கிழக்குக் கரைக்கு அப்பால் எண்ணெய் வள ஆய்வு ஆரம்பம்- அமெரிக்க நிறுவனத்திடம் கையளித்தது மைத்திரி-ரணில் அரசு?

கிழக்கின் கடலில் எண்ணெய் வள ஆய்வு மட்டுமல்ல, இராணுவ ரீதியான கடற்படை உறவையும் அமெரிக்கா பலப்படுத்தியிருக்கிறதென்பதையும் இலங்கையின் பெற்றோலிய வள அபிவிருத்தி அமைச்சின் உயர் அதிகாரி ஒருவர் கூறியுள்ளார்.

Schlumberger என்ற பாரிய எண்ணெய் வயல் சேவை இந்த நிறுவனம், தரவுகளைத் திரட்டி, அவற்றைபப் பல்வேறு நிறுவனங்களுக்கு விற்பனை செய்யவுள்ளது. அதற்காக இரு பரிமான மற்றும் முப்பரிமான தரவுகளை அது திரட்டவுள்ளது.

இந்த ஆய்வுக்கு Eastern Echo DMCC நிறுவனம் ஐம்பது மில்லியன் டொலரை முதலிடுமெனவும், பல்வேறு முதலீட்டாளர்களுக்கு தரவுகளை விற்பனை செய்து அந்தப் பணத்தை மீளப் பெறுமெனவும் அறிவிக்கப்பட்டுள்ளது.

இந்த விற்பனை நடவடிக்கைகள் இலங்கை அரசுடன் கடந்த மே மாதம் 30 ஆம் திகதி செய்து கொள்ளப்பட்ட ஒப்பந்தத்தின் அடிப்படையிலேயே மேற்கொள்ளப்படும் எனவும் அந்த நிறுவனம் கூறியுள்ளது.

அமெரிக்க நிறுவனத்தின் துணை நிறுவனமான Eastern Echo DMCC என்ற நிறுவனம் மத்தியகிழக்கில் டுபாயில் பதிவுசெய்யப்பட்டுள்ள நிறுவனமாகும்.

இன்று சனிக்கிழமை BGP Pioneer என்ற ஆய்வுக் கப்பல் கொழும்புத் துறை முகத்திற்கு வரும் என்ற இந்த செய்தியை lankabusinessonline.com என்ற செய்தி இணையத்தளம் நேற்று வெள்ளி்க்கிழமை வெளியிட்டிருந்தது.

அதேவேளை, முல்லைத்தீவில் இருந்து கிழக்கு வரையான ஈழத் தமிழர்களின் கடற் பகுதியை அமெரிக்காவுக்கு தாரை வார்க்கின்றதா இலங்கை ஒற்றையாட்சி அரசு என்ற தலைப்பில் கடந்த மே மாதம் கூர்மைச் செய்தித் தளம் செய்தி வெளியிட்டிருந்தது.

இதேவேளை, அமெரிக்கக் கடற்படையின் விசேட படைப்பிரிவு அதிகாரிகள் குழு ஒன்று இலங்கைக் கடற்படைக்கு கடந்த மாதம் திருகோணமலைத் துறைகத்தில் உள்ள இலங்கைக் கடற்படையின் பிரதான முகாமில் பயிற்சியளித்திருந்தது.

அதனையடுத்து அமெரிக்காவின் USS Anchorage கப்பல் ஒன்று திருகோணமலைத் துறைமுகத்திற்கு கடந்த வெள்ளிக்கிழமை வருகை தந்துள்ளது. சுமாா் தொள்ளாயிரம் அமெரிக்கக் கடற்படை அதிகாரிகளும் கப்பலில் வந்திருந்தனர்.

ஜப்பான் பாதுகாப்பு அமைச்சர் இட்சுனோரி ஒனோடெரா (Itsunori Onodera) கடந்த மூன்று வாரங்களுக்கு முன்னர் இலங்கைக்கு வருகை தந்து, அம்பாந்தோட்டை மற்றும் திருகோணமலைத் துறைமுகத்திற்குச் சென்று பார்வையிட்டிருந்தார்.

ஜப்பான் உதவியின் கீழ் பதினொரு மில்லியன் டொலருக்கும் அதிகமான பெறுமதியுடைய இரண்டு ரோந்து சேவை கப்பல்கள் இலங்கை கடல் பாதுகாப்பு திணைக்களத்திடம் ஜப்பான் அமைச்சர் கஸுயுகி நகானே, (Kazuyuki Nakane) சென்ற புதன்கிழமை கையளித்திருந்தார்.

ஈழத் தமிழர்களின் கடற் பிரதேசங்கள் மற்றும் நிலங்களை இந்தியச் சாா்பு நிலை நாடுகளான அமெரிக்கா. ஜப்பான், ஆகிய நாடுகளிடம் மைத்திரி- ரணில் அரசாங்கம் கையளித்து வருவதாக அவதானிகள் தெரிவிக்கின்றனர்.

தமிழர் தாயகம் என்ற கோட்பாட்டை உடைக்கும் நோக்கிலும் தமிழ்த்தேசிய அரசியலை பலவீனப்படுத்தும் வகையிலும் துாரநோக்குச் சிந்தனையுடன் இலங்கை அரசு என்ற கட்டமைப்பு செயற்படுவதாகவும் அவதானிகள் கூறுகின்றனர்.

ஈழத் தமிழர் விடயத்தில் இலங்கை முப்படையினரை உள்ளடக்கிய, இலங்கை அரசு என்ற கட்டமைப்பின் இந்தப் பொறிமுறையைப் புரிந்து கொண்டு, மாற்று அரசியல் செயன்முறைகளை வகுக்கக் கூடியதாக தமிழ்த்தேசியக் கூட்டமைப்பு உள்ளிட்ட தமிழ் அரசியல் கட்சிகளின் நடவடிக்கைகள் அமையவில்லை என அவதானிகள் சுட்டிக்காட்டியுள்ளனர்.

https://www.koormai.com/pathivu.html?vakai=1&therivu=266