கனவுக்'கண்’ணி மாதவியை மறக்கமுடியுமா?

நடிகை மாதவி

கண்களால் பேசுவது என்பது ஒருவகை. பேசும் கண்களைக் கொண்டிருப்பது வரம். அப்படி கண்களை வரமாக வாங்கி வந்த நடிகைகள் பலர் உண்டு. அவர்களில் மாதவிக்கு தனியிடம் உண்டு.

சிலர் தில்லுமுல்லு மாதவி என்பார்கள். இன்னும் சிலர் டிக் டிக் டிக் மாதவி என்பார்கள். ஆனால் பலரும் ராஜ’பார்வை’ மாதவி என்று சொல்லுவார்கள். ஹைதராபாத்தில் பிறந்தார். அவரின் பெயர் அல்லதுர்கம் மாதவி. எண்பதுகளின்  தொடக்கத்தில் தமிழுக்கு வந்தார். தனியிடம் பிடித்து நின்றார்.

வந்தது முதலே, மிகப்பெரிய உயரமும் தொடாமல், கீழேயும் செல்லாமல் எந்த ஆர்ப்பாட்டமும் இல்லாமல் அமைதியாய் ஒரு ரசிகப்பட்டாளத்தை வளைத்துப் போட்டிருந்தார் மாதவி.

மாதவியின் ஸ்பெஷல் என்ன தெரியுமா? கமல் ஸ்ரீதேவி படங்களும் ஓடின. ரஜினி ஸ்ரீதேவி படங்களும் ஓடின. அதேபோல், கமல் ஸ்ரீப்ரியா, ரஜினி ஸ்ரீப்ரியா படங்களும் சிறப்பாக அமைந்தன. இன்னும் அடுத்தகட்டத்தில், கமல் அம்பிகா, ரஜினி அம்பிகா, கமல் ராதா, ரஜினி ராதா என்று இரண்டு ஹீரோக்களுக்கும் பொருத்த ஜோடிகளாக உலா வந்தது போலவே மாதவியும் ஒரு ரவுண்டு வந்தார்.

ரஜினியுடன் தில்லுமுல்லு பண்ணியிருப்பார். அட... பிரமாதமான ஜோடிப்பா என்று சொல்லிக்கொண்டிருக்கும் போதே, ‘அந்திமழை பொழிகிறது’ என்று கமலுடன் குடை பிடித்துக்கொண்டு மழையில் நனையாமலேயே நம்மை நனைத்தெடுப்பார். ‘இந்த ஜோடிதாம்பா செம ஜோடி’ என்பார்கள் ரசிகர்கள்.

திமிர் பிடித்த பெண்ணாக தம்பிக்கு எந்த ஊரு படத்தில் ரஜினியுடன் போட்டி போட்டு நடித்திருப்பார். அதே திமிரும் பழி வாங்கும் ரெளத்திரமும் கொண்டு காக்கிசட்டையில் கமலுடன் அதகளம் பண்ணியிருப்பார். அந்தப் படத்தின்  பூப்போட்ட தாவணி பாடலை மாதவிக்காகவே பலமுறை வந்து பார்த்தார்கள் ரசிகர்கள்.

பாலுமகேந்திராவின் இயக்கத்தில் ரஜினியுடன் உன் கண்ணில் நீர் வழிந்தால் படத்தில் மென்மையான கதாபாத்திரத்தில் நடித்திருப்பார். பாரதிராஜாவின் டிக்டிக்டிக் படத்தில் கமலுடன் மோதிக்கொண்டும் உரசிக்கொண்டும் காதல் வழிய துடுக்காகவும் வெடுக்காகவும் நடித்து அசத்தியிருப்பார். அவரின் உடல்வாகும் கண் பேசும் பாஷையும் நீச்சல் குளக் காட்சிகளும் சாலையில் நடந்து வரும் அழகும் என... டிக்டிக்டிக் படத்தில் ராதா, ஸ்வப்னா இருந்தாலும் தனி ஸ்கோரில் புகுந்து புறப்பட்டு பாஸ் பண்ணியிருப்பார் மாதவி.

தெலுங்கிலும் தொடர்ந்து படங்கள் நடித்தார். குறிப்பாக நடிகர் சிரஞ்சீவியுடன் பத்துப்படங்களுக்கு மேல் நடித்து, கலக்கினார். பிற்பாடு, ஒளிப்பதிவு மேதை கர்ணன் கேமிராவையும் மாதவியையும் வைத்துக்கொண்டு, ஹிட் படங்களைக் கொடுத்ததெல்லாம் தனிக்கதை. தமிழ், தெலுங்கு, ஹிந்தி, மலையாளம், கன்னடம் என்று மிகப்பெரிய ரவுண்டு வந்ததை வியந்து பார்த்தது சினிமா உலகம்.

கமலுடன் மங்கம்மா சபதம், சட்டம், எல்லாம் இன்ப மயம்  என படங்களிலும் ரஜினியுடன் விடுதலை படத்திலும் நடித்த மாதவி, தொந்நூறுகளில் நடிப்பதைக் குறைத்துக்கொண்டார். திருமணம், இல்லறம், வெளிநாடு, குழந்தைகள், வாழ்க்கை என செட்டிலானார்.

ஆனால் என்ன... மாதவிக்கான இடத்தை நிரப்ப அதன் பின்னர் எவரும் வரவில்லை. இதுவும் மாதவியின் ஸ்பெஷல்தான்.

ராஜபார்வை மாதவிக்கு, இன்று (14.9.18) பிறந்தநாள். எண்பதுகளின் கனவுக்’கண்’ணி மாதவியை, வாழ்த்துவோம்!