுவோம்; படம் ரிலீஸ் ஆகும்; ரசிகர்கள் மொய்ப்பார்கள். அது எதுவுமே இங்கே நடக்காது; நம்பியது எதுவுமே நடக்காது; விரும்பியது எதுவுமே கிடைக்காது; மிச்ச வாழ்க்கையை இப்படியே ஓட்டிவிட முடியுமா? உயிருக்குப் பயந்து ஓடி வந்தோமே... உயிரா முக்கியம்? எப்படி வாழ்ந்து வந்தோமோ அப்படி இனி வாழவே முடியாது என்பதைவிட தொடர்ந்து இருப்பது முக்கியமா?

ஏஞ்சலினாவுக்கு புத்தர், கிறிஸ்து, நபிகள் எல்லாரும் சுருக்கமாக நினைவுக்கு வந்துவிட்டுப் போனார்கள். ஒரு வெறுமை... வெற்றிடம், உள்ளே புகுந்து வாட்டியது. பிராட்  பிட் அவள் தோள் மீது கை வைத்து வளைத்துப் பாந்தமாக அணைத்தார். இருவரும் எதுவும் பேசிக்கொள்ளவில்லை.

அவள் பார்த்துக்கொண்டிருந்த பிரமாண்ட கண்ணாடி மாளிகையின் மேல் இருந்து ஓர் உருவம் கயிற்றில் இறங்குவது தெரிந்தது. ''கிட்டி... அங்கே பாருங்கள்'' என்றார். பிராட்  பிட்டின் செல்லப் பெயர் அது.

யாரோ கட்டடத்தின் மீது இருந்து இறங்குகிறார்கள். ஆணா, பெண்ணா... என்பதுகூடத் தெரியவில்லை.

''என்னவோ நடக்குது'' என்றார்

ஏஞ்சலினா.

பிராட் பிட், ''வாழ்வதற்கான ஏதோ ஒரு சுவாரஸ்யம் காத்திருக்கிறது'' என்றார்.

- ஆபரேஷன் ஆன் தி வே...

https://www.vikatan.com

Edited June 21, 20187 yr by நவீனன்

ஆபரேஷன் நோவா - 26

 

 

அகிலனும் வினோதினியும் சொர்க்கத்துக்கு வந்தவர்கள் போல சந்தோஷமாக இருந்தனர். அந்த விசாலமான அறையில் வேலை நேரம் போகத் திகட்டத் திகட்ட காதல் செய்தனர்.

''நீதான் இங்கே முன்னாள் புரட்சிக்காரனா?'' - தன் மடியில் படுத்திருந்த அகிலனின் நெற்றி முடியைத் தன் விரல்களால் சுழற்றிவிட்டபடி கேட்டாள்.

''உனக்கு யார் சொன்னாங்க வினோ?''

''இந்த உலகமே சொல்லுதே... டாக்டர் மைக்கேல்கூட, 'உன்னிடம் பேச விரும்பவில்லை. நீ ஒரு அவசரக்காரன்’னு சொன்னாரே...''

''ஓ... அதுவா! அப்புறம் என் கோபம் எல்லாம் நியாயம்தான்னு அவரே சொன்னாரே...''

''இப்ப, புரட்சி எல்லாம் என்னாச்சு?''

''அப்படியேதான் இருக்கு. நடுவுல இப்பத்தான் கொஞ்ச நாளா இந்தக் காதல்'' - அகிலன், அவள் விரல்களைச் சொடுக்கிவிட்டான்.

''புரட்சிக் காதலா?''

''மார்க்ஸ் - ஜென்னி, லெனின் - க்ரூப்ஸ்கயா, சே குவேரா - அலெய்டா... மாதிரினு வெச்சுக்கோயேன்.''

''எதுக்குப்பா பெரிய மனுஷங்க பேரை எல்லாம் டேமேஜ் பண்றே?''

''புரட்சியாளர் என்றால் வெளிநாட்டில்தான் இருப்பார்களா? உங்கள் பிரபாகரன் - மதிவதனி நினைவுக்கு வரவில்லையா?'' - ழீன் கதவு இல்லாத அந்த அறைக்குள் சிரித்தபடி நுழைந்தாள்.

அகிலன், வினோதினியின் மடியில் இருந்து பதறி எழுந்து, பழக்கதோஷத்தில் வெட்கப்பட்டான். வினோதினியும் மரியாதை நிமித்தமாக எழுந்து, காது கருவியைப் பொருத்திக்காண்டாள்.

''வெட்கம் எல்லாம் தமிழில் கொஞ்சம் அதிகம்தான்!''

''உங்களிடம் கேட்க வேண்டும் என்று இருந்தேன். உங்களுக்குத் தமிழ் மீது எப்படி ஆர்வம் வந்தது? இதற்கு முன்னர் ஆதிச்சநல்லூர் பற்றிச் சொன்னீர்களே..!'' என்று கேட்டான் அகிலன்.

''என்னுடைய ஆராய்ச்சியே அதுதானே! 2,300 வருடங்களுக்கு முன் ரோமானியர்களின் செனட்டில் ஒரு விவாதம். 'டமெரிகாவின் மொள்குக்கும் பர்த்திக்கும் நாம் அடிமையாகிவிட்டோம்; நம்முடைய தங்கத்தை அவர்கள் காலடியில் கொண்டுபோய்க் கொட்டுகிறோம். இது நல்லதுக்கு அல்ல’ என்று அந்த விவாதம், வரலாற்றில் பதிவாகியுள்ளது. அது அரிஸ்டாட்டில் காலகட்டம். அதில் இருந்துதான் தமிழ் மீது ஈடுபாடு வந்தது.''

வினோதினி புருவம் சுருக்கிப் பார்த்தாள். ''எனக்கும் புரியவில்லை'' என்றான் அகிலன்.

''டமெரிகா என்பது தமிழகம்... புரியவில்லையா..? மொள்கு என்பது மிளகு; பர்த்தி என்பது பருத்தி.''

''எனக்குத் தெரிந்து உலகிலேயே தமிழ்தான் முதலில் தோன்றியிருக்க வேண்டும். ஐரோப்பிய மொழிகள் எல்லாம் ஆயிரம் வருட சரித்திரத்தைத் தாண்டவில்லை. உலக அளவில் கிரேக்கம், சீனம் என்று 4,000 வருட சரித்திரம்தான் இருக்கிறது. தமிழில்தான் 10 ஆயிரம், 20 ஆயிரம் வருட ஆதிச்சநல்லூர் ஆவணங்கள் இருக்கின்றன.

50 ஆயிரம் வருடங்களுக்கு முன் கோண்டுவானாவில் இருந்து பிரிந்துபோன ஆஸ்திரேலியாவில் இருக்கும் பழங்குடிகளின் மொழியில் தமிழ் இருக்கிறது'' - ழீன் பேசப் பேச, ஒருவித பூமிப் பாசம் அகிலனைப் பிடித்து ஆட்டியது. '193 டிரில்லியன் கி.மீ. தூரத்தில் தமிழ்ப் பற்றா?’ என்ற பரவசம்.

''பல முறை கடலால் அழிக்கப்பட்ட சமூகம் அது. இப்போதுள்ள குஜராத்தின் காம்பே துறைமுகம், தமிழ் பிராமி இலக்கியத்தில் கொம்பைத் துறைமுகம் என்று சொல்லப்பட்டுள்ளது. அந்தத் துறைமுகத்தில் தமிழ் பிராமி எழுத்துப் பொறிக்கப்பட்ட கல் நங்கூரம் கிடைத்திருக்கிறது. பாகிஸ்தானில் பேசப்படும் பிராக்யூ மொழியில் நூற்றுக்கணக்கான தமிழ் வார்த்தைகள் இருக்கின்றன. சிந்து சமவெளியில் கிடைத்த சித்திர எழுத்துகள், வாழ்க்கைத் தடயங்கள் எல்லாமே தமிழகக் கல்வெட்டுகளில் இயைந்து போகின்றன. இந்தியாவின் மேற்குக் கரை முழுக்கத் தமிழ்த் தொல்குடிகள் இருந்தனர். கிழக்குக் கடற்கரையில் ஒடிசா வரை... கடாரம் கொண்டான் தெரியும் இல்லையா? அசோகரின் கல்வெட்டுகளில் தமிழ் மன்னர்கள் அவருக்கு உதவியதாகச் சொல்லியிருக்கிறார்.''

''இனிமேல் அதை எல்லாம் பேசி என்ன ஆகப்போகிறது?'' என்றாள் வினோதினி.

''ஆகும்...'' - ழீன் ஏதோ சொல்ல ஆரம்பித்தபோது, ஆலீஸ் அங்கே பதற்றமாக ஓடி வந்தாள்.

''டாக்டர் மைக்கேல்... மைக்கேல்...'' என்றாள். அதற்கு மேல் அவளால் பேச முடியவில்லை. சைகையாலேயே தன் பின்னாடி வரச் சொல்லிவிட்டு, வந்த திசையிலேயே ஓடினாள்.

அவர்கள் குடியிருப்பின் வாசலில் மைக்கேல் கிடந்தார்.

''கேப்ரியல்தான் கொண்டுவந்து போட்டார்'' என்றாள்.

''கேப்ரியலா?''

''ஆமாம். 'எவ்வளவு சொன்னாலும் கேட்காமல் தப்பித்துப்போகப் பார்த்தான். இந்த ஆளை வைத்துக்கொண்டு ஒரு புண்ணியமும் இல்லை’ என்று திட்டிவிட்டு ஹைட்ரோகாப்டரில் பறந்துவிட்டார்'' என்ற தகவலையும் சொன்னாள் ஆலீஸ்.

நால்வரும் மைக்கேலை உள்ளே தூக்கிவந்து ஆலீஸின் படுக்கையில் கிடத்தினர்.

மைக்கேல், சுற்றி நிற்பவர்களை இறைஞ்சலாகப் பார்த்தார். ''என் மகள் ரோஸியை, கேப்ரியல் கொன்றுவிட்டான்'' என்றார் திணறலோடு.

''அம்மாவையா?'' என்று எல்லோரும் கேட்பதற்குள் அவர் மீண்டும் மயங்கிவிட்டார்!

''நீங்கள் சொன்னபடி நடந்துகொள்ளவில்லை''  - வடிகட்டிய கோபத்துடன் சொன்னார் பில்கேட்ஸ்.

அவருடைய சுபாவத்துக்கு இது ரொம்பவும் அதிகம். மத்தியக் கேந்திரத்தின் நான்காவது மாடியில் ஆக்சிஜன் முடுக்கம்பெற்ற சுத்தமான அறையில் இரண்டு பேர் மட்டும் இருந்தனர். இன்னொருவர் கேப்ரியல்.

'என்ன சொன்னேன்... எப்படி நடந்துகொள்ளவில்லை..?’ என்று பார்வையிலேயே விசாரித்தார் கேப்ரியல். சாதாரண பில்கேட்ஸுக்கு எல்லாம் பதில் சொல்ல வேண்டிய அவசியம் இல்லை என்பது போல இருந்தது அந்த நடவடிக்கை. 'அழைத்து வரும்போது சாக்லேட் கலந்து பேசியவர் இவர்தானா..? நாம்தான் ஆள் தெரியாமல் பேசுகிறோமா..?’ என்று அதிர்ச்சியாக இருந்தது பில்கேட்ஸுக்கு.

''ஒன்று சொல்கிறேன் பில். இது யூஸர் ஃப்ரெண்ட்லி உலகம். கோபப்படவேண்டியதே இல்லை. நீங்கள் நினைத்தால், உங்களுக்குத் தேவையானபடி இந்த உலகத்தை வடிவமைக்கலாம். முர்டோக் வந்திருக்கிறார்; ஏஞ்சலினா வந்திருக்கிறார்; மக்களை எப்படி வேண்டுமானாலும் ஊறுகாய் போடுங்கள்... ஆனால், அவர்கள் வீணாகாமல் பார்த்துக்கொள்ளுங்கள்'' என்றார்.

''ஊறுகாய் என்று சொல்லாதீர்கள்.  பொழுதுபோக்குவது...''

''எனக்குப் பொழுதே இல்லை. அப்புறம் எப்படி அதைப் போக்குவது?''

பில்கேட்ஸ், தன் முன் இருக்கும் மனித இயந்திரத்தை வினோதமாகப் பார்த்தார்.

''சினிமா பார்க்கட்டும்; சாட் பண்ணட்டும்; மந்தை மந்தையாகப் போய் சாமி கும்பிட்டு அழியட்டும். எனக்கு மக்கள் வேண்டும். அப்போதுதான் நான் அவர்களை ஆள முடியும்.''

''உங்கள் கெடுபிடியெல்லாம் உங்களுக்கு எதிராகத் திரும்பும். ஹிட்லர், முசோலினி என்று மக்கள் நிறையப் பார்த்துவிட்டார்கள்.''- நிதானமாகச் சொன்னார் பில்கேட்ஸ்.

கேப்ரியல் அதை ரசித்தார்; சிரித்தார். ''அவர்கள் நாடு பிடித்தார்கள்; நான் உலகம் பிடிப்பவன். என்ன செய்வது பில்... இந்த ஜனங்களைத் திருத்தவே முடியவில்லை. 300 வயசு வரைக்கும் வாழச் சொன்னால் வலிக்கிறது இவர்களுக்கு.

20 வயதிலேயே சர்க்கரை நோய் வந்து டாக்டருக்கு அழுகிறார்கள். நான் நோயை அகற்றிவிட்டேன். உழைப்புக்கு ஏற்ற உணவு செலுத்துகிறேன்; வேலை தருகிறேன்; அவனவனுக்குப் பிடித்த பெண்ணோடு ஆனந்தமாக இருக்கச் சொல்கிறேன். ஒருத்தனும் சரிப்பட்டு வரவில்லை. இவர்களுக்கு ஏதோ குறைகிறது. அதனால்தான் உங்களுக்குத் தொல்லை கொடுக்கிறேன்'' - கேப்ரியல், பணிகிறாரா... மிரட்டுகிறாரா என்பது பில்கேட்ஸின் பகுத்தறிவுக்கு அப்பாற்பட்டதாக இருந்தது. பில்கேட்ஸ் பயந்துதான் போனார். அவசர உதவியாக போலீஸையும் நாட முடியாது.

''உங்கள் திட்டம் என்ன என்பதை என்னிடம் முழுதாகச் சொல்லுங்கள். என்ன பண்ண முடியும் என்று சேர்ந்து யோசிக்கலாம். எல்லாவற்றையும் விஞ்ஞானத்தின் மூலமாகச் சாதித்துவிட முடியாது. பலர் இதயத்தால்தான் தீர்மானிக்கிறார்கள்.''

''என்ன பைத்தியக்காரத்தனம்? இதயம் என்பது, ரத்தத்தை பம்ப் செய்யும் உறுப்பு. அதில் எப்படித் தீர்மானிக்க முடியும்?''

