திஸரவின் அதிரடிப் போராட்டம் வீணானது ; இங்கிலாந்து 30 ஓட்டத்தால் வெற்றி

இலங்கை அணிக்கு எதிரான ஒரேயொரு போட்டி கொண்ட இருபதுக்கு 20 தொடரினை இங்கிலாந்து அணி 30 ஓட்டங்களினால் இலங்கையை வீழ்த்தி வெற்றி கொண்டு, கைப்பற்றியுள்ளது.

கொழும்பு ஆர்.பிரேமதாஸ சர்வதேச கிரிக்கெட் மைதானத்தில் ஆரம்பமான இப் போட்டியில் நாணய சுழற்சியில் வெற்றி பெற்ற இலங்கை அணி முதலில் துடுப்பெடுத்தாடுமாறு இங்கிலாந்து அணியை பணித்தது.

அதற்கிணங்க முதலில் துடுப்பெடுத்தாடிய இலங்கிலாந்து அணியும் நிர்ணயிக்கப்பட்ட 20 ஓவர்களின் முடிவில் 8 விக்கெட்டுக்களை இழந்து 187 ஓட்டங்களை பெற்றது. 

இதனையடுத்து 188 என்ற வெற்றியிலக்கை நோக்கி துடுப்பெடுத்தாட ஆரம்பித்த இலங்கை அணி இங்கிலாந்து அணியின் பந்து வீச்சுக்களை சமாளிக்க முடியாமல் அடுத்தடு விக்கெட்டுக்களை பறிகொடுத்தது.

குசல் மெண்டீஸ் ஒரு ஓட்டத்துடனும், திக்வெல்ல 3 ஓட்டத்துடனும், தினேஷ் சந்திமல் 26 ஓட்டத்துடனும், கமிந்து மெண்டீஸ் 24 ஓட்டத்துடனும், தனஞ்சய டிசில்வா 17 ஓட்டத்துடனும் அடுத்தடுத்து ஆட்டமிழந்து வெளியேறினர். இதனால் இலங்கை அணி 10.3 ஓவர்களுக்கு 5 விக்கெட்டுக்களை இழந்து 77 ஓட்டங்களை பெற்றது.

தொடர்ந்து ஐந்தாவது விக்கெட்டுக்காக ஜோடி சேர்ந்தாடிய திஸர பெரேராவும் தசூன் சானக்கவும் ஓரளவு தாக்குப் பிடித்தாட 14.2 ஆவது ஓவரில் இலங்கை அணி 100 ஒட்டங்களை கடந்தது. அந்த ஓவரில் திஸர பெரேரா அடுத்தடுத்து 2 ஆறு ஒட்டங்களை விளாசித் தள்ளினார்.

எனினும் அதே ஓவரில் 5 ஆவது பந்தில் தசூன் சானக்க 10 ஓட்டத்துடன் பிளன்கட்டினுடைய பந்தில் போல்ட் முறையில் ஆட்டமிழந்து வெளியேறினார். இவரின் ஆட்டமிழப்பையடுத்தடுத்து களமிறங்கிய இசுறு உதனா 2 ஓட்டத்துடனும், அமில அப்பன்ஷோ ஓட்டம் எதையும் பெறாது ஆட்டமிழந்து வெளியேறினர்.

அதனைத் தொடர்ந்து லசித் மலிங்க களமிறங்கி திஸர பெரேராவுடன் ஜோடி சேர்ந்தாடி வர இலங்கை அணி 17 ஓவர்களின் நிறைவில் 8 விக்கெட்டுக்களை இழந்து 125 ஓட்டங்களை பெற்றது.

இதனால் இலங்கை அணிக்கு வெற்றிக்கு 18 பந்துகளுக்கு 63 ஓட்டங்கள் என்ற நிலையிருந்தது. தொடர்ந்தும் இன்னிங்ஸில் அதிரடி காட்டி வந்த இலங்கை அணியின் தலைவர் திஸர பெரோ 19 ஆவது ஓவரின் நிறைவில் 28 பந்துகளை எதிர்கொண்டு 5 ஆறு ஓட்டங்கள் 1 நான்கு ஓட்டம் அடங்களாக அரை அதிரடியாக அரை சதம் கடந்தார்.

எனினும் அவர் 19.4 ஆவது ஓவரில்  31 பந்துகளை எதிர்கொண்டு 6 ஆறு ஓட்டங்கள் 1 நான்கு ஓட்டம் அடங்களாக 57 ஓட்டத்துடன் ஆட்டமிழந்து வெளியேற இலங்கை அணி இறுதியாக 20 ஓவர்களின் முடிவில் இலங்கை அணி சகல விக்கெட்டுக்களையும் இழந்து 157 ஓட்டத்தை மாத்திரம் பெற்று, 30 ஓட்டத்தினால் தோல்வியை தழுவியது.

பந்து வீச்சில் ஜேய் டென்லி 4 விக்கெட்டுக்களையும், அடில் ரஷித் 3 விக்கெட்டுக்களையும், பிளன்கட் ஒரு விக்கெட்டினையும் வீழ்த்தனர்.

http://www.virakesari.lk/article/43366