''அது பைத்தியக்காரத்தனம் அல்ல. அவர்கள் உங்களைப் போன்றவர்களைப் பைத்தியங்கள் என்பார்கள்.''

இப்போது யார் பைத்தியம் என்பது அவ்வளவு முக்கியம் இல்லை என்று கேப்ரியல் நினைத்தார். தாம் இரண்டு உலகங்களுக்கும் அதிபதியாக இருக்க விரும்புவதைச் சொன்னார். இரண்டிலும் மக்கள் வாழ்வதற்கு விரும்ப வேண்டும்.

''உங்கள் டீமில் யாரை எல்லாம் இங்கே அழைத்து வர வேண்டும் என்று பட்டியல் கொடுங்கள்; எல்லோரையும் இன்டர்நெட்டால் இணையுங்கள்; ஃபேஸ்புக், ட்விட்டர், வெர்ச்சுவல் ரியாலிட்டி விளையாட்டுகள் என்று எல்லாக் கும்மாளங்களையும் இறக்குமதி செய்யுங்கள். எவ்வளவு சீக்கிரம் முடியுமோ அவ்வளவு சீக்கிரம். சேட்டிலைட் தயாராக இருக்கிறது. 4 ஜி-யில் இருந்தே தொடங்குங்கள். மக்களுக்கு சாப்பாட்டைவிட செக்ஸைவிட இது தேவையாக இருக்கிறது'' என்றார்.

பில்கேட்ஸ் யோசித்தார். புதிய உலகில் இப்படி ஒரு சவாலா? ''நான் பட்டியல் தருகிறேன். நான் சொல்கிற நபர்கள், உபகரணங்கள்... எல்லாம் வந்து சேர்ந்தால்தான் வேலையை ஆரம்பிக்க முடியும்'' என்றார்.

பாக்கெட்டில் இருந்து சின்ன நோட் பேடை எடுத்து நீட்டினார் கேப்ரியல். மறந்துவிட்ட மளிகை சாமான்களை ஒவ்வொன்றாக ஓடிப் போய் வாங்கிவருவது மாதிரி இயலாது. மிகத் தீவிரமாக எல்லாவற்றையும் பட்டியலிட்டார்.

கேப்ரியல், அந்தப் பட்டியலைப் பார்த்தார். நீளமாக இருந்தது.

இதே போல் ஏஞ்சலினா அவரிடம் ஒரு பட்டியல் கொடுத்திருந்தார். அதில் ஜேம்ஸ் கேமரூன் முதல் டாம் க்ரூஸ் வரை இருந்தார்கள். இதையெல்லாம் முன்னரே செய்து முடித்திருக்கலாம். வந்தோமா, ஆண்டோமா என்று இல்லாமல் இப்போதுதான் முதல் ஐந்தாண்டுத் திட்டம் போலத் திட்டமிட வேண்டியிருப்பதால் சின்ன எரிச்சல் ஏற்பட்டது, கேப்ரியலுக்கு. மரணமற்ற நமக்கு என்ன அவசரம்? நிதானமாக ஆண்டு அனுபவிக்க வேண்டியதுதானே என்றும் இருந்தது.

ஆனால், அந்த நிதானத்திலும் ஓர் அசுரத்தனம் இருந்தது. வேகமாகக் குடியிருப்புகள் எழுந்தன. ஹைட்ரோகாப்டர் தொழிற்சாலை, சிந்தட்டிக் அக்ரோ, சுரங்கப் பணிகள்... சாலைகளால் நகரங்களை இணைக்கும் முறைக்கு மட்டும் முற்றுப்புள்ளி வைத்திருந்தார். எல்லா இடங்களுக்கும் ஹைட்ரோகாப்டர்கள்தான். மேம்பாலங்கள், சாலைகள் என்று எதுவுமே அங்கு இல்லை. ஒரு கோடிப் பேர் வந்தாலும் பெட்டிப் படுக்கையை வைத்துவிட்டு அன்றில் இருந்தே வாழ ஆரம்பிக்கலாம். அவ்வளவு ஏற்பாடுகள் நடந்து முடிந்திருந்தன.

இந்தப் பரபரப்பில் பில்கேட்ஸ் கொடுத்த பட்டியலில் இருந்த ஒரு சங்கேதக் குறிப்பை கேப்ரியல் கவனிக்கவில்லை!

- ஆபரேஷன் ஆன் தி வே...

https://www.vikatan.com/

Edited June 24, 20187 yr by நவீனன்

ஆபரேஷன் நோவா - 27

 

தமிழ்மகன், ஓவியங்கள்: பாலா

 

குற்றுக் கருவேல மரங்களும், காய்ந்த புற்களும் செறிந்துகிடந்த அந்தச் சமவெளிக் காட்டின் காலை அமைதியை, வலிக்காமல் வருடிக்கொண்டிருந்தது காற்று. சிங்கம், முள்ளம்பன்றி, சிறுத்தை போன்ற முரட்டு விலங்குகள் வேட்டைக்குப் பின்பான ஓய்வில் இருந்தன. புள்ளினங்கள் சிறகடிக்க, இன்னும் ஒரு மணி நேரமாவது ஆகும். மான்கள், படுத்தபடி வாய் அருகே இருந்த வசதியான புற்களை வெறுப்பாகக் கொறித்தன. காட்டின் கடிகாரமே மெதுவாக ஓடியது.

இயற்கையின் ஏழு உலக அதிசயங்களில் ஒன்றாகக் கருதப்படும் செரங்கட்டி வலசைப் பகுதி அது. ஆப்பிரிக்காவின் 15 ஆயிரம் சதுர கிலோமீட்டர் காட்டுவளம். தான்சானியாவில் இருந்து கென்யா வரை பரவிய பச்சைத் திட்டு.

பெண் சிங்கம் ஒன்று, தன் குட்டிகளுக்குப் பால் கொடுத்துக்கொண்டிருந்தது. பக்கத்தில் இன்னும் சில பெண் சிங்கங்கள். சற்று தூரத்தில் பிடறியை அடிக்கொரு தரம் உலுக்கியபடி, சினிமாவில் வரும் தசரத மகாராஜா மாதிரி இருந்தது கணவன் சிங்கம். தங்களின் அனகோண்டா கழுத்துகளால் பிணைந்தபடி இருந்தன சிவிங்கிகள். பைஜாமா போட்ட வரிக்குதிரைகள் தியானம் போல நின்றிருந்தன.

யானைகள், கழுதைப் புலிகள், வரையாடுகள்... என, சுமார் 70 வகையான பாலூட்டிகள் நீருக்காகவும் உணவுக்காகவும் காட்டின் ஒரு முனையில் இருந்து மறுமுனைக்கு மந்தை மந்தையாக இடம்பெயரும் இயற்கையின் விதி. 800 கிலோமீட்டர் உணவுத் தேடல். விலங்குகள், பறவைகள் எல்லாமே இயற்கையாக இருந்தன. அங்கே உயரமான ஓர் இடத்தில் மறைவாக நின்றிருந்த ஜீப்பைத் தவிர!

காட்டில் பயணிப்பதற்கான அந்தப் பிரத்யேக ஜீப்பில் கென்யாவைச் சேர்ந்த அபாஸியுடன் மூன்று கென்யர்கள் இருந்தனர். அந்தக் கண்டத்துக்குச் சம்பந்தமே இல்லாத வெளிறிய நிறத்தில் ஒருவன் மட்டும் இருந்தான்.

''பிரைவேட் ஜூ?'' - அபாஸிக்கு ஆச்சரியமாக இருந்தது.

வெள்ளைக்காரனுக்கு விவரிக்கும் நோக்கமே இல்லை. ''சிங்கம் பத்து, யானை பத்து, சிவிங்கி பத்து... எனத் தலைக்குப் பத்து வேண்டும். சிட்னி எல்லாவற்றையும் தெளிவாகச் சொல்லியிருப்பாரே. அப்புறம் பறவைகள்... எத்தனை தினுசு இருக்கின்றனவோ அத்தனையும்...''

''அதிலும் பத்து பத்தா..! எப்படி எடுத்துச் செல்வீர்கள்?''

''அதற்குத் தனி வாகனம் இருக்கிறது.''

அபாஸிக்கு, வழக்கமாக ஏதோ காண்டாமிருகத் தோலோ, முதலைத் தோலோ கேட்டு ஆர்டர் வரும். சில வேட்டைப் பைத்தியங்கள் சிங்கத்தைச் சுட வேண்டும் என்று வெறியோடு வரும். இரவில் கிழச் சிங்கமாகக் காட்டி சுடுவதற்கு ஆவன செய்வான். அரசாங்கமே வயதான சிங்கங்களைச் சுடுவதற்கு அனுமதித்திருக்கிறது. இப்போது வந்திருப்பவன் எல்லாவற்றிலும் பத்துப் பத்து கேட்கிறான்; அதுவும் உயிரோடு. சுளையாக 100 மில்லியன் டாலர்களை மூன்று சூட்கேஸ்களில் போன வாரமே கொண்டுவந்து இறக்கிவிட்டான். அத்தனையும் சலவை சுத்தமானவை!

'வேறு யாருக்கும் தெரிய வேண்டாம்!’ என்று சொல்லியிருந்தான். அபாஸியுடன் வந்த கென்யர்கள் சாயம் போகாத காட்டுவாசிகள். மோப்பம் பிடித்தே அடுத்த ஒரு கிலோமீட்டர் தூரத்தில் வருவது சிங்கமா, நெருப்புக்கோழியா என்று கண்டுபிடித்துவிடுவார்கள்.

''ஆரம்பிக்கலாமா?'' என்றான் வெள்ளையன்.

அபாஸி, கட்டை விரலை உயர்த்தினான்.

பேட்டரி சக்தியில் அந்த ஜீப் சத்தம் இல்லாமல் புறப்பட்டது. விலங்குகளுக்கு, சத்தத்தை மீறி வேறு ஏதோ உள்ளுணர்வு எச்சரித்திருக்க வேண்டும். மிரண்டுபோய் தலையை உயர்த்திப் பார்த்தன. வெள்ளையனின் கையில் இருந்த துப்பாக்கியில் இருந்து மயக்க ஊசி குண்டுகள் சீறின. சிங்கங்கள், வரிகுதிரைகள், மான்கள் எல்லாம் நான்கு கால் பாய்ச்சலில் அங்கிருந்து சிதறின.

''முதலில் சிங்கம்'' - வெள்ளைக் காரன் ஆணையிட்டான். ஜீப், சிங்கங்களைக் குறிவைத்துப் பாய்ந்தது. ஜீப்பில் இருந்து மயக்க குண்டுகள் தாக்கி விலங்குகள் பல வரிசையாக மண்ணில் சாய்ந்தன.

நடந்த விஷயங்களை, மைக்கேல் ஒன்றுவிடாமல் சொன்னார்.

அகிலன், அதிர்ச்சியில் உறைந்துபோய் இருந்தான். ரோஸி என்பவள் இருக்கிறாள்; ஆனால் இல்லை. அவள் பேசுகிறாள்; சிந்திக்கிறாள்; கேட்கிறாள்; ஆனால், உருவம் இல்லை. நடமாட முடியாது!

கேத்ரின்தான் அங்கு என்ன நடக்கிறது என்பதை ஓரளவுக்கு ஊகித்துச் சொன்னாள். 'செரிபுரோ ஸ்பைனல் ஃப்ளுயட்’ என்பது மூளையைச் சுற்றியுள்ள திரவம். சுருக்கமாக சி.எஸ்.எஃப். அந்தத் திரவத்தில் ரோஸியின் மூளையை மிதக்கவிட்டிருக்கிறார்கள். மூளையில் ஆக்ஸான், நியூரான்களுடன் சென்சர் முறையில் இணைப்புக் கொடுத்திருக்கிறார்கள். ராபின் குக் நாவல் போல லட்சம் சூப்பர் கம்ப்யூட்டர்களின் திறனை ஒரு மூளையில் அடைக்கலாம். அதற்கு உடம்பு இல்லாமல் இருந்தால்தான் வசதி. செக்ஸ், அழகு, ஆடை, குடும்பம், அரசியல், சினிமா போன்ற குப்பைகளை அகற்றிவிட்டாலே மூளையில் நிறைய இடம் கிடைக்கும். புதிய புரோகிராம்... புதிய திறமை... புதிய லாஜிக்!

மகள் என்ற பெயரில் ஒரு மூளையைக் காட்டினால், பெற்றவன் மனம் என்ன பாடுபடும்.

மைக்கேல், நிலைகொள்ளாமல் துடித்தார். கேத்ரினும் ஆலீஸும் அவரைக் கைத்தாங்கலாக வெளியே அழைத்து வந்தனர். க்ரீனிகள் நிறைந்த பகுதியில் அவரைப் புத்துணர்வுக்காக அமரவைத்தனர். அவருக்கு ஆத்திரம் தாளவில்லை. கேப்ரியலைக் கொல்வதா? இந்த சிஸ்டத்தைக் கொல்வதா?

அகிலன், அவரைத் தேற்றும்விதமாக, ''கேப்ரியலின் நோக்கம்தான் என்ன?'' என்று கேட்டான்.

''இரண்டு உலகங்களையும் அவனுடைய கட்டுப்பாட்டில் வைத்துக்கொள்ள நினைக்கிறான். உலகை விஞ்ஞானபூர்வமாக மாற்றுவதுதான் அவனுடைய நோக்கமாக இருந்தது. இப்போது அதிகாரத்தை ருசிப்பவனாக மாறிவிட்டான். இது ஆபத்தானது!''

இயற்கையோடு இணைந்த விஞ்ஞானம்தான் ஜெயிக்கும். உயிர்ப்பொருளும் வேதிப்பொருளும் கைகோக்க வேண்டும். ரோஸியின் மூளையின் புரோகிராமை மாற்ற முடிந்தால்..?

கேப்ரியல் இல்லாத இந்த நேரத்தில், மத்திய கேந்திரத்தில் நுழைந்து பார்த்தால் என்ன என்பதுதான் அகிலனின் எண்ணம்.

ழீனும் கேத்ரினும், ''அது அவ்வளவு எளிதான விஷயம் அல்ல'' என்றனர்.

அகிலனுக்கு அதுவே சவாலாக இருந்தது. எல்லாப் பூட்டுகளுக்கும் ஒரு கள்ளச் சாவி தயாராக இருக்கிறது. எல்லா சாஃப்ட்வேர்களுக்கும் ஒரு பைரேட்டட் வெர்ஷன் இருக்கிறது. சொர்க்கத்துக்குச் சவால்தான் திரிசங்கு சொர்க்கம். அகிலனுக்கு ஆவேசம் பெருகிக்கொண்டிருந்தது. எப்படியாவது ஒரு வழி கண்டுபிடிக்க வேண்டும்.

பரந்து விரிந்திருந்த அந்தத் தோட்டத்தில் காற்றின் சலனம் மட்டும் இருந்தது. எல்லோரும் மௌனமாக இருந்தனர். வினோதினி அங்கிருந்த தக்காளித் தோட்டத்தில் இருந்து ஒரு செடியை வேரோடு பிடுங்கி வந்தாள். செடியில் பூக்கள் காய்க்காமலேயே கருகிப்போவதைக் காட்டினாள்.

''ஏன் இப்படி ஆகுது?''

அகிலன், அதை வாங்கிப் பார்த்துவிட்டு, ''வேதியியலின் விபரீதம் இது...'' என்றான்.

''புரியவில்லை'' என்றாள் ஆலீஸ்.

''சுவர் வெடிப்புகளில் ஆலமரம் வளரும். எத்தனை முறை பிடுங்கிப் போட்டாலும் மறுபடி மறுபடி வளரும். அதற்கு, மண் தேவை இல்லை; எரு தேவை இல்லை. செடியை அழிப்பதற்காகச் சிலர் அமிலத்தை எல்லாம் ஊற்றுவார்கள். அப்போதும் செடி மீண்டும் மீண்டும் துளிர்க்கும். அதே ஆல விதையை நீங்கள் எடுத்து வந்து எரு போட்டு வளர்த்தால் பல சமயங்களில் வளராமல் போய்விடும். இயற்கை உரம் போட்டு விதைப்பதும்கூட ஒரு வகையில் செயற்கைதான்!'' - அகிலன் தீவிரமாக எதையோ சொல்ல ஆரம்பித்தான்.

''சுவர் வெடிப்பில் வளர்ந்த ஆல விதையை யார் போட்டார்கள்? ஒரு பறவையின் எச்சத்தில் இருந்து அது வந்திருக்கும். ஆசிட் ஊற்றினாலும் சாகாவரம் அந்த எச்சத்தில்தான் இருக்கிறது.''

என்ன சொல்லி முடிக்கப்போகிறான் என்ற ஆர்வத்தில் அவனைப் பார்த்துக்கொண்டிருந்தனர்.

''நமக்கு நம் தாவரங்கள் வேண்டுமானால் நம் உயிரினங்கள் வேண்டும். ஒரு விதையில் இருந்து மீண்டும் மீண்டும் விதைகள் எடுப்பதால், அதன் வீரியம் குறைந்துகொண்டிருக்கிறது. இயற்கை உரங்கள் வேண்டும். விலங்குகள் வேண்டும்!''

புல்தரையில் சாய்ந்திருந்த மைக்கேல் சுதாரித்து எழுந்தார். ''ஓ... அதனால்தான் விலங்குகள் ஒரு லோடு ஏற்றி வர வேண்டும் என்றானா?'' என்றார்.

''யார்?'' என்றான் அகிலன்.

''கேப்ரியல்தான். நோவா செய்கிற எல்லா வேலைகளையும் செய்கிறான். ஆனால், நோக்கம்தான் வேறாக இருக்கிறது!''

மைக்ரோசாஃப்ட் ஆசாமிகள், சினிமா நட்சத்திரங்கள், வனவிலங்குகள்... பாரபட்சம் இல்லாமல் எல்லாவற்றையும் சராசரியாகத்தான் பார்த்தார் கேப்ரியல். எல்லாவற்றையும் திரட்டி வருவதற்குக் கொஞ்சம் காலம் ஆகும். ரோஸியின் மூளை இணைப்புகளைப் பிரிப்பதற்கு இதுதான் சரியான தருணம். அகிலன், மனதுக்குள் தீர்மானித்தான். மைக்கேலின் கையில் கட்டியிருந்த வாட்ச் போன்ற பட்டியை வாங்கித் தன் கையில் கட்டிக்கொண்டான்.

வினோதினி எழுந்தாள். ''நானும் வருகிறேன்'' என்றாள்.

மைக்ரோசாஃப்ட் தலைமை அலுவலகம். மெலிண்டா கேட்ஸ், 'என் கணவர் எப்படி இருக்கிறார்?’ என்று நூறு முறையாவது கேட்டிருப்பார். மைக்ரோசாஃப்ட் நிறுவனத்தை அவர்தான் நிர்வகித்து வந்தார். அவருக்கு, கீழை நாட்டுத் தத்துவயியலில் ஈடுபாடு இருந்தது. கழுத்துக்கு மேலே பணம் புரளும் யாருக்கும் ஏற்படும் தொண்டு மனப்பான்மையும்  ஆன்மிக ஈடுபாடும் அவருக்கும் ஏற்பட்டிருந்ததில் வியப்பு இல்லை. ஆப்பிள் கம்ப்யூட்டரின் கர்த்தாக்களில் ஒருவரான ஸ்டீவ் ஜாப்ஸ், அப்படித்தான் கொஞ்ச நாள் ஹிப்பியாக மாறி இமயமலை அடிவாரத்தில் சுற்றிக்கொண்டிருந்தார். மிஸஸ் பில்கேட்ஸ் அந்த அளவுக்கு இல்லை. பிலன்த்ரே£பிஸ்ட் லெவலோடு நிறுத்திக் கொண்டார்.

பில்கேட்ஸ் தந்த பட்டியலோடு மெலிண்டா முன் அமர்ந்திருந்தார் கேப்ரியல்.

அந்த அம்மாவுக்கு, கணவர் இப்போது எப்படி இருக்கிறார் என்பதில் கவனம். 'பிரமாதமாக இருக்கிறார்; சிறப்பாக இருக்கிறார்’ என்று கேப்ரியல் விதவிதமாகச் சொல்லிப் பார்த்தார்.

''ஒரு போட்டோ எடுத்து வந்திருக்கலாமே!'' என்று கேட்டார்.

''புதிய கிரகத்தில் மக்கள் எப்படி இருக்கிறார்கள் என்பதை அங்கிருந்தே நேரடியாக ஒளிபரப்பும் யோசனை இருக்கிறது'' என்று ஒரு வரியில் முடித்துவிட்டார்.

மெலிண்டா, பட்டியலை நிதானமாகப் பார்த்தார். பில்கேட்ஸ் கேட்டிருந்த நபர்கள், அவர் கேட்டிருந்த மென்பொருள்கள் எல்லாமும் வேகமாகச் சேகரிக்கப்பட்டன.  100 பெடாபைட் ஹார்டுடிஸ்க்கில் ஏறத்தாழ எல்லா சாஃப்ட்வேர்களும் ஏற்றப்பட்டன.

ஜி 581 ஜி-க்கு செல்லவேண்டிய நபர்கள் வேகமாக அவரவர் வீட்டுக்குத் தகவல் தெரிவித்துவிட்டு, அலாஸ்காவுக்கு அவசர வேலையாகச் செல்வது மாதிரி கிளம்பி வந்தனர். எத்தனை செட் துணி எடுத்து வைத்துக்கொள்ள வேண்டும் என்பதுதான் பலருக்கும் எழுந்த உடனடி சந்தேகம்.

எல்.டபிள்யூ சேம்பர், மைக்ரோசாஃப்ட் நிறுவனத்தின் மொட்டைமாடிக்கே வரவழைக்கப்பட்டிருந்தது. பில்கேட்ஸ் கேட்ட நபர்கள், கேட்ட பொருள்கள் எல்லாம் நேர்த்தியாக அனுப்பிவைக்கப்பட்டன.

கேப்ரியலுக்கு வந்த வேலை சீக்கிரம் முடிந்துவிட்ட திருப்தி. அடுத்தகட்ட வேலையாக கேப்ரியல் ஹாலிவுட்டுக்குக் கிளம்பினார்.

அவர் கிளம்பிய அதே நொடியில், ''மேடம் தவறு நடந்துவிட்டது'' என்று மெலிண்டாவை நோக்கி பதறி ஓடிவந்தான் சீஃப் புரோகிராமர் வித்யாதர்.-

- ஆபரேஷன் ஆன் தி வே...

https://www.vikatan.com

ஆபரேஷன் நோவா - 28

 

 

தமிழ்மகன், ஓவியங்கள்: பாலா

 

திருமதி மெலிண்டா பில்கேட்ஸ், தன் டெலஸ்கோப் மூலமாக 581 ஜி-யைப் பார்க்க முயற்சி செய்துகொண்டிருந் தார். நட்சத்திரங்களை அடையாளம் காண்பது, அவருக்கு இன்னமும் எளிதாக இல்லை. அப்போதுதான் வித்யாதர் வந்தான். இந்தியாவில் இருந்து அங்கு பணிக்கு வந்தவன். 30-ன் மத்தியில் இருப்பவன். சிவப்பு, சுறுசுறுப்பு இரண்டும் கலந்த இன்டலெக்சுவல். நிறுவனத்தில் முக்கியமான புரோகிராமர்.

''என்ன வித்யாதர்?''

''ஒரு தவறு நடந்துவிட்டது மேடம்.''

மெலிண்டாவின் புருவங்கள் நெருங்கின.

''பில்கேட்ஸ் ஆபத்தில் இருக்கிறார். 'அங்குள்ள மக்களைக் காப்பாற்ற வேண்டும்’ என்று தகவல் அனுப்பியிருக்கிறார்.''

வித்யாதர் சொல்லப்போகும் விளக்கத்தைக் கேட்கும் அவகாசம்கூட இல்லை. தயக்கமாகப் பதறினார் மெலிண்டா.

ஹாலிவுட்டுக்குப் போன கேபிரியலை அங்கேயே தாமதப்படுத்த வேண்டும். அவருடைய அப்பாயின்ட்மென்ட்களை ஒரு மணி நேரம் தள்ளிவைக்க வேண்டும். தடதடவெனக் காரியத்தில் இறங்கினார். மொத்தம் மூன்றே போன்கள்.

'' இப்போது சொல்லுங்கள் வித்யாதர்.''

''நமக்கு மிஸ்டர் பில் அனுப்பியிருந்த பட்டியலைக் கவனித்தீர்களா?''

 

அவன் கையில் இருந்த பட்டியலை வாங்கி, கவனித்தார். வரிசையாகப் பெயர்கள்... மனிதர்களின் பெயரும் மென்-வன் பொருள்களின் பெயரும். உதட்டுச் சுழிப்பில் 'புரியவில்லை’ என்றார்.

''எழுத்துப் பிழைகள் இருப்பதைப் பார்த்தீர்களா?''

''பார்த்தேன்.'' மீண்டும் பார்த்தார். அவசரத்தில் நடக்கக்கூடிய சாதாரண டைப்போ எரர்கள். உதட்டில் 'புரியவில்லை’ அப்படியே இருந்தது.

பில்கேட்ஸ் அனுப்பியிருந்த பட்டியலில் இருந்த அந்த ரகசியக் குறிப்பை விளக்க ஆரம்பித்தான்.

விண்டோஸ் என்று டைப் செய்யப்பட்ட இடத்தில் இரண்டு W. அடுத்த வரியில் சாஃப்ட்வேர் என்ற இடத்தின் நடுவில் E. நான்காவது வரியில் A என்ற எழுத்துக்குப் பக்கத்தில் தேவை இல்லாமல் ஓர் இடைவெளி.

வித்யாதர் தவறு நடந்திருக்கும் ஒவ்வோர் எழுத்தையும் கோத்தான்.

'வீ ஆர் இன் டேன்ஜர். ப்ளீஸ் ஹெல்ப்.’

மெலிண்டாவின் முகம் மேலும் வெளிறியது ''ஓ மை காட்!''

எதுவுமே நடக்காத மாதிரி வந்துபோன கேப்ரியலின் முகம் நினைவுக்கு வந்துபோனது. '300 கோடி மக்களை, இவனை நம்பி அனுப்பி வைத்திருக்கிறோமே!’ என்ற அச்சம் குபீர் என்று உடல் எங்கும் பரவியது.

ஹாட்லைனில் தகவல் பறந்தது. எவ்வளவு சீக்கிரம் முடியுமோ, அவ்வளவு சீக்கிரம் கேப்ரியலை முடக்க வேண்டும். அமெரிக்க ராணுவத்தின் உதவி வேண்டும். பில்கேட்ஸ் அலுவலகம் பரபரப்பானது. இப்போதுதான் ஹாலிவுட் போய்ச் சேர்ந்திருப்பான். ஹாலிவுட் நட்சத்திரங்களுடன் அப்பாயின்மென்ட். அத்தனை பேரையும் அள்ளிக்கொண்டு போய் பிளாக்மெயில் செய்வானா? எதற்காக செலிபிரிட்டியாகச் சேகரித்துக்கொண்டு போகிறான்? மெலிண்டா, தவித்தாள்.

கேப்ரியல் அங்குதான் இருப்பதாக உறுதிசெய்த போலீஸ், அங்கேயே அவன் இருக்கும் அரங்கத்திலேயே சந்தேகம் வராமல் காபந்து பண்ணிவைக்கும்படி உத்தரவிட்டது.

ஜேம்ஸ் கேமரூன், ஸ்டீஃவன் ஸ்பீல்பெர்க், டாம் க்ரூஸ், வில் ஸ்மித், ஜேஸன் ஸ்டாதம், க்ரிஸ்டன் ஸ்டீவாக்... என மக்களுக்குத் தெரிந்த முகங்கள் அங்கே ஷாம்பெய்ன் ஏந்திக் குழுமி இருந்தனர்.

இன்னோர் உலகத்தை நிர்மாணித்தவர் என்ற பெருமையோடு நடுநாயகமாக கேப்ரியல் அமர்ந்திருந்தார். உண்மையில் இத்தகைய பெருமைகளை அவர் எப்போதோ கடந்துவிட்டிருந்தார். நோபல் பரிசு பெற்றவரை சிந்தாதிரிப்பேட்டை சினி ஆர்ட்ஸ் கௌரவிப்பது மாதிரி இருந்தது. வேலை நடக்க வேண்டுமே என்பதற்காக உட்கார்ந்திருந்தார். கொஞ்ச நேரம் எல்லோரும் தனித்தனியாகப் புகழ்ந்துவிட்டு, கேள்விகள் கேட்க ஆரம்பித்தனர்.

இதுவரைக்கும் வெளி கிரகத்தை செட் போட்டு எடுத்தவர்களுக்கு, அங்கேயே போய் படம் எடுப்பதில் இனம்புரியாத ஒரு தவிப்பு இருக்கத்தான் செய்தது. படம் எடுப்பதற்குத் தங்களுக்கு என்னென்ன வசதிகள் வேண்டும் என அழகான ஃபைலில் விவரித்திருந்தனர். கேப்ரியலுக்கு அதற்கெல்லாம் நேரம் இல்லை. ''ஹாலிவுட்டை அப்படியே அங்கு பேக் செய்துவிடலாம்'' என்றார்.

''உலகத்திலேயே அதிகமாக சினிமா எடுப்பவர்கள் இந்தியர்கள்தான். ஆண்டுக்கு சராசரியாக 500 சினிமாக்கள் எடுக்கிறார்கள். அதிலும் குறிப்பாக தமிழர்கள்... ரஜினி, ஷங்கர், ஏ.ஆர்.ரஹ்மான், கே.எஸ்.ரவிகுமார், ரவி கே.சந்திரன்... என்று ஒரு லோடு அடிக்கலாம். மக்களை ஜாலியாக வைத்திருக்க உதவுவார்கள்'' அமிர்தராஜ் பிரதர்ஸ் சார்பில் கோரிக்கை வைக்கப்பட்ட நேரத்தில்...

ராணுவம் உள்ளே நுழைந்தது. ராணுவ ஜெனரல் டேவிட் பெர்கின் மிடுக்காகக் கூட்டத்தின் மையத்தை நோக்கி நடந்து, கேப்ரியல் அருகில் நின்றார்.

''எங்களுடன் கொஞ்சம் வர முடியுமா?'' என்றார்.

''எனக்கு நேரம் இல்லை'' என்றார்.

''நேரத்தைப் பற்றி கவலைப்படாதீர்கள். நாங்கள் தருகிறோம். வரச் சம்மதம்தானே?'' என்றார் ஜெனரல்.

கேப்ரியலின் வாசனை நரம்பு, வரம்பு மீறப்படுவதை உணர்ந்தது. ''மகிழ்ச்சியாக'' என்றார் மகிழ்ச்சி இல்லாமல்.

அவருடைய நான்கு நட்சத்திர தோள்பட்டையின் அந்தஸ்து தெரிந்த பலரும் முகம் வழியாக மரியாதையை வெளிப்படுத்தினர். அத்தனை திரை நட்சத்திரங்களும் ஒபாமாவை மரியாதை நிமித்தமாகச் சந்திக்கச் செல்வதாகத்தான் நினைத்தனர். அதைத் தாண்டி சந்தேகிக்கவில்லை.

கேப்ரியலை மூன்று அடுக்குப் பாதுகாப்பு வாகனத்தில் ஏற்றினர். முன்னும் பின்னும் எட்டு ராணுவ வாகனங்கள்.

அவரைக் குலுங்காமல் பென்டகனுக்கு அழைத்து வந்தனர். ''எதற்காக, எங்கே அழைத்துச் செல்கிறீர்கள்?'' என்ற இயல்பான கேள்விகளைத்தான் கேப்ரியல் கேட்டார். ராணுவ மௌனம் அவரைக் கடுப்பேற்றியது.

கேப்ரியல், ''உங்களுக்கு அரை மணி நேரம் தருகிறேன். அதற்குள் என்னை விட்டுவிட வேண்டும். அதன் பிறகு என் பொறுமையைச் சோதித்தால் என்ன நடக்கும் என்பதை... ஒபாமா வந்தால்தான் சொல்வேன்'' என்றார் கோபமாக.

''அவ்வளவு நேரம் தேவைப்படாது'' என்றார் ஜெனரல் சிரித்தபடி.

அதற்குள் விசாரணை அறை வந்துவிட்டது.

பழக்கமானவர்களே ஒவ்வொரு முறையும் உள்ளே சென்ற வழியை மறந்துவிடக்கூடும். அத்தனை திருப்பங்களையும் தானியங்கிக் கதவுகளையும் கடக்க வேண்டியிருந்தது. சில நெகோஷியேட்டர்கள் அங்கே காத்திருந்தனர். உளவுத் துறை அதிகாரிகள் இருந்தனர். முக்கியமாக விஞ்ஞானி சார்லஸ் இருந்தார்.

''நீங்கள் சர்வாதிகாரம் செய்வதாகத் தகவல் வந்திருக்கிறது. மக்களை அடிமைகளாக வைத்திருப்பதாகச் சொல்கிறார்கள்'' - இது உளவுத் துறை.

சார்லஸை வெடுக்கெனத் திரும்பிப் பார்த்தார். அந்தப் பார்வை 'நீ எல்லாம் ஒரு பிறவியா?’ என்றது.

பின் உளவுத் துறையினர் பக்கம் திரும்பி, ''ஈராக்கில் சதாம் உசேனிடமும் ஈரானில் கடாஃபியிடமும் பேசிய வசனங்களை என்னிடம் பிரயோகிக்காதீர்கள். நான் வேறு'' என்றார் இறுகிய முகத்தோடு.

''பில்கேட்ஸை என்ன செய்தீர்கள்?'' - மீண்டும் உளவுத் துறை.

இந்த மாதிரி அற்பக் கேள்விகளுக்கு எல்லாம் பதில் சொல்ல அவர் விரும்பவே இல்லை. நகம் நேர்த்தியாக வெட்டப்பட்டிருக்கிறதா என அவருடைய கைவிரலை ஆராய்ந்தார்.

''ஓ.கே. உங்களிடம் வெட்டிக்கதை பேசிக்கொண்டிருக்க எனக்கு நேரம் இல்லை. இங்கே சிலர் 'நாடுகள்’ என்ற பெயரில் ஆண்டுகொண்டு இருப்பதை நான் தடுக்கவில்லை. நாட்டின் அதிபர் என்பது எல்லாம் என்னைப் பொறுத்தவரை வார்டு கவுன்சிலர் அதிகாரம் போலத்தான். உங்கள் ஒபாமா உள்பட. நான் இன்னும் இரண்டு நாட்களுக்குள் 581-ஜிக்குச் செல்லவில்லை என்றால், அந்தக் கிரகமே க்ளோஸ்... வானத்தில் ஒரு நட்சத்திரம் காணாமல்போய்விடும். டைமர் செட் பண்ணிவிட்டுத்தான் வந்திருக்கிறேன். அங்கே உங்கள் பில்கேட்ஸ், ஏஞ்சலினா உள்பட முக்கியமான 300 கோடிப் பேர் இருக்கிறார்கள். முக்கியமான கனிமங்கள் இருக்கின்றன. தங்கம், தோரியம், லித்தியம்... அப்புறம் உங்கள் விருப்பம்'' என்றபடி ஜெனரலின் சட்டையில் பொறித்திருந்த பெயரைப் படித்து ''மிஸ்டர் பெர்கின்'' என்றார்.

முகத்தில் வீராப்பை வைத்தபடி உள்ளுக்குள் உதறலோடு ஒருவரை ஒருவர் பார்த்துக்கொண்டது பென்டகன் கமிட்டி. இன்னும் 48 மணி நேர அவகாசத்தில் என்னவும் நடக்கலாம்; என்னவும் மாறலாம்.

''உங்களுக்கு என்னதான் வேண்டும்?'' தன்னையும் அறியாமல் அவசரப்பட்டார் ஒருவர்.

''எனக்கு என்ன வேண்டும் என்ற பட்டியலை ஏற்கெனவே ஹாலிவுட் ஆசாமிகளிடம் சொல்லிவிட்டேன். அவர்களும் தயாராகத்தான் இருக்கிறார்கள்.''

''நாங்கள் முடிவெடுக்கக் கொஞ்சம் நேரம் வேண்டும்'' என்றார் நெகோஷியேட்டர்.

''முடிவைத்தான் நான் எடுத்துவிட்டேனே? ஹாலிவுட்டை அங்கே அனுப்பிவைக்கிற வேலையைப் பாருங்கள்'' என்றார் கேப்ரியல்.

ஒரு நெகோஷியேட்டர் நிலைமையை உத்தேசித்து, ''அதற்கான அவகாசத்தைத்தான் சொல்கிறோம்'' என்றார்.

581-ஜி

மைக்கேல் கையில் கட்டியிருந்த கடிகாரம் போன்ற கருவி சாதாரணமானது அல்ல. இந்தக் கிழவனால் என்ன செய்துவிட முடியும் என்ற அலட்சியத்தால் அதை அப்படியே விட்டுவிட்டான். அகிலன் செல்லும் வழி எல்லாம் கேள்வி கேட்காமல் வழிகள் வழிவிட்டன. ஆனால், என்ன செய்வது என்றுதான் தெரியவில்லை. முதலில் மத்திய கேந்திரத்தை முழுசாகச் சுற்றிப் பார்க்கவே ஒரு மாதம் தேவைப்படும்போல இருந்தது. கேப்ரியல் வருவதற்குள் ஏதாவது செய்தாக வேண்டும். இடையில் வந்துவிட்டால், மத்திய கேந்திரத்திலேயே ஒரு சிட்டிகை சாம்பலாக்கி ஊதிவிடுவான் என்று தெரியும்.

சுற்றிய இடத்துக்கே திரும்பத் திரும்ப வந்துகொண்டிருப்பது தெரிந்தது. எல்லா இடங்களும் வெளி ஊதா நிறத்தில் குளிர்ச்சியாக, அமைதியாக இருந்தன. ஒன்றுமே புரியவில்லை. ஒரு ரோபோ எங்கிருந்தோ வேகமாக வந்து எதிரில் நின்றது.

சுடுமா? சிறை வைக்குமா?

''உங்களுக்கு ஏதாவது உதவி வேண்டுமா?'' என்றது ரோபோ.

''அம்மாவைப் பார்க்க வேண்டும்'' என்றான் அகிலன்.

''அவரை அழைத்து வா'' என்றது அம்மாவின் குரல்!

 - ஆபரேஷன் ஆன் தி வே...

https://www.vikatan.com

ஆபரேஷன் நோவா - 29

 

 

தமிழ்மகன், ஓவியம்: பாலா

 

'இரண்டு நாட்களில் நான் அங்கு போய்ச் சேரவில்லை என்றால், 581-ஜி அம்பேல்!’ என்று கேப்ரியல் போட்ட அதிர்ச்சி குண்டு, பூமியின் எல்லா நாட்டின் தலைவர்களையும் பேதிக்கு சாப்பிட்டவர்கள் மாதிரி நடுநடுங்கவைத்தது. முக்கியமாக ஃபிரான்ஸ், அமெரிக்கா, ரஷ்யா போன்ற நாடுகளில் நடுநடு இன்னும் அதிகமாக இருந்தது.

கேப்ரியல், உண்மையாகத்தான் சொல்கிறாரா... சும்மானாச்சும் பாவ்லா காட்டுகிறாரா என்பதில் அலட்சியம் காட்ட முடியவில்லை. பூமியின் முக்கியமான பலர் அங்கே இருந்தார்கள். தாராளமாகப் பயப்பட வேண்டியிருந்தது. கேப்ரியலை சிறையிலும் அடைக்க முடியாமல், சிறப்பு விருந்தினராகவும் கௌரவிக்க முடியாமல் அமெரிக்க அதிபர் ஒபாமாதான் அதிகம் தவித்தார். ஏனென்றால், இருந்திருந்து அங்குதான் கேப்ரியலைச் சுற்றி வளைத்தார்கள். உலக போலீஸாகவே இருந்து பழக்கப்பட்டுவிட்ட அமெரிக்காவுக்கு இது கூடுதல் தலைவலி.

வாஷிங்டன் கிராண்ட் ஹயட் ஹோட்டலில் முதன்மை ஷூட்டில் செம ராயலாகத் தங்க வைக்கப்பட்டிருந்தார் கேப்ரியல். ஆனால், அறையைவிட்டு அவர் வெளியே தப்ப முடியாதவாறு 400 ராணுவ வீரர்கள் அவருக்கே தெரியாமல் காவல் இருந்தனர். அறைக் கதவை நோக்கிக் குறிவைத்தபடி எல்லா நேரமும் துப்பாக்கிகள் தயாராக இருந்தன. இன்னும் 47 மணி நேரம் இருந்தது.

அடுத்த 10 மணி நேரத்தில் உலக நாடுகளின் அத்தனை தலைவர்களும், லண்டனில் அறிவியல் கழக விஞ்ஞானிகளோடு அவசரச் சந்திப்புக்கு தயார் ஆனார்கள்.

விஞ்ஞானி சார்லஸ் சொல்லப்போகிற ஒவ்வொரு யோசனையையும் உலகமே எதிர்பார்த்துக்கொண்டிருந்தது.

விஞ்ஞானிகள் குழு ஒன்று தீவிரமாக இருந்தது. கேப்ரியல் சொன்னது மாதிரி ஏதாவது டைமர் புரோகிராம் செய்யப்பட்டிருக்கிறதா என்பதை ஊர்ஜிதம் செய்யும் தீவிரத் தேடல். வெடிக்கவைக்கும் டிவைஸ் எங்கே இருக்கிறது? அதை இயக்கும் புரோகிராம் எங்கே... என்னவாக இருக்கிறது... விஞ்ஞானிகள் தவித்தனர். தெள்ளத்தெளிவாக எஃபெல் டவரில் குண்டு வைத்திருப்பதாகச் சொன்னாலே, அதைக் கண்டுபிடித்து அழிப்பதற்குள் மூச்சு முட்டிப்போகிறது. இது அண்டவெளி பிரபஞ்சத்தில் டெலஸ்கோப்பில் தெரிகிற ஒரு புள்ளி.

எல்.டபிள்யூ. டிரான்ஸ்மிட்டிங் டிகோட் புராசஸர் என்பது இப்போதுதான் உருவான புதிய துறை. உலகில், இப்படி ஒரு விஞ்ஞானப் பிரிவு தோன்றி ஐந்து மணி நேரம்தான் ஆனது. அதாவது, கேப்ரியலின் அச்சுறுத்தலுக்குப் பின்னால் அவசரத் தேவைக்குப் பிந்தைய அவசரக் கண்டுபிடிப்பு. ஒளி ஆண்டுகளைக் கடந்து மென்பொருள் ஆணைகளைப் பதிவிறக்கம் செய்து பரிசீலிப்பது.

581-ஜியில் தொடர்புகொள்வ தற்கான ஒரே இடம் அங்கு இருந்த மத்திய கேந்திரம் மட்டும்தான். டெஸ்ட்ராய் புரோகிராம் என்பதற்கான ஓர் இழை தெரிந்தாலும் பிடித்துவிடலாம். ஒவ்வோர் அலைவரிசையாக அலசி முடிப்பதற்கு இன்னும் 2,000 நாள்களாவது ஆகும். கேப்ரியல், சொன்ன கெடுவுக்கு 2,000 நிமிடங்கள்தான் இருந்தன. பெடாபைட் புராசஸரில் ஆயிரம் பேர் ஷிஃப்ட் போட்டு வேலை பார்த்தாலும் இன்னும் 47 மணி நேரத்தில் எல்லாம் கண்டுபிடிக்க முடியாது. எந்தத் தைரியத்திலேயோ சார்லஸ் தீவிரமாக இருந்தார். சாவு நிச்சயம். ஆனால், போராடிவிட்டுச் சாக வேண்டும்.

வந்திருந்த தலைவர்களுடன் பேச, அவரால் ஐந்து நிமிடங்கள்தான் ஒதுக்க முடிந்தது.

''இதோ பாருங்கள்... இந்த விநாடியில் இருந்து இன்னும் 37 மணி நேரம் இருக்கிறது. அதில் 35 மணி நேரம் நாங்கள் போராடிப் பார்ப்போம். இங்கிருந்தே அந்த ஆணையை அழிக்க முடியுமா என்று ஓர் அணி போராடுகிறது. இன்னோர் அணி அங்கே நேரடியாகச் சென்று 'ஏதாவது செய்ய முடியுமா?’ என்று பார்ப்பதற்காக உயிரைப் பணயம் வைத்துப் போயிருக்கிறது. இது இரண்டிலும் நாம் தோற்றுப்போனால், 'கேப்ரியலுக்கு அடிமை’ என்று பட்டயம் எழுதித் தருவதைத் தவிர வேறு வழி இல்லை. அவ்வளவுதான்... இருக்கிற ஒரு நாளை நிம்மதியாக வாழுங்கள். நாடு பிடிக்கிற ஆசை, பேராசையால் இயற்கையைச் சுரண்டி சீரழிக்கிற ஆசை, கடவுளின் பெயரால் நாசவேலை செய்கிற ஆசை... எல்லாவற்றையும் மூட்டை கட்டிவிட்டு, ஒரே ஒரு நாள் நிம்மதியாக இருங்கள்'' - சார்லஸ், உலகத் தலைவர்களின் பதிலுக்குக்கூடக் காத்திருக்காமல் அரங்கத்தைவிட்டுச் சென்றார்.

அறிவியல் கழகத்தால் 581ஜி-க்கு அனுப்பிவைக்கப்பட்ட அவசர விஞ்ஞானிகள் யாராலும் மத்திய கேந்திரத்தில் நுழைய முடியவில்லை. மொத்தம் 30 பேர் வந்திருந்தனர். பிசிக்ஸ், கெமிஸ்ட்ரி, எலெக்ரானிக்ஸ், எலெக்ட்ரோ மேக்னடிக், சாஃட்வேர் இன்ஜினீயர், அஸ்ட்ரோ பிசிக்ஸ்ட்... என தலைக்கு ஒரு துறையினர் இருந்தனர். அவர்களிடம் இருந்த எந்தக் கருவியும் கேந்திரத்தைத் திறக்கவில்லை. எல்லா சங்கேத மொழிகளும் அங்கே அர்த்தம் இழந்தன. வந்திருந்த அத்தனை வல்லுநர்களும் 'என்ன செய்வது?’ என்று கையைப் பிசைந்தனர். இப்போது அவர்களுடைய தேவை கிராக்கர். எளிமையாகச் சொல்வது என்றால், ஒரு டூப்ளிகேட் சாவி. கிராக்கிங் முடிந்த பின்தான் மற்றவர்கள் தங்கள் வேலையைச் செய்ய முடியும். எங்கே அழிவுக்கான புரோகிராம் செய்யப்பட்டிருக்கிறது என்பதைக் கண்டுபிடிக்க வேண்டும். பிறகு, அதை எப்படி நிறுத்துவது என்பதை ஆராய வேண்டும். மூன்றாவது, அதைச் செயல்படாதவாறு அன்ஹிலேட் செய்ய வேண்டும். உடல் உழைப்பும் மூளை உழைப்பும் 100 சதவிகிதம் செயல்பட வேண்டும். முதலில் கிராக். மென்பொருளாளர்கள் சிலர், ஃப்ரீ அக்சஸ் டிவைஸ்களோடு மல்லுக்கட்டிக் கொண்டிருந்தனர். சிலர், கையைப் பின்னால் கட்டி நிற்பதும் முன்னால் கட்டி நிற்பதுமாக இருந்தனர்.

இன்னும் 40 ப்ளஸ் மணி நேரத்தில் அழியப்போகும் கிரகம். மூளையில் கவுன்ட் டவுண் கடிகாரம் அடித்தது. எல்லா பக்கமும் மொழுக்கென்று இருக்கும் ஒரு கட்டடத்தின் உள்ளே போவதை எந்த இடத்தில் ஆரம்பிப்பது? எல்லாப் பரிகாரங்களும் துடைத்துவிட்ட மாதிரி இருந்தது.

பீரங்கியால் தகர்த்துவிட்டு உள்ளே நுழைகிற ஹைதர் காலத்து முரட்டு ஐடியாவைத் தவிர வேறு ஒன்றுமே கைகொடுக்காது என்றுதான் தோன்றியது. அவர்கள் கையில் கட்டியிருந்த பிராக்ஸி கோட் ரூட்டர்கள் எல்லாமே செயல் இழந்துபோயிருந்தன. இப்படி நடக்கும் என்று கேப்ரியல் முன்னரே ஊகித்து இருந்தார். தன்னைத் தவிர வேறு யார் வந்தாலும் உள்ளே நுழையவிடாமல் எல்லா ஆணைகளையும் மாற்றியிருந்தார்.

''ஆணைகளை மாற்ற முடியாதா?'' - விஞ்ஞானி ஒருவர் கேட்டார்.

முடியாது என்று தெரிந்தும் கேட்கப்படுகிற சம்பிரதாயமான கேள்வி இது. உள்ளே போய் ரோஸியின் மூளையை நெருங்கினால்தான் எதுவுமே சொல்ல முடியும்.

''உடைத்துக்கொண்டு நுழையலாமா?''

''மொத்த கேந்திரமும் ஒரே இணைப்பில் இருக்கிறது. அது வேறு வகையான பாதிப்புகளை உண்டாக்கும்.''

யோசனை சொல்கிறேன் என்ற பேர்வழியில் சிலர் யோசிக்காமல் பேசினர். சிலரால் அதுகூட முடியவில்லை. வந்திருந்த விஞ்ஞானிகளுக்குக் கட்டடத்தைச் சுற்றிச் சுற்றி வருவதால் ஒரு பயனும் இல்லை என்பது வந்த சில நிமிடங்களிலேயே தெரிந்துபோனது. உயிரைப் பிடித்துக்கொண்டு ஊர் போய்ச் சேருவதுதான் உத்தமம் என்று நினைத்தனர்.

அப்போதுதான் அங்கு வந்து சேர்ந்திருந்த பில்கேட்ஸ் அலுவலகப் பணியாளர்கள், இன்னும் ஒரு நாளில் கிரகத்தோடு சேர்ந்து அழியப் போகிறோம் என்ற தகவல் தெரியாமல் இன்டர்நெட் வைஃபி செய்துகொண்டிருந்தனர். சாட்டிலைட் தொடர்புகள் பக்காவாக இருந்ததால் வந்திருந்த டீம் நொடியில் ஜாலங்கள் செய்தனர். சில மணி நேரங்களில் 581 ஜி-யின் சகல கம்ப்யூட்டர்களும் பரமாத்மாவோடு கலந்த ஜீவாத்மாவாக மாறின.

581 ஜி-யில் முதல் இ-மெயில் கணக்கை உருவாக்கிய ஏஞ்சலீனா ஜோலி, ''நான் யாருக்கு என் முதல் மெயிலைப் போடுவது?'' என்று சிரித்தார்.

''உங்கள் கிட்டிக்கு அனுப்புங்கள்!'' பில்கேட்ஸ் இருவரையும் பார்த்துப் புன்னகைத்தார்.

''கிட்டிக்கா?'' என்றபடி பக்கத்திலேயே இருக்கும் பிராட் பிட்டைப் பார்த்தாள்.

''பூமியில் இன்று 100 கோடி இ-மெயிலர்கள் இருக்கிறார்கள். ஆனால், முதல் முதல் இரண்டு பேரில் இருந்துதான் ஆரம்பித்தது... எல்லா பெரிய மாற்றங்களும் ஓர் எளிமையான புள்ளியில்தான் தொடங்குகின்றன. நீராவியால் ஒரு சக்கரத்தைச் சுழற்ற முடியும் என்ற கண்டுபிடிப்பு, முதல் உலகப் போரில் அத்தனை லட்சம் பேர் இறப்பதற்குக் காரணமாகும் என்று யாராவது நினைத்திருப்பார்களா?'' - பில்கேட்ஸுக்கு அறிவியலையும் வரலாறையும் இணைத்துப் பார்த்த பூரிப்பு.

கிரகத்தில் இருந்த பல கோடிப் பேரும் நாம் என்ன மாதிரியான ஆபத்தில் இருக்கிறோம் என்பதே தெரியாமல் கிரகப் பலனுக்காகப் பணியாற்றிக்கொண்டிருந்தனர்.

''ஏதாவது உதவி வேண்டுமா?'' என்றபடி நின்றிருந்த ரோபோவை, என்ன மாதிரி உதவி கேட்கலாம் என்று திரும்பிப் பார்த்தான் அகிலன்.

''பூமியோடு தொடர்புகொள்ள வேண்டும்'' - வினோதினிதான் மிடுக்காக அடித்துவிட்டாள். ரோபோ இருவரையும் கடந்து முன்னே நடந்தது. தலையை மட்டும் 180 டிகிரிக்குப் பின்பக்கமாகத் திருப்பி, ''என் பின்னால் வாருங்கள்'' என்றபோது பின்னால் என்பதில் சிறு குழப்பம் ஏற்பட்டதை இருவரும் காட்டிக்கொள்ளாமல் பின் தொடர்ந்தனர்.

அது மேலே செல்கிறதா... கீழே இறங்கிச் செல்கிறதா... என்பதை மூளையின் மேல் கீழ் அடையாளங்களை வைத்து கண்டுபிடிக்க முடியவில்லை. மேலா, கீழா, இடமா, வலமா என்பதைச் சார்புபடுத்திப் பார்க்க முடியாத வழிகள். சில இடங்களில் நடக்க வேண்டியதுகூட இல்லை. வழியே கடந்து சென்றது.

அவர்கள் நின்ற இடம், மைக்கேல் ஏன் அவ்வளவு அதிர்ச்சியாக இருந்தார் என்பது புரிந்தது. ரோஸியின் மிதக்கும் மூளை. குடுவையின் திரவத்தைக் காட்டி 'செரிபிரள் ஃபுளூயட்’ என்றாள் வினோதினி.

''உங்களுக்கு என்ன வேண்டும்?'' என்றது ஒரு ஆம்ப்ளிஃபைடு குரல். அது ரோஸி!

- ஆபரேஷன் ஆன் தி வே...

https://www.vikatan.com

ஆபரேஷன் நோவா - 30

 

தமிழ்மகன், ஓவியம்: பாலா

 

இன்னும் 10 மணி நேரமே பாக்கி இருந்தது. நிலைமையின் தன்மையை ஒவ்வோர் அங்குலமாக சார்லஸுக்கு விவரித்துக்கொண்டிருந்தார் அலெக்ஸ். முடிந்த அளவுக்கு மீடியாவுக்குத் தெரியாமல் கட்டுப்படுத்திவைத்திருந்ததால், கீழ் மட்டங்களில் இன்னமும் ஸ்கூப் தகவல் பரவாமல் இருந்தது.

''க்ராக் செய்வது சாத்தியம் இல்லை. கேப்ரியலிடம் பேசி வழிக்குக் கொண்டுவருவதுதான் சரியாக இருக்கும்'' என்ற அலெக்ஸுக்கும் நம்பிக்கை குறைந்துகொண்டு வந்தது.

கேப்ரியலுக்கு, தன்னை சிறை வைத்திருக்கிறார்கள் என்பதுகூடத் தெரியாது. உலகத் தலைவர்கள் எல்லாம் ஒன்றுகூடிப் பேசிவிட்டு வருவார்கள் என்ற எண்ணத்தில்தான் இருந்தார். கேப்ரியல் சுதாரித்துக்கொண்டால், ஆத்திரத்தில் ஏதாவது ஏடாகூடமாகச் செய்துவிடலாம். அதிக நேரத்தை இழுத்துவிடாமல் கச்சிதமாக முடிக்கவேண்டியிருந்தது.

அலெக்ஸ் அடிக்கடி அதை நினைவுப்படுத்திக்கொண்டிருந்தார். அவருடைய முழு முதல் முடிவு, கேப்ரியலிடம் சரணாகதி அடைவதுதான். இங்கிருந்து 581 ஜி-க்குத் தொடர்புகொள்வது கடினம். அங்கிருந்து வேண்டுமானால் பூமியோடு தொடர்புகொள்ளலாம். கேப்ரியல் அப்படித்தான் ஏற்பாடு செய்திருப்பதாக அலெக்ஸ் சொன்னார்.

சார்லஸ் பதில் சொல்லவில்லை. க்ராக்கிங் சாஃப்ட்வேர் தொடர்ந்து ஓடட்டும் என்பதுதான் அதற்கு அர்த்தம். இங்கிருந்து போன விஞ்ஞானிகள் யாராலும் அங்கு மத்திய கேந்திரத்துக்குள் செல்ல முடியவில்லை என்பது உறுதியாகிவிட்டது. மனதளவில் தோல்வியை ஏற்றுக்கொண்டுதான் அவர்கள் முயற்சி செய்கிறார்கள் என்பதும் தெரிந்தது.

581 ஜி-யில் இருக்கும் பில்கேட்ஸின் பொறியாளர், பட்டாளத்தை முடுக்கிவிடச் சொன்னார். அலெக்ஸின் உதவியாளர் பிலிப் மட்டும், 'மனிதன் எப்போது முயற்சியைக் கைவிட்டுவிடுகிறானோ, அன்றே இறந்தவன் ஆகிறான்’ என்று பழகிப்போன பழமொழிகள் சில சொல்லிக்கொண்டிருந்தார். தொடர்ந்து அசட்டுத்தனமான தத்துவங்களைச் சொல்பவர் போல இருந்ததால், சிலர் அவரைக் கவனிக்காமல் வேலையைப் பார்த்தனர்.

சார்லஸ், ''இவர் எப்போதும் இப்படித்தானா?'' என்று விசாரித்தார்.

''இப்போது ஏற்பட்ட கிலியின் காரணமாக இப்படித் தத்துவ மழையில் இறங்கிவிட்டார். மற்றபடி திறமைசாலி!'' என்றார் அலெக்ஸ்.

'பயப்படுகிறவர்களை இங்கிருந்து அப்புறப்படுத்திவிடுவதுதான் நல்லது’ என்று சார்லஸுக்குத் தோன்றியது. தேவை இல்லாமல் பயத்தை வேகமாகப் பரப்பிவிடுவார்கள். அவரைத் தனியே அழைத்து ஓய்வு எடுத்துக்கொள்ளச் சொன்னார் சார்லஸ்.

''ஓய்வா... எனக்கா? ஓய்வு என்பது, இப்போது செய்துகொண்டிருக்கும் வேலையை நிறுத்திவிட்டு வேறு வேலையைச் செய்வது'' என்று அதற்கும் விளக்கம் கொடுத்தார்.

அவருடைய சட்டையில் குத்தியிருந்த பெயரைப் படித்துவிட்டு, ''மிஸ்டர் பிலிப்... உங்கள் கூற்றுப்படி நீங்கள் வேறு வேலையைச் செய்யலாம்'' என்றார்.

பிலிப் அனுமதி பெறும் நோக்கத்தோடு அலெக்ஸைப் பார்த்தார். ''நீங்கள் விரும்புகிற வேறு வேலையைச் செய்யலாம். நானேபாட் துறையில் முயற்சி செய்கிறீர்களா?'' என்றார் அலெக்ஸ்.

''தாராளமாக'' என்றபடி பெருந்தன்மையுடன் தோளைக் குலுக்கிக்கொண்டு நகர்ந்தார். அதில் மரண பயம் தெரிந்தது.

ஒரு நொடியில் ஒரு மணி நேரம் நகர்வது போல் அறிவியல் குழு பதறியது. இன்னும் மூன்று மணி நேர அவகாசம்தான் இருந்தது. எல்லா அலைவரிசைகளிலும் காஸ்மிக் கதிர்களின் அட்டகாசத்தால் இடையூறுகள் இருந்தன. 20 ஒளி ஆண்டுகள் இடைவெளியில் இது தவிர்க்க முடியாததுதான். ஆனாலும், ரொம்பத்தான் ஆட்டம் காட்டியது.

கொஞ்ச நேரத்தில் பிலிப், தன் மணிக்கட்டில் வெட்டிக்கொண்டு தற்கொலைக்கு முயன்றதாகப் பரபரப்பு பரவியது. டாக்டரைத் தேடினர். மனிதர், உயிருக்குப் பயந்துவிட்டார். ''பூமிக்கு ஆபத்து என்றதுமே பயந்துபோய்விட்டார். வாழ்வதற்கு 581 ஜி கிடைத்த ஆறுதலில்தான் உயிரைக் கையில் பிடித்துக்கொண்டிருந்தார். இப்போது அதற்கும் ஆபத்து வந்துவிடவே நம்பிக்கை இழந்துவிட்டார்'' என்று காரணம் சொன்னார் அலெக்ஸ்.

இந்த இக்கட்டான சூழலில் இப்படி எல்லாமா சிக்கலை வளர்ப்பது? எரிச்சலாகத்தான் இருந்தது சார்லஸுக்கு.

இன்னும் இரண்டு மணி நேரம் இருந்தது. பிலிப்பின் தற்கொலை முயற்சி தெரிந்தால், மற்றவர்களும் சீக்கிரம் சோர்ந்துவிடுவார்கள். ''யாருக்கும் தெரிய வேண்டாம்'' என்றார் சார்லஸ்.

பிலிப்பைக் கவனிக்க இரண்டு மருத்துவர்களை மட்டும் அனுப்பிவிட்டு, எல்.டபிள்யூ. டிரான்ஸ்மிட்டிங் டிகோட் புராசஸர் பிரிவுக்கு வந்தார்.

இளம் விஞ்ஞானிகள் சிலர்தான், ஆரம்ப உற்சாகத்தோடும் கணினிகளோடும் மல்லுக் கட்டிக்கொண்டிருந்தனர். உச்சா போகவும் அசையாமல் இருந்ததில் சார்லஸுக்கு ஒருவித உந்துதல் ஏற்பட்டு, பாத்ரூம் நோக்கிப் போனார்.

பாரத்தை இறக்கிவைக்கும் தருணத்தில் முதுகில் சீண்டியது ஒரு விரல். அந்தத் சீண்டலிலேயே ஒரு ரகசியம் இருந்தது. மெள்ள திரும்பிப் பார்த்தார். சட்டென நினைவுக்கு வந்தது. பிலிப்புக்கு வைத்தியம் பார்க்க வந்த டாக்டர்.

''பிலிப்பிடம், 'ஏன் தற்கொலை முயற்சியில் இறங்கினாய்?’ என்று கேட்டேன்.''

டாக்டர், ரெஸ்ட் ரூமில் இருந்த எல்லா பக்கங்களையும் பயத்தோடு பார்த்தார். அதில் என்ன ரகசியம் இருக்க முடியும்?

''கொலை முயற்சி என்கிறார்'' என்றவர் தொடர்ந்து, ''ஏதோ சதி நடக்கிறது... இங்கேயே கேப்ரியலுக்கு ஆதரவாகச் சிலர் இருக்கிறார்கள். 'நான் தற்கொலை முயற்சியில் இறங்கவில்லை’ என்றார் பிலிப்.''

''என்னப்பா... என்ன சொல்கிறாய்?''

''நடந்தது தற்கொலை முயற்சி அல்ல; கொலை முயற்சி. காரணம் அலெக்ஸ்.'' அதற்குள் இன்னும் சிலர் நீர் வெளியேற்றும் நோக்கத்தோடு உள்ளே வர, டாக்டர் பேச்சை அறுத்துக்கொண்டு வெளியேறினார்.

உலகில் கடைசி இரண்டே பேர் இருந்தாலும் இரண்டு விதமாகத்தான் இருப்பார்களோ? சார்லஸ் மேற்கொண்டு தத்துவ விசாரத்தில் இறங்காமல், எல்.டபிள்யூ. அலைவரிசை ஆராய்ச்சி மையத்துக்கு ஓடினார்.

581 ஜி.

பில்கேட்ஸ் உள்ளிட்ட வெகு சிலருக்கு மட்டும் கேப்ரியலின் மிரட்டல் தெரிவிக்கப்பட்டது. 581 ஜி. கோளில் தங்கம், தோரியம் கொட்டிக்கிடக்கின்றன. மனிதர் கோளையே எடைக்குப் போட்டுவிடத் தீர்மானித்துவிட்டார். அவற்றை விற்றால் கொள்ளை லாபம் கிடைக்கும் என்ற பேராசை. ஒன்றும் இல்லாதபோது எல்லாருக்கும் எல்லாமும் பொது என்ற சித்தாந்தம் பேசுகிற மனசு, எல்லாம் இருக்கும்போது இன்னும் இருக்க வேண்டும் என்று ஆசைப்படுவதை நினைத்துப் பார்த்தார்.

கேப்ரியலை வழிக்குக் கொண்டுவருவது... இல்லை என்றால், 581ஜி-க்கு ஆபத்து இருக்கிறதா என்பதைக் கண்டுபிடித்து அழிப்பது. இந்த இரண் டில் ஒன்றைச் செய்ய வேண்டும். இந்த விவகாரம் அவரிடம் சொல்லப்பட்டபோது 1லு மணி அவகாசம்தான் இருந்தது. அவருடைய பெரும் சாஃப்ட்வேர் படை க்ராக்கிங் வேலையில் இறங்க...

யாரும் சந்தேகிக்காத வகையில் அலெக்ஸை மட்டும் தந்திரமாகத் தனியாக அழைத்துபோய் விசாரித்ததில் ஒரு விஷயம் உறுதியானது. பிலிப், மத்திய கேந்திரத்தோடு தொடர்புகொள்வதற்கான 99 சதவிகிதப் பணிகளை முடித்துவிட்டார். அது தெரிந்துதான் அவரைக் கொலை செய்ய முயன்றிருக்கிறார்கள். பிலிப்பை ஒரு வழியாகத் தேற்றி, உள்ளே கொண்டுவந்து உட்கார வைத்ததில்... மத்திய கேந்திரத்தின் சர்வர் ரூம் அடையாளம் காணப்பட்டது. அதாவது, ரோஸியின் மிதக்கும் மூளை. என்ன நடந்திருக்கும் என்பதை சார்லஸால் வேகமாகக் கிரகிக்க முடிந்தது. நானோபாட் டெக்னாலஜியைவிட சிம்பிள். எல்லா லாஜிக்கும் தெரிந்த சுறுசுறுப்பான பெண்ணின் மூளை.

''என்ன பிலிப்?''

''நம்மால் மத்திய கேந்திரத்தைத் தொடர்புகொள்ள முடியவில்லை. அங்கிருந்துதான் யாராவது தொடர்புகொள்ள வேண்டும் என்று எதிர்பார்த்தோம். அதுபோலவே அங்கிருந்த யாரோ தொடர்புகொள்ள முயற்சிப்பது தெரிந்தது. ஓர் ஆணும் பெண்ணும் இருந்தார்கள். கடும் போராட்டத்துக்குப் பிறகு நம்மைத் தொடர்புகொண்டார்கள். இதை அலெக்ஸ் கொஞ்சமும் எதிர்பார்க்கவில்லை. எனவே, அலைவரிசையை மாற்றி அவர்களின் இணைப்பைத் துண்டித்துவிட்டார். என் மணிக்கட்டையும் துண்டித்து, தற்கொலை நாடகம் ஆடிவிட்டார்...''

''அவர்களோடு தொடர்புகொள்ளுங்கள். சீக்கிரம்... பயப்பட வேண்டாம். இங்கிருந்த கறுப்பு ஆடுகளை அகற்றிவிட்டோம்'' - சார்லஸ் துரிதப்படுத்தினார்.

''நான் அகிலன்... 581ஜி-யில் ஆபத்தில் இருக்கிறோம்'' - அகிலன் குரல் கேட்டது.

''இன்னும் ஒரு மணி நேரத்தில் 581 அழியும் விதமாக டைமர் செய்திருக்கிறான் கேப்ரியல். அந்தக் கோளைக் காப்பாற்றுவது இப்போது உங்கள் கையில்தான் இருக்கிறது.''

''அழிவு சாஃப்ட்வேர் எங்கே இருக்கிறது என்பதைக் கண்டுபிடிக்க முடிந்ததா?''

பிலிப் தலைமையிலான குழு சற்றே தயங்கியது. பிலிப் யோசனையோடு சார்லஸைப் பார்த்தார்.

சார்லஸ் உறுதியாகச் சொன்னார்.

''டெஸ்ட்ராய் புரோகிராம் ரோஸியின் மூளையில்தான் இருக்கிறது. அதைத் தேடிக் கண்டுபிடித்து ஃபார்மட் செய்வது சாத்தியம் இல்லை. தயங்காதீர்கள்... ரோஸியின் மூளைக்குச் செல்லும் எல்லா இணைப்புகளையும் துண்டியுங்கள். ரோஸியைக் கொல்ல வேண்டும்!''

அதிர்ச்சியோடு வினோதினியைப் பார்த்தான் அகிலன். அவனுக்கு, மகளின் மீது உயிரையே வைத்திருக்கும் டாக்டர் மைக்கேலின் முகம் நினைவில் வெட்டியது.

''ரோஸியைக் கொல்வதற்கு விட மாட்டேன்'' - அகிலனின் கையைப் பிடித்துத் தடுத்தாள் வினோதினி.

''சொன்னால் கேள். ரோஸியை அழிக்கவில்லை என்றால், நீங்கள் எல்லோருமே அழிந்துவிடுவீர்கள்.''

அவள் அமைதியாக இருந்தாள். இன்னும் அரை மணி நேரம்தான் மிச்சம் இருந்தது!

- ஆபரேஷன் ஆன் தி வே...

https://www.vikatan.com/

ஆபரேஷன் நோவா - 31

 

 

தமிழ்மகன், ஓவியங்கள்: பாலா

 

பிரமாண்ட ரோஸ் வுட் டேபிள், சார்லஸை மார்புக்குக் கீழே மறைத்திருந்தது. இரண்டு நாள்கள் ஓயாமல் உழைத்ததில் சோர்ந்து போயிருந்தார்.

''டோபா வெடிப்பை உத்தேசித்துதான் டென்வரில் அப்படி ஒரு பாதாள நகரத்தை உருவாக்கினீர்களா?'' - தன் முன் அமர்ந்திருந்த அமெரிக்க ராணுவத் தளபதியிடம் சார்லஸ் கேட்டார்.

53 சதுர மைல்... பரப்பில் 90-களில் பூமிக்குள் உருவாக்கப்பட்ட ஒரு முன்னெச்சரிக்கை நகரம். அதற்கு ஆன செலவில் இன்னொரு பனாமா கால்வாய் வெட்டியிருக்கலாம் என்று அந்த நேரத்தில் யூக அலசல்கள் வெளியாகியிருந்தன.

''அது சீக்ரெட்'' என்றார் தளபதி.

அமெரிக்காவின் சீக்ரெட்களுக்கு ஓர் அளவே இல்லை. ஒபாமாவுக்குத் தெரிந்த ரகசியம் இவருக்குத் தெரியாது; இவருக்குத் தெரிந்த ரகசியம், காண்டலீஸா ரைஸுக்குத் தெரியாது. அங்கே தலைமைப் பதவியை வகிப்பது எவ்வளவு ரகசியங்களைச் சுமக்கிறார்கள் என்ற அளவைப் பொறுத்தது.

''இப்போதைக்கு டோபா ஆபத்து இல்லை. அதைச் சொல்வதற்காகத்தான் கேட்டேன். டெக்டானிக் பிளேட்டில் ஒரு நானோ அட்ஜஸ்ட்மென்ட் நடந்திருக்கிறது. பசிபிக் பகுதி ரிங்க் ஆஃப் பயரில் வேறு இடத்தில் சிறிய பாதிப்பை ஏற்படுத்தி அடங்கிவிட்டது. ஜப்பான் கடல் பரப்பில் வழக்கமான சுனாமிகளில் ஒன்றாக அது வெளிப்பட்டது. இப்போதைக்கு இன்னும் 3.75 லட்சம் வருடங்களுக்கு டோபா வெடிப்பு இல்லை!'' - சார்லஸ் விளக்கினார்.

''இதற்கு முன்பும் அப்படித்தான் சொல்லியிருந்தீர்கள். ஆனால், திடீர் என்று 10 வருடங்களில் வெடித்துவிடும் என்று பயமுறுத்தினீர்கள்.''

தளபதியின் வாக்கியத்தில் மெல்லியக் குத்தல் இருந்தது. சார்லஸ், அவரை ஆழ்ந்து பார்த்துவிட்டு, ''இயற்கையின் கால்குலேஷன்கள் சிக்கலானவை. மழை, புயலைக்கூட நம்மால் சரியாகக் கணிக்க முடிவது இல்லை. பூமியின் ஆயிரம் கிலோமீட்டர் ஆழங்களில் கொதிக்கும் மேக்மாவைக் கணிப்பது இன்னும் சிரமம். இப்போதைக்கு வெடிக்காது என்பது விஞ்ஞானிகளின் கால்குலேஷன். ஐஸ்லாந்து மலைகளில் பனிக்கட்டிகளுக்கு நடுவே வெந்நீர் ஊற்றுகள் வருகின்றன. உலகம் எங்கும் மக்கள் வந்து சந்தோஷமாக அதில் குளிக்கிறார்கள். பூமிக்குள் கொதிக்கும் மேக்மாவின் விபரீதம்தான் அந்த வெந்நீர் என்று யாராவது அஞ்சுகிறார்களா? எல்லா அச்சத்திலும் ஒரு கேளிக்கை இருக்கிறது; எல்லா ஆபத்திலும் ஒரு சவால் இருக்கிறது. எல்லாமே 'யின் யாங் கான்செப்ட்’ போலத்தான். எல்லாத் தீமையிலும் ஒரு நன்மை இருக்கிறது. ஓ.கே. நீங்கள் கிளம்பலாம்!''

''581 ஜி?'' என்று தயங்கினார் தளபதி.

''அங்கே டிஸாஸ்டர் புரோகிராம் அழிக்கப்பட்டது. அந்த இரண்டு தமிழர்களுக்குத்தான் நன்றி சொல்ல வேண்டும்.''

''நன்றியா... அந்தப் பாசக்காரர்களால் கடைசி நேரத்தில் எவ்வளவு சிக்கல்?''

''ஆரம்பத்தில் நாங்களும் அப்படித்தான் பதறிப்போனோம். ரோஸியின் மூளை இணைப்புகளைக் கோழி அறுப்பதுபோல அறுத்திருந்தால் வெடி விபத்தை மட்டும்தான் தவிர்த்திருக்க முடியும். 581 ஜி, மூச்சுத்திணறிப் போயிருக்கும்.''

''அப்படியா?''

''உதாரணத்துக்கு மத்திய கேந்திரம் அந்த விநாடியே ஸ்தம்பித்திருக்கும். மற்ற கேபின்களின் தொடர்பு அறுந் திருக்கும். வினோதினி, பொறுமையாக ஆணைகளை கோட் கன்வெர்ட் செய்து பார்த்தாள். அது, ஹெக்ஸா டெசிமல் நியூமரிக்கல் கோட். அந்த நேரத்தில் அதை கன்வெர்ட் செய்து பார்த்ததுதான் அவளுடைய புத்திசாலித்தனம். மிராக்கிள். கடைசி விநாடி அவகாசத்தில் அந்த டிஸாஸ்டர் ஆணைகளை அழித்தாள். பார்த்துக்கொண்டிருந்த எங்கள் எல்லோர் உயிர்களும் கண்களுக்கு வந்துவிட்டன.''

ராணுவத் தளபதிக்கு அப்போதுதான் புல்லரித்தது.

சார்லஸ் தொடர்ந்தார்... ''உலக வரலாற்றில் அவளுக்கு ஓர் இடம் உண்டு. அப்புறம் அந்தப் பையன்...''

''அகிலன்?''

''ம்ம்ம்.. அவளுடைய முயற்சிகளுக்கு எல்லை வரை ஆதரவாக இருந்தான். அப்படி ஒரு காதல். காதல்தான் காப்பாற்றியிருக்கிறது.''

''லிபர்ட்டி சிலைக்குப் பக்கத்தில் அவர்களுக்கும் சிலை ஏற்பாடு செய்துவிடலாம்'' - தளபதி நிஜமாகவே சொன்னார்.

சார்லஸ் அங்கீகரித்துச் சிரித்தார்.

48 மணி நேர அவகாசத்தில் 47.30-வது நிமிடம் வரை பொறுமையாகத்தான் இருந்தார் கேப்ரியல். எப்படியும் நம் காலடியில் வந்து விழுவார்கள். அதுவரை எல்லா தலைவர்களும் எப்படி வேண்டு மானாலும் குழம்பிச் சாகட்டும் என்றுதான் 'டெக்ஸ்டர் லெபாரட்ரி’, 'பாப்பாயின்ஸ்’ என்று அனிமேஷன் படங்கள் பார்த்துக்கொண்டிருந்தார். இன்னும் அரை மணி நேரம் இருக்கும்போதுதான் தன் டைமர் கண்டிஷன் எப்படி இருக்கிறது என்ற யோசனையே வந்தது. ஒரு கெடு விதித்தால் இவ்வளவு அலட்சியமாகவா இருப்பார்கள்? கடைசி நிமிடம் வரை பூமியின் தலைவர்கள் தன் காலில் வந்து விழாத ஆத்திரம் அவருக்கு. 581 ஜி-யை அழிக்கலாமா அல்லது டைமரை இன்னும் ஒரு மணி நேரத்துக்கு மாற்றி வைக்கலாமா?

அவர் தன் மேல் கோட்டில் இடதுபுறத்தை விலக்கி, ஒரு பட்டனைத் தொட்டார். அவர் முன் விரிந்தது ஆப்டிக்கல் திரை. சில எண்கள், சில எழுத்துகளை அழுத்திவிட்டுக் காத்திருந்தார்.

'மன்னிக்கவும்... உங்களுக்கு இந்த அனுமதி இல்லை’ என்று பதில் வந்தது. ஒரு நிமிடம் ஆடிப்போனார். தவறான இலக்கத்தை அழுத்திவிட்டோமா என்று நினைத்தார். அடுத்த முயற்சியில் எல்லாம் விளங்கிவிட்டது. யாரோ எல்லா புரோகிராம்களையும் மாற்றியிருந்தனர். அறையின் உள்ளே ஒரே நேரத்தில் பல பேர் வேகமாக நுழைவதை அனுமானிக்க முடிந்தது. மெத்தென்ற காலடிச் சத்தம் கேட்டது. கேப்ரியல் சுதாரித்தார்.

கிராண்ட் ஹயட் ஹோட்டலில் இருந்த கேப்ரியலை இனி கைதுசெய்து உள்ளே தள்ளலாம் என முற்ற முடிவுக்கு அமெரிக்கா வந்தபோது, அவர் கொடுத்திருந்த கெடுவுக்கு சில நிமிடங்கள்தான் பாக்கி இருந்தன. ஆபரேஷன் நாகசாகி போன்ற தீவிரத்துடன் ராணுவ வீரர்கள் ஹோட்டலை முற்றுகை இட்டனர். பிரிகேடியர் தலைமையில் ஒரு பட்டாலியன். கேமரா பொருத்தப் பட்ட வீரர்கள் துப்பாக்கிகளுடன் எட்டுத் திக்கும் இறங்கினர். சதாம் உசேன், பின்லேடன் போன்றவர்களை முற்றுகையிட்ட அனுபவம் அதில் இருந்தது. ஒரு பிரிவினர் ஹோட்டல் கதவுகளைச் சரக்கெனத் திறந்து கதவுக்கு இரண்டு புறமாக நகர்ந்து ரவுண்டு கட்டினர்.

ஒரு பெரிய ஹால்... அதற்கடுத்து இன்னொரு பெரிய ஹால். இரண்டு இடங்களிலும் அவர் இல்லை. கார்ட்டூன் நெட்ஒர்க்கில் 'டாம் அண்ட் ஜெர்ரி’ கார்ட்டூன் ஓடிக்கொண்டிருந்தது. காவலர்கள், அத்துமீறும் வெறியோடு படுக்கை அறைக் கதவைத் திறந்து முன்னேறினர். மூச். படுக்கையில் போர்வை மட்டும் யாரோ எழுந்துபோனதை உணர்த்தியது.

பாத்ரூம்? சிறிய நீச்சல்குளம் இணைக்கப்பட்ட அதை, 'குளியல் அறை’ என்ற வார்த்தையால் சுருக்குவது அவமானம். அது நிசப்தமாகவும் திறந்தும் இருந்தது. அங்கேயும் இல்லை. ஏமாற்றமும் சந்தேகமும் பிணைந்து, கட்டிலுக்கு அடியில் கதவு மறைவில் எல்லாம் தேடிப் பார்த்தனர். கேப்ரியல் எங்குமே இல்லை. மூடிய கதவு, மூடிய ஜன்னல் எல்லாவற்றையும் மீறி அவர் காணாமல்போயிருந்தார்.

பொதுவாக நல்லவர்கள் தாங்கள் வாழ்வதற்கு அதிகபட்சமாக ஒரே ஒரு வழியைத்தான் வைத்திருக்கிறார்கள். கெட்டவர்களுக்கு ஆயிரம் வழிகள். கேப்ரியலுக்கு இப்படி எதுவும் நடக்கும் என்றும் தெரிந்திருந்தது. தன் எல்.டபுள்யூ பட்டனை அழுத்தி, கெப்ளர் 78-ல் இறங்கினார். வாழ உகந்த இடம் என்று நாசா கண்டுபிடித்த இன்னொரு கிரகம்.

'கேடுகெட்ட இந்த மனிதர்களை தமக்கு அடிமை ஆக்குவது அல்லது, அழித்துவிடுவது’ என்ற ஆப்ஷன்கள் அவரிடம் இருந்தன. கெப்ளர் 78-ல் இன்னொரு பூமியைப் படைக்க முடியும் என்று நம்பிக்கை பிறந்தது. 96 சதவிகித பூமியின் அம்சங்கள் அதில் இருந்தன. 'சூப்பர்!’ என மனதுக்குள் சொல்லிக்கொண்டார். 'நமக்கு என்று ஒரு கோடிப் பேர் இருந்தால் போதும்’ என்று கணக்குப் போட்டார். 581-ஜியை உருவாக்கிய அனுபவத்தில் அவருக்கு அதைவிட சீக்கிரமே இந்தக் கிரகத்தைப் பண்படுத்திவிட முடியும் என்று தோன்றியது. எல்லாம் அவர் எதிர்பார்த்தபடிதான் இருந்தன. அவர் எதிர் பார்க்காதது அங்கு இருந்த நைட்ரஜன் அளவு. அவரைப் போலவே அங்கே டெர்பிகளும் வந்து கணக்குப் போட்டுக்கொண்டிருந்தன. தன்னந்தனியாக வெட்டவெளியில் ஒரு மனிதன் நிற்பதை அவை கவனித்தன.  கேப்ரியலை நோக்கி வேகமாக பறந்து வந்து சூழ்ந்து நின்றன. அவர் அவசரமாக எல்.டபுள்யூ பட்டனைத் தேட, அதற்குள் டெர்பி ஒன்று அவர் மீது விசுக்கென்று தன் உடல் கருவி துப்பாக்கியால் சுட்டது.

கேப்ரியல் இருந்த இடத்தில் கொஞ்சூண்டு சாம்பல் மட்டும் இருந்தது!

அகிலனும் வினோதினியும் செய்த அற்புதம். ஆலீஸ், கேத்ரின், அகி, ஹென்ரிச், லூக்சூன், சினுவா எல்லோரும் தனித்தனியாகக் கட்டிப்பிடித்துப் பாராட்டி முடித்தனர். தன் மகளின் நினைவுகளைப் பத்திரமாக மைக்ரோ சிப்பில் மீட்டுத் தந்ததற்காக நன்றிப் பெருக்கில் நீராடிக்கொண்டிருந்தார் டாக்டர் மைக்கேல். உருவம்தான் இல்லையே தவிர, ரோஸி பேசினாள், பாடினாள், பாசம் காட்டினாள்.

பூமி, 581- ஜி இரண்டுக்குமே ஆபத்துகள் நீங்கின. புதிய கோளுக்கு வந்தவர்கள், பூமியில் இருப்பவர்கள் எல்லோருக்கும் விஞ்ஞானக் கழகம் ஒரு வாய்ப்பை ஏற்படுத்தியிருந்தது. யாருக்கு எங்கு வாழ விருப்பம் என்பதற்கான ஒரு இமெயில் சோதனை. இக்கரைக்கு அக்கரை பச்சை மனோபாவத்தில் இங்கும் அங்கும் சில தடுமாற்றங்கள் இருந்தன. ஆனால், இமெயில் கேள்வி பாரத்தைப் பூர்த்திசெய்யும்போது வெகு சிலர் மட்டுமே கிரக மாற்றத்துக்குத் தேர்வு செய்யப்பட்டனர்.

பில்கேட்ஸ், ''எனக்கு ஒன்றும் இல்லை. கொஞ்ச நாள் இங்கே இருந்து நெட்ஒர்க் முன்னேற்றங்களைக் கவனமாக முடித்துவிட்டுப் போகிறேன்'' என்றார். அவருடைய டீமில் இருந்த பலருக்கும் 581-ஜி என்ற அந்தப் பெயரைத் தவிர, அந்தக் கோளில் எல்லாமே பிடித்திருந்தது. ஏஞ்சலீனா ஜோலி, பிராட்பிட் ஆகியோர் இன்னும் சில நடிகர்கள், சினிமா ஆள்கள் வந்த பிறகு புது லொகேஷனில் காளான் மரங்களும் க்ரீனியுமாக அசத்தலான ஒரு சினிமாவை எடுத்துவிட்டுப் போகலாம் என்று முடிவெடுத்தனர்.

அகிலன், வினோதினியுடன் ழீனும் தமிழகம் செல்வதற்கு விரும்பினார்.

''குழந்தை மார்க்கஸ்?'' என்றான் அகிலன்!

- ஆபரேஷன் ஆன் தி வே...

https://www.vikatan.com/

ஆபரேஷன் நோவா - 32

 

 

தமிழ்மகன், ஓவியம்: பாலா

 

மார்க்கஸ்?'' என்றார் கார்ட்டர்.

''கேப்ரியல் செய்த ஆராய்ச்சியில் சுயநலம் என்ற ஒன்றை மட்டும் நீக்கினால், வேறு எதையுமே குறை சொல்ல முடியாது. மார்க்கஸை உருவாக்கி, வளர்த்து, அறிஞனாக்கும் முயற்சியில் அவருடைய ஈடுபாட்டைக் குறை சொல்லவே முடியாது. அவன் இந்தக் கோளுக்காகவே தயாரிக்கப்பட்டவன். அவனை எப்படி பூமிக்கு அனுப்ப முடியும்?'' என்றார்.

அகிலனும் வினோதினியும் எவ்வளவோ மன்றாடிப் பார்த்தும் அவர் மனம் இரங்கவில்லை. இருவரும் மார்க்கஸைப் பார்த்தனர்.

இரண்டு வயது குழந்தையைப் பார்த்து 'தயாரிக்கப்பட்டவன்’ என்பது என்ன சொல் பிரயோகம்? எல்லா விஞ்ஞானிகளுமே ஒருவிதத்தில் அன்பு, மனசு, சிந்தனை எல்லாவற்றையும் ஒரு பொருளாகத்தான் பார்க்கிறார்கள். கிலோ என்ன விலை என்கிறார்கள்.

''இந்தக் குழந்தையை எங்களிடம் கொடுத்துவிடுங்கள். நீங்கள் இன்னொரு குழந்தையைச் செய்துகொள்ளுங்கள்!'' என்றாள்.

''அதற்கு இன்னும் மூன்று வருடங்கள் காத்திருக்க வேண்டுமே? நீங்கள் இன்னொரு குழந்தை செய்துகொள்வதுதான் நல்லது. கிட்டத்தட்ட இனி ரோஸியின் வேலைகளை இவன் செய்ய வேண்டியிருக்கும்'' - கார்ட்டர் பிடிவாதமாகச் சொன்னார்.

கோளை வழி நடத்த, சக்திவாய்ந்த புரோகிராம் இருந்தது. மத்திய கேந்திரத்தின் ரோபோக்கள் இருந்தன. இப்போதைக்கு சார்லஸோடு தொடர்பில் இருந்து கோளைக் கண்காணிக்க, கார்ட்டர் தலைமையில் ஒரு குழு அமைக்கப்பட்டிருந்தது.

''கார்ட்டர், குழந்தை என்பது பாப்கார்ன் பொட்டலம் அல்ல; வேறு வாங்கிக்கொள்வதற்கு'' - வினோதினியின் கண்ணில் நீர் கன்னத்தைக் கடந்து அவள் மார்பில் விழுந்தது.

நானோபாட்டில் ஒரு வைரஸுக்குள் செய்திகளை அடுக்குவது பற்றிய விளையாட்டில் இருந்த மார்க்கஸ், வினோதினியைப் பார்த்தான். அவளின் கண்கள் சிவந்திருந்தன. மூக்கு நுனியும் சிவந்திருந்தது. தன் பொருட்டு இன்னொருவர் கலங்குவது அவனுக்குப் புதுமையாக இருந்தது.

எதற்காக?

அவன் யோசிக்கும்போதே, அதற்குப் பெயர் 'பாசம்’ என்று இன்டர்லிங்க் அகராதியில் விளக்கம் வந்தது. அதற்குத் தொடர்பான வார்த்தைகளாக அன்பு, மனசு, கருணை, உள்ளம், இரக்கம் போன்ற வார்த்தைகள் தோன்றி மறைந்தன. விநாடியில் அத்தனை வார்த்தைகளையும் துழாவிப் பார்த்தான். மார்க்கஸுக்கு இதுவரைக்கும் இதற்கான விளக்கம் தேவைப்பட்டு இருக்கவில்லை.

அகிலன், அத்துமீறி மார்க்கஸைத் தூக்கினான். ஒரு ரோபோ, அகிலனைக் கட்டுப்படுத்தித் தடுத்தது.

''நீங்கள் பூமிக்குக் கிளம்பலாம். மார்க்கஸ் விஷயத்தில் என்னால் உதவ முடியாது. குளோபல் சட்டவிதியும் இடம் தராது'' - கார்ட்டர் கண்டிப்புடன் சொன்னார்.

ஒரே மனதில் இரண்டு உலகங்கள் இருக்கும்போது, இரண்டு உலகங்களில் எத்தனை உலகங்கள் இருக்கக்கூடும்?

உலக அரசுகள் அனைத்தும், நாத்திகம், அறிவியல், புதுமை, எதிர்காலம், முன்னேற்றம், சமத்துவம், கண்டுபிடிப்பு, பழசு எல்லாவற்றையும் தூக்கி எறி என்கிற ரகத்தினர் ஒரு ரகம் - அவர்கள் 581 ஜி-க்கு.

கடவுள், பண்பாடு, இதிகாசம், புராணம், மதம், நம்பிக்கை, விதி, அந்தக் காலத்திலேயே எல்லாம் சொல்லிவிட்டார்கள் என்கிறவர்கள் இன்னொரு ரகம் - அவர்கள் பூமிக்கு.

இரண்டு கோள்களிலும் தாவல் அதிகமாக இருந்தது. பூமியில் ஆபத்து இல்லை என்பது உறுதியானதும், அங்கிருந்து ஒரு கோடியே 67 லட்சம் பேர் விண்ணப்பித்திருந்தனர். தோண்டும் இடம் எல்லாம் தங்கம் என்ற ஆர்வத்தில், இங்கிருந்து இரண்டு கோடி பேர் விண்ணப்பித்திருந்தனர். 'லிங்கா’ படத்துக்குப் பிறகு ரஜினி, 'சர்ஃபரோஷ்-2’ படத்துக்குப் பிறகு அமீர்கான், 'ட்ராகன் பிளேடு’ படத்துக்குப் பிறகு ஜாக்கிசான் என செலிபிரிட்டிகள் பலர் புதிய கோளுக்குப் படை எடுக்கத் தயாராகினர்.

மைக்ரோசாஃப்ட் ஆசாமிகள் 581 ஜி என்ற பெயரை மாற்றி இந்தக் கோளுக்கு 'நோவா’ என்றே பெயரிட்டால் என்ன என்று கோரிக்கை வைத்தனர். பொது ஓட்டெடுப்பில் ஓ.கே. ஆகிவிட்டதை மதுவுடன் கொண்டாடினர்.

'மனிதப் பண்பாடு முற்றிலுமாக ஒழிந்துவிட்டால் திருக்குறள் என்ற ஒரு நூலை வைத்து அதை மீட்டுவிடலாம்’ என்று கால்டுவெல் என்கிற அறிஞர் சொன்னார்.

ழீன் அதைச் சுட்டிக்காட்டினாள்.

திருக்குறளுக்கு வயது 2,000. தமிழின் வயதும் 2,000. எப்படி ஒரு மொழி பிறந்ததும், உடனே ஒருவர் எழுத்தாணி கொண்டு ஓலையில் மக்களுக்கான இலக்கணத்தை எழுத ஆரம்பித்துவிட்டாரா? தமிழின் வயதைக் கணக்கிடுவதில் வெளிப்படையாகத் தெரியும் மோசடி.

''உலகத்திலேயே ஒரே ஒரு மொழிக்குத்தான் செம்மொழி அந்தஸ்து கொடுக்கப்பட வேண்டுமென்றால், அது தமிழுக்குத்தான் கொடுக்கப்பட வேண்டும். ஆனால், இந்தியாவில் பத்தோடு பதினொன்றாகத்தான் அந்த அந்தஸ்தைக் கொடுத்தனர். 5,000 ஆண்டு, 8,000 ஆண்டு தமிழ்த் தடயங்கள் கிடைத்தால், அதை உடனடியாக மியூசியத்தில் காட்சிப் பொருளாக்கிப் புதைக்கிறார்கள். ஆராய்வது இல்லை. இது சதியா, சாதித்துக் குவித்த அசதியா?'' - ழீன் சொல்வதை யோசிக்க வேண்டியிருந்தது.

சொல்லப்போனால் இன்னொரு கோளைக் கண்டுபிடித்து அங்கு சென்று வாழ்வதைவிடவும் தமிழின் வேரைத் தேடிக் கண்டுபிடிப்பது முக்கியமானதாக இருந்தது.

''திருக்குறள் ஒன்று சொல்லவா?

'கூத்தாட்டு அவைக்குழாத்து அற்றே பெருஞ்           செல்வம்

போக்கும் அதுவிளிந் தற்று’

நாடகம் பார்ப்பதற்கு வருபவர்கள் ஒன்று இரண்டாகத்தான் வந்து சேருவார்கள். நாடகம் விட்டுப் போகும்போது கூட்டமாகப் போய்விடுவார்கள்... செல்வமும் அப்படித்தான்!

இந்த உலகில் எந்த மொழியிலும் இப்படி உவமை சொன்னது இல்லை'' என்று தீர்மானமாகச் சொன்னாள்.

2045 வருஷத்துக்கு முன் ஒருவர் தமிழில் இப்படி எழுதிவைத்திருக்கிறார். அதற்கு முன் நிறைய எழுதப்பட்டு இருக்க வேண்டும்.

அந்தத் தமிழின் முதல் நூல்கள் கடல்கொண்ட தென்னாட்டில் இருக்கின்றன. தென்னிந்தியக் கடலைச் சுற்றி உள்ள 100 கிலோமீட்டர் கடலை ஆராய்ந்தால் போதும், உலகத்தின் வரலாறே மாறிவிடும். என்னுடைய முதல் பயணம் தமிழகத்தின் தென்முனை'' - ழீன் தெளிவாக இருந்தாள்.

வினோதினிக்கும் அகிலனுக்கும் ஓர் இலக்கோடு வாழ்வதில் இருக்கும் மகிழ்ச்சி புரிந்தது. ழீனின் ஆராய்ச்சிக்கு உதவுவதேகூட நல்ல நோக்கம்தான்.

முதல் குழுவினர் பூமிக்குப் புறப்பட்டனர். எல்.டபிள்யூ சேம்பரில் ஆயிரம் பேர் வரிசையாகப் படுக்கவைக்கப்பட்டிருந்தனர். வேர்க்கடலைக்குப் போர்த்தப்பட்டிருக்கும் மூடி போன்ற அந்தச் சாதனம் அவர்கள் முதன்முதலாக இங்கே வந்து இறங்கியபோது பார்த்தது. பலருக்கு தீபாவளிக்கு சொந்த ஊருக்குப் போகிற மகிழ்ச்சி.

இன்னும் சில விநாடிகளில் நோவாவை விட்டுப் பிரியப்போகிறோம் என்ற வருத்தம் ஒரு பக்கம். மனிதனுக்குத்தான் இப்படி எல்லாம் ஒரே நேரத்தில் இரண்டுவிதமான மனப்போராட்டம் சாத்தியம். மனிதம் என்பதே இரண்டு நிலைதான். டைலமா. நிறைவின் முடிவில் ஒரு புள்ளி ஏக்கம்... மூடநம்பிக்கையின் முடிவில் கொஞ்சம் நாத்திகம். பாசத்துக்கு நடுவே ரகசியத் துளியாக துரோகம்.

எல்லாமே பொதுவாக மனிதனிடம் இருந்தது. இந்த முரண்பாடுதான் உலகை இயக்குகிறது.

எல்லோரும் ஒருவழியாக பூமிக்குத் தயாரானபோது, ரோபோ ஒன்று கடைசி நிமிடத்தில் மார்க்கஸைக் கொண்டுவந்து வினோதினியிடம் ஒப்படைத்தது. வினோதினி அவனை வாரி அணைத்துக்கொண்டாள்.

ரோபோவின் அணைப்புக்கும் வினோதினியின் அணைப்புக்கும் வித்தியாசம் இருப்பதை மார்க்கஸ் உணர்ந்தான். இத்தனைக்கும் தன் 23 குரோமசோம்களுக்கு சொந்தக்காரி கேத்ரின். அகிலனுக்கு பாதி உரிமை இருந்தது. அகிலனின் காதலியான வினோதினி உரிமை கொண்டாடுவது ஆச்சர்யமாக இருந்தது. மார்க்கஸ் வசதியாக வினோதினியின் மடியில் சாய்ந்துகொண்டு, ''அம்மா'' என்றான்.

எல்.டபிள்யூ சேம்பர், க்ய்க் என்ற சத்தத்துடன் அந்த இடத்தில் இருந்து மறைந்தது.

ஆதிச்சநல்லூர், குமரிமுனை, பூம்புகார் என்று ழீனுக்கு சுற்றிப் பார்க்கவேண்டிய வேலை நிறைய இருந்தது. ழீன் எக்மோரில் நெல்லை எக்ஸ்பிரஸில் புறப்படக் காத்திருந்தாள். வழி அனுப்புவதற்காக அகிலன் குடும்பத்தினரோடு ரயில் நிலையம் வந்திருந்தான்.

தரவுகள் திரட்டிக்கொண்டு, சர்வதேச அறிவியல் கழகத்தின் துணையோடு கடலுக்குள் களம் இறங்குவதாக ழீன் திட்டமிட்டிருந்தாள். பல ஆயிரம் ஆண்டுகளாகவே ஏதோ ஒரு புள்ளியில் தமிழுக்குத் துரோகம் நடந்திருப்பதை அவள் ஊகித்தாள். இதை ஆராயப்போனால் அவளையும் அந்தத் துரோகம் துரத்துமா என்பது தெரியவில்லை.

கால்டுவெல், எல்லீஸ், ட்ரூமன்... இப்போது இருக்கும் ஜார்ஜ் ஹார்ட் என்று வெளிநாட்டவர் தமிழுக்கு ஆற்றிய தொண்டோடு தம் பங்காகக் களத்தில் நின்றாள் ழீன். ரயில் புறப்பட்டது.

அகிலனும் வினோதினியும் வீடு திரும்பினர்.

''திடீர் என்று எங்களுடன் வந்துவிட்டாயே... நான் எதிர்பார்க்கவே இல்லை. கார்ட்டர் எப்படி சம்மதித்தார்?'' - மார்க்கஸைக் கேட்டாள்.

''அவர் சம்மதிக்கவில்லை.''

''ம்?'' என்றாள்.

''ரிப்ளிகா ஸ்டாம்பிங் என்று ஒரு குளோனிங் புரோகிராம் உருவாக்கினேன். அதை வைத்து இன்னொரு மார்க்கஸ் செய்து அங்கே வைத்துவிட்டு வந்துவிட்டேன்.''

திகைத்துப்போய் அவனைப் பார்த்தாள்.

''அறிவியலுக்கு அவன்... அன்புக்கு நான்!''

சென்னை எவ்வளவோ மாறிப்போய் இருந்தது. பசுமையாக இருந்தது. 'அரசியல்வாதிகளுக்கு வைக்கும் வினைல் போர்டு தொகையை, தெரு நாய்களைப் பராமரிக்கும் நலச் சங்கங்களுக்குச் செலவிடுமாறு’ அரசியல்வாதிகளே சொல்லியிருப்பதாக அகிலனின் அப்பா சொன்னார். மேலும், ''யாரும் யார் காலிலும் ஆதாயத்துக்காக விழுவது இல்லை'' என்றார். அப்படியானால் அது மகத்தான மாற்றம்தான்.

அகிலன் சொன்ன அனுபவங்கள் எல்லாம், அவனுடைய பெற்றோருக்கு 40 சதவிகிதம்தான் புரிந்தது. அதற்கே அகிலனும் வினோதினியும் பல முறை விளக்க வேண்டியிருந்தது.

உலகமே நோவா பற்றி பரபரத்துக்கிடந்தது.

அகிலனிடம் நோவா அனுபவத்தை எழுதும்படி கேட்டிருந்தது ஆனந்தவிகடன். அகிலன் என்ற பெயரில் தமிழில் வேறு ஒரு எழுத்தாளர் இருந்ததால், வேறு பெயரில் எழுதினால் நன்றாக இருக்கும் என்று பேசியிருந்தனர்.

ழீன் தந்த தமிழ் ஆர்வம் அவனை உற்சாகப்படுத்தியது. 'தமிழ்மகன்’ என்ற பெயரில் எழுதலாமா என்று யோசித்தான்!

- ஆபரேஷன் சக்சஸ்

https://www.vikatan.com